Monday, March 15, 2010

عم حسين بواب عمارتنا

عم حسين بواب عمارتنا ،و المسئول الاول عن الظبط و الربط فيها، و مافيش اي بياع ارزقي يقدر يهوب ناحية بير السلم، من غير ما يديله عم حسين الجرين كارد و ينصص معاه نص الربح اللي حيكسبه من السكان

عم حسين بواب اوريجينال من بتوع اليومين دول من اللي بيلبسوا ترنج مش جلابية و لاسة زي زمان و تلاقيه نزيه في نفسه قوي ،يعني كل يوم لازم يحلق و يلمع و يسنفر وشه ، و لازم و حتما و لابد يصبغ الشعرتين بصبغة سودا بلاك اسواني من الاصلي ،و لا ممكن ابدا يظهر لعوام السكان بدون ما يتكلين (يحط كولونيا يعني )لأ و الاكادة انه كمان لابس نظارة و عامل فيها مثقف و بيقرا جرايد - هي اللي حتجيبله الكافية.
عم حسين الفترة اللي فاتت ماكنش ولابد، و صحته في النازل، اصل باين ان سكان العمارة فقعوله مرارته ،و وقفوا المية في زوره ،اكمنهم بيفكروا يجيبوا بواب غيره ،و فضل رايح جاي على الدكاترة لما نعل جزمته اتخرم

فكر عم حسين انه يشيل ام المرارة الي تعباه و قرفانا ،و قرا في الجرنال ان اعضاء لامؤاخذة الشعب بيتعالجوا على نفقة الدولة بالشئ الفلاني، فقال في عقل باله و اشمعنى انت يا واد يا حسين و لا هيا ماتهنش الا على الفقير

و استلم السكان واحد واحد يسألهم عن واسطة علشان يسافر يتعالج برة و هدد انه حيعمل اعتصام لو ما وصل لمطلبه، اه ماهي الاعتصامات بقت زي الفول و الطعمية كده( فولكلور شعبي)

عم حسين: عايز واسطة اتعالج على نفقة الدولة يا عبد الستار بيه
الاستاذ عبد الستار: روح ربي عيالك و كل عيش يا عم حسين

عم حسين:عايز واسطة اتعالج على نفقة الدولة يا استاذ سامح
الاستاذ سامح: هو السولار غلي من شوية؟ ماهو علشان الغلابة هجمو عليه لجل ما يولعوا في نفسهم

عم حسين:عايز واسطة اتعالج على نفقة الدولة يا استاذ جودت
الاستاذ جودت:لو كنت اشتغلت لعيب كورة او مغنواتي او رقاصة كان ممكن يا عم حسين

عم حسين:عايز واسطة اتعالج على نفقة الدولة يا ست عايدة
الست عايدة:تتعالج مفهومة و نفقة معروفة انما يعني اية الدولة دي يا عم حسين؟ اوعى تكون كلمة ابيحة؟؟

عم حسين:عايز واسطة اتعالج على نفقة الدولة يا مدام سعاد
مدام سعاد: و تتعالج ليه يا عم حسين ما انت حترجع تعيا تاني قول يا باسط

و هكذا فضل عم حسين يدور على واسطة، لجل ما يسافر بلاد برة يتعالج و لا حياة لمن تنادي

عم حسين:عايز واسطة اتعالج على نفقة الدولة يا مدام كلبوزة لكن سمباتيك
أنا: ليه لازم تتعالج برة؟ لما ممكن تتعالج جوة؟
عم حسين :لان السيسترات هنا مش ولابد، انما السيسترات في بلاد برة يحلوا من على حبل المشنقة ،و الواحد و هو عيان بيبقى محتاج ايد حونينة

اما عم حسين ده ليه نظريات غريبة
===

و بالمناسبة نتمنى للريس بتاعنا الشفاء العاجل و العودة الى ارض الوطن سالما ،و ما تنسناش في الهدايا الألماني يا ريس
و كل مرارة و انت طيب
كتبته لكم
كلبوزة لكن سمباتيك
و السجن للجدعان
و انا جدع



12 comments:

Mafrousa said...

ههههههههههه
طيب الحمد لله انا لسة جايبة حلاوة
حلفها بقا و معاها كام رغيف
هههههههههههههههههه
بس قوليلي يا سمبتيك
تحبي السجاير ايه؟؟
ههههههههههههه
بلامونت و كولوباترا؟؟؟؟
ده لوزوم السجن يعنى
هههههههههههههه

عابر سبيل said...
This comment has been removed by the author.
كلبوزة لكن سمباتيك said...

عادة لا ارد على التعليقات لاني ارى انها راي شخصي لكاتبها لا يجب التدخل فيه
لكن عندما ارى ان التوضيح واجب فلابد ان اعقب
الحنة الاسواني من اشهر انواع الحنة السوداء و اجودها و اتذكر ايام الجامعة كان يقام معارض للمنتجات الاسواني و كنا نتكالب على شراء الحنة الاسواني لنهادي امهاتنا و جداتنا بها
و يستخدمها معظم مصنعي الصبغات لجودتها الفائقة في صباغة الشيب باللون الاسود


و لكن البعض يبحث في الثوب الابيض عن نقطة الغبار و لا يرى في الورد غير الشوك و اذا شعر البعض بالنقص فانهم على بطحاتهم يحسسون


صدق الله تعالى اذ قال:
إن بعض الظن إثم

عابر سبيل said...

" ان بعض الظن أثم "
صدق الله العظيم

اعتذار واجب فانا اخطأت في حقك فارجو منك قبول الاعتذار

وسبب هذا كله اني قرأت المدونة وانا في نرفزة وغضب ولم افسر هذه الكلمة بتفسيرها الصحيح واخذتها بمحمل سئ فتقبلي اعتذاري

يا مراكبي said...

:-)

وايه علاقة عم حسين البواب بالرئيس مبارك؟

ده اسقاط يعني والا خالتي "رمزية" عدت من هنا والا ايه؟

;-)

السينيور said...

لو كانت المرارة هى المشكلة كانت تبقي بسيطة
ولو كانت فيه دولة بتعالج على نفقتها تبقي ابسط
ولكن المشكلة ان احيانا المسميات مش زي الافعال ابدا
تحياتى لعم حسين بواب عمارتكم
وليكي يا سمبتيك

Haytham Alsayes said...

حلوة يكلبوزة بس سمباتيك
والله عم حسين دة له الجنة مستحملكم 28 سنة بالتمام والكمال
ومش عاوزين مرارته تتفقع
دة يبقي حرااام

ولازم يتظبط من السيسترات عشان يرجع حلو ويعرف يكمل المسيرة قصدى مسيرة اخد باله من العمارة امال ايه


تحياتي ياكلبوظة
وارجو التواصل

بيتنا القديم said...

قالوا قديماً: الشعب وأمواله في خدمة السيد الرئيس..!
وعلى رأي المثل القائل: ان جالك الرئيس حط عم حسين تحت رجليك..(أو متحلسهوش كله)..!
(:
تك كير الايام دي..!

محمد said...

ينفع كدا ؟؟!!

حضرتك ظلمت عم حسين, لأنه بعد عودته قرر احتساب نفقة علاجه على حسابه الشخصي..

وهنا يثور سؤال آخر: من أين له بنفقة علاج في أكبر المستشفيات في الخارج, وإقامته وأبناءه, وأصهاره, ومساعديه, و.... إلخ ؟؟!!

بالتأكيد ورث أمواله كابر عن كابر, وباع "حتة" الأرض التي تركها لوقت العوزة !!

دنيا....او حياة said...

انا اول مرة ادخل المدونة والموضع هايل
:D
بس معلش اعزريني انا قريت تعليق لحضرتك بتقولي فيه انك مبتحبيش تعلقي على تعليق الناس ..هي دي حاجة ممكن تضايق حد اصلا؟؟؟ ...ياريت توضحيلي رأيك برضة يمكن افهم ؟؟
وانا سأتابع المدونة

Dr. Ibrahim said...

اسقاط حلو
ومجلكوش فى سجن

قلم جاف said...

لما أي حد يعوز علاج على نفقة الدولة يروح على أقرب نائب ويحضره كام باكو لزوم الشيء ، يوطي البيه على إيد السيد الوزير يبوسها وياخد التأشيرة من هنا تديله الفلوس حيقولك أستغفر الله ، وأنا مش حاخد إلا خمستاشر باكو مصاريف الشحن ، ولا الشحت وأهو نقطة تدعم المعنى وتقويه ولا أحلى "فوتامين"..

وأدينا بعد الثورة حنلاقي من شكل سيادة النائب كتير ، فلا حد قال ع البعيد فلول ، ولا شيخ طلع فتوى قال فيها التصويت للمرتشين وتجار التأشيرات حرام..

وسمعني سلام : قولوا للي أكل الحلال يخاف ، لابن الحرام ييجي يلهفه..