Tuesday, November 27, 2007

معانا الحل الطازة



بقى عادي جدا انك تركب اي تاكسي في القاهرة و تلاقي السواق خريج هندسة او خريج طب ما هو ليه حق أصل لو اشتغل بمؤهله حيجيب نصف اللي بيكسبه في اليوم و هو سواق تاكسي

يبقى ليه حق ابني لما يقولي يا ماما انا عايز اطلع لعيب كورة و مرتبي يبقى بالدولار و ابقى مشهور ما هو شايف ابوه اللي حاصل على الدكتوراه متغرب في بلاد الله مش لاقي شغلانة كويسة في بلده تحميه من الغربة و بلاويها

هي اية المشكلة؟ عدد شباب الخريجين كبير و الوظايف قليلة؟و لا الوظايف السقع بياخدها ولاد الك... الكبار يعني بس اصلي بتهته؟
و لاالمصانع و الشركات بتفتح في اماكن بعيدة زي حلايب و شلاتين و الخريجين الوحشين بيرفضوا يسيبوا القاهرة الكبرى و يروحوا يشتغلوا بعيد عن النوادي و صالات الهلس ؟ و لا اية بالظبط
انا لو عينوني وزيرة القوى العاملة يا نهار ابيض... ده انا اعمل عمايل.... ابهدل الدنيا.. اقصد يعني اظبطها
اولا : اعمل اعادة تقييم للموظفين الحاليين في كل هيئة و مصلحة حكومية و انحي كل موظف كسول ملوش لازمة و اديلة معاش مبكر يطلع يفتح مشروع بلاي استيشن و لا كشك كروت شحن و يسترزق و اهي كلها سبوبة و كمان علشان يوسع مكان لغيره من الطاقات الفعالة الحقيقية
ثانيا: اعمل سن المعاش من خمسين سنة ، مش تقليل من شأن كبار السن لا دول فوق راسنا ،بس علشان يرتاحوا بقى من المواصلات و قرف الشغل و يجربوا مرحلة ربيع العمر على رواقة و طبعا مش حنسى اعمل جمعيات للعمل الاجتماعي يكون نواتها الناس دي .. و اهي فرصة برضة نوسع مكان للخرجين الجدد
ثالثا:اعمل هيئة اعداد و تدريب للخرجين الجدد علشان اللي يتعين في مكان يكون كفء ليه و يكون على دراية كاملة بالكمبيوتر و الطرق الحديثة للحصول على افضل النتائج و ادقها

رابعا: ارفع المرتبات و المعاشات و امنجه الناس دي ايوة طبعا ما هو الموظف اللي باخد ماتين جنيه مش زي اللي بيقبض الفين كده انا بحد من الرشوة لان مش معقول واحد بيقبض الفين جنيه يدنأ نفسه علشان عشرة جنيه رشوة، ده غير اني حضرب بيد من حديد على اي مرتشي يتقفش.

و خامسا : اعمل مواصلات مجانية لكل شركة تكون مكيفة و بالمشروب كمان علشان الموظف يروح شغله متكيف و شارب الشاي و مسقي بقسماط كمان و ملوش حجة انه ينتج و يبدع في عمله
و متنسوش ان كل موظف عارف ان في تقييم شهري لمجهوده يعني لو خسوع حياخد استمارة سته و يجي مكانه اللي اكفأ منه

بكده نرفع من شأن شركاتنا المصرية و يعلى انتاجها و نريح الكبار في السن و نعين الشباب و كله يبقى مبسوط و مروق و لا اية؟
و اللي عنده اي افكار ايجابية يتحفنا بيها و اهو كله علشانك يا مصر
كانت معكم وزيرة القوى العاملة


كلبوزة لكن سمباتيك

76 comments:

عصفور المدينة said...

طب ليه يا سيادة الوزيرة ما تقوليش نريح الستات بدل ما تقولي نريح من هم في سن الخمسين

وليه ما تقوليش نلم فلوس الناس اللي جابوها بدون وجه حق ونرجعها لمستحقيها اللي هما أنا يعني

على كل حضرتك ممكن تجيبي استقالتك انا قبلتها مقدما

رئيس جمهوريه نفسى said...

لو ليه تعليق صغير على موضوع الرشوه يمكن انتى مسمعتيش او معرفتيش انى معظم قضايا الرشوه الكبيره من الموظفين الك...... الكبار تهته برضه مرتبتها كبيره
وكيل وزراءه الثقافه 30 الف جنيه
يوسف عبدالرحمن ورزاءه الزراعهه250 الف جنيه
الوكيل فى الاذاعه والتلفزيون450 الف جنيه
دى مرتبات ناس اتمسكت فى رشوه
صباح الفل
بما انك عايزه وزاره انا حشكل حكومه قريب حفكر فيكى وعد

محمد said...

معلش يا كلبوزة
تسمحيلي أرد على عصفور المدينة :
يا أستاذ عصفور أما تفكر في فكرة يجب أن تكون فكرة منطقية أحنا في مصر مش في الجنة
يعني أيه نلم فلوس الناس اللي جابوها بدون وجه حق ونرجعها لمستحقيها
الحكاية مش سهلة زي مانتة بتقول
دي هتتقلب كوسة وكله هيقول أنا ليه حق واللي واخد فلوس بدون وجه حق أنتة فاكرأنه هيسبها بالساهل أو هيسبها أصلا
متزعلش مني يا عصفور أنا بس حبيت أوضحلك وجهة نظري
أما السيد رئيس جمهورية نفسه مع احترامي لملحوظتك الجميلة
لكن خلي بالك إن التركيز مش هيبقى على الكبير الغني
التركيز على الموظف المتوسط الغلبان أما تيجي ترفعله الراتب دل مايأخد 5 أو 10 جنية مش هيمد أيده أما المسئولين الكبار دول فدول مش محتاجين لذلك يجب أن تجمد مصالحهم ويعاقبوا
..
معلش يا سمباتيك أنا رديت على الناس كأني أنا اللي كاتب الموضوع بس والله ما عايز حد يزعل مني دي وجهة نظر بس
أبقوا زورونا يا جماعة

fnan_geology said...

مبروك على الوزاره يبقى
انتى كده بتاكدى الشائعات اللى طالعه بتقول انهم هيشيلو الوزاره دى وهيجيبو وزاره حججديده
وادينا عرفنا اول وزيره
كلبوزه للقوى العامله
يبقى فى امل نشفو ستات كتير فى الوزاره
وسلاااااااااام
:)

حــلم said...

سمباتيك
قصدي يا سيادة الوزيرة السمباتيك
احلي حاجة حكاية المعاش عند خمسين سنة يعني الستات ساعتها يطلعوا بأة عند أربعين سنة..ودة معناه اني قربت خلاص وهاتفرغ للمناكفة
عصفور المدينة الظاهر علشان عصفور لقطها وهي طايرة
أنا معاك يا سمباتيك قلبا وقالبا

يا مراكبي said...

وأنا من موقعي هذا أحيي السيدة الوزيرة على الأفكار النيرة دي كلها وبأناشدها إنها ترفض الوزارة وتستريح وتريحنا معاها أحسن

:-D

أنا فعلا ليا تجربة حقيقية في موضوع التوظيف ده .. الشباب اللي في سن العمل عددهم ضخم جدا .. لكن أغلب تخصصاتهم مش مطلوبة في سوق العمل أصلا .. ولا هما كمان عايزين يغيروا من نفسهم ويتعلموا حاجة تانية مطلوية في السوق

طبعا الغلطة من الأساس غلطة الدولة اللي سايبة التعليم زي الطابونة .. أعداد بتتعلم أي حاجة وبتاخد أي شهادة وخلاص .. إحنا بندور على ناس متخصصة في مجال شغلنا ومش لاقيين .. وفي المقابل تلاقي التخصصات المتوفرة ومالهاش شغل خالص مش عايزة تتعلم مجال شغلنا .. يعني في إيديهم يصلحوا من الوضع ده لكن مش عايزين .. كل الناس عايزة تشتغل بهوات

إوعي تبقي وزيرة بجد

The Groom said...


شوفي يا حضرة الوزيرة

في تغيير وزاري جديد وانت حتتشالي بعد 5 دقايق بالظبط من توليك الحكم .. قصدي الوزارة

هو يطول يكون لعيب كورة؟

تحياتي من ماناساس البلد

آلام وآمال said...

كل أفكارك حلوة وبناءة مفيش كلام بس اعتقد ان الكلام شيء والواقع والتطبيق شيء تاني يعني مش بالساهل كده حضرتك حتقدري تظبطي كل المسائل دي لن ببساطة الموضوع مش متوقف على وزارة بعينها او هيئة حكومية مثلا لاء ده المشكلة اكبر من كده لأنها مشكلة نظام وشعب وثقافة سائدة وحاجات كده ملعبكة محتاجة بوستين ولا تلاتة عشان تتشرح

بس طبعا روح الأمل والتفاؤل مطلوبة بردو وربنا قادر على كل شيء

وياريت لو حضرتك بقيتي وزيرة متبقيش تنسي وعودك وتورينا الشغل بقى
:D

-------
على فكرة
يدايء = مدايء .. من الديء

ودي اللغة الدارجة عندنا ف مصر
:D :D

خمسة فضفضة said...

السلام عليكم ورحمة الله وبركاته

ايه الافكار الطازه دي يا سمباتيك

معاكي في موضوع التقييم الشهري والاستماره سته ده
عارفه بعدها هاتلاقي ان 99,99999% من الموظفين خدوا شل...اقصد استماره سته ،وعيني بقي يا حضرة الوزيره براحتك

انا مع عصفور المدينه انهم يريحو الستات بس علي شرط يدوهم مرتب بدل بطاله زي اوروبا والدول المتقدمه
ساعتها هاتلاقي الست من دول تقولك وانا اتشحطط كل يوم في المواصلات ليه ما انا اقعد في البيت بكرامتي اخد بالي من العيال وابوهم واخد مرتب بدل بطاله حتي لو كان اقل شوية

يلا يا ست الوزيره عاوزين نشوفك في التشكيل الوزاري الجديد وارينا الهمه

سلام

عايش ولكن said...

يا سلام بجد الناس لسه بتحلم انا كنت فاكر انهم خلاص بطلوا يحلموا
يلا عموما مدام حلمتى يبقى فى امل
لما نتكلم عن فساد يبقى ممكن نكتب مدونات مش بوست واحد
تحياتى
علاء

وضـّاح said...

هههههه

جميلة هذه التدوينة

حضرتك قرأتي تدوينتي .. التاج

أكيد لما أمسك الحكم هعينك وزيرة القوى العاملة


ممكن اقتراح كمان .. إن وزيرة القوى العاملة .. اللي هي حضرتك .. تنزل المدارس وتعلم الطلبة معنى كل وظيفة وكيفية القيام بها ونتائجها ودخلها وتطويرها

وهذا فعلا مطبق ولكن بصورة متخلفة .. عندك مثلا مواد الزراعة والصناعة والكمبيوتر والإقتصاد المنزلي وغيرهم

كلها مواد تجعل الطالب على مستوى ثلاثة عشر عاما يجول بين التخصصات المختلفة فيفهم هذا ويتعلم هذا ويحب هذا

حتى إذا أحب جانب برع فيه .. وهذا ما كان طلبه منا أحد مدرسينا ولكن بعد أن صرت شابا وليس في طفولتي

قال لي أحدهم .. نحن نبحث عن شخص عمل في الميكانيكا أو النجارة منذ نعومة أظافره .. نبحث عن بليه .. عارفه بليه ؟؟

لأن بليه لما يكبر ويتخرج من الثانوية سيركض إلى كلية الهندسة شعبة الميكانيكا ويصبح مهندس وأسطى


طولت في التعليق .. نعتذر

تحياتي

لماضة said...

طيب انا اقول ايه دلوقتى
مش عارفه اقول ايه حقيقى ولا اتلامض حتى
بس اللى اقدر اقولهولك انى مستعده فعلا اشتغل اى حاجه بما يرضى الله
المهم اقدر اعمل اكتفاء ذاتى واصلح شويه من حال البلد
يعنى تقدرى تقولى ممكن ابدا بنفسى

اسكندراني اوي said...

اممممممممممممممممممممممم

فاكره زماااان لما عادل امام كان بيقول بلد بتاعه شهادات صحيح

دلوقتي الكل في الخلاط

افكارك جيده طبعا ولكن ناويه تطبقيها في اي بلد

بلدنا احنا
ولا بلد الناس التانيييييين

مش تكسير مجاديف والله
بس استنكارا للحاله المهببه اللي وصلها شبابنا

إنـســـانـة said...

هييييييييييه

تعييييييش الحكومة .. قصدى الوزيرة

ياريت ياختشى اهوه احسن من قعدة المقاطيع ع القهوة وفى السكك واقفين يبحلقوا للى رايحة واللى جاية

إلهى تجيلهم شغالة تلهيهم يااااااااارب

وابقى سلميلى على باقى الوزرا قبل ماتستقيلى الله يكرمك
:D

Sampateek said...

رغم أني لا أجد فائدة من التعليق على تعليق أصدقائي لأنها ارائهم و هم احرار فيها و أجد أن اسلوب المناقشة عن طريق تعليق و الرد عليه طريقة تفقد النقاش طزاجته الا ان تعليقاتكم هذه المرة بها شئ من الطرافة و التي تدفعني الى الدخول فيها و الامتزاج معها و لنبدأ
.
.
.

Sampateek said...

عصفور المدينة
فكرة استبعاد السيدات من ميادين العمل فكرة قاسية و عنصرية فكم من سيده تحتاج الى المال لتعول أبنائها و كم من شابة تحتاج العمل لتساعد خطيبها على متطلبات الزواج و كم من زوجة لابد أن تعمل لتساعد زوجها في مصروف البيت
أنا افضل أن يكون عمل المرأة في إطار من التميز و الالتزام و تقييم دورها بحيادية تبعد عن التصنيف الجنسي
-
فيما يخص أخذ فلوس الناس الوحشين و اعطائها الى الناس الحلوين فهي نظرية كرتونية بحته نحتاج الى جان دارك لتطبيقها

استقالتي !!!طيب مش تسنتنى اما اتهنى بالكرسي شوية؟

لا انا حخليها كنبة الوزارة علشان اقعد و اتأنتخ

:)
تحياتي

Sampateek said...

رئيس جمهوريه نفسى
انا معاك ان ضعف الضمير لا يتطلب بالضرورة ضعف الراتب و العكس بالعكس
و لكن انا اريد ان اسد اي عذر او حجة قد تبدر من اي موظف

سد زرائع لاجتناب الفتن
دفي جيب الموظف و اخرم عينه لو ارتشى

بما انك حتشكل وزارة متنساش تمسكني التمويين علشان انهبها

تحياتي

Sampateek said...

محمد
ردك في محله و يدعم فكرتي و كنت اتمنى ان تطلع علينا بافكار جديدة للرفع من شان البلد و السيطرة على وحش البطالة الكاسر
تحياتي

Sampateek said...

fnan_geology
انا عينت نفسي وزيرة القوى العاملة في هذا البوست و سوف اعين نفسي وزيرة لباقي الوزارات تباعا في بوستات قادمة
العملية بالدراع يعني لا يتحكم فيها أي تغيير وزاري و لا حاجة يمكن ربنا يكرم الوزير الحالي و يعدي من هنا و يشوف الناس عايزة اية
حاجة كده زي ما يطلبه المستمعون
ها تحب تسمع اغنية اية بقى؟


تحياتي

Sampateek said...

حــلم
تتفرغي للتدوين يا حلمي الجميل و تتحفينا بكتاباتك الراقية
او ممكن تحطي عينك على وزارة العدل و تحققي اللي معرفش رجالة بشنبات تحقيقه


تحياتي العامرة بالحب و الإيخاء

Sampateek said...

يا مراكبي
دايما كده موقف المية في المواسير يا ابو فيري
مش عارفة العيب فين
في مكتب التنسيق اللي بيدخل خريج علمي رياضه اداب و لا تجارة و اللي بيربط دخول فنون جميلة بامتحان قدرات اهبل مبيتصححش اساسا و لا بالدراسة الجامعية اللي بتخرج الواحد من دول زي ما دخل بس بشرطة

المشكلة ان اي خريج ما بيصدق يتخرج علشان يرتاح من مصاريف الدراسة نقوله ارجع ادرس تاني طيب منين

مش حبقى وزيرة ارتحت؟
كفاية عليا الووتر فايت
تشششششششش
:))

تحياتي

Sampateek said...

The Groom
بقى تيجي منك انت يا عريس
ده انا كفائة و حسنجف الموظفين اخر سنجفة

اه بسلامته عايز يبقى زي ابو تريكة فاكر ان هي دي الجينسة

تحياتي

Sampateek said...

آلام وآمال

لا مش حنسى وعودي بس انتي ايديك معايا و طريق الالف ميل يبدا بخطوة و لو فضلنا نكسر المقاديف مش حنلاقي ولا مقداف يوصلنا


يا بنتي متضايق مش متدايئ ههههههههه


تحياتي

Sampateek said...

خمسة فضفضة
انت اللي رافعة معنوياتي
عجبتني حكاية منحة البطالة دي و لو ان حكومتنا ام رشيدة بتصرف فلوسنا على المهرجانات و الحفلات لكن لحد المنح و المعاشات تقول ممعيش
منين يا دلال
على قول محمد صبحي في سنبل

تحياتي

Sampateek said...

عايش ولكن
اه طبعا لسة في امل
و سعاد و وفاء و هدى
امال اية؟!
نكتب يا فندم منكتبش ليه


تحياتي

Sampateek said...

وضـّاح
لا اصل انا ناوية الف على كل الوزارات و اظبطها واحدة واحدة مش ححبس امكانياتي في وزارة واحدة
:)
و مفيش مانع الف على المدارس و القهاوي و ادخل كل بيت كمان مادام حنشر الوعي بين صفوف الشعب و اطور بلدي

تعرف ان بلية و امثاله ممكن يكون عنده معلومات افضل من عشر مهندسين في نفس مجاله لانه خاض العمل و عرف التطبيق مش نظري و بس


تحياتي

Sampateek said...

لماضة
انا نفسي كل خريج يشتغل في تخصصه مش اي حد يشتغل اي حاجة و تكون الخبرة للفتاكة و الحداقة و الفهلوة
نفسي نحترم التخصص علشان ننجح بجد

الرضا بالمقسوم و على اد لحافك مد رجليك و الجودة بالموجود شعارات تقتل الطموح و الاجتهاد


تحياتي

Sampateek said...

اسكندراني اوي
حطبقها في الصومال للرفع من شأن الصومال الشقيق و اصلاح ما افسده التسيب و الاهمال و الاتكال

ايه يا اسكندراني حتشلني ليه بس
بلدنا و عايزة تتصلح نروح نجيب لها سمكري من برة يعني؟
و لا ايدنا في ايدين بعض و من هنا مسمار و من هنا شاكوش لحد ما نعمل لها عمرة
؟
تحياتي

Sampateek said...

إنـســـانـة
على رايك حال الشباب على القهاوي و النت كافيه يحسر و يزعل لو لاقين شغلانة مفيدة و مشوقة و عمل يديك قد ما ياخد منك مكنش بقى ده حالهم

تعيش الحكومة؟؟؟؟؟؟ و احنا بلاش و لا اية؟

انا من مزنقي هذا بدعوا الحكومة انها تستقيل و تسيب الشعب يحكم نفسه و يظبط حاله بدل المسخرة اللي احنا فيها دي

تحياتي

امرأة تقول الذي لا يقال said...

هنتخبك على فكرة (:

البرديــــــة المصرية said...

سعادة وفخامة الوزيرة المنتظرة كاميليا

والله كلام حلو وجميل , وبغض النظر عن وجهة نظري فى المعاش المبكر , بس اجمالا يعنى كلام جميل , وننادى به جميعا
لكن لو فكرتي تانى بشكل تنظيمى
حتلاقى ان تحقيق الكلام ده عايز برضه وزيرة اسمها كاميليا فى وزارة التعليم وكاميليا تانية فى وزارة الاستثمار وتالتة فى المالية ورابعة ترأس مجلس الوزراء وكمان تلاتة اربعة فى لجنة وضع السياسات , ده طبيعى لأن اى خطة وزارية عشان تتنفذ محتاجة أرضية صالحة وتعاون من وزارات أخرى

وبصراحة مش حيكون فيه وزير كويس الا لما يكون فيه قانون لمحاسبة الوزراء

وتفضلوا بقبول فائق الاحترام

HoNdA said...

السلام عليكم
هو فى نقطة بردو لاحظتها فى موضوع البطاله دى ان اغلب الشباب مبيحسنوش من قدراتهم
عشان كده اوقات كتير تلاقى فرص عمل بالهبل فى مجال الالكترونيات والبرمجة والجرفيك ووووو
بس اغلب الشباب بيعتمدو على الكلية بس
دى نقطة بتخليههم قاعدين قاعدين
انا طبعا مببرءش الحكومة والناس دى
بس نفسى اننا نحاول نحل جزء من مشاكلنا ولو حتى كل واحد يبدأ بنفسه عشان منقضيهاش كلنا شكوى

سها said...

دلوقتي خريجين الامعة بيسوقوا توكتوك سيادتك

عاليا حليم said...

طب يا ريت انتى تمسكى باه الوزارة و انا اول المقيدين
موضوع جميل يمس الكثيرين احييكى عليه
و انتى مش كليوزة خالص انتى كلك سمبتيك

أبوشنب said...

بس انا مش بحب البقسماط

ممكن توزعو كيك مع الشاي الصبح

ويا ريت مزيكا هادية في البص عشان اعصابنا يا وزيرة

the emperor said...

انا شايف ان في مشكله في تخطيط المدن في مصر
يعني مثلا مدينه زي القاهره بتتركز فيها كل المناطق الصناعيه وفي مدن تانيه كتير مفيهاش مصنع ينفع تقولي عليه مصنع تحت السلم غير كده مستوي التعليم الفاشل اللي موجود في مصر لازم يتغير عشان يكون عندنا خريج مؤهل انوا يشتغل اساسا او علي الاقل لما يحب يفتح مشروع يعرف يديره دا غير طبعا اسلوب تعامل الضرايب مع المشاريع الصغيره ......... وحاجات كتير محتاجه مؤتمر قومي زي انابوليس كده :) وفي الاخر هنطلع كلنا حرميه وتقضيها في المعتقل
شكرا كلبوزه
=============================
===============================
الامبراطوريه المفقوده
عالم مختلف
www.lost-empire.blogspot.com

Iskanderani said...

صباح الخير ياوزيرة ؟

إضافة لافكار حضرتك الجميلة !!!!! نرجو تعيين مُساعد / مساعدة وزيرة مُحترم/ محترمة لتنفيذ رؤية الوزيرة وعرض الهامها الذي بدونه لايصلح أي شئ في الكون... إلهام الوزيرة ..الحقيني يامه... ولو كمان مسموح لي بطلب صغير جداً جدً: كل موظف يطلع له بطيخة صيفي حتي ولو في الشتاء علشان الامور تمشي وتبقي بطيخي ولما مايكونش في شغل يقرعوا علي بعض ويثبتوا بما لايدعي مجالاً للشك... مين عنده احلي بطيخة في الدنيا ...!!

احلي حاجة ان المشاكل عند العرب بتُحل ببساطة لا نظير لها. عملية التبسيط وصلت لكل الطبقات والناس اللي المفروض ان عندهم قليل من العلم والمعرفة ..لاتتعمق في التفكير. بالسهولة هذه تُحل المشاكل؟

علشان كده خربت من زمان، لان اللي المفروض ان عندهم القدرة علي إستيعاب وفهم النظم المعقدة لاهم فاهمين ولاهم مفكريين.... فقط الكلام والكلام ...البسيييييييط بلا أي مرجعية علمية ...

تحيات إسكندراني في بلاد الله الواسعة

بيسوو said...

احنا برضو ممكن نحط كاميرات مراقبة خفية في مكاتب الموظفين علشان نقطع دابر الرشوة والمحسوبية
طب وحياتك عندي لو بقيتي وزيرة القوى العاملة لهتكسري الدنيا
بس متنسيش خريجي التجارة الغلابة

None said...

بعيدا عن الموضوع انا لسه الصراحه مش قريت البوست

بس انا داخله اقولك كل سنه وانتي طيبه ياقمر

هاروح بقي اقرا البوست واقولك

ahmEd_H said...

كل عام وحضرتك طيبة يا كلبوزة

M.R said...

ههههههههههههه
ربنا يكرم سيادتك، و يكافئك على مجهودات حضراتكم العظيمة.. و بما ان سيادتكم تكرمتم بفتح الباب أمامنا لقول الرأي و المشاركة.. فاسمحو لي ان ........ او ما تسمحوش

جميل موضوع إعادة التقيم دا... بس لو عملته أنا يبقى الوحيد اللي هاسيبه.. و لا حد... اه، من أول سيادة اسمه ايه لحد الواد اسمه ايه

ثانيا.. هاسيب الناس تشرب المية اللي بتشربها و تاكل الحاجات العجيبة اللي بتاكلها و طبعا تستمتع بنسيم القاهرة المعمورة..دا طبعا جنب برامج التليفيون الممتعة و إعلانات ( الشباب الملحلح )و المسابقات و و و ... و أكيد ما حدش هايلحق يترقى مش يطلع معاش

و بعدين أموت كل الناس اللي فوق الخمس سنين.. لتقليل نسبة الغباء ف المعمورة
و بعدين هاموت نفسي طبعا بس بعد ما أكمل مشروعي العبقري - و أعلم الولاد دول فعلا يعني تعليم بجد مش من بتاع القراءة للجميع و طباشيرة لكل تلميذ و نغمة لكل جامعي

و بعدين ... حلو موضوع اليد اللي من حديد دي.. ممكن نمشيها بس بتعديل بسيط ... بدلا عن الضرب هايكون القطع... علشان نخلص


أما عن موضوع المواصلات مع المشاريب.. ف ههههههههههههههههههههههههههههه

بس

ضد الظلم said...

ياسلام احلمى احلمى مفيش فيده اشد فى شعرى يعنى عشان ابقى عاطل واقرع كمان انا ليا واحد صحبى ليسانس اداب فلسفه وفاتح محل بلاىاستيشن ومش عارف يعمل ايه

ربنا ينتقم من الى كان السبب

وليا اقتراح سياده الوزيرة احنا الى نمسكه بيرتشى نجرسو نجيب عيال ونمشيهم وراه ويقول من ده بكره بقرشين

الدبور said...

اقولك ايه بس
انت عارفه انا واحد صاحبي دافع 20 الف جنيه علشان يشتغل ب350 في الشهر
في شركه بترول
البركه فيكي يا حضرة الوزيرة
تعدلي المايل

تحياتي
الدبور

شاب مصري مفروس said...

ادينا بنحلم.......

ونحلم..........

ونحلم......

لما نشوف اخرتها ايه

بس على فكرة

لو حصل بجد اكيد مش هتفتكري حاجة من دى خالص

لان الوزارة بتغير الواحد برده
اكيد للأسوا

خليكي مواطنة احسن

ويابخت من بات مظلوم

ومش بات ظالم
تحياتى

موجة said...

كلام جميل
و حلول واقعية
بس مين اللي ممكن يطلعها من اطار النظرية الى دائرة التطبيق
تحياتي

كراكيب عادل said...

انا معاكي يا ريسة

قصدي يا وزيرة

الشباب عندنا عايز فلوس من الهوا وفي خلال ايام

عايز يكون واحد غني والتعليم زي مانتي عارفة

البلد بقت ماشية بالبركة

زي مركب من غير شراع ولا ماكينة

اهي ماشية وبس فين هتروح مش عارف

الي عايز يوصل ينزل ياخدها عوم احسنلة

علي الاقل يكون حاول

Mask said...

مهو لو كان الوزرا بتوعنا كلابيز لكن سمباتيك مكنش دا بقه حالنا

ولا نملك في هذه اللحظه المفترجه الا الدعاء

امنوا ورايا

اللهم كلبزهم
اللهم سمبتكهم

امبييييييييييييييييييييين

غمض عينيك said...

والله يامعالي الوزيرة تاعبينك معانا كده دايما
كان الله في العون...الحمل عليكي تقيل
شخبطه معاليكي تخطيط لمستقبلنا
واحلامك اهداف استراتيجية لبلدنا

انا طول عمري اكره النفاق
اه

Ma -3lina said...

ايدى على كتفك المهم حد يسمع و ينفذ علشان حالتنا بقت صعبة اوى و الله

و مبروك النيولوك الجديد

القلم السكندري said...

بصراحة أولا ربنا يبشرك بالخير علي بشارة خريجي الطب والهندسة

هو ده واقعنا طبعا اللي مينفعش نهرب منه

أنا ليا صديق مهندس خريج جديد مرتبه الأساسي 139 جنيه في مصلحة حكومية

طبعا ميكفيهوش يشرب بيهم شاي

لكن نقطة انك تقعدي اللي عندهم خمسين سنة في البيت

هو بيبقي قبل ما يطلع معاش وبيكفي بيته بالعافية

ولما ولاده بيتخرجوا كانهم بلوة اتشالت من علي راسه

كدة إحنا هنزود عشر سنين هم تانيين علي دماغه

البلد فيها حلول تانية كتير وخير كتير

بس ربنا يتوب علينا من غضبه


بوست في الصميم

تحياتي

محمد العدوي said...

بحس أوقات انو الوزرا مظلومين وأن الموضوع فعلا معقد ..


بقينا عاملين زي كومة صوف متعقدة في بعضها محدش عارف تتفك ازاي . وعمالين نقول مين لعبكها كدة .. حتى لو عرفنا .. اهي اتلعبكت والسلام .. فكوها بقى

أو نرميها ونجيب صوف جديد


كل الود

حسن ارابيسك said...

الحقيقة الموضوع المردة دي
موضوع مكلبظ خالص
وموضوع بالنسبة للحكومة موضوع مكعلظ ومبظظ ومش عارفين يظبطوه يظبطون من حته فيبض من الحته التانية وهكذا دواليك
ودي معضلة للأي حكومة تجي تخبط تحت بطاطها فقط لاغير

MAKSOFA said...

ربنا مايحكمك علي ولايه ياكلبوظتي

yamen said...

شوفي يا سيادة الوزيرة

تحياتي للبرنامج الانتخابي الجامد ده
ده الواحد كده نفسه يبقي موظف في عهد سيادتك

:)

تحياتي

حسن ارابيسك said...

احببت أن أكون أول واحد في البلوجرية يقولك كل سنة وانتي طيبة بمناسبة العيد الأضحى المبارك
حسن

كفراوى said...

انا بقى لو عينونى رئيس الجمهورية

الغى المصريين دول كلهم

وابعت استورد سلالات بشرية جديدة

من روسيا و قازخستان

مهندس مسلم said...

"الخريجين الوحشين بيرفضوا يسيبوا القاهرة الكبرى و يروحوا يشتغلوا بعيد عن النوادي و صالات الهلس ؟ و لا اية بالظبط"

انتي بتقوليها بتريقة دي فعلا حقيقة

انا اعرف اتنين بيعانوا من الموضوع ده

واحد صاحب مزرعة بطاطس في وادي النطرون
والتاني صاحب مزرعة سمك في القنطرة

كلاهما حصل معاه نفس السيناريوا تقريبا

يروح يجيب الشاب من على القهوة لاحظي على القهوة يعلمة ويسكنه وياكله ويديله 700 جنيه في الشهر خالصي مخلصين يحطهم في جيبة وبعد 3 4 شهور ييجي الواد يقوله يا بيه انا مش قادر انا عايز اشوف ناس

يفضل يتحايل عليه يقوله هعزمك انت واهلك يوم في الاسماعليه طب روح اقعد مع اهلك اسبوع وتعالى ما يرضاش

للاسف الشاب اليومين دول عايز يقعد على القهوة يشرب على النوته وييجي اخر الشهر يعمل شغلانه على السريع يسدد نوتة القهوة وايجار وصلة الدش وقسط الموبيل الان 73

سجدة said...

ايه دا كله وزيرة تمام والله
ابدئى الشغل بس ميهمكيش وكلنا وراكى بس على فكرة الرشوة مش شرط لموظف صغير ومربته صغير
محمد الوكيل رئيس قطاع الاخبار كان مرتبه 35الف جنيه
يعنى الحكاية حكاية رقابة وكوسة اكتر

اعشق فى اليل ضوء القمر said...

اولا احيك على روحك الطيبه لكن صدقينى لو كنتى وزيره القوى العامله لن تقومى بأى تغيير
انا واحد من الشباب تخرجت من كليتى وبحثت عن عمل فى تخصصى كهرباء قوى لمده ثلاث سنوات
وعملت فى تلك الفتره بوظائف عده بعيده عن تخصصى
ولكن وفقت للعمل فى مصنع بطريق الواحات يعنى بنزل من البيت الساعة 6.30 ص
و ارجع الساعه 10 م
على مرتب تعبان و لأسم معندس
لكن هو ده الحال وأتمنى يأتى يوم ويتحقق كل كلامك

كل عام وانت بخير وعيد سعيد

ابن مرّ said...

مصر بتعلمنا ان الدنيا ما بتديش كل حاجة بس بقة بشدة
أنا مثلا باشتغل باحث في مجال الوراثة البشرية في مؤسسة بحثية كبيرة جدا في البلد
وأنا أساسا طبيب أسنان
وعندي عيادة ممكن أتفرغلها بالكامل وتجيبلي فلوس كتير

وهنا بقى يجي المأزق

أنا عاوز أشتغل ف أبحاث السرطان ودي بيتصرف عليها من جيبك الشخصي و ما بتأكلش عيش
"مرتبي من أعلى جهة بحثية دي 485 جنيه"

فميش حل غير اني أشتغل في العيادة وأنس بقى البحث


في حل تالت اني أسيب البلد وامشي

انتو ايه رأيكو؟

Ragi said...

الحل الاكثر طزاجة هو قفل الجامعات بالضبة والمفتاح والاذكياء الوهوبين يبعتوهم قطر او الكويت يدرسوا فى الجامعة هناك
الشباب بقى سواسية كله يمسك فاس ويطلع الصحراء الغربية وينتشروا من اول توشكى الى منخفض القطارة يحفروا بايديهم والفاس فقط مجرى جديد لنهر النيل ويزرعوا على الجانبين كل شاب لمدة 4 سنوات بدون اى كوسة ولا استثناء واللى يموت يموت شهيد واللى يعيش فالبقاء للاصلح ومن يقضى الاربع سنوات يمتلك 10 فدان من الارض التى عمل بها ويبعت يتجوز شابة من البنات يستقروا ويعمروا اسرائيل عملت كده وهى الان دولة عظمى مع الفارق فى الامكانيات والخلفية الحضارية
شكرا لكى وكل عام وانتى وزيرة بس سمباتيك لان عائشة عبد الهادى محدش ممكن يبقى كلبوز اكتر منها

appy said...

والله معاكى حق حلك مظبوط ويا ريت يمسكونى المواصلات علشان كمان انا امنع الناس الكبيرة انها تسوق او امسك المرورو واعرف الناس ان فيه اشارات فى العربيات او الزراعه واخلى الشباب يزرعوا اى حاجه فى الصحرا شوفيلى مكان معاك فى الوزارة والنبى

بيقولوا سايكو said...

ما عنديش أفكار لإن مخى لسة على قدى .. وبينى و بنك باحاول كتير ما افكرش فى المشكلة دى بالذات غير لما اتخرج .. مش عايزة احمل همها من دلوقتى

tota_fm said...

حلو اوى الافكار دي يا سعاده وزيره القوى العامله انا مؤيده جدا ليها
وكمان موافقه اشتغل فى شركه من اللى اتوبيساتها مكيفه وفيها شاى وبقسماط ههههههههه
بجد الافكار رائعه بس للاسف مفيش حد بينفذ ويقولوا البلد مليانه شغل الشباب هو اللى مكسل
المدونه بتاعتك جميله
ربنا يوفقك

BaTaBeeT said...

ana m2ayedaki tamaman :D
te7ebee akalemlek 7ad mn el mas2oleen ?

fe3lan enty 3andek 7a2..m3 tazbeet 7agat so3'iara kol 7aga we7sha kebera 7atetzebet...bas ne3ml eh!! el nas di betkassel... (fi lafz tany bas mayenfa3sh a2olo hena:D)


nice blog :)

رجل من غمار الموالى said...

وهل طموحك حده النهائى الوزارة بس واللا ..
فيه ..مناصب أكبر ؟
عشان الإصلاح يكون أكبر

emos said...

ahy wazeret el kowa el 3amla deh sa7bet 3amety el roo7 belroo7
gatlaha zeyara w 2e7na 3andaha marra w kan sa3etha ma3ad el bernameg beta3haw tab3an 3eeb geddan en 2e7na manetfaragsh 3ala bernameg seyat el wazera w fedelna 2a3deen w heyya tetkalem 2a3deeeeeeeeeeen w heyya tetkalem ledaraget en e7na kolena konna benetaweb
kalam keteer 2et2aal w kalam gameel 2et2aal bs mafesh 7aga menha 7asalet kalam bs
ya3ny hateb2y wezeret el kowa el 3amla w te2oly el kelmeteen dool w 2e7na netfarag 3aleky fel telefzyoon

Memo said...

ههههههههههههههههههههه

احب على يدك يا اختشي تشوفيلي اي حاجة لما تشتغلي مش انا باعلق عندك اهو ابقا ترفك و انتي الوسطة بتاعتي و حبيبتشي



يبقا تشفيلي شغلانه من امو 2000 جنية دي

و عنيا ليكي بعد كده بطاقة ,تنسيق ؟ رخصة ؟
محكمة ؟
شهر عقاري ؟
عنية يا حبيبتي و انا في ديك الساعة

على الاقل ابقا عديت طابور المعيز الي احنا واقفين فية من ترقيات و معاشات


اللاهي و انتي جاهي يعالي مراكبك معاليكي و ينصر على مين يعاديكي

أنسانة-شوية وشوية said...

الف الف الف مبروك الوزارة ومبروك عليا الوزيرة واهم حاجة بقي تريحى الستات يعنى ممكن نقعد في البيت وناخد مرتباتنا برده واهو كله علشا مصر لان الست لما ترتاح هتريح يبقي المجتمع والوط هيريحوا
وبالنسبة للفلوس والرشوة كل ده يرجع للتربية والقيم والمبادى مش علشان اللي بيقبض قليل او كتير
والف سلام بس احب اعرفك ان الوزارة دى صعبة جدا واسالي عائشة عبد الهادى اللي م يوم ما مسكة الوزارة وكل شوية اعتصام واضراب وشكاوى مكتش موجودة قبل كده... يالا بقي ربا يقدرك

مفلس افندى الرايق said...

يا وزيرة القوى العامله
خططك كامله وشامله
بس ناقصها حكومه
راسها مافيهاش ولا قمله

ازيك الاول يا كلبوزه يلا نرجع للمدونات تانى اهو اللى نعرفه احسن من اللى نعرفه برضه ههههه

حلولك اللى قولتيها دى عاوزه ميزانية دوله جديده وعاوزه اساسا بلد جديده الحكايه باظت يا كلبوزه باظت

صاحب المضيفة said...

ألحل بيكون في ايدينا واحنا مش واخدين بالنا

الحل اننا نعرف ايه المطلوب مننا بالظبط زي ما ربنا طلب مننا واحنا هانستريح خالص

ربنا يسهل الامور ويسهل لنا كل عسير

مدونة طيبة وجميلة

دمت بخير

أنا وهي said...

ولو ان المتعلمين لما بدأوا يشتغلوا الشغل اللي كان مفروض يشتغله الجهلة الشغلانات نضفت

koukawy said...

سؤال... تفتكري كل الناس بتقول زيك قبلما يلزقوا في الكرسي
العيب بقي في الناس و لا في الكرسي
و لا في اللزق اللي علي الكرسيييي؟؟؟؟؟؟

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام