Tuesday, January 30, 2007

تاج البلوجرية 2

اتدبست في الاستفتاق ده من حبيبتي حفصة
و طبعا علشان المصايب متجيش الا من الحبايب فانا فرحت انها افتكرتني و بعتتلي تاج البلوجرية

السلطنية
و لو اني مش بحب اقول اي معلومات خاصة عني بس يعني شوية هزار على حبة تورية البوست يمشي
و نبدأ
اية اللي حيحصل لايميلك لما تموت؟
محدش حيعرف يفتحه
اديت الباس وورد لحد قبل كده؟
ايوة

لو اه كانت طبيعةعلاقتك بيه اية؟
صديق
اسمك؟
الحقيقي معرفوش بس المتعارف عليه
سارة
اسم الدلع المشهور في وسط اصحابك؟
طيب ما انا لو قلت اسم الدلع حتعرفوا اسمي
نقول سارة
عمرك؟
مواليد ديسمبر 71
مجالك او مجال دراستك ؟
حدادة و سباكة
شخصيتك نوعها اية؟
وربنا ما عارفة اقول اية
السفر بالنسبة لك؟
كاس و داير على العباد
المود بتاعك؟
متقلب
وقت فراغك بتعمل فيه اية؟
بنام او بعمل سيرش على النت او ببلجر
الاكلة المفضلة؟
البيتزا
الصفات اللي خدتها من ماما؟
هممم يا ربنا على الاسئلة دي
التبيخ الحلو و خلو بالكم من التاء دي
الصفات اللي خدتها من بابا؟
العصبية
اكتر 6 حاجات بتكرهها؟
الهبل و العبط و الغش و الاستهبال و الاستغباءو الاستعباط
اكتر 6 حاجات بتحبها؟
الضحك و النوم و النت و العوم
الشغل بالنسبة لك؟
صحيان بدري
الكومبيوتر والانترنت بالنسبة لك؟
حاجة مهمة قوي
----
اخيرا و ليس اخر مش حمرر البوست ده على حد اساسا
و على فكرة مجوبتش بصراحة على اغلب الاسئلة
بس علشان الناس الحلوة اللي مررت لي الاستفتاء ده متزعلش جاوبته
منجيلكوش في حاجة وحشة

Tuesday, January 23, 2007

ساعدني

حوليا برد و ضلمة و خوف
لا انا عارفة مولودة و لا بموت
ساعدني اخربش جوة الضلمة
يمكن اعرف افوت



ساعدني اخرج برة القشرة
و اشوف بعيوني انوار بكرة
ساعدني ادوق طعم الحرية
ده هيا الحلم و هيا الفكرة
ساعدني و شيل عني جداري
وطفي باديك لهفة ناري
نفسي اشوف شكل الدنيا
و ادوب حلوها جوه مراري
الدنيا فراغ ليه حوليا؟
ده انا اللي جتها برجليا
لا لاقية اخ و لا صديق
رجعني تاني و سك عليا

تخريفات سمبتيكية

Saturday, January 20, 2007

الست سعاد




كان غيابها عن البيت أمر لا يصدق! فمنذ مات زوجها و هي أم رؤوف، ترعى أبنائها بحنان و جلد و صبر ،و لم يتوقع أحد يوما أن تتخلى عنهم أو أن تتركهم.رغم تقدم بعض الرجال بطلب الزواج منها ،منهم من أراد أن يكفل الأيتام و يظفر بخادمة زهيدة الأجر لا يتعدي أجرها ثمن ما تأكله يوميا. و منهم من أراد مربية لأولاده و لا بأس من أن ينفق على أولادها في المقابل و منهم من كان يطمع في مبلغ التعويض الزهيد الذي صرفه العمل عن وفاة والد الأيتام و هو يؤدي عمله في المصنع.


قرأت سعاد كل هذه الأهداف في عيون من تقدم للزاوج منها و اثرت أن تنفرد بأولادها جانبا، تكد معهم في دفع عجلة الأيام الى الأمام و كان كلها أمل أن يظهر لها الزمن وجها بشوشا غير ما رأت منه


و عندما جاء الصباح و استيقظ أولادها فلم يجدوها في البيت و هي قد خرجت في المساء لشراء الخبز و الحليب - ككل ليلة-و احضار بنطلون سامح من عند الخياط حيث سقط على ركبتيه فتقطع البنطلون و كان يحتاج الى علاج سريع لثقب ليس سببه الاحتكاك في الارض و حسب و إنما بسبب بلاء القماش في أغلب الظن، لأن البنطلون كان ملكا للأخ الأكبر عادل قبل أن يضيق عليه أو يكبر سامح و يأخذه


و تعجبت سلوى كيف لم تحضر أمي و قد وعدتني بشراء كراسة جديدة عوضا عن كراستي المنتهية و قلم رصاص طويل بمحاية ملتحمة فيه


ذهبت سلوى و ضقت جرس جارتهم أم أيمن و سألتها : ماما عندكم


ردت أم أيمن و هي تمضغ اللبانة كعادتها غير مكترثة: و ايه حيجيبها عندنا على الصبح كده(!)


سلوى في خوف ممزوج بالدهشة: أصلها من ساعة ما راحت تشتري العيش و اللبن مرجعتش من ليلة امبارح


الست أم أيمن و هي تدفع الباب ملتفتة الى الداخل: الغايب حجته معاه!.


فازداد عجب سلوى


أين ذهبت أمي


!!!!!


و ما هى الا دقائق وكان الشارع كله يعلم أن الست سعاد لم تبت في بيتها منذ ليلة أمس- بعد ممارسة أم أيمن لهوايتها




و بعد أن ارتدى عادل و سامح و أختهم سلوى ملابس المدرسة خرجوا من البيت متجهين الى المدرسة، و لم يتركهم أحد من سكان الشارع و الا و سألهم: أمكم راحت فين؟؟؟


و لم يسلموا من بعض الايمائات و التعليقات و التعجب الذي ملئ أعين و صدور الجميع




و أنتظر الكل عودتها


و لكنها لم تعد


و إنما عاد الأولاد من المدرسة جائعين ،فهم لم يفطروا ككل يوم و لم يأخذوا سندوتشات الحلاوة الدافئة التي اعتادت أمهم أن تعدها لهم كل صباح.


عادوا ليجدوها لم تعد


فتح عادل الباب بالمفتاح الذي يربطه في خيط حول رقبته


و قالوا جميعا في صوت واحد:


ماما ..يا ماما ..احنا جينا


و لكن لم يرتد لهم صوتها كلل يوم: اهلا يا حبايبي


و تبادرت الأفكار في أذهانهم الصغيرة


هل تخلت أمنا عنا؟ هل رحلت لتتزوج و ترتاح من همنا؟ هل ملت من طلباتنا و شكوانا و شجارنا المتواصل؟!أين ذهبت؟!و هل ستعود؟


أقسم عادل أنها إن عادت لن يتشاجر مع أخيه سامح و يضربه حتى لا تبكي أمه


و أقسم سامح أنه لن يبلل فراشه و يجعلها تحمل المرتبة ككل يوم الي السطح لتجففها الشمس


و أقسمت سلوى أنها لن تبكي كل يوم و تمتنع عن شرب الشاي بالحليب بل ستشربه كله حتى تكبر و تفرح أمها


بحثوا عن شئ يؤكل فلم يجدوا


أرسل لهم الجيران ما تيسرمن غداءهم، و لكن البطون جائعة و النفس حزينة فمن له رغبة في الغداء؟!


ساعات و ساعات مرت كحمل ثقيل و كلما مر الوقت ازداد يقين الأولاد بأن أمهم لن تعود




الست سعاد..كانت قد خرجت بعد صلاة العشاء لتشتري لأولادها الخبز و الحليب و أغراضهم البسيطة،و كانت تحلم بغد أفضل، و أولاد بارين ناجحين,و لكن عمر بيه ابن الواحدة و العشرين و الفتى المدلل لأمه و ابيه لم يمهلها أن ترى أحلامها حقيقة


فقد كان يقود سيارته على سرعة 120 داخل شارع صغير فصدمها بقوة،رفعتها الصدمة الى أعلى و اسقطتها على الأرض فانقطع كيس الحليب و اختلط بدمها و انفرط الخبز يمينا و يسارا


و ماتت الست سعاد محتضنة كراسة سلوى و قلمها و ماتت معها أحلامها


و لأنها من البسطاء ،غطاها المارة بالجرائد و لم يستدل أحد على شخصيتها ،و ظل جميع من يعرفها يظن أنها هربت أو رحلت و استغنت عن أولادها


إلا نحن ...فنحن نعلم بقوة أنها ماتت شهيدة








ربما--تستكمل--




Tuesday, January 16, 2007

أيظن؟!!!


سيد يا سيد
من أجمل الأغنيات الهابطة التي ترفع المود الواقع
نعم
أعترف لقد سقط مودي من البلاكونة و تكسر
و كان من الصعب تجميعه و تلزيقه في الأيام الماضية
و لكن هناك أسباب
من أهمها احساسي بعدم وجود هدف للتدوين أو على الأصح لمدونتي
ثانيا تشابه التعليقات و تركيزها على المجاملة و المحافظة على روابط المودة
و هي في حد ذاتها شئ جميل و لكن عندما تتكرر تشعر انك تعينت في جريدة في باب الوفيات و انك مكلف بان تكتب كل دقيقة كلمة
سعيكم مشكور
بحثت عن تحدي فلم اجد
بحثت عن جديد مفيش
بحثت عن هدف ملقتش
و مع ذلك عدت
مش عارفة ليه بس حسيت انكم وحشتوني فحبيت ارجع أغلس عليكم شوية

Tuesday, January 02, 2007

من أول يناير


عملا بالحكمة الشهيرة للمطرب الشعبي المغوار شعبولة((من أول يناير حبطل السجاير))واكون انسان جديد
قررت انا كذلك ان ابدأالسنة بقرارات جديدة و تطورات ايجابية في حياتي
من أول يناير
حخلي في وقت ثابت عندي للرياضة و اخف النت شوية لان قاعدة النت تطلب كباية نسكافية و شوية كرواسون و مفيش مانع من بسكوت او اي نوع تسالي,ححاول امشي كل يوم نصف ساعة و بعد شوية ساعة و يمكن اشترك في ماراثون 2007 من يعرف
من أول يناير
حنظم مواعيد اكلي و ابطل ارمرم بين الوجبات و حتعشى بدري علشان انام خفيفة
من أول يناير
حبطل اخد دواء عمال على بطال و حسيب جسمي يقاوم اي صداع او مغص او دور برد لاني حاسة اني مدمنة دواء و بقيت لو عايزة اسرح شعري اخد دوا
من أول يناير
ححاول اكون اكثر صبرا مع اللي حوليا و متنرفزش, و ارمي ورا ضهري, اي شئ يضايقني و معملش من الحبة قبة
من أول يناير
كقلل من ساعات الفرجة على التليفزيون و انا على النت و حوجه اهتمامي الى القراءة بمعنى اني امسك كتاب و اقرا بدل القراءة على النت اللي قورت عنيا و شتت تركيزي. بلا مبالة انا ببقى فاتحة عشر صفحات لمواقع مختلفة و بقرا فيهم في وقت واحد و انا فاتحة التليفزيون و مفيش مانع اكون برد على تليفون في نفس الوقت
اية الوش ده
لازم اركز شوية ده صاحب بالين كداب
من اول يناير
حعمل وقت ثابت لقراءة القران لاني للاسف مش بختمة غير مرة واحدة في السنة و هي في رمضان و ده عيب قوي و حرام و ميصحش
لازم اخلي وقت و ليكن بعد المغرب مثلا لقراءة جزء ثابت من القران علشان الزم نفسي اختم القران حتى لو مرة كل شهرين
من اول يناير
حرجع ارسم تاني و اطلع العدة بتاعتي القلم الفحم و الالوان و الفرش و الكاتالوجات و امارس احب هواية الى قلبي و اللي كنت بعبر بيها عن نفسي قبل الكتابة و مش عارفة ليه سبتها
من اول يناير
حجيب سيديهات برامج تصميم تعليمية و اقعد اتعلم في البيت عليها زي ما اتعلمت الفوتوشوب قبل كده و اهو فرصة اعمل حاجة تانية علي الكمبيوتر غير النت
من اول يناير
حبدأ احوش شوية بقى لان بيني و بينكم ايدي مخرومة بطريقة فظيعة و لازم اعمل حساب لبكرة
من اول يناير
حبدا اسال على قرايبي و اجمع ايميلاتهم و ارسل لهم باستمرار لان الغربة باعدت بينا قوي و مش بتصل و لا بسأل و انا مقصرة معاهم قوي
من اول يناير
حرتب كل الدواليب و ارمي اللي ملوش لازمة يا نهار ابيض انا عندي كمية كراكيب مهولة لازم اسيب اللي محتاجاله و ادي حد تاني اللي مش لازمني
اكيد انتم كمان نفسكم تبدأوا صفحة جديدة مع نفسكم و ترتبوا افكاركم و تنوا تعملوا حاجات كتيــــــــــر
من أول يناير
ربنا يوفقنا كلنا للخير
و سنة سعيدة عليكم يا حبايبي