Saturday, December 30, 2006

هدية العم سام في عيد الاضحى


إعدام صدام
سجل رأيك
موقفك
إحساسك
و لو على الورق
!!!
تحديث
مؤلم

Thursday, December 28, 2006

على الهامش




لما ماتت خالتهم مسبتلهمش غير مرتبة و لحاف قديم و شوية نحاس مصدي
و مع ذلك بعد الدفن و العزا بدأت الخناقة و كل واحد فيهم يشد في حته

لما هلهلوا اللحاف و قطعوا المرتبة


و كل واحد منهم طلع منها بقطنة


هذا ما يحدث في الصومال



-----




عيد

و عيد


و فين الناس اللي تعيد؟

افرجها يا رب

بالمناسبة


كل سنة و انتم و كيبوردكم بخير

Sunday, December 24, 2006

أطفال الحكومة المشردة

أيوة هي مكتوبة صح
انت مقرئتش غلط
هيا الحكومة المشردة اللي شردت أبونا و بهدلت ولاد مصر و رمتهم في الشارع علشان كلاب السكك تنهش فيهم




أم ماتت و محدش يربي عيالها قوم يترموا في الشارع
أب اتسجن و محدش يصرف على أولاده قوم يترموا في الشارع
أم و أب انفصلوا قوم العيال يترموا في الشارع هربانين من مرات الأب و زوج الأم
إبن شقي ابوه و امه بيضربوه من شقاوته قوم يترمي في الشارع

جميل قوي

و الشارع يتملي عيال مشردة نايمة تحت الكباري و في مواسير الصرف الصحي و في الصناديق و الدنيا برد موت


مشهد هزني قوي و خلاني خايفة ربنا يسألني يوم القيامة
بنتي عندها دبدوب و لقيتها ملبساه هدوم شتوي بتاعة اخوها الصغير
قلتلها ليه كده قالتلي اصل يا ماما الجو برد و خفت يبرد

يااااااه
دبدوب جماد لا يحس و لا يشعر يلبس ملابس شتوية
و عيال مصريين من لحم و دم مرمين في الشارع في عز البرد
طيب يا ربي الواحد يعمل لهم ايه العيال دول
يديلهم هدوم
مش كفاية
حيباتوا فين
ياخدهم عنده البيت
مينفعش البيت حيكفي مين و لا مين
و كمان الخوف من امراض مستوطنة في اجسامهم ممكن تعدي عيالنا
ده غير العادات الشاذة اللي ممكن يمارسوها في بيوتنا
طيب ايه العمل؟؟؟؟؟؟؟؟

فين الست الحكومة؟؟؟؟
فين فلوسنا اللي بندفعا سنويا اشي تامينات و اشي معاشات و اشي ضريبة معرفش اية و نيلة اية
بتروح على المهرجانات و الهشك بشك و على عربيات الوزراء و الفشخرة الكذابة


بجد منك لله يا حكومة يا مشردة عيالنا

ملناش غيرك يا رب نشتكيله
في الأيام المفترجة دي

لم شمل المشردين
دفئ بردهم
اجبر كسرهم
امن روعهم
انصرهم على عدوهم حكومة بلدهم
امين يا رب
اقرأ الحادثة

Wednesday, December 20, 2006

سعيدة




سعيدةٌ أنــا و قلبى سعيد
سعيدةٌ لأنك أنبت من جديد
طفلا صغيرا منمنما وليد
و أصبح جذرك ممدداً شديد
من أنجب لم يمت
و عشتَ العمرَ المديد

Saturday, December 16, 2006

نعم أحبك



منذ أن كان جنينا في بطني و أنا في وهن على وهن
كان حملا صعبا و ولادة شاقة و رضاعة مضنية و ليالي عز فيها النوم و غلا
لم يكن طفلا مريحا هادئا بل كان لا ينقطع عن البكاء و التذمر
أجهدني شديد الإجهاد حتى أني مرضت و هو في الشهر الثالث بسبب قلة النوم
و عندما بدأ يمشي و يتحرك كان عنيدا جدا يصر على أن يمسك المعلقة بنفسه و يأكل و هو لا يجيد التنشين فتدخل الملعقة و تخرج كل حبات الأرز على الأرض
و عندما تكلم كان كثيرا ما يردد سؤال واحد
ماما أنتي حبيني ماما
و كنت اردد نفس الإجابة
طبعا يا حبيبي
و عندما حاولت أن افصله عن سريري لينام في سريره كانت المعارك الكبرى و الخسائر الفادحة
و بجهد جهيد اقتنع أن مكانه ليس بجواري
و إن كنت إلى اليوم استيقظ فأجده نائما على باب غرفتي
و هو اليوم يتم عامه الثاني عشر
و قد خط شنبا رقيق تحت أنفه و استطالت انفه و اخشن صوته قليلا
لا يتورع أن يسألني نفس السؤال
أنتي حبيني ماما
طبعا احبك يا حبيبي الصغير
فمن لي سواك أحبه
أتذكر يوم تأخر أتوبيس المدرسة و نزلت ابحث عنك في شوارع القاهرة
أتذكر يوم ارتفعت حرارتك و كدت اجن من عدم انخفاضها و أنا أضعك في حجري مبلله الملابس لأضع لك الكمادات
أتذكر يوم وقعت فنزفت راسك كيف هرب دمي و تجمدت أطرافي و أنا اجري بك على المستشفى
أتذكر يوم خرجت في المدينة تشتري هدايا العيد و تأخرت و نزلت أجوب الشوارع باحثة لاهثة أدعو الله أن أراك فأضمك إلى صدري
آه يا قلبي كم عانيت في حب هذا الصغير
الذي ما زال يسألني
تحبيني ماما
كل عام و أنت ابني الحبيب
اليوم تكمل عامك الثاني عشر و تنسج خيوط الثالث عشر
أوصيك يا ولدي أن ترأف بقلب أمك التي أحبتك
نعم
احبــــــــــــــــك

Monday, December 11, 2006

من وحي الموت

محاولة انعاش
الصدمة

الافتقاد


الوحدة



محدش بيشعر بالموت الا اللى جربه




الموت اللي اغلبنا بيشعر انه بعيد عنه




رغم انه اقرب لينا من انفسنا




.


Friday, December 08, 2006

صورة و تعليق


هكذا نحن دوما

Monday, December 04, 2006

شعرة معاوية

هل جربت عزيزي القارئ ان تفقد لغة الحوار مع من تحب؟
ان تتحول كل اقوالك معه الي اشواك ورد تؤذي بقدر ما تسعد و تمتع

هل جربت ان تنقلب عليك أمواج الصفاء و الود فتختلط مع ماء المحبة حبات رمل القاع فتعكره و في نفس الوقت يصعب الوقوف امام تلك الموجات العاتية

هل جربت ان ينفرط عقد الاخاء حبة ..حبة حتي لا يبقى في يديك غير خيط حريري رفيع ان شددته انقطع و اصبح لا قيمة له؟
عزيزي القارئ
انا قد مررت بهذه التجربة
فقد كان لي صديق ,جاد علي به الزمان, فاشرق في ليل بارد و ملأ حياتي بالدفء فنعمنا سويا بعصور من السعادة و الايخاء و الود و التوحد حتى ظننا في كثير من الاحيان اننا شخص واحد ,له نفس الطباع و الخصال و حتى الالام و الامنيات
كثيرا ما ضحكنا و كانت لضحكاتنا معنى خاص في زمن الجدية الذي نعيشه
و لكن
و دائما هناك لكن
تغير الصديق او ربما تغيرت
فحل الشك و سوء الظن مكان الثقة و الود
و اطلقنا لسهامنا العنان كي ترتشق في قلب كل معني جميل زرعناه يوما
و تبدد الود و الايخاء و السعادة كتبدد السحاب البارد في يوم صيف حار
و صرنا امام لهيب الشمس الحارقة شمس الخصام و تبادل الاتهامات

كثيرا ما تمنيت لو كنا احتفظنا بشعرة معاوية
تلك الشعرة التي قال فيها معاوية لو ان بيني و بين الناس شعرة ما انقطعت فلو شدوها رخيتها و لو رخوها شددتها
تلك الشعرة التي تمكنك من التواصل مع خصومك في مساحة تبادل السلام بدلا من لقائهم في ساحة الحرب و القتال
تلك الشعرة التي انقطعت رغما عني و.. رغما عنه

و هكذا لم يتبقى في جعبتي الا الندم ربما على ما حدث و ربما على ما يحدث كل يوم و ساعات كثيرة يكون الندم على مجرد الخروج من عالمي الي عالم البشر

Wednesday, November 29, 2006

أنا و الضرير




كان بيسالني عن كل حاجة حواليه عن شكل الالوان و شكل الشجرو كان بيقولي اوصفيلي السما و اية الفرق
بينها و بين الارض! كان بيسالني اية الفرق بين الليل و النهار! و ازاي بعرف ان واحد فيهم غاب او التاني
جه!و ازاي بتيجي الشمس و ازاي تغيب
بإختصار
كان بيشوف الدنيا بعنيا

كتير كنت بقدر اجاوب و ساعات مكنتش بقدر اجاوب و الغريبة اني لما كنت بعجز عن الاجابة كان بيجاوبني هو

و كانه من البداية مكنش بيسال علشان يعرف لا كان بيشوفني عارفة و لا لأ

كان معتمد عليا في حاجات كتير و انا طبيعي فاهمة ليه

لانه مش بيشوف بعنيه و محتاج حد يدله الطريق ازاي

و يقوله شكل الحياة اية
و اتصدمت
لما عرفت انه
بعد السنين دي كلها
مكنش اعمى و لا حاجة

بل مفتح... و بيشوف!!! بس ادمن يشوف الدنيا في عنيا و اتعلق بوصفي للحياة
و ان عماه الحقيقي كان جوه قلبه اللي مقدرش يفرق بين الصداقة و الامتلاك

و لما حاولت ابعد.... ثار و هاج و ماج و شفت منه الوش الغريب

شفت امتلاكه لعقلي في عنيه و انا مش ملك الا للي خلقني

بعدت و قلت اكفي خيري شري

لكن دايما كان يدور على الحياه اللي ذاقها من اديا و يعدي بحور و جبال و الاقيه قدامي بيلعن في يوم ما شافني

طيب ليه؟

لما انا مبقتش الزم و الحياة مرة معايا

ليه بتبحث عن شقائك و لا متهني بشقايا
ليه لسة فاكر كل كلمةو كل فكرة او حكاية
ليه بتسال عني و تعيد الرواية
ليه عاملني متهم و انت قاضي القضايا
ليه

ليه بتدور عليا
!

Friday, November 24, 2006

فلان القـــــــــرد

من وحي الخيال:

كان لا يتمتع بأي قدر من الجمال بل أنه كان معروفا في الحي و العمل و من قبلهم المدرسة و الجامعة بفلان القرد فقد كان وجهه قريب الشبه بالقرود علاوة علي شعره الكثيف الذي يملأ رأسه و يظهر ممتدا من صدره الي رقبته و كان صوته الأجش يكمل الصورة و يلصق به اللقب عن جدارة ,كان فلان القرد رجلا طيب يعيش في شقة في حي متوسط وحيدا بعد أن ماتت أمه و فشلت محاولاته في العثور على عروسة ترضى بأن تكون زوجة القرد و كان في الصباح يذهب الي العمل و في المساء يتجول في شوارع المنطقة يلقي السلام علي كل من يراه و يجلس يتحدث مع أصحاب المحلات و يسأل عن الغائب و يبادر بعرض المساعدة لأي محتاج ,فكان معروفا بشهامته و طيبته وحسن خلقه ,و لا انسى له أنني عندما تخرجت من الجامعة عرض علي أن يجد لي عملا في الشركة التي يعمل بها و بالفعل توسط لي عند المديرين لأتعين تحت التدريب و ما لبثت أن تعينت تعيين ثابت بعدها لأحظى بفرصة يتمناها الكثيرون ,و كان فضولي يدفعني أن أسئله لماذا لا تتزوج نريد أن نفرح بك فيرد مبتسما :ربنا يكرمك .و كان إذا عرض عليه أحد الجيران عروسا تبسم و قال :كل شئ نصيب
كأنه كان يعلم ما يخبأ له في حقائب الأيام ,حتي حدث يوما أنه مرض و غاب عن العمل فما كان مني الا أن زرته فوجدت حالة بيته يرثى لها فوصل بي الفضول منتهاه و سألته ليه مش عايز تتجوز لحد دلوقتي؟ فرد في إبتسامه في عمقها المرارة:
و مين دي اللى ترضى تتجوز فلان القرد!!
وكانت صدمة لي أنه يعرف الإسم الذي يتهامس به الناس من وراء ظهره و الذي أطلقه عليه أولاد الحي فإحمر وجهي خجلا و قلت :أنت طيب و إبن حلال و في بنات كتير تتمني تتجوزك و نقلت دفة الحوار الي موضوع أخر بعد أن فجر في وجهي قنبلة معرفته بلقبه .
و ذات يوم رزق زميل لنا في العمل بمولود و عرض عليه فلان القرد ان يذهب معه الي حلقة الغنم لإختيار شاتا جيدة تصلح للعقيقة و ركب معه سيارته و توجها الي حلقة الغنم و اشتريا شاتا و رفض أبو المولود أن يضع الشاة في سيارته الجديدة,حتى لا تتسخ, فعرض عليه فلان القرد أن يركب هو مع سائق سيارة نقل صغيرة و يقود أبو المولود سيارته وراءهم في طريقهم للبيت و وافق الطرفان ,و كان الليل قد رسم الرطوش الأخيرة في اللوحة المعتمة. و جاء سائق سيارة للشحن مسرعا ليدلي الستار علي حادث مروع هشم السيارة التي يستقلها فلان القرد, و هشم معها أخر ملمح من ملامحه ,دخل فلان القرد الإنعاش و كانت حالته خطيرة حيث أصيب بكسر مضاعف في الجمجمة و جروح متفرقة أغلبها في رأسه من أثر تكسر زجاج السيارة و ارتشاقه في وجهه و ذهبنا لنزوره في المستشفى.

و كانت المفاجأة أن استقبال المستشفى يعج بأهل الحي و أصدقائه و زملائه و كل من يعرفه فكل واحد منهم يحمل له جميل أداه له في حزنه قبل فرحه و رأيت عيونا قد أدمعت و أكف قد رفعت و عرض كل واحد من الحاضرين أن يساهم في مصاريف العلاج بالمستشفى فكانت مظاهرة حب في من يتقدم بدفع نقود تحت حساب العلاج, إلا أن زميلنا أبو المولود أصر أنه المسئول و لابد أن يتكفل بالمصاريف كاملة.و أمام باب الإنعاش اكتظ الحاضرون كل يريد أن يطمئن و يلقي نظرة على فلان القرد .إلا أن الأطباء رفضوا و منعوا الزائرين من الدخول و بحكم أني جارته عرضت علي الدكتور أن ادخل لأراه و اسأله إذا كان يريد أي شئ من بيته احضره له و وافق.كان رأسه مغطي بالشاش لا يظهر منه غير مخرج بسيط للتنفس و خراطيم الهواء و كان يبدو انه بعد سبع ساعات في حجرة العمليات ان حالته خطيرةاقتربت منه متماسكة مبتسمة هامسة :ألف سلامة يا فلان إن شاء الله تقوم بالسلامة بسيطة ان شاء الله
فرد علي بصوته الأجش: الحمد لله الإصابة جت في الرأس و معدش حد يقدر يبص في وشي اخيرا حريح الناس من منظري البشع
صدمت لرده و قلت:متقلش كده الناس كلها بتحبك و قلقانين عليك و بيدعولك تقوم بالسلامة
قاطعني بصوت متعب:انا كنت بشوف في عنيهم السخرية و القرف لما بكلمهم
قلت:ابدا مش صحيح دول بيحبوك
قال:بيحبوني ازاي و هم كانوا كل يوم بيقتلوني بنظراتهم
قاطعنا الطبيب قائلا :كفاية كده سيبيه يستريح
سألته : مش عايز حاجة من الشقة او اي حاجة؟
قال:ربنا يكرمك
و ما هي الا ساعات حتى رحل فلان القرد عن دنيا المظاهر و الأشكال ليترك أصحابه و جيرانه يبكون دموعا علها تغسل الدماء التي نزفت من قلبه بسبب خناجر نظراتهم له
و إكتشفناجميعا أننا قتلناه من قبل أن يموت.

Friday, November 17, 2006

يا وحشة كوني نغشة

النهاردة اعزائي البلوجرية حناقش معاكم موضوع الجمال
و ازاي اننا بنختلف في تقيمنا للجمال
فممكن جدا اللي انت تشوفه جميل ميعجبش غيرك
و دي نماذج لجمال(....)و

دي صورة ملكة جمال كفر بطاطا سنة 99













و دي ملكة جمال الشاطئ في مسابقة ابو رواش السنوية

و الغريبة انك تلاقي راجل زي الفل متجوز وحدة وحشة طحن و العكس صحيح


ايه الفكرة في كده؟
و انت ترضى تتجوز وحدة وحشة؟
و انت ترضي تتجوزي واحد وحش؟
هل فعلا الجمال جمال الروح؟
و لا لازم الشكل كمان يبقي حلو؟

زمان







قالوا في المثل
يا وحشة كوني نغشة
الترجمة البوست الجاي

Monday, October 30, 2006

الصحبجية

أنواع الصحبجية
المصلحجية
اللي يعرفوا فين المنفعة من وراك و يعقدوا يسحلبوا و يتدحلبوا لحد ما ينالوا مرادهم منك و بعد كده و لا يسئلوا عنك و لا حتى بميسد يتيمة

الفقرجية
اللي يقعدوا يدقوا في الهم و يغربلوا فيه طول الوقت و ينكدوا علي اهلك و يا ويلك لو حاولت أنت تشتكي من مشكلة عندك يسبوك و يخلعوا

الحسودجية
اللي طول الوقت علي لسانهم يا بختك و لو علي سواد شعر الاقرع و اللي زي دول يوصلوك للقبر و يقفوا يأخدوا العزاء و يقولوا يا بخته ارتاح


اللؤمنجية
اللي يعرفوا منك كل أخبارك و تفاصيل حياتك و هم و لا تقدر تعرف عنهم و لا حاجة كل مشاريعهم في الخباثة


الهمبكجية
اللي اول ما يشوفوا وشك يقولولك انت فين يا راجل واحشنا و اول ما تديلهم ضهرك ينسوا اللي خلفوك و احلي بلوك و ريموف


البمبجية
اللي يوعدوك و يخلوا بيك و تكون مظبط مواعيدك علشانهم و هم و لا علي بالهم و اجمل سوري و ارق معلش و لا ليلى مراد مع حسين صدقي في فيلم حقك عليا متزعلشي

الطناشجية
اللي تتعشم فيهم يساعدوك في حاجة أو يدلوك علي طريق و يهبدوك أهدى طناش بفيونكة و على حسب وداد قلبي يا بووووي و قلت يا واد طنش خالص


الاسفينجية
اللي يقلوزوا لك الإسفين المعمر و ينشنوا في مقتل و بووووم ترقد منه متقمش إلا بعد الأربعين يوم و يا أم المطاهر رشي الملح على الواوا

المزاجنجية
اللي كل يوم بمزاج شكل حبة فوق و حبة تحت و حبة عدوية و حبة ريكو و لما تسال عليهم يتنكوا عليك و لما تبعد عنهم يسألوا عنك و دول ينطبق عليهم المثل اللي بيقول (عبر ال....ينجعص لورا) و اللي حيعرف مكان النقط يخليه في سره و ليه جايزة سيفون تلاتة اوبشن شفط و طرد و بوفتيك


وهكذا احبائي لا تخلوا حياة كل منا من احد الصحبجية المذكورين
هذا طبعا و ليس من البلوجرية
احد من هؤلاء
الصحبجية

تنوين=محلوظة

هذا و من يجد في نفسه أي خصلة من هذه الخصال فهو ليس المقصود بالذكر و إنما اللي علي رأسه بطحة يحسس عليها


Tuesday, October 24, 2006

كلبوزة علي الجبل اقوي افلام العيد


من زمان و انا اسمع صديقاتي السعوديات و المصريات يقولوا ان الطائف جميلة و فيها جبال خضراء و لا جبال لبنان و فيها شلالات و تلفريك و مستعمرات قرود و مناظر طبيعية خلابة و بما اني في اجازة العيد فقلت ارفه عن نفسي عن اولادي و نسافر الطايف
قال اية نتفسح
و بعد صلاة العيد لبسنا الجديد و اخدنا الشاي و القهوة و الكحك و شوية قراقيش و شرخنا علي الطايف
قالوا ان الطريق مش بعيد يعني فركة كعب كده و كانت اول صدمة ان الطريق من جدة للطايف حوالي 3 ساعات في طرق وعرة بين الجبال الشاهقة و منحنيات عالية علي حافة الجبال و صخور متساقطة من هنا و هناك طوال 3 ساعات من فيلم الرعب اللي قمت ببطولته اول ايام العيد و حقق ايرادات منقطعة النظير
حيث لم يحضر احد العرض غيري انا و اولادي و جوزي المسكين.
مطولش عليكم قولوا طولي
وصلنا الشفا و ده عبارة عن جبل عالي فية استراحات و منتجعات سياحية و متتغروش من كلمة منتجع ده و اوعوا تتصوروا ان في سويمنج بول و لا سونا و لا جاكوزي لا قدر الله
المنتجع المحروس ده عبارة عن غرف فندقية عالية الجودة في البناء و التاثيث و متواضعة النظافة تدخل جواها و تقفل عليك الباب و تقعد تتفرج علي الدش يعني تسيب بيتك و تطخ مشوار مقندل علشان تجعمز قدام شاشة التلف ازرون
المهم كانت تاني صدمة ان الجو برد جدا هناك غير جو جدة الدافئ و انا مش عاملة حسابي في اللبس و رايحة صيفي انا و العيال و ابوهم
و الصدمة السبعتاشر ان مفيش مطاعم مضمونة للغدا يعني كلة نظام المطبخ العربي للمظبي و الحنيز و الزربيان و طبعا اسماء الحاجات دي من الاساس تسد النفس و خصوصا الزربيان ده
و الصدمة الثالثة و الاربعين اننا حنضطر نبات لان الطريق الطويل ده مينفعش نرجعه في نفس اليوم و اننا نفسنا ننام و حنصحي علي المغرب و الطريق مفيهوش انوار يعني ظلام دامس و مع الجبال و المنحنيات كانت العودة حتبقى عبارة عن فيلم رعب بعنوان
كلبوزة في القرافة
فضلت عدم القيام ببطولته السنة دي علي اعتبار ان العمر مش بعزقة
طيب اوكي حجزنا احد الاجنحة الفندقية و جعمزنا كلنا تحت البطاطين قدام التليفزيون و قضينا ليلة بائسة من البرد بعد غدا خفيف من الجبن المحفوظة و المربي و العيش الصخري
طيب يا بشرية بقي ننام من المغرب يا طايف!!!!؟
الوكسة الكبيرة بقي اني لا لقيت شلالات و لا بطيخ لقيت شلل بس من غير ات
و الجبال الخضراء عبارة عن جبال كالحة الخضار من النباتات البرية و ساعتها افتكرت مصر و جمال طريقها الزراعي و جمال خضار الحقول الممتدة في كل مكان
عمار يا مصر
الشيء الوحيد الصدق في الكلام اللي سمعته هو
مستعمرات القرود
لقيناهم علي الطريق و احنا ماشين ووقفنا السيارة و حدفنا لهم سوداني و موز من شباك العربية بس كان في قرد كبير بس هو المستولي علي كل الاكل و مش مدي فرصة لحد تاني ياكل
تصوروا ان اولادي حدفولوه كحك و اكله هههههه قرد نفسه حلوة مبيدقش
(صورة القرود مش راضية تظهر اللي عايزها يروح الطايف يشوفها بس اوعى يدعي عليا)
و رجعنا في ثلاث ساعات اخري من القلق و التوتر لان الطريق مخيف علي سفح الجبل و ملتوي و في صخور متساقطة من الجبال زي ماقلتلكم
و زاد و غطي اننا دخلنا يمين غلط في طريق رايح جاي في نفس الشارع من غير جزيرة في النصف و ملوش مخرج حاجة كدة بتاعة 30 كيلو اونطة
كانت رحلة مؤلمة
رجعت منها عندي احباط و ضغط عصبي نمت زي الفسيخة و استخلصت حكمة بالغة الاهمية
هي
من خرج من دارة
انقل مقداره
و كل اجازة عيد و انتم بخير
بحبكم

Saturday, October 21, 2006

عيدكم مبارك




كل عام و أنتم بخير

أسأل الله أن يتقبل صالح عملنا و يتجاوز عن سيئاتنا و يعيد علينا الأعياد بخير و صحة و سعادة

لكم حبي و ودي و سلامي

Thursday, October 12, 2006

اقتربت

احرص على قيام العشر الأواخر من رمضان , ولو اضطررت إلى تأجيل الأعمال الدنيوية
فلعلك تحظى بقيام ليلة القدر , فإن قيامك فيها تجارة عظيمة لاتعوض
اللهم بلغنا ليلة القدر
و أعنا علي قيامها
ووفقنا للعمل الصالح فيها

Friday, September 29, 2006

عمرة في رمضان-حجة مع الرسول


لبيك اللهم عمرة

من ساعة ما نويت اعمل عمرة و أنا حاسة بسعادة و انشراح و تسامح مع كل اللي حوليا و لما ركبت السيارة في طريقي إلي الحرم المكي حسيت بنعمة ربنا العظيمة عليا و أد اية في ناس في كل العالم أحسن مني و لكن محرومين من نعمة القرب من الحرم و بيعيشوا و يموتوا و هم نفسهم يعملوا عمرة و مش قادرين لكن أنا بفضل الله رايحة اعمل عمرة رغم كل ذنوبي و قلة عملي إلا إن الله بعطفه و كرمه أراد لي الخير.

و في الطريق إلي مكة كان معايا كتيبات فيها صفة العمرة و ما يستحب من أدعية و قعدنا نقرا فيها أنا و أولادي استعدادا لاستقبال أول أنوار منازل مكة و مخبيش عليكم الطريق كان زحام رغم إن الساعة كانت حوالي حداشر ليلة الجمعة لكن السيارات اللي رايحة مكة كانت كتيرة و اللي راجع منها كمان كانت اكتر و رسمت أنوار السيارات احلي لوحة لعقد احمر رايح و عقد ابيض جاي

.و الحمد لله وصلنا و ركنا السيارة في مواقف الرصيفة و دي مواقف مخصصة للمعتمرين القادمين من جدة و غيرها و طبعا المواقف علي وسعها كانت مليانة سيارات و سمعنا صوت بيقول:

حرم حرم حرم

و ده صوت سواقين السيارات الأجرة اللي بيستقلوا المعتمرين إلي الحرمركبنا و احنا بنقول بصوت خافت :

لبيك اللهم لبيك لبيك لا شريك لك لبيك

و مع أول اشراقات أنوار الحرم المكي الشريف تنهال عليك العبرات و تنشرح نفسك و تبقي عايز تطير لحد جوه

اللـــــــــــــــــــــه

اول ما تدخل و تنزل سلالم قليلة تلاقي الكعبة

بيـــــــــت الــــــــلــــــه

ما أجمله و أشرفه و أكرمه قشعريرة حب و إجلال لله تسري في بدنك و تلاقي رجليك بتجري لعنده
و تشوف منظر رائع افواج من الناس لابسين ابيض بيلفوا حولين الكعبة في تنسيق جميل

و مع استلام الحجر الأسود- من بعيد طبعا للزحام الجميل و بقول جميل لان ما فيش احلى من التهافت علي طاعة الله

ابتدت العمرة سبعة أشواط من الدعاء و الاستغفار و التوسل إلي الله -و اقسم بالله إني دعيت للمدونين و المسلمين كلهم بظهر الغيب

أما المعتمرين فيا الله عليهم من كل حدب و نسل أشكال و ألوان مختلفة و لغات و لهجات و بعثات من أقصى بلاد الأرض كلهم لابسين ابيض

و لا انسي مرة من حوالي عشر سنين رأيت رجل عجوز يطوف و حامل فوق ظهره سيدة عجوز جدا في الغالب أمه منظر لا يمكن أن تنساه و لا تراه إلا في الكعبة الطيور تطير في صحن الحرم و تشدوا بصوت فريد و كأنها جنود الله جاءت تلبي مثلنا

لبيك اللهم لبيك

و مع انتهاء الشوط السابع صلينا ركعتين أمام مقام إبراهيم و ركعتين بنية الصلاة في حجر إسماعيل و طبعا في مكان بعيد عنهما لان زي ما قلت لكم الزحام كبير و عظيم و شربنا من زمزم و لا اخفي عليكم ان لماء زمزم طعم فريد يستغربه من لا يألفه و لكنها غير كل المياه لا ترتوي منها ابدا و لو شربت جالون ماء و هي كذلك لما شرب له يعني الدعاء بعد الشرب منها مستجاب باذن الله

و بدا السعي سبعة اشواط بين الصفا و المروة حشود من المسلمين من كافة بلاد الأرض مقدرناش نسعي من الدور الاول و طلعنا الدور الثاني لأنه اقل زحاما و بين النورين الخضر يهرول الرجال و تمشي النساء و يقولوا جميعا

ربي اغفر و ارحم و أعفو و تكرم و تجاوز عما تعلم انك تعلم ما لا نعلم انك أنت الله الأعز الأكرم

واحد يحمل ابنته فوق كتفه إشفاقا عليها من التعب و المشي و امرأة حامل جلست علي كرسي متحرك و رفعت أيديها إلي السماء داعية الله عز و جل و رجل عجوز يلبس الإحرام الأبيض و يهرول و أطفال صغار يجرون فرحا و مرحا بالحدث العظيم.

و أحب أقولكم إني ممتنة جدا لرجال الأمن و النظافة في الحرم و ربنا يجازيهم كل خير بجد بيعملوا بكد و جهد لراحة المعتمرين و زوار الحرم.

و رغم انك بتبقي تعبان جدا مع الشوط السابع و حاسس إن نفسك تقعد علي الأرض و ترفع رجليك إلا انك بتبقي حزين إن العمرة خلصت و بتتمني انك ترجع تبدأ من الأول

تحللنا من الإحرام بقص أطراف من شعر الرأس و جرينا علي المواقف علشان نلحق تنسحر لان الساعة بقيت أربعة الفجر و فاضل اقل من ساعة علي الفجر.

و هكذا عدنا من العمرة التي اسأل الله أن تكون عمرة مقبولة و أن يغفر الله ذنبنا و يرفع أجرنا و لا يحرمنا جميعا زيارة بيته الحرام.

آمين

Friday, September 22, 2006

هل ستصوم رمضان حقا؟؟؟


كل عام و أنتم الي الله اقرب
رمضان كريم

Sunday, September 17, 2006

عشرة مرق و عشرة خرق و عشرة حلق

كنت اسمع ستي (اللي هيا جدتي) تقول رمضان عشرة مرق (يعني طبيخ و اكل )و عشرة خرق (يعني تجهيز لبس للعيد )و عشرة حلق( يعني عمل الكحك و الغريبة و المنين)ن
و لما كبرت شوية بقي رمضان يعني ليا الفوازير و نيللي و عمو فؤاد و السهر للفجر و النوم لحد العصر
و لما كبرت شوية كمان اكتشفت الحقيقة
يا نهار ابيض
ده رمضان حاجة تانية خالص غير العبط اللي كنا بنعمله و احنا صغيرين ده
ده شهر في السنة للتقرب من الله و غسل النفس من الذنوب و استغلال فترة الصيام و النقاء الروحي اللي فيها في التعبد و التدبر و معرفة قد اية الواحد ميسويش علشان يبقي ضايع و مفيص من قلة الاكل
و هو اللي عامل جن بقية السنة
رمضان مش السهر في الخيمات الرمضانية (نفسي اعرف ابن شوز مين اللي سماها كده)اللي مليانة غناء و رقص و اختلاط و شيش و بلاوي سوداء
رمضان مش نوم للعصر و صيام تلات ساعات قدام التليفزيون
رمضان مش حداشر مسلسل يستلموك من اول الفطار لحد ما تتسحر
رمضان مش حشو بطن و حلو و حادق و ساقع و سخن و عزومات كل يوم
يا ربي
ده رمضان ده فرصة لازم نغتنمها
استعدوا معايا لرمضان

Thursday, September 14, 2006

استعداد

طول ما هو موجود أنا حاسة باطمئنان و سكينة و هدوء
و لما يمر أحس انه مقعدش كتير و ملحقتش اشبع منه
و كل مرة أقول لما يجي تاني حستغل كل لحظة معاه و مضيعش أي وقت

صحيح هو شهر كريم الناس كلها بتبقي كرام فيه و في تسامح بينهم
و الصلاة فيه لها طعم تاني و قراءة القران و حلاوة ختمه مرة أو مرتين
أما بقي عن الدعاء فالله عليه قبل الفطار و الواحد مفيص و صوته مش طالع و بيحس إن روحه صافية و مش عايز حاجة من الدنيا غير رضا ربنا ثم كباية مية تروي عطشه

أنا بحب رمضان و عايزة استعد له
حبيبي قرب يجي و لازم استعد نفسيا و انظم وقتي
علشان استغل كل لحظة فيه
فاغتنام حسنات و رفع درجة
حتستعدوا معايا؟

يا عالم حيمر علينا تاني و لا لأ
يا رب بلغنا شهر رمضان أعوام عديدة

Sunday, September 10, 2006

كلنا ليلي -سبع صنايع و البخت ضايع


هذه هي ليلي العربية
لها سبعة أيدي و أرجل تعمل بلا راحة و لا يوم أجازة
و في المساء لابد ان تكون
هند رستم
حتي تُرضي ادم سيد الدار و تقضي معه ثواني حمراء
ثم ينقلب هو علي الجانب الأخر
ويتركها هي تعاني باقي
الســــــــــــــاعات الســــــــــــوداء
المدونة الأم

كلنا ليلي- لقطات-

1
كانت تظن و هي تودع بيت والدها منتقلة الي بيت الزوجية أنها تودع أخر أيام
الإستبداد و التحكم ولكنها قد خرجت من زنزانة لتوضع في معتقل اّخر تحت الأرض . الزوج اكثر تحكما و اشد استبدادا لا يسألها رايها عن شئ و لكنه يعاملها كخادمة ليس لها الحق في تحديد حتي ما ياكله سيدها و انما يملي هو عليها كل الاشياءحتي ظنت انه قد يملي عليها اوامر بان تتنفس او تختنق
2
استغل كل من تعرف ظروفها فمنذ سافر زوجها و هي وحيدة مع أولادها تحاول أن تكون الأم و الأب و لا يراها الناس إلا حمامة وحيدة يترقب كل منهم متي تسقط فيذبحها و يأكلها و جاهدت كي تطير بلا توقف و أن تبدو قوية رغم صعوبة الأجواء
3
سافرت الي الخليج لتعمل هناك طبيبة و تدخر من المال ما يعينها علي الزواج و لكن مرض والدها الفجائي غير خططتها و بدأت تحول كل مدخراتها الي مصر لتصرف علي علاجه و شهور قليلة و توفي والدها ليترك لها أمها و ثلاث أخوات أصغر منها حمل في رقبتها
أضطرت أن تتحول الي رجل يرفض الزواج من أجل الحفاظ علي مستقبل أخواتها
فمن يصرف عليهم لو تزوجت و أي رجل يقبل أن يحول راتب زوجته إلي اهلها
فاتت السنين و تزوجت أختان و الأخت الثالثة مازالت تدرس
و أصبحت هي في الأربيعينيات
و فات قطار الزواج بغير رجعة
---------------------
و هكذا لا تنتهي اللقطات
البطلة واحدة
و لكن الاحداث تختلف
و ان توحدت النهايات
قهر و ذل و حرمان وضعف و انكسار
هذه هي الخماسية التي تدور فيها
ليلي

المدونة الأم


Saturday, September 09, 2006

كلنا ليلي- ظلم و قهر


هدى جارتنا من حوالي عشرين سنة كانت جاية عروسة جميلة و كان الجيران بيقولوا ان بيتها متوضب و فيه من الابرة للصاروخ و كان جوزها راجل تاجر صاحب محل في الازهر و كسيب و الاشية معدن
و بما اني كنت طفلة رغاية و حشرية فكنت لما اشوفها واقفة في البلاكونة بتاعتها اللي لصقة في بلاكونتي ميفرقش بينا غير دور كنت اقعد اكلمها و اسئلها و احكيلها اخبار البيت كله طابخين اية و ماما اتخانقت مع بابا و حنروح فين بالليل و و و لوكلوكلوكلوك
و هي كانت بتحبني جدا لدرجة انها سمت اول بنت جاتلها علي اسمي
هي في الواقع مخلفتش غير ثلاث بنات سمعت انها لما حملت في البنت الثالثة جوزها زعل و امرها تسقط الجنين
و هي علشان ساذجة و متعلمتش راحت جابت بيرة و قعدت تشرب قال اية ولاد ال...قالولها ان البيرة بتسقط
و طبعا و لا سقطت و لا بتاع و جابت بنوتة تالتة
المهم انها بعد حوالي خمس سنين من الجواز احوال جوزها المادية اتلخبطت و بدات تبيع حاجات من عفشها و بدات بالغسالة الاوتوماتيك المستوردة اللي كانت كل جارتها بتحسدها عليها
و تلاها باقي الاجهزة الكهربائية و بدء يبان عليها و علي لبس بناتها اللي كان كله شيك و غالي ان ظروفهم المدية اتدهورت
في الاول كنا فاكرين انها مسالة ارزاق و السوق يوم فوق و يوم تحت
و لكن عرفت الحقيقة لما عرفت من واحدة زميلتي في المدرسة انها بتشتغل عندهم شغالة باليومية و انها اضطرت تعمل كده علشان تصرف علي بناتها بعد ما جوزها ادمن المخدرات وبقي كل فلوسه رايح علي الحشيش و الافيون و جلسات المزاج
صعبت عليا جدا و سالت نفسي لية متطلقش منه و تسيبه و ترجع بيت اهلها معززة مكرمة
و كانت الاجابة محزنة ان مفيش بيت اهلها طبعا بعد عشر سنين جواز ماتت امها و بيت العيلة بقي بيت مرات اخوها و كل اخت و اخ ليها فيهم اللي مكفيهم و محدش ممكن يستحمل ست معاها تلات بنات بهمهم و مصروفهم
و استجدعتها قوي انها فكرت تشتغل و لانها زي ماقلتلكم مش متعلمة مكانش قدامها غير الخدمة في البيوت و كانت حريصة قوي انها متعرفش حد في الشارع انها بتشتغل خدامة علشان كرامة بناتها و رغم دخلها المتواضع الا انها مكنتش مخلية البنات نفسهم في حاجة كل اللي يطلبوه تدبأ و تجيبه
اما جوزها فاهمل تجارته و مبقاش يروح المحل و الحالة بقت ج
حاولنا نساعدها بشتي الطرق و رغم حوجتها الا انها كانت عزيزة النفس

السؤال
مين المسؤول عن اللي وصلتله الست دي من ضعف نظر و دوالي في رجليها و حيل مهدود و هي اللي كانت ست بيت بقت تخدم في البيوت!!؟؟
لحد امتي حتفضل الست عبدة لتصرفات جوزها و جنونه و استهتاره اللي مبيأذيش حد غيرها!!؟
مين الهيئة المسؤولة عن رعاية المتزوجات و المطلقات و الارامل و توفير فرصة عمل شريفة كريمة ليهم!!؟؟
و امتي وزارة الشئون الاجتماعية حتعرف ان الخمستاشر جنيه معاش الإعانة دي مبقتش تأكل عيش حاف!!!؟؟؟
القهر و الظلم و الحوجة
ثلاث وحوش بتنهش في لحم كتير من سيدات مصر و الحكومة و الاهالي واقفين ساكتين

لحد امتي الست حتفضل تعشش و الراجل يطفش!!؟


المدونة الأم

http://laila-eg.blogspot.com/

Tuesday, September 05, 2006

دكانة الكشري


بما إني اكتشفت إن شغلانة خاطبة البلوجرية مش بتأكل عيش و إن معظم البلوجرية يفضلون الإنحراف أو بمعني اخر ملهومش في الجواز و عاملين روحهم مش عايزينه عملا بالمثل القائل
عيني فيه إخيه عليه
فأنا قررت من هذا المزنق إني
أغير نشاطي
و عليه فهيلا بيلا جمعت مشابك الغسيل و طلعت السطح و نشرت لكم البوست ده
و ناوية أاجر مدونة من الباطن و افتح دكانة كشري للبلوجرية الشقيانين
صاحبة الفكرة الحبيبة
و اهي سبوبة الواحد يسترزق منها أنتم عارفين داخلين علي مدارس و رمضان و كسوة الشتا و يجعل بيوت البلوجرية عمار
و اية هيا فكرة الكشري؟؟!!!
الكشري عبارة عن رز و مكرونة و عدس و حمص و شعرية و صلصة و دقة و بصل محمر
شغلانة يعني
و ميزته أنه متنوع المكونات و بينفخ
(محلوظة بعد الأكل بساعتين مش عايزة أشوف جنس بلوجراوي هنا و بلاش فضايح)
و احنا كمان لازم نكون زي الكشري فينا
طيبة و حنية و شقاوة و ظرف و جدية ونباهة و زكاوة و قدرة علي نفخ الأخرين اذا لزم الامر
يعني هي دعوة لأن تحتوي النفس البشرية علي كل الصفات المتناقضة لكي تكون الشخصية ثرية و طعمة و حرشة
انا ضد ان تكون الشخصية طيبة بس أو ساذجة بس أو شريرة بس
لازم نكون
زي الكشري
----------------------------------
الي اللقاء مع مدونة الرز بلبن بعد الكشري

Sunday, September 03, 2006

إنفلوانزا الحياة

ماذا تفعل عندما تشعر بإنفلوانزا الحياة؟
احساس بتكسير في الإرادة فأنت لا تريد أن تصنع شئ و لست متحمس لشئ
و سخونة في المخ و كأن قطار بالفحم من النوع القديم
بيسخن للقيام بأول رحلة الي القمر
مع برودة في الأطراف
و كأنك دخلت تلاجة بالغلط
مع رشح من العيون بلا سبب أو داعي
و تشعر أن الوضع الوحيد المريح
هو
النـــــــــــــــــــــــــوم العميـــــــــــق
الذي تتمني الا تصحو منه علي الاقل حتي الخطة الخمسية القادمة
ماذا تفعل؟
لو كنت مكاني

Sunday, August 27, 2006

خاطبة البلوجرية

نطت فكرة لدماغي و انا اقرأ مدونة
و لقيت الفكرة بتتقلوظ اكتر و انا بتصفح مدونة
و لقيت ان المجتمع مش بيدي الفرصة للبنت او للولد انه يبني نفسه فكريا قبل بناء اسرة و بيحملهم عبء الاسراع بالجواز حتي لا يقعوا تحت طائلة القيل و القال
و كان قطر الجواز لو فات علي واحدة بيهرسها
او ان ميعاد الجواز زي ميعاد مسلسل الساعة تسعة مينفعش يتشاف في الاعادة
لكل هاذوها قررت ان اقوم بدور
خاطبة البلوجربة
و علي كل بلوجراوي يجد في نفسه المؤهلات ان يترك بيناته في الكومنت و بلاش يحط الصورة علشان في ستات بتتوحم
و علي البلوجريات السكرة اللي علي وش جواز ان يعسكرن في الكومنت و يضربوا براشوت في انتظار بينات كويسة و هوب يعملوا ريكويست و تقع الفاس في الراس
بس محدش يرجع يدعي عليا و يقول منك لله يا خالتي كلبوزة
و في فكرة تانية
البلوجريات المتزوجات امثالي
يعرضوا بينات ازواجهم اللي عايزين يخلصوا منهم
و اهو تبقي ضربتي عصفورين بحجر جبتي عروسة لجوزك و بقي ليكي ضرة
بيدي لا بيد عمر
مين عمر ده؟

و اهو كله في سبيل الجاتوه و تورتة الفرح

Saturday, August 26, 2006

لقطة...و تساؤل

شعر بوحدة بالغة و هو ينظر حوله فلا يجد غير الكثبان الرملية و الصحراء المترامية الملتحمة مع السماء و كأنها علبة احكم غطاؤها عليه, و هو يلعب دور فأر المعمل الحبيس في انتظار تجربة جديدة.

أين الغرفة المكيفة من هذا الحر العميق الذي يكاد دمه يغلي منه و أين الكرسي الوثير من هذا الإسفلت الساخن القاسي الذي تصل إليه حرارته رغم حذاؤه و أين كوب الماء المثلج في هذا العطش الخانق الذي الصق لسانه في اعلي حنكه فظن انه لن يستطيع الكلام بعد الآن.

هل من الممكن أن تزول النعم واحده تلو الأخرى في لمح البصر؟!

و يجد الإنسان نفسه تراجع قرون من التقدم و عاد إلي العصر الحجري لا كهرباء و لا ماء نقي و لا ريموت كونترول يحرك الأشياء و يقرب البعيد و يبعد القريب؟

إلي أي حد نحن ننعم بأشياء لا نقدرها إلا عندما تتسرب من بين أيدينا

أو ربما تواجد النعم الدائم يكسبنا شعور بعادية وجودها, فمن منا يحمد الله علي انفه الملتصق بوجهه طوال ثلاثين سنة و أكثر!

و لم يتوقف عن لوم نفسه, كيف انسي أن أملئ خزان الوقود قبل رحلة كهذه و كيف استحوذ عليّ التفكير لدرجة أنستني ملاحظة كل محطات الوقود التي مررت عليها ,ربما هو التسويف عدو الإنسان الأول.... لا هو النسيان..... أم انه سوء التقدير .... لا في الأصل هو الإهمال .

في الحقيقة هو لا يعرف بالتحديد علي أي شماعة يعلق غلطه, و لكنه قد وجد نفسه في مواجهة حقيقية مع ضعفه و قلة حيلته و هو الذي كان يظن انه فارس مغوار طوال الوقت.

لم يعد متأكد من شيء قدر تأكده أنه يستحق أن يكون الفائز بالجائزة الأولي في اللامبالاة.

Tuesday, August 22, 2006

شنطة سفر

انتهت الاجازة
كما تنتهي كل الامور
عشتها بحلوها و صعبها
اتفسحت و سافرت و ضحكت و حزنت
و جت اللحظة الصعبة
لحظة تحضير الشنطة
و اه من تحضير الشنطة
حاجة مزعجة لا يعرفها الا من اعتاد السفر
و خصوصا لفترات طويلة
يعني لو نسيت حاجة مش حتشوفها الا السنة الجاية و عليك خير
مئات الحاجات عايزة اعملها و كتبت ورقة بيها و علقتها و كل ما احط حاجة في الشنطة اشطب عليها
اقولكم حطيت اية
طاولة صدف من خان الخليلي
قصة يعقوبيان
سيديهات افلام و مسرحيات
كمية دواء رهيبة
عسلية و خروب و بهارات
حاجات جونية
المهم مطولش عليكم قولوا طولي
اتهد حيلي مشاوير
فاضل بكرة ارفع العربية و اغطي العفش و اقفل محبس المية و سكينة الكهرباء
سايبة في مصر حاجات كتير مش حقدر اخدها معايا
سايبة الناس و الأصحاب و الشارع والمية اللي في الحنفية
سايبة الفاكهة اللي ليها طعم و الجو الجميل
عارفة حتقولوا عليه فقرية
بس انا بحب مصر و حتوحشني
جدا
انتم مش حتوحشوني علشان لما اوصل ان شاء الله
و انضف البيت حنطلكم تاني
تعرفوا انا حبتكم جدا و بستناكم تيجوا تعلقوا عندي و بفرح قوي بكل كلمة
ربنا يخليككم ليه
اوسا
انا سايبة شوية رز و زيت في النملية تعالي خوديهم بدل ما يخززوا
تمر حنة
متنسيش تحشري ورقة في شباك الصالة لحسن معصلج مش بيقفل
توتة
اوعي تنسي تشقري علي الشقة و ابقي تعالي اتشمسي في البلاكونة
بعدك علي بالي
متنسيش الجوابات و لما فوانيس رمضان تنزل السوق ابقي هاتيلي واحد
غادة الكاميليا
ابعتيلي جوبات كتير احكيلي عن مصر و اخبارها و طمنيني عنك
نوران
انبي تلمي الملايات من علي المنشر و اوعي تضيعي المشابك
لحسن معرفش انشر المدونة الجديدة
ام مريلة كحلي
كل ما تعدي علي قهوة و تشمي ريحة الشيشة و تسمعي منير بيغني اذكريني
ابيتاف
كان نفسي اركب مركب في النيل بس لاني جبانة مقدرتش السنة الجاية ان شاء الله نعمل رحلة نهرية سوا
الي كل البلوجرية
بحبكم و حتوحشوني
و اللي مصبرني
ان مصــــر بخيـــر طول ما انــــتم فيـــها

Sunday, August 13, 2006

تاج البلوجرية..... السلطنية

يبدو ان جلده الحنفية عندي مسربة و مغرقة كل البلوجرات المجاورة
لذلك انا مرشحة
من قبل اعزائي(ام مريلة كحلي)و(زبادي)لعمل استقصاء
بداية انا مش عارفة اية لازمة الاستسقاء ده
بس اهو تفاريح
لكن لما قرأت مدونة العزيزة اوسا و العزيزة ابيتاف عجبتني الفكرة
لذلك
اقر و اعترف انا كلبوزة لكن سمباتيك ان كل اجاباتي ستكون صادقة
و الله علي ما اقول شهيد
فتحت الجلسة
س هل أنت منشكح من مدونتك شكلاً وموضوعاً؟
ج:لأ كنت اتمني ان تكون في قالب ادبي اكثر تعمق و رومانسية و لكني اخترت القالب الفكاهي لصياغة الوجع المتمركز في ايامي
حلوة متمركز دي
س هل تعلم أسرتك الصغيرة بأمر مدونتك؟
يعلمون انني اكتب علي النت مدونات لكني لم اعطي اللينك لاحد و لن اعطيه لاحد
لاني افضل ان اكون صريحة في كتاباتي و لا اخضع لقيود ازاي و ميصحش و اية ده و الحاجات دي
س هل تجد حرجآً فى أن تخبر صديقاً عن مدونتك؟
اصدقاء معينين ممكن يفهموا و اصدقاء تانين لا
لذلك لن اخبر احد بامرها
الا ان صديقتي تمر حنة هي التي عرفتني علي عالم التدوين و انا منشكحة لذلك كل الانشكاح
س هل تعتبرها أمرا خاصا بك؟
اسم الله عليك بالظبط
س هل تسببت المدونات بتغيير إيجابى لأفكارك؟
مش بالظبط بس حسيت بارتياح لما خرجت افكاري السجينة في اعماقي و شافت النور لاسيما اني اعترف فيها بعقدة الكلبزة التي طالما حاولت الفرار منها
خلعت الكورسية و عيشت علي راحتي ليسي
اه انا كلبوزة و اللي عاجبة اهلا وسهلا و اللي مش عاجبة يسمعني ترقعة شبشبه علي السلالم
هل تكتفي بفتح صفحات من يعقبون بردودهم فى مدونتك أم تسعى لاكتشاف المزيد؟
افتح مدونات اللي بيعقب عندي و منها بعرف ناس تانيين انا بتشدني الفكرة و الناس عندي مواقف
حد تحترمه من اول مدونة و حد تبعتله سونج بودعك
س ماذا يعنى لك عداد الزوار.. هل تهتم بوضعه فى مدونتك؟
بفرح لما حبايبي يجوا يقروا مدونتي و يا ريت اعرف احط عداد للزوار
و يا ريت اقدر اقدم كباية شاي و سميطة لكل زائر
س هل حاولت تخيل سحنة اصدقائك المدونين؟
ههههههههه
ليه بس الطيب احسن
هل ترى فائدة حقيقية للتدوين؟
ايوة مفيد للهضم و مفيهوش بذر
س هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
ربنا ميجبش انفصال
لا طبعا همومنا واحدة و افكارنا متقاربة و حتي لو اختلفنا في تناغم
انا مبسوطة قوي اني بدأت ادون
هل يزعجك وجود نقد في مدونتك؟
لا ابدا كل واحد حر يكتب اللي عايزة مادام في حدود الادب
و عموما انا محبش حد يهاجمني
س هل تخاف من بعض المدونات التى تفتح تابوهات السياسه و الجنس و الدين وتتحاشاها؟
ممكن اقرأ لكن في حدود لكل شئ
اعلق علي اللائق فقط
س هل صدمك اعتقال بعض المدونين؟
يا نهار مش فايت هو في مدونين اعتقلوا؟ مكنتش اعرف
طيب يا اخوانا لازم نلم و نوديلهم عيش و حلاوة
دي اصول ولاد البلجرة الاصلة
س هل فكرت فى مصير مدونتك حال وفاتك؟
لو غبت عنكم اكتر من شهر اعرفوا اني مت
و قولوا الله يرحمك يا كلبوزة متي و نفسك في الممبار
اما عن المدونة
فاكيد وزارة الاوقاف حتخدها من بعدي و يكتبوا هنا كانت تدون كلبوزة
آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟
ممكن فات الميعاد لثومة
اوتخونوه لعبد الحليم
اوحاجة من روائع شعبولا
اكتب اسماء خمسة مدونين ليقوموا بهذا الاستقصاء بعدك خمسة بس؟؟؟
----------------------------------
تمت
تعلن كلبوزة عن بدء حملة رجيم
و ترجوا من الاخوة الزوار عدم احضار اي نوع من انواع الحلوي او المقبلات معهم الي المدونة
و يكتفي بالجزر
منجيلكوش في حاجة وحشة

Saturday, August 12, 2006

ساعة في أمن الدولة

بالليل وأنا قاعدة في البلاكونة و الجو كان جميل قوي
و كنت سعيدة لان الجو عادة بيكون حر في شهر اغسطس
بعكس الليلة
سمعت جرس الباب روحت افتح لقيت واحد طويل زي الحيطة بيقولي
عندك استدعاء في امن الدولة
انا: اية؟ ازاي؟ انا؟
هو:ايوة عايزينك دلوقتي
انا: طيب ..اصل..ممكن اروح الصبح؟
هو : لا دلوقتي حتغيري هدومك و لا تيجي كده
أنا:لأ ح ح حغير
---
ثواني أو ساعات مش فاكرة
دخلت مكتب في مبني عادي مش مكتوب عليه اي حاجة كانها عمارة سكنية عادية
لقيت واحد بيه قاعد علي كنبة سودا في حجرة فيها مكتب و كرسي و مفيش اي لوح متعلقة علي الحيطة
انا: سلاا اممم ع ع عليكم
هو:اهلا
انا: حضرتك اقصد في حد عملي استدعاء خير؟
هو: الست كلبوزة لكن سمباتيك؟
قالها بابتسامة صفراء تنم عن كره غير مبرر

انا: ايوة يا فندم بس ده اسم حركي لزوم البلوجرز يعني
قلتها بابتسامة خجل ممزوجة بمسح الجوخ و رغبة في التلطف
هو:اه و انت بقي عاملة حركة لتغير الحكم و مؤسسة وزارة و
قاطعته
انا:لا لا يا فندم و لا تغيير حكم و لا يحزنون ده احنا عاملينها مزحة من همنا
حركة كلابيز من اجل التغيير
يعني عايزين نغير من نفسنا للاحسن و كمان نغير اللي حولينا من اوضاع مععع
هو:نعم ملها الاوضاع ؟ مش عاجبكم البلد؟ طيب ما تسيبوها و تمشوا و لا انتم بتقوموا الناس علينا؟
أنا: يا فندم احنا معملناش حاجة من دي و لا نعرف بعض اصلا كمجموعة مشاركة في الدعوة
هو: تعرفي المدعو زنجولا
انا: ابدا يا بيه عمري ما شوفته و لا اعرفه
هو: امال مرشحك زعيمة ازاي؟
انا: علشان اسمي كلبوزة لكن سمباتيك يعني من باب اني زعيمة الكلابيز هزار بس
هو:و اية هيا اهداف الانقلاب ده
انا: يانهار اسود انقلاب اية يا بيه و لا انقلاب و لا حاجة
الموضوع و ما فيه ان في مجموعة ناس بيحبوا يعبروا عن نفسهم و تجتمع فيهم صفة الكلبزة و اتفقوا انهم يقترحوا اقتراحات تقدر تقول امال او احلام نفسهم يعملوها و نفسهم يجملوا الواقع من حواليهم او ينفسوا عن نفسهم فقلنا نعمل مجموعة كلابيز من اجل التغيير و كل واحد يتصور نفسه في موضع مسؤولية معين و يشوف حيعمل اية لو بقي في المكان ده
الاخت سوسه المفروسه مثلا حتبقي وزيرة الاعلام و ليها تصورات تتمني تكون في المستقبل و
قاطعني
هو:انت حتحكيلي تاريخ حياتك؟
انا بسالك دلوقتي الحركة دي ليها اي اطماع سياسية؟
انا: ابدا و الله يا فندم
هو: طيب انا سمعت ان في تحريض للناس علشان تشترك معاكي
انا:تحريض اية؟
هو: ايوة سمعت ان في سندوتش مربي لكل بلوجراوي يشترك معاكم و في كمان مكرونة بشاميل و حاجات كده مش فاكرها
انا:هاهاها لا يا فندم دي فنجرة بق بس هو يعني البلوجر فيه اتاتش فايل و لا اتاتش حلة و لا سيند سندوتش
اهو كلام تفاريح
هو:هممممم
طيب
في عندك
مكان فاضي ليا؟؟؟
انا: هه؟
اه طبعا يا فندم
......
و بصيت شمالي لقيت المنظر من البلاكونة جميل و الجو لسة طراوة
ده انا لا روحت و لا جيت بس يظهر سرحت بخيالي
وكل سرحة و انتم طيبين

Sunday, August 06, 2006

هجوم جوي علي اسرائيل

لما كان معيار القوة هو السائد
و لما كانت اسرائيل تلعب دور العاهرة التي لا تخشي كلام الناس و لكن الناس يخشون فجرها
و لما كانت الامم المتحده تلعب دور القواد الذي يمهد لمومساته الدعارة
و لما كانت أمريكا هي بيت الدعارة الاكبر
أعلنت مصر نيتها شن هجوم جوي علي اسرائيل
في حال لم تتوقف اسرائيل عن غاراتها الوحشية ضد لبنان و فلسطين
و ذلك تضامنا مع الشعب العربي المسلم الشقيق
و اعطت مهلة 24 ساعة لتنفيذ وقف اطلاق النار
و الا فسوف توجه القوات الجوية المصرية ضربة موجعة لاسرائيل في عقر دارها
وجدير بالذكر أن الشعب المصري سعيد
لهذا القرار الذي اثلج الصدور
و قامت مظاهرات تأييد و ترحيب بهذا القرار الذي طال انتظاره
و قد تكاتفت الجمعيات الشعبية و الحكومية
و قدمت كل ما لديها من دعم مادي و معنوي لقوات جيشنا الباسل
استعدادا لتلقين اسرائيل درس مؤثر
ذلك و تشهد مراكز التجنيد توافد حشود من الشباب المصري الراغب في التطوع بالجيش
للمساهمة في تأديب أسرائيل
---
هذا و قد أعلن البيت الأبيض استنكاره لهذا التهديد
و توعد بانه في حالة تنفيذه سوف تقع مصر تحت حصار اقتصادي صارم
حيث ان اسرائيل هي البنت الكبري لامريكا
--------
اصحي بقي يا بنتي الساعة بقيت تسعة
يااااه يا ماما ليه صحتيني بس
ده كان حلم جميل
------------
تفتكروا ممكن يتحقق؟

Wednesday, August 02, 2006

لبلابة الحزن

كنت بسمع زمان الناس تقول الحزن مكانه القلب
لكن انا حاسة ان بذرة الحزن هي اللي في القلب
نبتت و اتشعبت فروع الحزن في كل حته في جسمي
لحد عنيا و جلدي و حتي احبالي الصوتية
بقيت شجرة حزن متنقلة
مش عارفة افرح
و اكتشفت ان الشجرة دي مدت جذوعها لبرة و بدأت تلف علي كل شئ حوليها
زي اللبلاب
الهوا بقي حزين مخنوق كانه خارج من قلب بركان
الشمس حامية و قوية و بتنفر حرارتها عليا
الارض يابسة و قاسية زي الفولاذ
بطلت اسمع و اشوف نشرات
بس الايميلات اللي بتجيلي بتسقي شجرة الحزن و الاقيها كبرت و كبرت
ازاي اخرج شجرة الحزن دي من جوايا و اقطع جذوعها و جذورها
ازاي اقضي عليها و هي بقت متلفلفة حولين شراييني
خايفة لو قلعتها تطلع بالدم
حسبي الله و نعم الوكيل

Monday, July 24, 2006

حملة قومية للتف علي اسرائيل



بما إن الكلام لوحده مش كفاية
فأنا أدعوا كل بلوجراوي أصيل للأشتراك في
الحملة القومية
لجمع أكبر عدد ممكن من التفافة بهدف أغراق اسرائيل
تعاطفك مع اللي بيحصل في لبنان مش كفاية
ساهم في أغراق اسرائيل في بحر من التفافة
تفة لكل اسرائيلي
صدقوني سلاح التفافة من أنسب الأسلحة لهذا العدو الحقير

Sunday, July 23, 2006

ســكـــوت

سكوت
------
بسجل اعتراضي سكوت
قنابل و خلق عمبتموت
يوم بعد يوم بيفوت
معنديش غير سكاتي اقدمه لبيروت
---
الزعمة بيشجبوا و يمصمصوا الشفايف
و العالم عامل عبيط و لا سامع و لا شايف
و الحق لازم يعيش
و يموت اللي خايف
---
فينك يا ماما امريكا و فين جيوش السلام
و فين حمامة المحبة و لا اتدفنت في البرام
يا ماما أمريكا عيب أتكسفي علي دمك حرام
---
ميت غارة يهود علي لبنان
و من شارون لاولمرت يا قلبي لا تحزان
ملكيش غير ربنا يا صور و يا بعلبك كمان
ميت الف شهيد علشان رهينتان!!!!
---
يا شيراك حتنزع سلاح حزب الله و تسيب اسرائيل
يا راجل مقدرتش علي الحمار حتمسك في العليل
و حتي فلادمير الروسي بيطبل لليهود
يا أخي خدكم عزرائيل
-------
خواطر عاجزة لا ترتقي للزجل و لكنها نوع من الوجع

Tuesday, July 11, 2006

هرونا أعلانات

تفاعلا مع مدونة الزميل من زمااااااان
التي بعنوان احكي يا حكاواتي
------------------------
هرونا إعلانات
و رقص ولاد و بنات
علي الوكسة بيرقصوا
و لا علي الخيبات
---------
عايزنا ناكل جيلاتي بعيش!
و احنا فارشين تحت رسنا الخيش!
هوا احنا لسة خلصنا
من طابور العيش
----------------
يا عم يا إعلاناتي
ارحم جعنا و قوم
إعلن عن الجعان
اللي بيكمل عشاه نوم
-----------
اعلن عن العيش الحجر
اللي يعور سنان الصبايا
و لا الغموس المر
اعلن عن جنون الفراخ
و هبل السمك
و انفلونزا البقر
اعلن عن المطبات في الشوارع
و عن سواقين المكروباص الغجر
اعلن عن الشحاتين
و اللي نايمين في الحفر
اعلن عن الشعب الجعان
اللي عمره ما بالله كفر
---------
يا رب أنت علي المفتري
و أنت رب الغلابة و الليل و القمر
--------
و عجبي

Monday, July 10, 2006

أبجني تجدني


حاجة تخنق مفيش حاجة تمشي في البلد من غير ما ترش أو بمعني تاني تهرش أو تقب
و الواحد من دول يبقي زي الحيطة و يقولك: عرقي يا بيه
او حسنتي يا هانم
و بقت الرشوة لها الف اسم
سبوبة
الابيج
حاجة سقعة
تفتيح مخ
كل سنة و انت طيب
المهم انك لو تربست و قلت مش دافع يبقي نهارك مش فايت
حاجتك تتعطل و يمكن تتوقف خالص
و الموضوع ده في كل حاجة بداية من التقديم للمدارس مرورا بالتقديم في النوادي و حتي حجز مصيف أو حتي شمسية علي البحر
لازم ترش
و المشكلة إن الواحد اتهري هرش و رش وتفتيح مخ
مش عارفين نلاقيها من غلو الاسعار و لا من الرشوة المتفشية في كل قطاعات البلد
و مش بعيد تدخل اي مصلحة حكومية تلاقي يافطة مكتوب عليها
أبجـــــــــــــــــني تجـــــــــــــــــدني
و طبعا متعلقة جنب صورة اسمه ايه ده
يلا حصل خير
كباية شاي لكل بلوجراوي يشرفنا
ضع تعليقا او نص رغيفا او أهرش
هههههههههههههههههههههههه

Thursday, July 06, 2006

أقوال مش مأثورة قوي

1
واحد متلبسهوش شبشب في رجلك
!
اسمع الجملة دي من ناس كتير بيقولوها علشان يعبروا عن واحد
ملهوش اي لزمة في الحياة أو واحد متحكم في الناس و هو واطي
الغريبة ان الشبشب ليه اهمية كبيرة و أنا شخصيا مقدرش امشي
من غيره. علي كده الجملة دي مش بتأدي المعني المطلوب منها
و أقترح أن نقول
واحد الشبشب اللي في رجلك له اهمية عنه
ده اذا كان ضروري نذكر الشبشب في الموضوع
-------------------------------------------
2
العجوز لما يتدلع يبقي زي الباب المخلع
!
معروف ان سن المراهقة بين العاشرة و الثامنة عشر
لكن الغريب ان بعض الرجالة بتحصلهم نكسة و بترجع لهم
المراهقة في سن الخمسين
و لا تنتهي الا علي يد الحانوتي
و أقترح ان نقول
عجوز و عامل توتي مايتوبش الا علي ايد الحانوتي
---------------------------------------------
3
فلان مقطع السمكة و ديلها
!
و هي تطلق علي الواد الجن اللي عارف و عامل كل حاجة و مقطع
بطاقته مستبيع يعني
و الغريبة ان تقطيع السمكة ليس معضلة بل ان اي طفل صغير
يستطيع ذلك
و أقترح أن نقول
فلان تربية أسود لا يهمه سجن و لا حدود
-----------------------------------------------

Tuesday, July 04, 2006

السعادة المشروطة

لما كنا صغيرين كنا لما نضحك قوي نقول اللهم اجعله خير و كنت بستعجب لية بنقول كده هو احنا لازم لما نضحك نتوكس بعدها؟و مع مرور الايام اكتشفت ان هذه الجملة لها ما يفسرها فبالفعل كلما فرحت انكسر ظهري بعدهاو لست وحدي فبلدي كلها مثلي كلما فرحت بمنحة او علاوة ارتفعت الاسعار فاخذت ما زاد و ما نقصو لم يتهني الشعب المسكين بالزيادة في الراتب و لعلهم كان لابد مع قبض العلاوة يقولوا اللهم اجعله خيرأو ربما كان شرطا مسبقا علينا ,, خذ جزءا من السعادة و خذ حبة نكد مجانا اثنان في واحد