Wednesday, June 25, 2008

يوميات كلبوز- الحلقة الخامسة والاخيرة




اتعرفت على بنت كلبوزة من الوزن التقيل معدية الميت كيلو بمترين كده ، و كان مكان التعارف احسن مكان في الكرة الارضية و هو مطعم اكلات شامية مشهور في البلد و سبب التعارف اننا طلبنا نفس الطلب اللي هو
شركسية بالديك الرومي
و كان اخر طبق شركسية في المحل و كان لازم حد مننا يتنازل للتاني عن الطلب و من هنا جت المعرفة .. احلى معرفة
طلبنا يومها حاجات ملهاش علاقة ببعض خالص و قعدنا نضحك و لا كأننا ضحكنا قبل كده و اكلنا اكل عمرنا ما اكلناه و اتكلمنا في امور كتير اهمها الاكل و طلعت بتحب نفس الاكلات اللي باحبها
أمل...اسمها أمل.. و من يوم ما اتعرفت عليها و بقى عندي أمل في الحياة الاسرية السعيدة القائمة على الحب و الاكل و الحلويات و الذي منه
و فكرت اعرفها على والدتي، و اتعرف على اهلها، و تبقى مقابلة تعارف تمهيدا للخطوبة و اتفقنا نتقابل في محل الايس كريم اللي بنحبه
و اول ما اتقبلت الاسرتين نسينا كل حاجة و طلبنا كاس عملاق لا هو في الواقع سلطنية أيس كريم بالمكسرات و الشيكولاتة و الفروت سلاط و البسكوت و حاجات كتير حلوة ملزوزة كده على الوش
و سبنا العيلتين يتعرفوا بطريقتهم و قعدنا احنا نمزمز في القنبلة بتاعة الايس كريم
و بعد ما خلصنا ... و من كتر حلاوة الايس كريم ، قررت اطلب ايدها من والدها على سبيل الخطوبة يعني مش الاكل و فوجئت بيه بيقولي:
والد أمل: لا و الف لا ...انا مجنون!! اجوز بنتي لواحد مدمن اكل زيك؟! ده انا عايزها تخس، و هي لو اتجوزتك مش حتعرفوا تخرجوا من باب الشقة بعد شهر العسل من كتر الاكل
بص يا كلبوز يا ابني لازم تخس ..و تبقى رشيق علشان تعرف تعيش حياتك و شبابك و تلاقي بنت الحلال،
اما أمل فانا حسفرها لعمها في لندن تدخل مصحة تخسيس، و مش حترجع الا لما تخس بتاع 40 كيلو كده


اسودت الدنيا في عيني ...بقى بعد ما الاقي انتمتي اللي بتحب نفس الاكلات اللي بحبها ابوها يرفض يجوزهالي علشان قال اية
كلبوز!!!0
انا كلبوز؟؟؟؟؟؟؟؟؟؟؟؟؟؟؟ ابدا انا بس الاكل بيبان عليا، ياما في ناس زي القطط بتاكل و تنكر و لا بيبان عليها ، اصل انا مامتي كانت دايما تدعيلي و انا صغير و تقولي يا رب يا حبيبي مطرح ما يسري يمري.. و اهو مرى

و حاولت اتصل بأمل كذا مرة بعد كده ، لكن كنت بلاقي موبيلها مقفول، يظهر سافرت بجد ، يا خسارة كان نفسي اعزمها عند (عبده تلوث) على اكلة حواوشي و شرمبان قبل ما تسافر
و رحت اتعشي في محل السندوتشات بتاعي و طلعت همي في الاكل و زودتها في الطلبات حبتين و فوجئت بالجرسون بيقولي
الجرسون: يا كلبوز بيه مش كويس علشان صحتك الاكل الدسم ده بالليل كده
كلبوز: اعمل اية بس ...انا اصلي متضايق تصور بيقولوا عليا كلبوز ..انا كلبوز ؟؟؟ انا؟؟؟
الجرسون: بصراحة ..صلاة النبي عليك يا كلبوز بيه انت تملى عين الشمس
كلبوز: يا راجل بجد؟؟
الجرسون: الشمس و القمر كمان يا بيه
يااه معقول الناس كلها شايفاني كلبوز!!! وانا لا
و يومها قررت اني اخس بجد بقى مش هزار، و العب تمرينات و امشي و ابطل رمرمة و حلويات و اوصل لوزن مثالي، علشان امل لما ترجع من لندن تلاقيني بقيت استاهلها
و بعد شهر من المعاناه و الجدية و الصبر فرحت قوي لما صبحت على البواب و معرفنيش رجعت
قلتله :انا كلبوز انت مش عارفني؟
البواب : معقول؟؟؟ انت خسيت قوي يا بيه.. كلبوز اية بقى
و كملت و حفضل مكمل.. لحد ما ترجع أمل حياتي و نتجوز، يمكن نرجع نرمرم تاني سوا و ارجع اكلبز تاني و اكتب لكم يومياتي
انما دلوقتي انتم عارفين



اذا حضرت السمباتيكات بطلت اليوميات
و انا بقيت سمباتيك
و بكدة انتهت يوميات كلبوز
كتبتها لكم
كلبوزة لكن سمباتيك

Sunday, June 01, 2008

يوميات كلبوز- الحلقة الرابعة


امبارح رحت بيت الدونات اشرب نسكافية و اقزقزلي عشرة خمستاشر دونتاية كده على الماشي تصبيرة لحد العشا، بس لقيتهم منزلين نوع جديد كده مدور ومليان لزاليز ملزوزة بالسكر. 0
من ساعة ما أكلت اللوزّية باللُزلوز و أنا بطني وجعاني و قررت إني متقِّلش في الأكل تاني، و إني اخلي على الأقل ساعة بين كل وجبة و الثانية.
و مش بس كده و كمان حلعب رياضة و اروح الجيم و من النهاردة مش من اول يناير.

لبست التريننج بتاعي و شرخت على النادي و عملت براشوت على ملعب الكورة ، لقيت شوية شباب زي الورد بيلعبوا كورة ، قلتلهم : سلام عليكم ..ممكن العب معاكم؟
بصوا لبعض و الكابتن قالي: طيب اوك.. تعالى اقف جون
انا فرحت جدا لان حارس المرمى ده مهم جدا و عامل زي سوستة البنطلون ،بيستر الفريق و من غيره الفريق يتفضح.

و كمان ده مكان مناسب جدا لإمكانياتي و مهاراتي الطبيعية،
صحيح أنا دخل فيا خمس اجوان بس مش مشكلة دي بس البداية
***

و قررت اني اسافر اسكندرية يومين اغير جو و انزل البحر و ابلبط و اهي كلها رياضة
بس مش عارف ليه كراسي القطار عمالة تكش كل سنة عن اللي قبلها بشكل ملحوظ ،و بالعافية عرفت اتحشر في الكرسي بعد ما رفعت السنادة اللي هي دراع الكرسي و دخلت على الكرسي اللي جنبي بتاع شبرين كده.
و حاولت اعتذر للراجل الجينتل اللي كان قاعد مفعوص جنبي بس هو مسكين باين عليه عيان كان الكلام بيطلع من بقه محشرج كده و كأن في حاجة كابسة على مراوحه، بس مش عارف اية هي!؟0
و قعدت انصحة يشوف له دوا كحة كويس ،بدل ما صدره عمال يزيق طول السفر ،و اول ما وصلنا اسكندرية و قمت من جنبه لقيته اخد شهيق طويل و الصفارة راحت ، اكيد هوا اسكندرية ريحه.0


و بعد ما حطيت شنطي في الفندق ،و دخلت جوه المايوه و يلا على البحر هييييييه حنبلبط
اجرت شمسية و كرسي ، و كنت محرج جدا لما جيت اقعد على الكرسي البلاستيك بتاع الشبشب أبو وردة (دي ماركة بلاستيك جديدة) و لاقيته اتكسر باين عليه نوع مش متين
المهم...نزلت اعووووم في البحر و طبعا انا من نوع الناس اللي مش ممكن تغرق ..لان عندي عوامات طبيعية ،و عوامل رفع ثابتة غير قابلة للخرم و لا الكسر
و بعد ما طلعت من البحر لقيت نفسي جعت قوي و سمعت صوت جميل بحبه جدا
...لا.. لا مش صوت عصافير بطني ده صوت بتاع الفريسكا بيقول بأحلى صوت

الصورة من مدونة الزميل اسكندراني اوي

فريسكااااااااااااااا
ياه رجعني عمشتاشر سنة لورا.. اشتريت منه بتلاتين جنيه فريسكا و جوزية و سمسمية و فولية
و انتم عارفين طبعا

اذا حضرت الحلويات بطلت اليوميات

و نلتقي في الحلقة القادمة من

يوميات كلبوز
كتبتها لكم