عم حسين بواب عمارتنا

عم حسين بواب عمارتنا ،و المسئول الاول عن الظبط و الربط فيها، و مافيش اي بياع ارزقي يقدر يهوب ناحية بير السلم، من غير ما يديله عم حسين الجرين كارد و ينصص معاه نص الربح اللي حيكسبه من السكان

عم حسين بواب اوريجينال من بتوع اليومين دول من اللي بيلبسوا ترنج مش جلابية و لاسة زي زمان و تلاقيه نزيه في نفسه قوي ،يعني كل يوم لازم يحلق و يلمع و يسنفر وشه ، و لازم و حتما و لابد يصبغ الشعرتين بصبغة سودا بلاك اسواني من الاصلي ،و لا ممكن ابدا يظهر لعوام السكان بدون ما يتكلين (يحط كولونيا يعني )لأ و الاكادة انه كمان لابس نظارة و عامل فيها مثقف و بيقرا جرايد - هي اللي حتجيبله الكافية.
عم حسين الفترة اللي فاتت ماكنش ولابد، و صحته في النازل، اصل باين ان سكان العمارة فقعوله مرارته ،و وقفوا المية في زوره ،اكمنهم بيفكروا يجيبوا بواب غيره ،و فضل رايح جاي على الدكاترة لما نعل جزمته اتخرم

فكر عم حسين انه يشيل ام المرارة الي تعباه و قرفانا ،و قرا في الجرنال ان اعضاء لامؤاخذة الشعب بيتعالجوا على نفقة الدولة بالشئ الفلاني، فقال في عقل باله و اشمعنى انت يا واد يا حسين و لا هيا ماتهنش الا على الفقير

و استلم السكان واحد واحد يسألهم عن واسطة علشان يسافر يتعالج برة و هدد انه حيعمل اعتصام لو ما وصل لمطلبه، اه ماهي الاعتصامات بقت زي الفول و الطعمية كده( فولكلور شعبي)

عم حسين: عايز واسطة اتعالج على نفقة الدولة يا عبد الستار بيه
الاستاذ عبد الستار: روح ربي عيالك و كل عيش يا عم حسين

عم حسين:عايز واسطة اتعالج على نفقة الدولة يا استاذ سامح
الاستاذ سامح: هو السولار غلي من شوية؟ ماهو علشان الغلابة هجمو عليه لجل ما يولعوا في نفسهم

عم حسين:عايز واسطة اتعالج على نفقة الدولة يا استاذ جودت
الاستاذ جودت:لو كنت اشتغلت لعيب كورة او مغنواتي او رقاصة كان ممكن يا عم حسين

عم حسين:عايز واسطة اتعالج على نفقة الدولة يا ست عايدة
الست عايدة:تتعالج مفهومة و نفقة معروفة انما يعني اية الدولة دي يا عم حسين؟ اوعى تكون كلمة ابيحة؟؟

عم حسين:عايز واسطة اتعالج على نفقة الدولة يا مدام سعاد
مدام سعاد: و تتعالج ليه يا عم حسين ما انت حترجع تعيا تاني قول يا باسط

و هكذا فضل عم حسين يدور على واسطة، لجل ما يسافر بلاد برة يتعالج و لا حياة لمن تنادي

عم حسين:عايز واسطة اتعالج على نفقة الدولة يا مدام كلبوزة لكن سمباتيك
أنا: ليه لازم تتعالج برة؟ لما ممكن تتعالج جوة؟
عم حسين :لان السيسترات هنا مش ولابد، انما السيسترات في بلاد برة يحلوا من على حبل المشنقة ،و الواحد و هو عيان بيبقى محتاج ايد حونينة

اما عم حسين ده ليه نظريات غريبة
===

و بالمناسبة نتمنى للريس بتاعنا الشفاء العاجل و العودة الى ارض الوطن سالما ،و ما تنسناش في الهدايا الألماني يا ريس
و كل مرارة و انت طيب

كتبته لكم
كلبوزة لكن سمباتيك
و السجن للجدعان
و انا جدع