Sunday, August 06, 2006

هجوم جوي علي اسرائيل

لما كان معيار القوة هو السائد
و لما كانت اسرائيل تلعب دور العاهرة التي لا تخشي كلام الناس و لكن الناس يخشون فجرها
و لما كانت الامم المتحده تلعب دور القواد الذي يمهد لمومساته الدعارة
و لما كانت أمريكا هي بيت الدعارة الاكبر
أعلنت مصر نيتها شن هجوم جوي علي اسرائيل
في حال لم تتوقف اسرائيل عن غاراتها الوحشية ضد لبنان و فلسطين
و ذلك تضامنا مع الشعب العربي المسلم الشقيق
و اعطت مهلة 24 ساعة لتنفيذ وقف اطلاق النار
و الا فسوف توجه القوات الجوية المصرية ضربة موجعة لاسرائيل في عقر دارها
وجدير بالذكر أن الشعب المصري سعيد
لهذا القرار الذي اثلج الصدور
و قامت مظاهرات تأييد و ترحيب بهذا القرار الذي طال انتظاره
و قد تكاتفت الجمعيات الشعبية و الحكومية
و قدمت كل ما لديها من دعم مادي و معنوي لقوات جيشنا الباسل
استعدادا لتلقين اسرائيل درس مؤثر
ذلك و تشهد مراكز التجنيد توافد حشود من الشباب المصري الراغب في التطوع بالجيش
للمساهمة في تأديب أسرائيل
---
هذا و قد أعلن البيت الأبيض استنكاره لهذا التهديد
و توعد بانه في حالة تنفيذه سوف تقع مصر تحت حصار اقتصادي صارم
حيث ان اسرائيل هي البنت الكبري لامريكا
--------
اصحي بقي يا بنتي الساعة بقيت تسعة
يااااه يا ماما ليه صحتيني بس
ده كان حلم جميل
------------
تفتكروا ممكن يتحقق؟

62 comments:

tota said...

كلبوظة اصحى صحصحى فوقى انت كنتى بتتكلمى وانت نايمة
كنت خير اللهم ما جعله خير بتقولى حاجات عجيبة
كنتى يا بنتى فاكرة انه مصر فيها جيش ويقدر يعمل ضربة جوية معلش نسيت اقولك ولا حتى ضربة صرصار بشبشب يقدر يعملها جيشنا من البواسل الاشاوس الشجعان
وقال ايه كمان قلتى ان فى شباب راحو علشان يحاربو
اخر معلوماتى انهم بيهربو من التجنيد ويزورو شهادات علشان ميرحوش الجيش اصل الجيش بهدلة وبيبعدهم عن مامى وبابى وبيكلو حاجات وحشة هناك وينامو على سراير مش نظيفة فيها حشرات وكده
الحمدلله انك صحيتى قبل ما امريكا تنفذ وعدها وتحول البد الى لبنان رقم اتنين والحمد لله اننا عندنا بابا الكبير وماما الكبيرة مش بيسمحو ان الولاد يتبهدلو ولا يخشوشنو
ده لو حلمك ده واقع يا شيخة كنت اول واحدة اروح اقول الشهادة وميغلاش دمى عن وطنى

salateenoo said...

حلم جميل عيشتيني فيه معاكي لدقايق...وحاولت اصدق انه خبر جديد انا لسة مسمعتوش...ولكن جوايا عارف انه حلم...لإني من البلد دي ,,,عارف حكامها وحكومتها بيفكروا أزاي...بس عرفة وانا بقرا كلامك اللي هو انا عارف مية في المية انه حلم ...جسمي انتفض ...والدم ضرب في عرقي...وكنت هقوم من على مكتبي ..واصرخ الله أكبر ..الله أكبر ..بس ماتت الصرخة في الحلق....وإتكسر الحلم على صخور الواقع المؤلم...والله انا مش عايز مصر تحارب ...انا بس عايزها تاخد موقف...مش كتير علينا ان الواحد يحس ان بلده ليها موقف مشرف مع اخواتها من الدول ...ومش اي بلد ...دي مصر يا جماعة ....اللي كانت وكانت وكانت ....ولا مكتوب على الجيل بتاعنا انه يفضل يقول احنا كنا زمان كذا وكذا...وابائنا عملوا كذا وكذا....واجدادنا عملوا كذا وكذا....طيب واحنا...خلاص مفيش حاجة نعملها...ااااه...مش عارف اقول ايه...يتهيألي اللي جوايا هوة اللي جواكي وهوة اللي جوة كل الناس...إمتى بقى

المسافر said...

شوفي يا كلبوظة،

أنا مش مع الناس اللي متشائمة لدرجة الكآبة ولا مع الناس اللي فاتحين صدرهم على الآخر، لكن أعتقد إن حلمك مش بعيد وبرضه مش قريب، حتسأليني ليه؟ أقول لأن لوكانت الحكاية بالأحلام والأمنيات أحنا كلنا بنتمنى ويسلام على ده حلم لكن في الواقع فيه شوية حاجات صغيرة محتاجين نشوفها الأول وبعدين نقرر ولما كانت هذه الحاجات مش معروفة لينا أحنا الشعب فلا يمكن نقدر نقرر وبالتالي نرجع ونقول طيب ح نسيبهم يعثوا في الأرض فساداً ... بالتأكيد لأ لكن احنا لازم نتصرف وبإيجابية وبعقل

وبعدين مين فينا عارف فيه إيه بكره؟
لكن دايما ً أنا متفائل ومش دايماً بيجي الحل بالدراع ولا يمكن الإعتماد الدائم على الجيش فقط في طرق وأساليب أخرىتتبعها الدول الذكية، والذكية فقط.

وكلامي مش معناه إني ضد حزب الله لكن أنا بأتكلم على إن مصر تقرر الدخول في حرب أو ما شابه، وعلى العكس فأنا أقر بكل ما فعله ويفعله حزب الله في اسرائيل وبصراحة ربنا يحميهم ويبارك لهم وينصرهم ويدكوا اسرائيل على من فيها.

Nouran said...

كلام جميل وحلم اجمل ومين عارف يمكن يحصل مفيش حاجة بعيدة عن ربنا عارفة لو حصل الموضوع ده ومصر عملت كده من غير ما اسرائيل تضربنا او امريكا وطلعنا بسلام وبتنا مدمرش صدقيني هسعى جاهدة انزلك تهنئة ف الصفحة الاولى ف اي جرنال علشان انت صاحبة الحلم الجميل واللي اتحقق وهعملهالك ف النشرة بتاعتي كمان وانت اللي تعلني عنها ما انت هتبقي مذيعة فيها
اما لو محصلش فلو بطلنا نحلم نموت :)

Sampateek said...

tota
يا توتة ان كان علي الامكانيات فهي متاحة صحيح مش زي امكانيات امريكا و اسرائيل بس ربنا بيقول كم من فئة قليلة غلبت فئة كثيرة بإذن الله
لكن في اعتبرات تانية لازم تتدرس
قبل ما ينزعوا سلاحنا و يمكن ينزعوا قلمنا و كيبوردنا و اللي يتقفش ماشي بموّيس يتعمله محضر دعارة
نورتي يا جميلة

Sampateek said...

salateenoo
احنا عملنا اية!
احنا بنعمل مهرجنات و حفلات و بنتبني المواهب الجامدة زي خالتي هايفة و مفيش مانع نعمل لنا قمة لامؤخذة عربية ندحرج لنا فيها بؤين كلام من الحلوين دول زي نشجب و نستنكر و نطالب
كل ده مش كفاية؟
و لا لازم البلد تدخل حرب و السكر يشح و الرغيف يبقي بعشرة جنية علشان نرتاح
-----
احلي تعليق وصلني علي المدونة دي
((ابقي اتغطي كويس قبل متنامي) هههههه معلش اصل الجو حر

Sampateek said...

المسافر
امين يا رب العالمين
ترجع لنا بالسلامة يا مسافر
-------
الباشمهندسة نوران السكرة
تصدقي نفسي يتحقق الحلم ده مع معرفتي الكاملة ان ممكن البلد ترجع عشر سنين لورا بدخولها في حرب لكن عايزة اقولك اذا كان حيتان البلد ناهبين خيرها كده كده فعلي الاقل نوجه خيرها للهدف ضروري
لاني حاسة ان اسرائيل دي اتفرعنت و لازم حد يلمها بقي
قبل ما الدور يجي علينا
ديما منوراني يا جميلة
--------------
خالص تحياتي للجميع

مـحـمـد مـفـيـد said...

كلبوزه اصحي احنا واقع مرير مش في عالم الاحلام الذي نريده ان يتحقق

محمد أبو زيد said...

آخر خبر

هدد الحكام العرب إسرائيل برد مزلزل إذا قصفت منزل هيفاء وهبي في لبنان


اصحوابأه
القيامة قامت

tota said...

كلبوزة
يا ريت العدد كان يفيد فى الحالة دى
فئة قليلة امام فئة كبيرة فى مواجهة ممكن تغلبهم انما يا عزيزتى مش هيكون فى مواجهة هما من هناك من غير اى مجهود هيبيدو الفئة الكثيرة
ده مش تشاؤم ولا حاجة ده رحم الله امرؤ عرف قدر نفسه
انا لما قلتلك ان مفيش جيش انا عارفة انا بقولك كده على اى اساس
عارفة كمان ان معندناش تطور فى الاسلحة و الاشياء اللى عندنا دى اساسا لا تعد اسلحة دى بيسموها فى علم الاحياء حفريات احنا بنتكلم فى انواع طيارات تقريبا انقرضت وهما هناك بيتكلمو فى ما بعد الشبح
انا مش قصدى اهبط عزيمة حد
بس احنا وقعنا فى فخ كبير اننا لا طورنا اسلحتنا ولا طورنا البحث العلمى فى بلدنا واكتفت الحكومة بأنها تأكل الناس وتعملهم طرق علشان الزحمة وتخصخص باقى القطاعات
ووزير الزراعةالاسبق العميل يضرب البنية الزراعية والثروة الحيوانية ويطلع جيل متغذى على الاكل اياه وشارب الميه اياها ومش هقولك على النتائح بقى تقدرى تعرفيها من معاهد السرطان
الصورة مش حلوة بالمرة مش هينفع معاها حتى الحلم
احنا حضارة 7000 سنة انقرضت وماتت بدل ما نضيف لماضينا حاضر رجعنا اسوء ما ابتدينا
طيب هنفضل نندب حظنا ونبكى على اللبن المسكوب ولا الحل ايه ؟
الحكومة تعيد النظر فى جيشنا وتعيد هيكلته وتظبيته كما لو كنا فى حالة حرب لان ده متوقع انه يحصل فى اى لحظة ومحدش هيحمى مصر غير ولادها منتوقعش من الدول العربية غير الشجب والتخازل
الحكومة لازم تعيد النظر فى البحث العلمى فى مصر وتدى فرص للنوابغ اللى فرطنا فيهم ولقو فرصهم برة مصر
الحكومة لازم تقيس بميزان عادل حجم الثروات المسروقة وتعييد تقسيمها صح على القطاعات المختلفة
الله الله هو كله الحكومة امال احنا هنعمل ايه ؟
الوعى من يوم ما ولادنا يفهمو والتربية على الرجولة مش الخنوع والضعف
زرع الضمير الانسانى اللى مات فى ولادنا من تانى
الرفض لاى حكومة تهدر وتقرر مقدرات الشعب حسب اهوائها الشخصية
اللى عملو ثورة 23 يولية علشان يتخلصو من الملك كانو رجالة واللى دلوقتى سايبين حكومة فاسدة دول ايه ؟
احنا عايشين كل واحد فى حاله كافى خيره شره فاكرين ان كده اتحمينا لا ايد الغدر السودا هتلمس كل واحد فينا وساعتها هنعرف معنى الغضب
اللى قلته ده فكرة واحدة من مليون فكرة لتحسين حال الامة وعارفة ان جوا كل واحد فينا مليون فكرة
يمكن انا كمان بحلم بس صحونى يا جماعة من حلمى لو شوفتوه صعب قوى كده

m_elsewedy said...

يا ساتر يارب ده كابوووووووس
لازم تروحى تكشفى عشان تشوفى حل فى الاحلام اللى عمرها ما هاتتحقق دى

أُكتب بالرصاص said...

يا كاباكا يا كاياكا
إحنا وراك بالكراكة

يا بنتي دي ما تاخدتش في ايدينا غلوة ،

وفعلا
الشباب نفسه يتطوع

بس في حاجة كاتمة على نفسسسهه


اه
نفسي !!
الحقوني يا جماعة

مش قادر اخد نفسي


ز
بلم بلم
بلم
بلم

أُكتب بالرصاص said...

كلبوزة

ألحقي

تدوينة بتاعة كلابيز من اجل التغيير بتاعتك
نزلوها في عشرينات

http://masr.20at.com/article.php?sid=770

Epitaph said...

حلم يحلم حالما حلما مفزعا

يعني ايه نحارب؟
يعني ايه ضربة جوية
دي زي اللي فتحت باب الحرية كدة؟؟؟؟

و علشان كدة احنا اخترناااااااك يا كلبوزة عشان تكملي الحلم و تتغطي كويس

Sampateek said...
This comment has been removed by a blog administrator.
Sampateek said...

مـحـمـد مـفـيـد
كل ما أنام تصحيني يا محمد
---
محمد ابو زيد
حلــــــــــــــــــوة
---
توتة
أفكارك لتحسين حال الأمة ممتازة و انا اضيف عليها ضرورة تأسيس النشأ علي عقيدة قوية سليمة و تمسكهم بالدين
مفيش حلم صعب المهم الهمة
دايما منوراني يا جميلة
---
m_elsewedy
ما انا رحت كشفت الدكتور قالي بداية شيزوفرينيا
---
اكتب بالرصاص
اية اللي كاتم علي قلب الشباب ؟
يمكن متغدي غدوة تقيلة؟
ازازة سفن اب لكل بلوجراوي علشان يهضم الحلم
لولولولوي
فرحت بالنشر و الله عقبال عندكم يا حبايب
----
Epitaph
ههههههههه ما انا جيت اكمله لقيت النهاردة الاثنين و دكانة الاحلام قافلة فقلت اكتفي بالغطا و انا نايمة لحد ما ربنا يفرجها بحلم جديد
نورتي يا جميلة
---------------------
اللهم اجعله خير
يمكن حقبض الجمعية؟
خالص تحياتي

5:17 PM

أبو أمل said...

كلبوزة ياحبيبتى
ابقى اتغطى كويس قبل ما تنامى

وبعدين
مش قلتلك
بلاش المسبك
كفاية حتة كيكة
خفيف خفيف
تحياتى
طالعى جديدى

جمال الدولى said...

كلبوزة
الأحلام خير
انا مرة حلمت انى برفرف ف الهوا وعامل جناحات
عارفة إية اللى حصل
ام العيال دبحت كل اللى حيلتنا من طيور ف أزمة انفلونزا الطيور
احلمى
زورينى

المزاجنجي said...

كلابيظو المهم بعد ما صحيتس لاقيتي في بيتكم فطار ؟ انت عارفة مثل الجعان يحلم بسوق العيش ؟
اهو انت كده بالظبط بس مش هاقولك ابقي غطي .... نفسك كويس زي الباقيين لكن هاقولك انت صابتك العين ويلزمك بخور جاوي ومعية سايلة ورجلة وتتبخري يوم الاحد ساعة عطارد علشان تردي العكوسات وبلاش تدخلي اماكن ضلمة بالليل من غير ما تسمي وبلاش سمك وبيض لمدة ست شهور ونامي على ضهرك وادبحي ديك اسود بعرف اهمر وقلبة ابيض يعني زي علم مصر كده وبعدين تتبخري كل يوم جمعه كمان بعد ما تمسحي المكان باللي قلنا عليه قبل كده وربنا يشفي يا ماما واهو نعمل ايه ولاد الحلال ما خلوش لولاد الحرام حاجة ....... ايوة يا ام حنكش انا هاصحى اهوه .... ياليلة برد تصدقي ان انا كمان كنت باحلم بيكي والكلام ده برضة كان حلم ما هو خلاص كلنا هيسنا ههههههههههههه وبعينك لا مشبك ولا بسيمة ولا راس البر كمان

عمر said...

يسمع منك ربنا ياريت تزورينا

Utrechty said...

اية يا كلبوزة الكلام الكبير ده؟
انتى واضح انك صغيرة ومتعرفيش ايام الحروب والآزمات اللى عاشتها مصر زمان, ايام ما كنا بنحارب بالنيابة عن اى حد ماشى فى الحارة!
دا احنا ماصدقنا نشم نفسنا

وعلى راى اللى قال بنامى واتغطى كويس علشان الدنيا بتبرد بالليل . .

BackBone said...

كلبوزه انا حلمت حلم مشابه بحلمك ده بس كان فيه شويه تفاصيل مختلفه.
يعني مسلا ً ان مصر مرحتش قيله تخ لزق كده انها هاتضرب تل ابيب لاء في حلمي ان الاجتماع بتاع الجامعه العربيه ده قرر ان بدل ما هتبقي قوات حفظ سلام اجنبيه في جنوب لبنان هتبقي قوات عربيه. زي الناتو كده.
و بدل ما هانضرب اسرائيل عيني عينك كده لأ احنا بس هنقول اننا هنحمي اللبنانين من الغارات الاسرائيله الغاشمه علي المدنين. مش هنستني ناخذ الاذن لا من الأمم المتحده و لا من مجلس الامن. بعتبار ان اللي بحصل ده اعتداء رسمي علي دوله عربيه مشتركه في اتفاقيه الدفاع المشترك و نوعد سعتها ان القوات العربيه لن تتخطي حدود لبنان الجويه و لا الأرضيه. و بعد ما القواة تتمركز ميمنعش اننا نقول انه في احدي الغارات الإسرائيليه علي لبنان توغلت الطائرات العربيه في الشمال الإسرائيل مطارده طائرات العدو و بعد ساعه و نص كده نبلغ انه في تطور سريع للأحداث توغلت المدرعات العربيه في الشمال الاسرائيل نتيجة خطف جندي عربي من علي الحدود و نضرب بقه ساعتها المطارات و الرادارت و مباني الإستخبارات الإسرائيلة و ذلك في اطار حفظ السلام في المنطقه. مميمنعش برده طالما انه حلم ان الكويت و السعوديه و تفرض خفض كميت البترول المصدر الي الدول الغربيه و ذلك في اطار احتياج القوات العربيه اليه. و طالما ان هكون مش متغطي كويس في الحلم ده يبقي نظيط بقه و ممكن سعتها تتدخل القوات المصريه الي داخل قطاع غزه لحماية الفلسطنين الغلابه من براثن العدو الإسرائيلي.

اصل موضوع التهديد و الجعجعه اللي علي الفاضي ديه "ان القوات المصريه المغواره ستضرب عمق اسرائيل اذا لم تتراجع" مش هتعمل حاجه غير انها هتهيج الناس علينا و هتخلي منظرنا ارهابيين. مفيش احلي من السياسه.




و بعدين ممكن سعتهي بقه يبقي اخوي الصغير يدخل القوده ويشغل الكمبيوتر ويصحيني علي اغنيه.
"الي هيفا و ما بعد هيفا"

اه نسيت. قبل مخويا الضغير يخش عليا القوضه. جالي هاتف في المنام ان الشباب المصري مش ذي توته متهماه انه " انهم بيهربو من التجنيد ويزورو شهادات علشان ميرحوش الجيش اصل الجيش بهدلة وبيبعدهم عن مامى وبابى وبيكلو حاجات وحشة هناك وينامو على سراير مش نظيفة فيها حشرات وكده" بس هقولك ايه يا توته منتي مشفتيش الجيش متعرفيش لما تكوني بنقدمه محترمه متخرجه من جامعه محترم و درسه علوم محترمه و يجي و احد يسب امك و ابوكي و كل عيلتك علي الصبح علشان شعر دقنك بقالوه خمس ساعات متحلقش و لا لما تبقي بتتغدي و بتتعشي و بتفطري اكل معمول بزيت كافور ده حتي الشـــــاي عليه زيت كفور. متعرفيش لما تبقي بتعملي الشغل غلط لمدت 3 ايام و انت عرفه انك هتعديه لمجرد ان ديه تعليمات مدير الوحده. متعرفيش يعني ايه لما واحد يمكن اصغر منك بكام سنه بس اكمنه ظابط و انتي عسكري يقولك رويحي جبيلي الجذمه بتعتي من القوده اللي جمبي. و سيبك من ده كله. كفايه انك لما تخرجي هتكوني نسيتي اللي انتي اتعلمتيه في الخمس سنين بتوع الكليه و تلاقي كل زميلك من البنات او الولاد اشتغل و حوش و مش بعيد يكون اتجوز كمان. و لما تيجي تقدمي تقدمي في شغلانه تلاقي عيل معفن معلش يعني كان حمار الدفعه هو المدير بتاعك في الشغل.....

هقولك ايه يا توته الموضوع مش تزوير شهدات و لا هروب من الخدمه العسكريه. الموضوع ان اللي بيحصل ده ملوش علاقه تماما بالأهداف النبيله بتاعه حمايه الوطن و نصره المظلوم الموضوع اكبر من كده بكتير يا توته.

و دلوقتيه بقه مش فاكر اذا كان اخويا قفل الكمبيوتر و خرج و لا اختي دخلت غتطني و كملت نوم من غير احلام....ه

bosbos said...

يؤسفني بل و يحزنني اني ابلغك

ان حلمك ده عمره ما هيتحقق ابدا

كلمه said...

howa e7na 3andena sela7 rad3 aslan
????
so2al bytr7 nfaso m3 awel kelma fel post ..... slohom mesh momken yekono nymeen keda el ez kano naymeen 3la 7aga :D
mooooooooooooot ya 7mar (tshk tshk .. elkelma elly el5waga pejo makanaash 3ref yektebha howa w ismail yassin ) :D

القلجاوى said...

أن يحلم الانسان حلما كهذا ، فهو مهموما بالوطن ، ثائرا ومقاتلاً ، وتراه الدولة متطرفا ، ومطروف العين لأنه مش شايف الحقيقة كويس
فألف سلامة

Aoossa said...

والله ياكلبوظه
أنا قولت حرب أيه مسمعتش عن الموضوع ده خالص فى الجزيره يعنى
بعدين طلع حلم
أنتى أكيد أتعشيتى بارود قبل ماتنامى
نامى وأحلمى ربك كريم يمكن يتحقق
ربنا معانا حتى يوم الدين
أن وعد الله حق
وبعدين توتا كل شويه تهاجم الشوباب
مع أن الشوباب فى مصر كتير منهم رجاله
أنا لما بنزل الأقاليم بشوف الشباب حاجه تفرح عندهم وطنيه ونخوه وبيحلموا نفس حلمك
كلنا هانحلم نفس حلمك
بحترمك جدا يا كلبوظه

الغـــــــــــــريب said...

كلبوزه الأخت التى لم تنجبها أمى ولكن أنجبتها مصر
فعلا مصرية أنتى حتى النخاع
مصرية فى كتاباتك
توجــعك هموم الوطن فتوجعينا
لكنه وجع الصادقين
رغم كل الشهداء فى لبنان من المدنين
لكن كل المحلليين العسكريين أعتبره نصر سياسى وعسكرى نظرا لقلة عدد وعتاد حزب الله مقابل التفوق العسكرى للصهاينه
للأسف الأعلام غير قادر على نقل الحدث فى أسرائيل بدقه فهم فى حالة خوف ودهشه من قدرة حزب الله على المواصله حتى الان
وقدرته على أصابة أهداف فى عمق العدو بصواريخ فقط دون غطاء جوى
المشكله أن لبنان لاتملك دفاعات أرضيه لصد الهجمات الجويه
بينما تدعم امريكا الصهاينه باحدث قنابل وتقدم الدعم السياسى فى مجلس الأمن
وللعلم لدى دول الخليج ترسانة أسلحة متطوره و لديهم أصول وأموال فى الغرب مؤثره كسلاح فعال مثله مثل البترول
ولدينا قوه بشريه لا يستهان بها
حزب الله أثبت أن مليشياته غير النظاميه
على أحسن تدريب وقد أتبع تكتيك عسكرى فعال حتى الأن معتمد على طبيعة الأرض هناك
لم يستغل العرب الفرصه فى الأستفاده من الأعمال العسكريه لحزب الله
المشكله فى عدم وجود أتفاق عربى ولا وجود مايسمى بالقوميه والدفاع المشترك
فكرا كتاب القوميه العربيه بتاع أبتدائى ..الظاهر كانوا بيضحكوا علينا
المهم أحلمى لحد ماحلمك يتحقق
وياريت توته تتوقف عن التشكيك فى الجميع لأن هناك من يقرأ المدونات ولديه وطنيه وهناك من أشترك فى حروب سابقه لأن المدونات ليست قصرآ على جيل الشباب ..المشكله فى الحكومات ياتوته
مش فينا
الخير فى أمتى الى يوم الدين

تمر حنه said...

لأ ده مش حلم - حصل حقيقى فى 67 - قالوا هنرمى اسرائيل فى البحر و خيبة الأمل اللى جات للناس أساسا كانت من البروباجاندا اللى سبقت الهزيمة أكتر من الهزيمة.
سيبينا نبتديها بإحباط يمكن تنتهى بفرحة - و بلاش بروباجندا لحسن لو حد اتعلق بخيوط الأمل هينزل على جدور رقبته.واحشانى

shady said...

أولاً
عاوزين ثورة من اللى بيسموها عيال امريكا انقلاب
ثانياً
عاوزين شعب للتجنيد لأن أخر احصائيات معهد الانثروبلوجيا بيقول أن الشعب المصرى حينقرض على أخر السنة دى
ثالثاً عاوزين قوات جوية لأنه ثبت أن الطيسران اللى بناخده من أمريكا تخصص مراجيح هوا استعراضات جويه ونفافيخ وبلالين وحاجات من هذا القبيل

المسافر said...

من رأيي أن يكون اسم الحركة "كلابيز بلا حدود" وهو ما أعتقد يطلق العنان لحرية التعبير الكلابيزية وعدم التحديد والتقييد ووضع عراقيل حيث أن "كلابيز من أجل التغيير" ستختفي بمجرد حدوث التغيير ولكن "كلابيظ بلا حدود" فأفقها لا نهائي. كما أنه من الواضح أن حركات من أجل التغيير ممتلئة بالكلابيز والمسلوعين فهم كده على بعضهم خلطبيطة فلا شيئ يميز بينهم وينبغي لنا ككلابيظ أن يكون لنا خط موازي ومختلف ومتميز. كما أن كلابيز بلاحدود تتيح التوجه العالمي مثل أطباء بلا حدود وصحفيين بلا حدود. ومن هذا المنطلقيصبح للكلابيز الحرية في الكلبزة بلا حدود.

BackBone said...

يا استاذ المسافر:

مش عايزين انقسامات علي حركة "كلابيز من أجل التغير". ياسيدي لما يحصل التغير نبقي كلنا كده كلابيز و مسلوعين نروح نعمل حركه جديده مع بعض. و سعتها بقه نبقي نسميها كلابيز بلا حدود والا بحدود مش فرقه بس المهم نفضل مع بعض. و اهوه لما نغير الاسم ممكن نحصل علي فتره اعفاء من الاعتقال جديدة.

و بلاش نثير نار الفتنه بين الاعضاء المكلبزين و المسلوعين. كفايانا تميز بقه.

و علي العموم نشكر السيد العضو الـ" المسافر" و ليتفضل بالجلوس و ربنا يرجعك بالسالامه ياحبيبي

و شكرا ُ

المسافر said...

كلامك بيوصل للعظم يمكن لأنك عامود فقري لكن مش مشكلة واضح إنك في طريقك الي السلوعة والتغيير وده يجعلك منشق عن اجماع المكلبظين

وننبه إنه لو استمر وضعك بهذا الشكل سيتم سحب الثقة والفيشة وكل حاجة تبقى تمام

مع الشكر

Sampateek said...

ابو امل
الدنيا حر يا عزيزي غطا اية بس
و بعدين العشا كان يا دوب جوزن حمام عند عبده كفته
يعني عشا خفيف
نلتقي في الحلم القادم
---------
جمال الدولي
يا ريت الحلم يتحقق
في مشكلة عندك في تسجيل اسمك بالكومنت لانه بيظهر اسم عادي مش لينك لمدونتك
حاول تصلح الموضوع ده علشان الناس تعرف توصلك
--------
من زماااااان
ايوة يا خويا محسودة
العالم حاسدنا علي برود اعصابنا و صمتنا
و لا حيحوق فييا لا بخور و لا خرزة زرقة
ادعي معايا الحلم يتحقق
---
بلاش سمك و بيض؟ ينفع كوارع؟
----------------------------
خالص تحياتي للجميع

Sampateek said...

عمر
زورتك يا عمر و الصور عورتني في قلبي و انا اللي بقالي كام مدونة حزينة
مش كنت تفطمني
اشكرك علي تعاطفك
------
Utrechty
انا معاصرتش حروب فعلا بس اتمني اننا نحارب اسرائيل
شرفتنا يا فندم
------
BackBone
فينا من اقتباس الاحلام بقي و لا اية:)
كل واحد يخللي باله علي حلمه يا جدعان
يا ريت ربنا يكرمنا بتحقيق احلامنا
مدونتك جميلة يا عم العمود الفقري
خالص تحياتي
----------------------
تبرعوا بكوفرتة لاختكم كلبوزة

Sampateek said...

bosbos
ليه بس قولي يا رب
نورتيني
----
كلمة
هو سلاح الردع ده في اي مكان في الجسم؟
يلا يا جدعان قبل ما يعقل يا جدعان
هو انت يا سي لطفي؟
-----
السيول السميرية
سلامتي من طرف العين
لا يا سيول انا شايفة كويس
مجاديف
و ناس بتكسرها
و مراكب سايرة
و ناس بتوقفها

خالص تحياتي

Sampateek said...

Aoossa
ربنا يكرمك يا جميلة
تشرفت بحضورك و كلامك اللطيف
يا رب يا اختي يا رب
يتحق الحلم
----
الغـــــــــــــريب
اخي في البلجرة
يسلم تمك باللبناني
يعني يسلم فومك
و ان كان في الواقع تسلم كيبوردك
و في الاصل يسلم عقلك
-------
تمر حنه
علي الاقل الجيل اللي قبلنا اتوكس و انتصر احنا بقي عايشين حالة ازازة المية في التلاجة
لا لون و لا ريحة و لا طعم
برووووووووووووود
وحشتيني يا اختشي
تصدقي البراشوت بقي مينفعش اليومين دول عايزين نجيب شمسية عمولة خمسة راكب
---------------------------
خالص تحياتي للجميع

Sampateek said...

shady
لية بس يا شادي
متشائم طحن ليه كده
لسة في شعب يا راجل
انا لسة شايفاه في التوحيد و النور ده حتي نازل في السيل طازة و بيلعب
-------
المسافر
و الله ما بتفرق معانا الاسامي (محمد صبحي)
المهم حنعمل اية؟
نسفلت الفساد
و نبطط المحسوبية
و نقعد علي قلب الرشاوي
لازم نستخدم امكانياتنا
اطمئن الرجيم باظ مع اول محل بيتزا
كلابيز الي الابد
-------
BackBone
نشكر للسيد العضو(لامؤاخدة) الايضاح
و نلتقي بعد الفاصل
------------------
خالص تحياتي

wa3d el3yoon said...

تصدقينى لو قولتلك أنى برده ما صدقتش مع ان طريقه الكتابه كانت مقنعه وكأنها حقيقيه للأسف برده ما صدقتش

أجدع واحد في الشارع said...

ايه احنا مش هنشوف الجديد ولا ايه

Aoossa said...

والنبى ياختشى ياكلبز
تعدى عليا ضرورى فى البلوج بتاعى
اللى جمب عم عبده كفته
البوست الجديد بتاعى فيه كلام غريب مش قادره أفهمه
مش عارفه الدنيا ليه أتغيرت كده
والناس بتاكل فى بعض هم هم هم
أنا سمعت أنك أشتريتى الغساله أم روحين
على رأى المثل الغساله أم روحين
تشطف مرتين
العواف عشان رايحه للحلاق

kalam said...

هو القرار ده مش هيتاخد الا لو الضرب وصل مصر الجديده بس

Dr. Tantawy said...

hay7sal isa ya benty .. bs lama 7okomt ( kalabezo ) hya elly temsek el balad .. el 7okoma khalas etshakelet w fadel tasdeqek 3aleha .. alf mabroook .. w isa wazer el defa3 beta3na yeshoflena 7ekayt darb israel tfoooo .. orayeb

المسافر said...

aoossa اسمه المزين يا حبيبتشى مش الحلاق لأن الحلاق ده بتشاع الرجالة إنما بتاع الستات اسمه المزين أو الكاوافير

واقعدي بالعافية أو بالراحة مش فارقة

Aoossa said...

مسافر
تروح وتيجى بالسلامه
الحلاق بتشاع الرجاله
بتشاع
وبعدين أسمها
أقعدى بالعافيه
وأمشى حافيه
أتعلموها بقا
مع تحيات
أوسه مختار الصحاح

المسافر said...

لا موأخذة يا حبيبتشي أنا كنت بس بشأر عليكي علشان شايفيك مفستكة شوية يقطع الجواز وسنينه

إيه الريحة دشي يا حبيبتشي التشبيخ اتحرق ولا إيه يا أختي

يادشي النيلة

العواف عليكي وأقعدي بالعافية

BackBone said...

هوه فيه ايه.

ده مبقاش بلوج ده.

ده بقه الي ربات البيوت كده...ه

متقولي حاجه أخت ياكلبوزه

و بعدين ازاي التشكيل الوزاري يتحط من غير حتي ماشوفه... هي دبه برده اخلاق الكلابيز....


و شكراً

Aoossa said...

مسافر
انت مش ناوى تسافر
كل ماقطعلك نص تذكره
تزوغ وتجرى من مـحطة مصر
وبعدين مافيش طبيخ بيتحرق
دى ريحة البرفان الفرنساوى
أسمه شيح دوكار
شيح دوكاغ

كومنت لى فو؟
يعنى أنت مين يابنى

أحمــــــــدبــــــــــلال said...

حــــــــــــــــــــــلـــــــــم

soosa el-mafroosa said...

تعالي يا كلبوزة شوفي أول انجازات وزارتي وزارة الإعلام ...ياللا يا ريسه ادينا رأيك

مقهور said...

دا الحلم المستحيل طول ما بابا سونة ماما سوسو و ابيه جوجو على نفسنا

littilemo said...

اشك

islamventura said...

انا باتمنى و لكن انتى شايفة ده فى شجب و ادانة لحسن نصر الله
انا ما باقولش انه كويس قوى حسن نصر الله بس ده موقف صعب

بس الدول العربية مش اخوات و كله هجايس

شــهــروزة said...

اولا شكرا على الدعم المعنوى يا كلبظ
ثانيا نصيحة من اخت يعنى0... ابقى غطى(.....) كويس عشان الاحلام الوحشة دى تودى ورا الشمس يا حبيبتى.....احمدى ربنك ان محدش كان بيراقب الحلم دة والا كنتى روحتى فى خبر كااان واخواتهااا

Sampateek said...

wa3d el3yoon
ليك حق متصدقش
ابن الشارع
قريبا جدا بس لما اصحي من الحلم ده
Aoossa
عديت يا اختشي لقيتك سايبة الغسيل في اللاكونة بقالك يومين
نعيما
kalam
الخوف انهم يفضلوا ساكتين لحد الضرب ما يوصل مدينة نصر اصل عبده كفتة مستهدف
ZanGooLaaa
و الله انا مش طمعانة في الحكم و لا في الوزارا انا طمعانة في حاجة اهم من كده
في سنداوتش جبنة بالزيتون
المسافر و اوسة
العبوا سوا يا حلوين
BackBone
معلش يا سيدي البلوجرية احباب الله
احمد بلال
اه
soosa el-mafroosa
لولولولولوي الف مبوك يا اختشي
مقهور
انبي انا خايفة عليك
littilemo
اذن انت دبوس
Eng/ Islam M.S.M.S
صح عندك حق
shahrzad
هههههههههههه الجو حر يا اختشي و بعدين اكيد ورا الشمس ده مكان ظل و طراوة
-------------------
نورتونا يا حبايب
خالص تحياتي لكل من شاركني

BackBone said...

و بعدين يازعيمه (بلاش ريسه ديه مش حلوه علي قلبي)ـ

مسنين جديدك, المنظمه كلها تقريباً طلعت بوستس جديده...ـ


والله شكلنا كده هنوديكي في دهيه بموضوع كلابيز من اجل التغير ديه


و شكراً

islamventura said...

انتى عارفة الواحد حاسس انه تم اللعب فى دماغه لدرجة
انه مكانش دماغه فى التعليم بقى زى الفل دماغه كلها كورسات و دكاترة و.... حكاية
و لماكان بيلعب اى حاجة بقت الكورة اكلت دماغه
و لما كان السينما و التليفزيون و القهاوى و السياسة بتاعة القهاوى و تبصى تلاقينا كلنا شبه بعض
بنفس الدماغ و نخاف الحرب زى الريس ربنا يكرمه و نعرف ماذا تفعل الحروب و انا اؤيده و لكن دون اعرف السبب هل الدمار ام الطناش ام انى كسول و زيى و زى غيرى


زورينا مرة

دوسى على الاسم حتوصلى على طولو مالكيش دعوة

زبادي said...

العزيزة حلم أرسلت لي تاج وأنا بدوري عملت لك تاج وحابب أني أشوف ردك علي الأسئلة ولك تحياتي

ام المريله الكحلى said...

كلبوزه اصحى ياجميل الحلم عمره ماهايتحقق
انا دبستك فى تاج
تعالى بقى وعايزا اشوف ردودك
ماشى اوعى ماتجيش
هازعل ومش هاديكى المشبك بتاع ابيتاف

Aoossa said...

كلبوزه
بقا الأمتحانات شغاله عندى وانتى قاعده
تتفرجى على هيفاء أنتى مش عارفة أن هيفا من ألد أعدائى
وغيرانه منى وبتلسن عليا
تعالى بقا للجنة الامتحان عندى عشان تراقبى على التلامذه
وهو كل بتمنه

Sampateek said...

BackBone
لا متخفش ما انا اصلي مع اول قلم حعترف عليكم كلكم
islamventura
ما عاش اللي يدوس علي اسمك:)
شرفتنا
زبادي
من عنيا بس كده
ام المريله الكحلى
احلي تدبيسة علم و سينفذ يا جميل
Aoossa
حاضر انا لبست القبقاب و الملاية اللف و جيا جري و معايا البراشيم و المنافيستو
انت سكر يا بنتي
---------------------
بموت فيكم كلكم
خالص تحياتي

زنفل المعجباني said...

In the apricot ya kalbooza

dr hatem el bitar said...

it will never happen

ممكن تشوفيلي عقد عمل في جدة
السيرة الذاتية اهي

السيرة الذاتية

معلومات شخصية

الاسم: حاتم البيطار
العنوان: 17 ش السيد ايراهيم سليمان القاهرة مصر
تاريخ الميلاد: 7\10\1981
الحالة الاجتماعية: اعزب
موقف التجنيد: معافى نهائيا

مؤهلات

بكالوريس : طب الفم والاسنان جامعة القاهرة
التقدير: جيد جدا

الخبرات

11\2003-06\2004
العمل بمستشفى شبرا العام(كتشنر) خلال فترة الامتياز بالقاهرة
العمل بمستشفى القصر العيني خلال فترة الامتياز بالقاهرة
العمل كمساعد اخصائي جراحة للوجه والفكين بقسم الجراحة والفكين
العمل كمساعد اخصائي تقويم الاسنان بقسم التقويم
اقوم الان بعمل دراسات عليا _دبلومة جراحة الوجه والفكين جامعة القاهرة
11\2003-7\2006
العمل كطبيب اسنان اول بمستشفى نويبع المركزي بمحافظة جنوب سيناء (مدة التكليف)
العمل بمراكز طبية ومستشفيات خاصة داخل محافظة القاهرة والقليوبية
العمل كرئيس لجان توريد اطعمة وأغذية العاملين بالمستشفى

اماكن العمل

مستشفيات تخصصية: (مستشفى نويبع المركزي-- مستشفىعبد الراضي الطبي--مستشفى الرحمن--مستشفى ابو مناع الطبي)
مراكز طبية: (الهوانم-الاخلاص--ايديال--ابن سندر-الشروق-مكارم الاخلاق)

هوايات ومهارات اخري

الهوايات: القراءة--تصميم مواقع الانترت--تشغيل الحواسب--تصفح مواقع الانترنت
اللغات: تحدث وكتابة اللغة الانجليزية بطلاقة

طرق الاتصال


محمول: 002
010 5684344
موقع الالكتروني: www. timo1.jeeran.com/timo/
بريد الكتروني: timo_dentist1@yahoo.com


تسلم ايدك يا حبي مدونة جميلة
وتستحقي التقدير
واتمني لك مستقبل باهر ومزيد من التقدم
ياريت نكون اصحاب منتظر ايميلك وبناء جسور الصداقة بينا
ويا ريت تشوف موقعي وتقوللي رايك
www.timo1.jeeran.com/timo/
www.hatom1.jeeran.com/bitar/
www.flickr.com/photos/40483090@N00
http://groups.yahoo.com/group/timobitar/join
وانا اقبل بتبادل الاعلانــــــــــات
وارجو ان تنشروا مواقعي
mboile: 002-010-5684344
للتفاوض بخصوص الاعلانات ارجو اضافتي على المسنجر
timo_dentist1@yahoo.com
sambo200437@yahoo.com
my foto
http://www.realpics.net/user_photos/37801/22_492364.jpg