Tuesday, October 24, 2006

كلبوزة علي الجبل اقوي افلام العيد


من زمان و انا اسمع صديقاتي السعوديات و المصريات يقولوا ان الطائف جميلة و فيها جبال خضراء و لا جبال لبنان و فيها شلالات و تلفريك و مستعمرات قرود و مناظر طبيعية خلابة و بما اني في اجازة العيد فقلت ارفه عن نفسي عن اولادي و نسافر الطايف
قال اية نتفسح
و بعد صلاة العيد لبسنا الجديد و اخدنا الشاي و القهوة و الكحك و شوية قراقيش و شرخنا علي الطايف
قالوا ان الطريق مش بعيد يعني فركة كعب كده و كانت اول صدمة ان الطريق من جدة للطايف حوالي 3 ساعات في طرق وعرة بين الجبال الشاهقة و منحنيات عالية علي حافة الجبال و صخور متساقطة من هنا و هناك طوال 3 ساعات من فيلم الرعب اللي قمت ببطولته اول ايام العيد و حقق ايرادات منقطعة النظير
حيث لم يحضر احد العرض غيري انا و اولادي و جوزي المسكين.
مطولش عليكم قولوا طولي
وصلنا الشفا و ده عبارة عن جبل عالي فية استراحات و منتجعات سياحية و متتغروش من كلمة منتجع ده و اوعوا تتصوروا ان في سويمنج بول و لا سونا و لا جاكوزي لا قدر الله
المنتجع المحروس ده عبارة عن غرف فندقية عالية الجودة في البناء و التاثيث و متواضعة النظافة تدخل جواها و تقفل عليك الباب و تقعد تتفرج علي الدش يعني تسيب بيتك و تطخ مشوار مقندل علشان تجعمز قدام شاشة التلف ازرون
المهم كانت تاني صدمة ان الجو برد جدا هناك غير جو جدة الدافئ و انا مش عاملة حسابي في اللبس و رايحة صيفي انا و العيال و ابوهم
و الصدمة السبعتاشر ان مفيش مطاعم مضمونة للغدا يعني كلة نظام المطبخ العربي للمظبي و الحنيز و الزربيان و طبعا اسماء الحاجات دي من الاساس تسد النفس و خصوصا الزربيان ده
و الصدمة الثالثة و الاربعين اننا حنضطر نبات لان الطريق الطويل ده مينفعش نرجعه في نفس اليوم و اننا نفسنا ننام و حنصحي علي المغرب و الطريق مفيهوش انوار يعني ظلام دامس و مع الجبال و المنحنيات كانت العودة حتبقى عبارة عن فيلم رعب بعنوان
كلبوزة في القرافة
فضلت عدم القيام ببطولته السنة دي علي اعتبار ان العمر مش بعزقة
طيب اوكي حجزنا احد الاجنحة الفندقية و جعمزنا كلنا تحت البطاطين قدام التليفزيون و قضينا ليلة بائسة من البرد بعد غدا خفيف من الجبن المحفوظة و المربي و العيش الصخري
طيب يا بشرية بقي ننام من المغرب يا طايف!!!!؟
الوكسة الكبيرة بقي اني لا لقيت شلالات و لا بطيخ لقيت شلل بس من غير ات
و الجبال الخضراء عبارة عن جبال كالحة الخضار من النباتات البرية و ساعتها افتكرت مصر و جمال طريقها الزراعي و جمال خضار الحقول الممتدة في كل مكان
عمار يا مصر
الشيء الوحيد الصدق في الكلام اللي سمعته هو
مستعمرات القرود
لقيناهم علي الطريق و احنا ماشين ووقفنا السيارة و حدفنا لهم سوداني و موز من شباك العربية بس كان في قرد كبير بس هو المستولي علي كل الاكل و مش مدي فرصة لحد تاني ياكل
تصوروا ان اولادي حدفولوه كحك و اكله هههههه قرد نفسه حلوة مبيدقش
(صورة القرود مش راضية تظهر اللي عايزها يروح الطايف يشوفها بس اوعى يدعي عليا)
و رجعنا في ثلاث ساعات اخري من القلق و التوتر لان الطريق مخيف علي سفح الجبل و ملتوي و في صخور متساقطة من الجبال زي ماقلتلكم
و زاد و غطي اننا دخلنا يمين غلط في طريق رايح جاي في نفس الشارع من غير جزيرة في النصف و ملوش مخرج حاجة كدة بتاعة 30 كيلو اونطة
كانت رحلة مؤلمة
رجعت منها عندي احباط و ضغط عصبي نمت زي الفسيخة و استخلصت حكمة بالغة الاهمية
هي
من خرج من دارة
انقل مقداره
و كل اجازة عيد و انتم بخير
بحبكم

66 comments:

KazaBaza said...

سمدله علي الحلامه

مش كل الناس يتسمع كلمهم

بس بيني و بينك قالولي كتير علي جمال الطايف
لكن خلاص بعد رحلتك الاستكشافيه
كل شيء انكشفن و بان

كلبوزة لكن سمباتيك said...

كازابازا
الله يحلمك يا خويا اسكت كانت رحلة فقرية كنتم حتفقدوني
يلا حصل خير
انت ازيك كده؟

Anonymous said...

كل سنة وانت طيبة وعقبال ما يخدى العيال وباباهم وتطلعوا رحلة كل سنة بس لاماكن مش متعبه وتخلى الفيلم الرعب كوميدى ورومانسى كمان
وبعدين اهم اسمكم خرجتم فى العيد

مفلس افندى الرايق said...

هههههههههههههههههههههههههههه
تصدقى رحله ممتعه بجد هو ده العيد ولا بلاش برد ورعب وجوع وقرود وقلق يا بختك يا باشا بس اللى لفت نظرى من كلامك ان القرد الكبيرهو اللى استولى على السودانى هما حتى القرود فيهم قوه حاكمه وباخد خير الغلابه هههههههه
ماعلينا اسكتى انا بهرج لحد يقول انى بتكلم ف السياسه

بس ايه اسامء الاكل اللى تخلى الواحد يكره الاكل دى
للمظبي و الحنيز و الزربيان

هههههههههههه
طب المظبى معروف قريب ابو ظبى

والحنيز عباره عن خلطه من الشكلمه والمحموحى والفوحلوقى

ايه بقى الزربيان دى هههههههه

يلا امشى احسن اصلى انتى اللى فيكى كفايه ومش ناقصانى

سلام يا كلبوزه فوق الجبل
على غرار فيلم ابى فوق النخله

سلالالالالالالام

كل سنه وانتى طيبه

مفلس افندى الرايق said...

موضوعى الجديد وقعت كام مره من البلوج وماكنش بيقبل كومنتات بس اخيرا بقى بيقبل كومنتات

عيد مبارك

ody911 said...

إيه المأساه دى يا ست كلبوزة
دة إنتى زعلتينى أوى
صحيح إللى يشوف رحلت غيروا تهون علية بلوتوا
أنا بقة كنت فى الشغل النهاردة إللى هوة يوم العيد يعنى
وقضيتها وسط المرضى والحوادث أجارنا الله وشفاهم أجمعين
وعادى بقة
أودى

الأميره أوسه said...

يا ختشى حمدلله على سلامتك
قرود أيه اللى رايحين تشفوها
مكفاكيش القرود فى مصر
صورة القرد مش بتظهر
أنت مصوراه عريان
ههههههههههههههه
جبال الألب أل
جبال الألب الأبيض
دى شبه الجزيره العاريه
يعنى الناس بتروح الأماكن دى عشان تتفرج على الدش ليه هو بيجيب أيه
وبعدين أكلهم وحش
الناس تاكل سحالى أو ضفادع
لكن مظبى أيه ده
ده حتى باين كلمه أبيحه
وسايبين القرود جعانين
يكونوش دول باقية قبيلة بنى أجعد
أبن نسناس أفندى
طيب كنتى خدى قرد نونه من هناك أهو يعوض الرحله ومصاريفها
طيب ممكن أستفسار
سمعت أن جده زى أسكندريه صح أم خطأ
وأهل جده أفضل فى المعامله من باقى السعوديين فى المدن الأخرى صح أم خطأ
أرسل الأجابه على صندوق بريد رقم خماشر كورنيش النيل عماد الدين
ده فى التلفزيون مصدعنا أعلانات عن المملكه واحد بيقول أخرج وتعرف على المعالم السياحيه للملكه
نصيبه ليكون بيقصد القرود و التلفزيون والقاعده العربى
عشان كده لما بيجوا مصر بشوف الدخان طالع من مناخيرهم وعنيهم بتنور
يا دى الحوسه يا كلبوزه أنت حمل الكلام ده
أنت تركبى أول قطر وتيجى تتفسحى
عملوا فى الجيزه جنينة حوانات
وفيها قرود وارانب والدخول بشلن
ولو معاكى زوج بيدخل بنص تسكره
يعنى انت وهو والعيال تسكرتين
وممكن تاخدوا معاكوا شندوشتات بومبار وتعيشوا
كل سنه وانت طيبه
زمان مصر وحشتك
أنا كمان موزبيق وحشتنى
أهىء أهىء أهىء
أنا فرحانه أنى عندك ومش عايزه أروح
ممكن أبات عندك
بس كده هنحتاج مــحلل
كركركر
مش البنت شهروزه عملت كحك و حططه فى الفرن وجات تخرجه طلع من الفرن بيتفور
أصلها شاطره فى عمايل الحنويات
كل أصناف الحنويات بتعملها
سمعتى أخر نكته
واحده سعوديه أشترت غساله فول أوتماتيك بتشيل سبعه كيلو غسيل
المهم فرحانه بيها أوووووى
كل متشوف صحابتها تقولهم ألغساله بتاعتى مـــره حلوه مــره حديثه
و راحت عزمه (دعيا ) مش دعيت عليهم
قالتلهم تعالوا أشربوا معايه الشاى
فهمتى يا كلبوزه ولا لسه
المهم فرجتهم الغساله الجديده
و راحت حطه فيها تلاتين كيلو غسيل مره واحده وهوب راحت مشغله الغساله
يعنى دورتها (داست زرار التشغيل ) أيه
فى أيييه ركزى معايه يا كلبوزه
هانام منك فى السكه
كنا بنقول أيه
أيون راحت مدوره الغساله
وراحت قاعدت مع صديقاتها فى الأنتريه
وهى أخر أنفشاخ وشويه وسمعت صوت كركره عاليه ولقيت الغساله الجديده بتتهز جامد وبتتحرك نحيــة البلكونه
راحت جريه على الغساله وحضنتها
وقالتلها والله والله مــحــد ناشر الغسيل غيرى
تمت
ههههههههههههههههه
هههههههههههههههههههههه
هههههههههههههههههههه
أنا مش قادره أمسك نفسيتى من الدحك
هههههههههههههههههه
أنا دوخت من الدحك أأأه يا بطنى
ههههههههههههههههه
حد يضربنى على ضهرى بالشومه جاللى زغطه
شفتى الحكومه عندنا كتر خيرها بتوزع علينا بلالين ملونه وبتدى كل واحد خابور هديه
مش قولتلك مصر حنينه أأأوى
والناس ماشيه فى البلد مهيصه
البلد أتغيرت خالص عن شهرين فاتوا
بقت وااااااااسعــه
ونضيفه
طيب أمشى أروح للبنت شهروزه ألعب معاها أستغمايه
عيد مباااااارك
و يا ااااجمال العــيد

الأميره أوسه said...

نسيت أقولك
العيد فرخه
كاك كاك كاك
أنبى تسلميلى على المحروس جوزك اللى هو خطيبى
باى

Adel said...

يا مسافر على الطايف طريق الهدا
شوق قلبي من امبارح معاك ما هدى
من ابدع واجمل اغاني ابو بكر سالم بالفقيه


عموما رحلة زي دي يا ماما ما يبغى لها الا بشكة شباب ويبشكوا بالخبت وينصبوا بيت الشعر والعود والطرب ونسمر ما يبغى لها عوائل وايش رايك لو طلعتي المطل بأبها والله تنفجعي اشكل من ارتفاع الطيارة بالسما انا كنت اطلع يعلى عندي الضغط روحي منك لله فكرتيني باحلى ذكرياتي وانت فعلا عاملة بمبدأ ما يعرفش قيمة امه الا اللي يشوف مرات ابوه مالها الاكلات دي واله اتوحشت للمندي والمظبي والسليقة والمضغوط الموضة الجديدة من القوزي ولا الرز البخاري والكبسة لالالالالالا بجد زعلان منك هي الحاجات دي الواحد يتريق عليها والله كانت اجمل الايام 14 سنة صعب انساهم بسهولة ولا اسمح لك تتريقي عليهم ممكن ولو انت عاوزة تموتي موتة ربنا يبقى بلاش تاكلي منهم انما انا كنت بانتحر بمزاج ومش عاوزك تكرهيني فيهم انت عارفة ان القرود اكتر في أبها وفيوم قرد دخل بيت يسرق .. ايوة بيسرقوا ويخطفوا وبيعملوا بلاوي المهم القرد وهو بيسرق مسكه صاحب البيت وضربه فما كان من القرد الا انه فر هاربا وعاد بعد حوالي الساعه ومعاه قبيلته من القرود ودغدغوا بيت الراجل لولا رحمة ربنا كانوا موتوه والله القرود هناك يا ما بتعمل وبعدين انت ليه ما ذكرتيش انه في طريق الشفا في لوحات تحذير من البعارين (الابل )لانها بتقلب سيارات ياما



المهم حمد لله على السلامة مش هاطول عليك كل رحلة وانت احلى
اقعدي في البيت وقولي
ما احلى الرجوع اليه

ذكريات said...

besara7a wana bakra2 eftakart masr7eyet seket elsalamaa we 3ala fekra 3agabny awee blog heya hakaza ka3roset elba7r

Anonymous said...

كل عام وانتي بخير ياكلبوزة

يعود عليكي الايام بخير يارب

memo said...

كل سنة وانتى طيبة
بزمتك
فى حد فى الدنيا يروح مستعمرة قرود
المهم
حمد الله على سلمتك
وتعيشى وتاخدى غيرها

أحمــــــــدبــــــــــلال said...

معلش يا ستى

ناحدش يمشى ورا كلام الناس


و عمار يا مصر

Anonymous said...

مصر حلوة صحيح.. بس الطائف حاجة تانية

والله أنا مستغربة من الانطباع الوحش اللي اتكوّن عندك@@

أنا زرت الطائف.. جماااال غير طبيعي

منطقة قمة في الشاعرية .. منظر البيوت على قمم الجبال محاطة بالسحاب وااااو

الباعة المتجولين أكلهم نظيف..الفاكهة اللي بتتباع فوووق بيبقى شكلها طازج وحلووو.. وباردة ولذيييذة..

التسهيلات الترفيهية لزلاّجات الأطفال فوق الجبال

كفاية متعة ركوب السيارة والسواقة في الممرات الضيقة بين الجبال، أكشن رهيييب

و بصراحة، حتى قراءة القرآن في الطائف بيبقى فيها خشوووع مذهل لأن الإنسان بيبقى محاط بعلامات قدرة الله... يعني طول ما إحنا بنلف بنذكر ربّنا و بنتسائل: إن كان في الدنيا في حاجة بالجمال والعظمة دي أمّال الجنّة إزاااي.. اللهم اجعلنا من أهلها..

أختي أنا بزور مصر باستمرار، وأوروبا كل سنة كذا مرة.. بس مافيييش زي هدوء وشاعرية و رووووعة الطائف

جو لايوصف.. يؤسفني إنك ماعرفتيش تستمتعي بيها

Anonymous said...

موتينى من الضحك يا كلبوزة و كل عيد و أنت طيبة و لما تحبى تتفسحى أبقى اكتفى بالفسح بتاعت مصر لأنها لا يمكن تقارن بفسح السعودية

admelmasry said...

معلشي تعيش وتاخدي غيرها

HANY said...

حمدالله على السلامه أختى الكريمة

ةتعيشى وتاخدى غيرها , انتى بقى كان لازم وانتى راجعه من الطايف تحطى فى العربيه شريط مصر هى امى , أو طوف وشوف لام كلثوم

على فكره مش مهم جمال المكان ولا سحره المهم انك مع جوزك وولادك وهو ده المهم , فى أى مكان بقى هيخلوه جنه حتى لو كان الطايف
وانا لو منك بصراحه كنت رحت المدينة وقضيت العيد كله جنب سيدنا محمد , هوه ده بقى اللى يبقى اسمه عيد

وتقبلى تحياتى

Amr Ahmed said...

هاي كلبوزة موضوع لذيذ علي راي جدتي يرحمها الله "من خرج من دار اتقل مقداره"ادينا برضو بنعرف قيمة مصر علي الرغم من المرمطة اللي احنا فيها بس يللا اديها بلدنا واحسن من غيرها وربنا يجعله عامر

soosa el-mafroosa said...

كلبوزتي يا حبيبتشي
كل سنة وانت طيبة يا قمر

لحقوا القرود وحشوكي..انت مش كنتي هنا في الصيف ما هم ماليين الميكروباصات ..والا انت من بتوع التاكس؟؟

و بعدين طب المظبي ده شكله مفيد..داكفاية اسمه ..مش انت يا اختشي عايزة تخسي..طيب هو ده اللي هايجيب معاكي نتيجه
يا اما تتسد نفسك من اسمه فتخسي
يا اما تاكلي منه و بعدين ....اوععع..و برضه تخسي

فايده بروحين يعني

عموما تعيشي و تاكلي غيرها يا كلبوزتشي
و انا هاطلبلك اغنية ..سلمولي على مصر سلمولي ..للفنان توفيق الدقن..هاتي ال اف ام هتلاقيها شغاله

قبلاتشي

اموووواه

^ H@fSS@^ said...

اختشي في الكلبظة
والله بموت فيكي و في بلوجك و تعليكاتشك
ايه الحلاوة دي ايه العظمة دي؟؟
لكن كله الا فلم القرود
انت اساسا عايشة ازاي في السعودية
ارجعي بسرعة قبل ما يخسسوكي من الغم و القرف حاكم احنا دمنا خفيف عشان مكلبظين
تحياتشي
ابقي تعالي زوريني

Anonymous said...

وكان اية لزمة الاسراف دا
كنت خدي الاولاد كازينو الفروتيكانا و تتغدوا مشنكاح بالزبادي
وتشربوا عصير سوداني بمية العدس

وتتفرجي علي فيلم كوكب القرود في البيت
بس حصل خير
وعيد سعيد
====================
الامبراطورية المفقودة
عالم مختلف
www.lost-empire.blogspot.com

tamer afify said...

كل سنه وانتي طيبة
بجد رحلة جميلة
نفسي تكرريها تاني

كراكيب نـهـى مـحمود said...

كل عيد وانتي بخير وتعيشي وتاخدي غيرها
بس بقولك انا سمعت ان في شلالالت تجنن في ساحل العاج ومستعمرة سحلاليل
عايزة تعرفي يعني ايه سحالايل ممكن تزوريها العيد الجاء
مت من الضحك على فكرة

مـحـمـد مـفـيـد said...

كل سنه وانتي طيبه وكل رحله وانتي بخير

ibndafallah said...

كلابيزوووو
انتى متاكدة انك رحتوا الطائف اصلى سمعت غير الحكى ده على العموم كل عام واولادك وانت بخيروالعيد الكبير عليك بجبل لبنان مش هاتندمى

كلبوزة لكن سمباتيك said...

hend
و انت طيبة يا هنودة اعمل اية يا اختي المتعوس متعوس و لو علقوا في ايده فانوس :)
----
مفلس افندى الرايق
فرحان فيا يا مفلس طيب لك يوم تروح فيه ابو زعبل و نفرحلك برضه بس انا بقي حجيبلك حلاوة و عيش فينو
و انت طيب يا عزيزي
----
ody911
العمل شرف العمل حق العمل واجب ربنا يقويك يا دكاترة و يشفي كل مريض
و انت طيب يا طيب
----

كلبوزة لكن سمباتيك said...

Aoossa
موه اموه اموه
ازيك يا اختشي عاملة اية وحشاني مووووت عملتي اية في العيد اوعي تكوني اتوكستي وكستي
لا و اية جيت من الرحلة دي مكسرة و نمت يومين في السرير
انا وش فسح!!؟ الفسح دي ليها ناسها
القرد يا اختشي صورته مش طالعة علشان الحاج بلوجر مش مستنضفها باين و لا اية
الناس بتروح الطايف علشان يتفسحوا بس اللي يبسط واحد مش ضروري يبسط التاني في ناس تحب تعيش عيشة البدو و تشوف صحراء حوليها و احنا كمصريين الموضوع ده موحش بالنسبة لنا
كمان اللي مش متعود علي اكل معين ميستطعموش حتي لو حلو لانه مش متعود عليه
جدة جميلة و بلد عصرية مليانة مولات و منتزهات و فيها كورنيش فيه مطاعم عصرية و علي احدث طراز مش زي الطايف خالص
مصر وحشتني يا اوستي بجد رغم كل سلبيتها الا اني بحبها بعبلها
بوسيلي شهروزة و سلميلي علي غريب و كل حبايبنا
متحرمش من دخلتك عليا
و لا من طبق الكحك اللي سيباه تحت الكومنت
بحبك انبي بحبك
قبلاتشي

كلبوزة لكن سمباتيك said...

Aoossa
الله يسلمك يا اختشي هو بيبوس ايديكي و بيقولك هو انا مكتوب عليا اطلع من حفرة اقع في دحديرة
تفتكري يقصد اية
ههههههههههههه
----
المزاجنجي
كيف حالك يا مزاجنجي يا خوي عساك طيب من العايدين ان شاء الله و الله تعبنا مرة في السفرة هاي و كان الجو براد و ما حصلنا و لا مطعم زين للعشا و العيال حقي ما يحبون المظبي و الخرابيط هادي
كمان طريق الهدي كان مسكر يجولون في سيول متوقعة و طريج الشفا مرة طويل و ماهو زين
يلا عاد العيد اللي يجي نتانس بوجودك
و عساك من العايدين
---
ذكريات
الحمد لله انكم انبسطم عندنا شرفونا دايما

كلبوزة لكن سمباتيك said...

الغرييييييييييب
ازيك يا سيدي عامل اية كل دي غيبة طيب الواحد لما يحب يسأل عنك يعمل اية؟
افتح الكومنت علشان خاطر النبي
وحشتنا و وحشنا كلامك
تعرف
الناس ازواق مختلفة انا حسيت بقلق و وحشة من طلوع الجبل في ناس تانية تحس بمتعة
و كمان الخروج للبر ده انا بستغرب علية اية الممتع في انك تقعد حواليك رمال من كل ناحية
كل واحد حسب متعود بقي
المهم انت نورت مصر يا رب تكون بصحة و سلامة و عافية
خالص تحياتي

كلبوزة لكن سمباتيك said...

shoowbash
متحرمش من دعاكي الرقيق يا اختشي نورتي بلوجي يا رب دايما مشرفاني
و انت طيبة و بصحة و سلامة
---
7arnkash
و انت طيب الله انت وحشتني قوي من زماااااان ماكلتكش
---
memo
اصل انا احب اجي في راس القرد و اشم
ههههههههه
و انت طيب يا ميمو
---
احمد بلال
ايوة صح انا محقوقة المرة دي
و عمار يا مصر الف مرة
نورت يا طيب
---
Aisha
العزيزة عائشة
نورتي البلوج يا جميلة و اتمني تشرفيني دايما
انا فعلا سمعت سمع خير عن الطايف بس تعرفي كان حظي سئ في زيارتها لان طريق الهدي كان مغلق لتوقع حدوث سيول و مشينا في الطريق الطويل و ده كان متعب كمان الجو كان غيام و برد و ده مش ممتع بالنسبة لنا و مكنتش عاملة حسابي علي البرد فمكانش ممتع الخروج من الاستراحة و التجول و اعتقد لاننا في فصل الخريف فالجبال لونها مش اخضر زي ماسمعت يظهر لازم اروح مرة تانية في الربيع و المرة دي اخدك معايا
اما عن ذكر الله فصدقتي فعلا و ربنا يكتبنا وسط الغافلين من الذاكرين و وسط الذاكرين من المستغفرين و يعيد علينا و عليكم الايام بكل خير
خالص تحياتي

كلبوزة لكن سمباتيك said...

safa
معلش يا صفا المرة الجاية حاخدك معايا علشان اتبسط
اللمة الحلوة بالدنيا
قبلاتي
---
ادم المصري
سم كده اهو انت
:)
---
HANY
انا كل سنة كنت بعيد في المدينة بس السنة دي قلنا احنا لسة كنا هناك فنغير بقي
بس بجد انا نفسي بقول كنت رحت المدينة احسن
نورتنا يا هاني
---

كلبوزة لكن سمباتيك said...

miro
ايوة صدقت
مصر ام الدنيا و اللي اتعود علي شئ يبقي هو احلي جاحة عنده مهما كان
نورتنا يا فندم
---
soosa el-mafroosa
هههههههههه
بقي كده طيب انا اول ما تيجي جدة حعزمك علي مظبي و نشوف حيجيب نتيجة و لا لا
و مقبولة منك الاغنية و الحاج توفيق
و الي بابا و ماما و جدو و تيتة و سلميلي علي مصر سلميلي
---
fayroze
و انت طيبة يا جميلة و ده عزائي الوحيد اني جربت علشان مبقاش نفسي في حاجة
شرفتينا

كلبوزة لكن سمباتيك said...

Hafsa
ربنا يطول عمرك في الصحة و الهنا يا جميلة
السعودية جميلة و كفاية ان جدة قريبة من الحرم و من المدينة
لكن الفسحة كانت غير موفقة يمكن في الصيف تكون احلى
بوسيلي مصر
قبلاتشي لك
---
the emperor
علي رايك بس مبنسمعش الكلام تقول اية بقي
الا هو المشنكاح ده اكلة بجد و لا زي الفحلقي كدة؟
:)
---
tamer afify
هههههههههه و انبي يا تامر باينك مقراتش البلوج يا اما نفسك تفرح فيا
هههههههه

كلبوزة لكن سمباتيك said...

كراكيب
و الله انا كمان سمعت كده و اخدت الراجل علي مشمة و قعدت ارفس عايزة اروح الطايف اشوف الشلالات بس يا اختي المنحوس منحوس
لما اجي رايحة تاني حخدك معايا
:)
---
مـحـمـد مـفـيـد
و انت طيب و بصحة و سلامة
---
ahmedsobhy
رحت جبل الشفا في الطايف اكيد في اماكن تانية حلوة في الطايف بس حظي جه كده
شرفتنا:)
-

كلبوزة لكن سمباتيك said...

dr hatem el bitar
طريقتك سخيفة جدا
و كده عمر ما حيكون ليك اصدقاء
عندك سطرين تعملهم كوبي و بيست و ترميهم في كل مدونة و تجري
و اية السي في اللي باعتهالي دي؟
و انا اعرفك علشان تقولي يا حبي؟
يا اخي حبك برص و سبعة خرص
اسمع بقي متجيش تاني و لا تبعت ايميل لحسن اخللي اللي ما يشتري يتفرج عليك
حاجة تقرف

Anonymous said...

انتي متعرفيش المشنكاح
زعلتيني دي مصر كلها عارفة المشنكاح
دي اكلة اختراعها الزعيم عادل امام
في فيلم التجربة الدنماركية
========================
مستني زيارتك في الامبراطورية المفقودة
عالم مختلف
www.lost-empire.blogspot.com

Tamer Nabil Moussa said...

حمد الله على السلامة كلبوزة

انا احسن منك بقى قضت العيد فى البيت

بينى وبينك اريح

تحياتى

بعدك على بالى said...

كل سنة وانت طيبة ونورتى بيتك

We2am said...

7amdella bessa :D
elsara7a ana ro7t el 6a2ef bs w ana so3'ayara ya3ni..fakra enha kanet kowesa mesh mo2refa awe kida.bs anyway..mafesh a7san mn masr w ent fel s3odya awel matege w to3ode mfesh a7san mn ay mkan fel 3alam b3eed 3an masr..kol sana w ente tayba :)

tota said...

كلبوزة

عودا حميدا لا يا شيخة بلاش المغامرات اللى مش محسوبة دى القرود كانوا لطاف المرة دى واكتفوا بالكحك والفول السودانى محدش عارف افكارهم المرة الجاية
اتفرجى على التليفزيون فى البيت فى الطائف مش هيعرضوا حاجة جديدة بلاش النفوس اللى مش صافية دى

كل سنة وانت طيبة ومبسوطة برجعوك تانى على شاشة الال سى دى

تحياتى

labido said...

كل سنة وانتي طيبه
ما نجيلكيش في طايف
وفعلا اللي يسمع كلام ...... يستاهل اللي يجراله

Ayat said...

يا عينى يابنتى!! ده فيلم رعب بجد
معلش اهو الواحد ما بيتعلمش ببلاش
حمدالله على السلامة ليكم كلكم وكل عيد وانتم بخير :)

كلبوزة لكن سمباتيك said...

the emperor
انا سمعت مع اللي سمعوا عن المشنكاح في فيلم التجربة الدنمركية بس ماكلتوش لسة قولي بقي ده عبارة عن اية بالصلاتو علي النبي:)
-----
tamer
خير ما عملت يا تامر و الله انا ندمت علي السفرة دي و اتمنيت لو كنت قعدت في البيت و نممممممممت
او رحت المدينة زي كل سنة بس نصيب بقي
-----
بعدك على بالى
تسلمي يا غالية الله يسلمك انت عاملة اية؟ طمنيني عنك يا رب تكوني باحسن صحة و عافية انت و كل العائلة الكريمة
قبلاتي الحارة

كلبوزة لكن سمباتيك said...

we2am
ده انا كل ما احكي لحد يا وئام يا اختشي يقولي ليه رحتي في الشتاء ده انتي زي اللي راح مرينا في الشتا طبعا حيلاقيها برد و فاضية و مملة
بس اقولك اية المنحوس منحوس
المرة جاية نروح سوا و نعمل رحلة بلوجرية و الله تبقي روعة قبلاتي
----
tota
يا توتة يا قطقوطة نفسي اجي اشرب الشاي عندك في بلوجك انبي تفتحي الكومنت علشان ابقي اجي اشقر عليكي يا شيخة بتوحشيني
تصدقي مكنش في دماغي خالص موضوع الدش ده ماهو عندي في جدة بس الوكسة اني اطخ المشوار علشان اتفرج علي لورد اوف ذا كينج هناك
و انت طيبة يا جميلة
قبلاتي
----

كلبوزة لكن سمباتيك said...

labido
و انت طيب و بخير و سلامة و يجعل بيوت البلوجرية عمار
----
ME
و انتي طيبة يا مي ربنا سلم المرة ديو اهو الواحد مبيتعلمش ببلاش

Anonymous said...

كلبوزة..
ربنا يعلم أنا حبيتك ازاي قبل مااشوفك
لكن انهردة بئه حبيتك أكتر
وبافترا كمان :D

يعني تكوني في جدة وساكتة؟؟
أنا في جدة كمان
ياريت بجد نتعرف على بعض

mariam said...

تعيشى و تاخدى غيرها بس و لا يهمك
كل سنة و انت طيبة

Rivendell** said...

يا عيني يا اختشي .. ليه تعملي في روحك كدا ... حد يبقى في جدة ويروح يتفسح في حتة تانية دا انتو في نعمة مش حاسس بيها غير اللي قعد في حتة تانية في المملكة ... يلا تحياتي لاولادك وحرام عليكي كدا العيال هتتعقد من العيد وهيجلهم كومليكسات جامده جدا مش هيحلها الا يومين في دريم بارك ويوم في جيرو لاند واسبوع في اسكندرية

تحياتي يا عسل

ســــها

Anonymous said...

ياااااه
ياكلبوزة
دا فيلم هندي صار ..
المهم رجعتكم سالمين وبصحة جيدة
والعتب على قصور السياحة عندنا
وعلى اللي نصحوك
المفروض يعطوكي فكرة اوضح من كذا ..

بكل الاحول كل عام وانتي بخير
وعيدك مبارك

أُكتب بالرصاص said...

تعيشي وتاخدي غيرها
ودي جزات اللي تسمع كلام صحباتها
على فكرة الطريق اللي بتقول عيله كلبوزة ... وصفها له كان ف يمنتهى الأدب والرقة

لاني مشيت في الطريق ده في طريق عودتي من العمرة ، سنة 99
فعلا..فيلم رعب ، وعايز تكون مفتح التلات ساعات
وخصوصا انا اخدته بالليل،

منحنيات ، ورايح جاي، ومطلع ،
انا لما وصلت لاخره ، كانت العربية سخنت ،
ونافوخي هو كمان ولع

الحمد لله على السلامة يا كلبوزة

Anonymous said...

هو ياكلبوزة غالبا يعني المشنكاح دا زي الفحلوقي
بس انت عارفة بقي خلاص
مبقاش في حاجة اسمها مستحيل بعد خبر ام نبيل
ويجعلة عامر
=====================
انا نزلت الجزء الثاني من موضوع الكاس المقدسة مستني زيارتك
==================
الامبراطورية المفقودة
عالم مختلف

كلبوزة لكن سمباتيك said...

سحابة
اهلا اهلا بجارتي العزيزة عاملة اية؟ ابعتيلي ايميل نحكي سوا اوعي تكوني رحتي الطايف في العيد؟
استني شوية و نروح سوا في الصيف ان شاء الله
خالص تحياتي
---
mano
ناخد غيها جماعة ان شاء الله
و انتم بصحة و سعادة:)
---
غواص بحر الأمل
بالضبط يا سها ده اللي حاسيت بيه اننا في نعمة و الحمد لله
يعني المساكين اللي عايشين هناك دول اكيد بيكلموا نفسهم لا و لسة الشتا اللي بجد جاي و هناك المطر سيول يعني الحياة بتتوقف
الحمد لله علي كل حال

كلبوزة لكن سمباتيك said...

Elham
الله يسلمك يا جميلة و كل سنة و انت طيبة شرفتيني و نورتيني
---
أُكتب بالرصاص
فرحان فيا يا رصاص ؟طيب عقبالك كده لما تحج تاني و تمشي في نفس الطريق بقي معقول سوقت فيه بالليل؟ بتهرج
ده مفيش فيه نور و لايمكن يتمشي في الضلمة
المرة الجاية نعيد علي جبال لبنان بقي
اصل انا ادمنت الجبال
سلملي علي العيال
----
the emperor
بقي كده ما انا قلت من الاول انه اسم بس مفيش مسمى بس رجعت قلت مش بعيد المصريين يكونوا استغلوا الشهرة اللي اخدها الاسم في انهم يعملوا اكله مفتكسه عليه
بس يلا حصل خير
اول تاكسي حاخده و اجي اتوه عندك شوية
:)

no one said...

البلوج ده كلو على بعضه حلو انا قريت كل البوستس الى فيه اتمنى انى اعلق عليهم واحد واحد بس كفايه انى اقول انى كل ما ادخل مدونه الاقى لينك للمدونه دى و عرفت ليه

لأنها بجد رائعه

استنينى هاجى تانى كثير

عوليس said...

طب احمدى ربنا انك دخلتى طريق الهدا وطلعتى منه سليمه
فكرتينى اما دخلته مره وانا راجع من جده غلط وتهت وكانت الساعه 2 بالليل كان فصول من الرعب

daktara said...

يا ستي من خرج من داره
الا صحيح انت غيرتي القطه ليه
علي العموم مبروك علي الجديده

أُكتب بالرصاص said...

ما الطريق ماكانش ضلمة يا كلبوزة ،
كان نور السيارات اللي جاية في المقابل ضارب في وشي ومنور لي الطريق
شفتي الهنا اللي انا فيه ،

سوسا
حلوة القرود اللي في الميكروباصات … بس ده قذف عام !
المظبي ، والمندي والكبسة ، والبرياني والبخاري
كله حاجة واحدة بس اعتقد ان الاختلاف في البهارات، رز ولحمة وخضار

يعني برضه

بيييييض

BackBone said...

مفيش احلي من جزيرت القطن (السرير يعني) ان روحت عند ختبطي في البلد و قضيتها نوووووووم و اكل و حمام و فريك و ووز و بط و لحمه و كوارع و فشه و كرشه و فتة و حواوشي بيتي و بميه و ملوخية و شويكة اكلات كده من بتوع لبيا زي المبكبكة و الخبزة المحشية
بالأضافة بقي للكحك و بسكوت و الأبور و الغريبة و البتي فور


و كفاية بقة لحسن جوت قوي يا خاااااااااااالتشي
;)

كلبوزة لكن سمباتيك said...

i`m just depressed
نورتيي بالزيارة يا جميلة اوعي تكوني محبطة ابدا تعالي دايما نشرب شاي و نرش مية من البلاكونة علي البلوجرية
و لا يهمك
مستنياكي
---
Epitaph
الجو دلوقتي في جدة حلو يا ابيي بيبقي في الشتا طراوة و الصيد علي كورنيش جدة بيبقي متعة
تعالي انت بس و انا افسحك
علي فكرة اوسة طلعوا عليها اوشاعة انها راجل و اسمه حنفي ملقوش في الورد عيب قالوا يا احمر الخدين
و الغريب اخيرا فتح الكومنت و نقدر دلوقتي نروح نشقر عليه و ناخدله معانل بقسماط و شاي بلبن
تيجي معايا؟
قبلاتي
----
عوليس
مرحتش الهدا ده انا رحت الشفا كان طويل قوي و وعر
بس الحمد لله ربنا لطف
انت عامل اية؟
لسة في السعودية و لا اخدت افراج:)
----

Anonymous said...

كل سنة وانت طيبة
والسنة الجاية نشوف فيلم كلبوزة سعيدة دوما
:)

كلبوزة لكن سمباتيك said...

daktara
ازيك يا دكاترة يا خويا اسكت اصل القطة الاولانية اخدت اجازة تعيد مع اهلها , و مرجعتش تاني
باين لقت مدونة تانية تقعد فيها براتب اعلى
الله يبارك فيك
---
أُكتب بالرصاص
ايوة قلتلي بقى
طيب الحمد لله انك لسة موجود
انا لما يدفعوا لي فلوس علشان اكل المظبي ده مستحيل اكله
ده اسمه بس بيفكرني بالتواليت
مزروط و زربيان و شد السيفون
ازيك كده؟
----
BackBone
ماشية معاك يا عم العريس و احنا برضه جيران و احلي تحية لاهل ليبيا الشقيقة و سلملي علي فتة الكوارع
حنمشي في فرحك امتي شد حيلك
كلنا لها
-------------------
بحبكم و الله بحبكم

كلبوزة لكن سمباتيك said...

حائر في دنيا الله
الله يسعد ايامك يا طيب
و انت بصحة و سعادة

BackBone said...

قريبا قريباً انشاء الله هتمشي في فرحي

يوه كده تنسيني:

كل سنة وانتي طيبة ياخالتشي

اوعي تجيبي سيرة للبت بتاعتي, بجد وحشتيني

كلبوزة لكن سمباتيك said...

الي فقري ابن اختي
يا رب يا خويا ربنا يتمم لك علي خير و يسعدك يا غالي يا ابن الغالية
مقولش للبت بتاعتك اية؟
انت مخبي عليها ميعاد الجواز؟
و لا مخبي عليها ان خالتك وحشاك
ده انا خالتك يا فقري
:)
ربنا يهنيك

Anonymous said...

طب ما هى دى السعوديه
بالنسبه ليهم اى حاجه يعتبروها تحفه لكن كلها شلل
انا هنا فى المنطقه الشرقيه الخبر
و الكل يقول يا سلام بقه على الخبر و جمالها لكن تعالى شوفه الحقيقه المره السعوديه سجن كبير ما عدا مكه و المدينه

Anonymous said...

السعوديين شايفين انها جنه الله فى أرضه
ودا طبعا مقارنه بالصحارى والصحارى والصحارى اللى عندهم
أنا كنت عايشه زمان فى الرياض, ونص السكان قاعدين فى خيام
دى نصيبة ايه دى
بس باسمع ان جده هى أكتر حته عدله فيكى يا سعوديه
يابختك.. وربنا يرجعك بلدك بالسلامه.. لو كنتى لسه ما رجعتيش