Monday, October 30, 2006

الصحبجية

أنواع الصحبجية
المصلحجية
اللي يعرفوا فين المنفعة من وراك و يعقدوا يسحلبوا و يتدحلبوا لحد ما ينالوا مرادهم منك و بعد كده و لا يسئلوا عنك و لا حتى بميسد يتيمة

الفقرجية
اللي يقعدوا يدقوا في الهم و يغربلوا فيه طول الوقت و ينكدوا علي اهلك و يا ويلك لو حاولت أنت تشتكي من مشكلة عندك يسبوك و يخلعوا

الحسودجية
اللي طول الوقت علي لسانهم يا بختك و لو علي سواد شعر الاقرع و اللي زي دول يوصلوك للقبر و يقفوا يأخدوا العزاء و يقولوا يا بخته ارتاح


اللؤمنجية
اللي يعرفوا منك كل أخبارك و تفاصيل حياتك و هم و لا تقدر تعرف عنهم و لا حاجة كل مشاريعهم في الخباثة


الهمبكجية
اللي اول ما يشوفوا وشك يقولولك انت فين يا راجل واحشنا و اول ما تديلهم ضهرك ينسوا اللي خلفوك و احلي بلوك و ريموف


البمبجية
اللي يوعدوك و يخلوا بيك و تكون مظبط مواعيدك علشانهم و هم و لا علي بالهم و اجمل سوري و ارق معلش و لا ليلى مراد مع حسين صدقي في فيلم حقك عليا متزعلشي

الطناشجية
اللي تتعشم فيهم يساعدوك في حاجة أو يدلوك علي طريق و يهبدوك أهدى طناش بفيونكة و على حسب وداد قلبي يا بووووي و قلت يا واد طنش خالص


الاسفينجية
اللي يقلوزوا لك الإسفين المعمر و ينشنوا في مقتل و بووووم ترقد منه متقمش إلا بعد الأربعين يوم و يا أم المطاهر رشي الملح على الواوا

المزاجنجية
اللي كل يوم بمزاج شكل حبة فوق و حبة تحت و حبة عدوية و حبة ريكو و لما تسال عليهم يتنكوا عليك و لما تبعد عنهم يسألوا عنك و دول ينطبق عليهم المثل اللي بيقول (عبر ال....ينجعص لورا) و اللي حيعرف مكان النقط يخليه في سره و ليه جايزة سيفون تلاتة اوبشن شفط و طرد و بوفتيك


وهكذا احبائي لا تخلوا حياة كل منا من احد الصحبجية المذكورين
هذا طبعا و ليس من البلوجرية
احد من هؤلاء
الصحبجية

تنوين=محلوظة

هذا و من يجد في نفسه أي خصلة من هذه الخصال فهو ليس المقصود بالذكر و إنما اللي علي رأسه بطحة يحسس عليها


30 comments:

Sampateek said...

قد يتسائل البعض ما هو السيفون و اقول








صعيدي سألوه ماهو السيفون؟؟
قال:صندوق بحبل لما تشده يا تلحق تشرب يا متلحقش.

سندباد مصري said...

ماشي

مش عارف

دماغي وجعتني كتير أول لما قريت البلوج بتاعك

وقلت يا تري كلبوظه بتتكلم عن مين

وفي الأخر عرفت

يا احلي كلبوظه

متفكريش في الناس كتير

أحسن تتعبي

ومتفكريش في نفسك كتير

عشان الناس متتعبش

والسلام

المزاجنجي said...

والله للاسف الانواع دي منتشرة جدا وفي وسط البلوجرز وبكثافة زي الزفت للاسف واسئليني انا انا متزنبج كام زنبة طالعين من قفا اهلي

Anonymous said...

انا على راسى بلحه مش بطحه بس انت ما جبتيش الصنف بتاع الجدعنجيه ليه بالصلاه على النبى

وازودلك صنف من اللى هو بما انى اسكندرانى


بلموطنجيه

واقولك


نفسى اشوف الصعيدى ده اللى انتى قولتى عليه ده غبى جدا

مش عارف يلحق يشرب من الصندوق ابو حبل يجى يشرب من عندى خير ربنا كتير والصندوق اللى عندى مليان ميه

أبو أمل said...

أولا
شكراً يا ستى ع الإستقبال السقع
نكت
وكده
ماشى
ثانياً
كل سنة وانت طيبة
ثالثاً
انا شايفك
طناشجية من ناحيتى
يعنى طنشتى الإجابة
ع الأسئلة بتاعة شهر رمضان
الله يسامحك

ادم المصري said...

احلي كلبوزة في الدنيا

انيهاهاهاا

عن كل ثقة وجدارة احب اقولك اني جربت كل الانواع


وياما شربت لحد ما اتمليت

هههههههههههههه

عشان كدا .. وكدا عشان

انا احب اقولك

ان الصاحب دهب

عمرة مايصدي

بس لما يكون فعلا صاحب

جمال الدولى said...

هو انت تعرفى حاجة عن النوع الذى الزلنطحجية
لو عرفت تعالى قوليلى
يا من تدعين
الكلبظة
وتدعين
السمبتكة
نييييياو

أحمــــــــدبــــــــــلال said...

هؤلاء قابلتهم
الحسودجية
اللؤمنجية
الفقرجية

لم أقابل الاخرين
ربما أقابلهم لاحقاً

عليهم اللعنة جميعاً

3lool said...

الكلام علي مين
الكلام علي مين

كلبوزه الحلوه الميه ميه

انسي الكلمنجيه

بعدك على بالى said...

دايما كلامك بيجى على الجرح... يسلم بقك

انا بس مختلفة معاكى حول وجودهم هنا، وده الوهم الكبير اللى كان صعب أتخيل وجوده فى البداية، قلت الهم واحد ودول بقى الخلاصه، لكن للأسف حتى فى هذا العالم الافتراضى موجوده الاصناف دى، والمصيبة انه فى ناس بتجمع بين كل صفات الصحبجية وبنجاح منقطع النظير..
مرة تانيه بحييك على هذا الرصد والتحليل

i`m just depressed said...

اغلب الناس الى عرفتهم:
مصلحجيه بس دول مش صحابى. واحيانا كثيره بلاقى نفسى انا كمان مضطره اكون كده. و عرفت من الفقرجيه كثير
وعرفت كثير لؤمجيه
واحيانا كثيره اكون همبجيه بس مش مع الأصحاب مع الناس الكبار رؤسائى
فى الشغل والذى منه ربنا يجعل كلامنا خفيف عليهم
بس بجد نفسى ما أكونش حد من دول بالنسبه لأصحابى اتمنى أكون صحبجيه على حق
وعلى فكره انا جيت عشان أشرب الشاى وجيبت معايا كحك و بسكوت كمان.

BackBone said...

يالخاااااااااااااااالتشي:

مش عارف ليه حاسس ان الواوا بتاعت الاسفنجية ديه مش مختلفة عن الواوا بتاعت هيفاء بس ماعلينا

ويامزجانجي متقلقش كلبوزه مش بتتكلم عليك و لا حاجه
انا بحب اهدّي النفوس بس

و محاشي بقه لحسن مستعجل

&HEBA& said...

ههههههههههههه
يا كلبوزة بتقلبي المواجع ليه ... اكيد اي حد قابله ناس من دول ومش بعيد يكون الواحد كمان فيه حاجة من دول
دي اول زيارة ليا لمدونتك لكن دخلت دماغي اوي وبعدين كفاية خفة دمك يا فندم :D
ربنا يعافينا من الصوحبجية دي

labido said...

ربنا يكفينا شر الصحبجية اللي من الانواع دية
وسلام

مفلس افندى الرايق said...

اللي طول الوقت علي لسانهم يا بختك و لو علي سواد شعر الاقرع و اللي زي دول يوصلوك للقبر و يقفوا يأخدوا العزاء و يقولوا يا بخته ارتاح

ههههههههههههههههههههههههههههههههههههههههههههههههههههههههههههههههههههههههههههههههه

انتى فظيعه

مفلس افندى الرايق said...

انا مشكلتى بقرا كلامك وانا متخيل خفة دمك وملامح وشك مع انى ماعرفش ادنى حاجه عن ملامحك غير خفة الدم والزوق والروح الجميله

بجد انا ضحكت بصوت عالى وانا بقرا البوست ده
لانى من كتر ما بتابع مواضيعك بقيت حاسس بروحك بدرجه كبيره

كلبوزه انتى سكرة التدوين كله واخف دم وبجد بتطلعى منى الضحكه بصوت عالى

تحياتى
وشدوا السيفون

Sampateek said...

سندباد مصري
انا فاهمة الحركات دي انت جاي اصلا عندك صداع و حتجيب الصداع في البوست علشان تاخد مني تمن البورشامة بتاعة الصداع لا يا عم انا صاحيالك اوي
و من ساعة مشروع الخاطبة اللي جيت ضرفه و انا مفتحالك
و بعدين مفكرش في الناس ازاي و انا بفكر في الاتناشر اللي مسكنهم عندك و كل يوم هارشين مخي بوستات
ابقي طلع الكاتب القصاص يتفسح شوية لحسن وحشني
-----
المزاجنجي
ايوة يا مازا يا خويا قووول قووول
في كل مكان بس انت عارف بقي فض المجالس و المجاملات و مفيش داعي نقول للاقرع انت احول في عينه
ازيك دلوقتي عامل اية؟
سلملي علي العيال
و امهم
---
yasser shams aldien
اجدع ناس الاسكندرنجية و المجدعجية دول انقرضوا يا يسووور كله بقي فنجري بق
يا تري السيفون اللي عندك بينزل ماية سقعة و لا عادي
ههههههههههه
ابقي تعالي نرش ماية علي البلوجرية سوا

Sampateek said...

أبو أمل
ابو امل عندنا يا مرحبا يا مرحبا
و الله الاستجواب بتاع مجلش الشيعب ده نسيته خالص و اتدهولت رحت الطايف و جيت لا شيفا ورا و لا قدام
اسكت كانت سفرة مقندلة و رجليا لسة بتنشر عليا و الهسس جالي من طلوع الجبل قطيعة تقطع الشلالات
و انت طيب يا طيب
---
ادم المصري
جربت البرتقالي اللي بطعم التفاح؟
لا لازم تجربها
اسكت شوفت الاخ اللي عامل بوست مسمية اللباس الحديدي؟

http://spring456.blogspot.com/2006/10/blog-post_27.html

الحق روح احجزلك دستتين قبل ما يصدوا
ههههههههههه

Sampateek said...

جمال الدولى
ازيك الاول عامل اية ايوة عارفة الزلنطحجية دول العيال اللي مش هئ و لا مئ و لا لعب و شخاليل و كلام و بتاع و باكو نعناع العيال اللي بيفطروا علي مية نار و يحلوا بمسامير و كلامهم جاز و بيسلكوا سنانهم بكبريت
بس بصراحة معرفش اي حد منهم اسمع بس
:)
----
أحمدبلال
انا قابلتهم كلهم يا ابو حميد و الاول كان في طولة بال للمجاملة بس دلوقتي لا بقيت رخمنجية و بقول لكل واحد انت كده و كده
انت بقي اخبارك اية؟

Sampateek said...

3lool
الكلام مش علي حد بعينه يا علوول بس الكلمنجية دول اهلنا و ناسنا و لولا الكلام كنا زورنا و متنا بحسرتنا و عيد مبارك و يا جمال العيد و سوزانا عليك يا رب

Sampateek said...

بعدك على بالى
ازيك حبيبتي عاملة اية؟ مش باينة بقالك فترة و لا انا اللي مقصرة
انا لسة مشفتش حد من البلوجرية كدا بس اكيد في يمكن انا علقاتي سطحية متعمدة علشان متصدمش في حد
بس بجد انا سعيدة بمعرفتك و بمعرفة كل بلوجراوي او بلوجربة محترم او محترمة
قبلاتي لك

Sampateek said...

i`m just depressed
احلي كباية شاي ليكي يا جميلة و انا معاكي ان الواحد لازم يجامل الناس الكبار بس مش قوي يعني
و عموما الشخص المجامل بيبقي كده طول الوقت و كمان الجلف جلف
اكيد انت مش اي حد من دول علشان انتي عسل دايب في مية ورد
قبلاتي

Sampateek said...

BackBone
ههههههههههههههههه
ايوة هيا طبعا
مش بقولك انت ابن اختشي ووارث عني الحداقة
مستعجل ليه اتقل
---
&HEBA&
شاعرتنا الرقيقة
ازيك عاملة اية؟؟
و يعافيكي يا اختشي
---
labido
و يعافيك يا لابيدوووو
الله يسلمك
---
مفلس افندى الرايق
قمر يا مفلس انا قمر
استفار رستي علي زينات صدقي علي ليلي علوي و حبة صابرين و نص نورا مقلكش حكاية
متتخيلش كتير حتتعب
متشدش السيفون لحسن ادوووووب
---
خالص حبي و تحياتي للجميع

واحـــد مـــــن الـنـــاس said...

اقلك موقف يا ست كلبوزة
وانا في تالتة ثانوي

كنت في درس انجليزي
ومتخانق مع ولد اسمه اسلام
واحنا الاتنين مخنوقين من بعض
ماشي ؟؟

الرداسة خلصت ..وخلصنا من الثانوية السامة

يوم كنت ماشي بعربية والدي ..الاخ شافني ...لقيته وقفني وبالحضن ..وفينك يا علي...وازي الحال ..وواحشني المهم مسابنيش
الا لما ركب معايا ...بس انا عرفت ازحلقه بعدها ...

نفاق نفاق

أُكتب بالرصاص said...

الست كلبوزة المحترمة
بالنسبة للنماذج دي
انا كنت لفترة قريبة باتعامل مع الناس بمبدأ
كن جميلاً ترى الوجود جميلا
كن وسخاً ، تلاقي كل االلي حوليك وسخين

بس
فضلت ماشي بالمبدأ ده
وحسن النية
مع كل الخلق
وخد عندك .. خوازيق للصبح
هما يكوروا
وانا القف

لغاية ما اتهريت ..
قصدي يعني ..اتعلمت وعرفت كيف افهم الناس ، وكيف اتعامل مع كل نوعية

وزي ما قال سيدنا عمر رضي الله عنه

لست بالخب
ولا الخب يخدعني

المهم
انا جيت دلوقت علشان اسألك على المثل
عبر إيه يحصل له ايه ؟؟

احسن هاموت واعرف

وليه راجعة تاني ...
مش لورا

للبوست علشان اعلق على كل نوع ..:)

BackBone said...

انا كمان ياخالتي نفسي اعرف المثل ده بتاع عبر إيه يحصل له ايه ؟؟

بس اوعي تطلع حاجه ابيحه ياخااااااالتشي لحسن انا بتكسف
أهئهئهئهئهئ

سلميلي علي الفقرجية

عمر said...

ايه التحليل السوسيولوجي الميتافيزيقي المتقعر ده؟ ميت فل + 14. المشكلة الوحيدة اني افتكرت الاسفنجية هو من يمتص البلل أسرع بس مش مشكلة، جود وان. كيب ات اب

أنـــا حـــــــــرة said...

الناس دى اكتر م الهم ع القلب

تخيلى بقى
بس برضة بيعملوا للحياة طعم
و يقرفوا الواحد بسبب مش قلة أدب

دماغك حلوة قوى على فكرة
بخريها بقى علشا ماتقوليش انى بحسدك

بس ليا ليكى نصيحة من اخت خايفة على قدراتك و حقوق النشر

لازم تسجلى كل الدروس القيمة دى فى مرجع كبير علشان الاجيال القادمة تعرف ان كان فى ايامنا فى عبقريات كده و مواهب تفتح النفس

على فكرة انا معرفتش المثل
مفيش جايزة للى ميعرفش
وللا هى كوسة اللى يعرف بس بياخد

sendrlla said...

على فكره كلبوزه بس دمك خفيف وكلامك جميل وقريته فى مدونه تانيه بس مش بلغتك دى التانيه لغه غريبه عنا خالص ههههههههههههههههه

وينكى said...

كوكتيل رائع من العقد والكلاكيع اللى بنتكعبل فيها يوماتى
طب مافيش حاجه عدله شويه وتكون 3 سيستم وب5 رباط؟؟
ياترى الصعيدى شرب ولا لسه؟