Sunday, December 24, 2006

أطفال الحكومة المشردة

أيوة هي مكتوبة صح
انت مقرئتش غلط
هيا الحكومة المشردة اللي شردت أبونا و بهدلت ولاد مصر و رمتهم في الشارع علشان كلاب السكك تنهش فيهم




أم ماتت و محدش يربي عيالها قوم يترموا في الشارع
أب اتسجن و محدش يصرف على أولاده قوم يترموا في الشارع
أم و أب انفصلوا قوم العيال يترموا في الشارع هربانين من مرات الأب و زوج الأم
إبن شقي ابوه و امه بيضربوه من شقاوته قوم يترمي في الشارع

جميل قوي

و الشارع يتملي عيال مشردة نايمة تحت الكباري و في مواسير الصرف الصحي و في الصناديق و الدنيا برد موت


مشهد هزني قوي و خلاني خايفة ربنا يسألني يوم القيامة
بنتي عندها دبدوب و لقيتها ملبساه هدوم شتوي بتاعة اخوها الصغير
قلتلها ليه كده قالتلي اصل يا ماما الجو برد و خفت يبرد

يااااااه
دبدوب جماد لا يحس و لا يشعر يلبس ملابس شتوية
و عيال مصريين من لحم و دم مرمين في الشارع في عز البرد
طيب يا ربي الواحد يعمل لهم ايه العيال دول
يديلهم هدوم
مش كفاية
حيباتوا فين
ياخدهم عنده البيت
مينفعش البيت حيكفي مين و لا مين
و كمان الخوف من امراض مستوطنة في اجسامهم ممكن تعدي عيالنا
ده غير العادات الشاذة اللي ممكن يمارسوها في بيوتنا
طيب ايه العمل؟؟؟؟؟؟؟؟

فين الست الحكومة؟؟؟؟
فين فلوسنا اللي بندفعا سنويا اشي تامينات و اشي معاشات و اشي ضريبة معرفش اية و نيلة اية
بتروح على المهرجانات و الهشك بشك و على عربيات الوزراء و الفشخرة الكذابة


بجد منك لله يا حكومة يا مشردة عيالنا

ملناش غيرك يا رب نشتكيله
في الأيام المفترجة دي

لم شمل المشردين
دفئ بردهم
اجبر كسرهم
امن روعهم
انصرهم على عدوهم حكومة بلدهم
امين يا رب
اقرأ الحادثة

21 comments:

بيجاسوس المصرى said...

مشكلة المشردين بقت مشكلة المشاكل فى مصر وده يعكس الحالة اللى احنا فيها
طيب دول اطفال لاحول لهم ولا قوة

المصيبة اللى اكبر من كده و اللى بقت منتشرة ان الناس بقت بتدور على اى حاجة فى القمامة بل و يتصارعون عليها

و احنا داخلين على العيد
الناس بتتفرج على اللحمة كأنه محل مجوهرات مش جزارة

حسبنا الله و نعم الوكيل

Unknown said...

كل سنة وانت طيبة

فينك
بكرة هتحتجبى معانا
ياريت
عشان الحرية
ما جاتش من يوم

قطر الندي said...

و الله عندك حق في كلمة قولتيها بجد
الحكايه زادت بشكل مايتسكتش عليه. اكوام القمامه في الشوارع مابقاش يتلم عليها القطط و الكلاب زي زمان بالعكس و الله انا شايفه انهم قلوا لكن بيتلم عليها اطفال مش بس كدا دا بقي فيه عائلات كامله بتستوطن اكوام القمامه و انا شخصياً شوفت منظر ادمي قلبي اكتر من مره لما اشوف طفل بياخد بواقي طعام من اكوام القمامه دي و ياكلها. طب و بعدين بقي؟ في الجوع و الفقر اللي بيطحن الناس دا و حكومتنا نايمه و حطه المخده علي ودنها قلوبهم مابيقطعهاش بكا الاطفال من المرض و الجوع!!!

بين الأمل و اليأس said...
This comment has been removed by the author.
بين الأمل و اليأس said...
This comment has been removed by the author.
بين الأمل و اليأس said...

ملناش غيرك يا رب نشتكيله
في الأيام المفترجة دي

لم شمل المشردين
دفئ بردهم
اجبر كسرهم
امن روعهم
انصرهم على عدوهم حكومة بلدهم
امين يا رب
بجد ايه اللي في ادينا
اقلك على حاجه فرة ان الواحد يكفل يتيم ولا حاجه دي ممكن تساعنا احنا اننا نستريح ونحس اننا بنعمل حاجه اهه على الاقل
لكن لو كل واحد فينا قال وانا هاعمل لوحدي يقه كدا مش هانعمل حاجه وبعدين صدقيني ربنا كبير ومابينساش حد
ومنهم لله حكومه فاشله من جميع النواحي والمقاييس على رايك فعلا فرحانين بالمسخره وهز الوسط وخلاص
قال ايه جيل العنب
وربا يسترها

فريسكـــــــــــــــــــــــــا said...

عندك حق يا كلبوزة
بس انا اتضحلى ان احنا بنكلم نفسنا
ومحدش بيسمع لينا
منهم لله

ody911 said...

يااااااااااااااه على التعب
فكرتينا بحجات بنحاول ننساها يا كلبوزة
لية كدة يا بنتى
عموما هيه زى ما أنتى قلتى حكومة مشردة
يارب كن فى عوننا
يارب أصلح لنا حالنا
يارب

أحمــــــــدبــــــــــلال said...

طبعاً ربنا هايحاسبنا
ربنا معاهم و معانا

smraa alnil said...

كلبوزتي

انتي عندك حق في كل كلمة قلتيها
ولاسف احنا كمان ادينا متكتفة
مش عارفين نلاقيها منين ولا منين
الحكومة احيانا بتستغل الطفولة المشردة دي وتتخذها وسيلة للتسول وتستعطفنا
يجيبولك ولد عيان عنده السرطان او مشلول ويلبسوه اردء الملابس ويطلعوه في التلفزيون عشان يستعطف قلبنا ونتبرع
فين الضرايب وفلوس التامينات وحاجات كتير اوي
حسبي الله ونعم الوكيل
الاطفال بياكلوا من الشارع
وبيلبسوا مقطع وينامو في السارع متغطين بجرانين
ومش في حد بيقدر
الحكومة مش بس شردت الاطفال في الشوارع
لا دي كمان شردتنا فكريا وشردتنا من جوانا
بوست مؤلم يا كلبوزة
ربنا معانا

tota said...

كلبوظة

عارفة بدون الرجوع لنظرية المؤامرة
لكن فى جهات كتير وجمعيات اهلية كتيرة وبيجى لها تبرعات ضخمة لصالح اولاد الشوارع لكن محدش عارف فين وبتروح فين

لو ولاد الشوارع لقوا فىالجمعيات والملاجىء امل مكنش حد هرب منها وفضل العراء عن الاسرة

اللوبى الحقير علشان يفضل يجمع تبرعات يبقى لازم يكون فى ولاد شوارع ودايرة ما تنتهيش

واسر اتعدم من قلبها الحنان بترمى ولادها
وحكومة مهياش راعى ولا رقيب
وسفاح بيقتل من غير ما ولا جريمة تكشفها الداخلية الا بالصدفة

واطفال ممكن ليهم اهل لكن اعتبروا دى وظيفة جديدة مربحة افضل من التعليم

الموضوع متشابك ومحتاج يتفك من بعضه علشان يتعالج جزء جزء

والست هانم النايمة بتاعة القراءة للجميع تعمل حاجة ايجابية قبل ما تقابل ربنا ولا هى ماما بالاسم بس وولاد الشوارع ما ينفعش يبقوا من اولادها المشمولين بالرعاية
بصراحة اللى بيحصل ينضم لقائمة السبات فى جبين مصر لما معدش حتة فيه مفيهاش سبة

وحسبى الله ونعمة الوكيل

عمر said...

يا كلبوزة قلنا النظام فاشل فاسد محتكر للسلطة لا يهمه إذا كان الشعب يولع بجاز طالما كرسيه في الحفظ والصون وبيهبر الهبر التمام وجيمي معاه يجيب بي ام جديدة كل سنة... مال أبوهم هما بأطفال الشوارع بأه؟ مش انتي بتقوليلي أخرتي في أمن الدولة؟ أنا ليه واحد ضابط معرفة في سجن القناطر فمتقلقيش خالص حتتعملي معاملة زي الفل
:)

albida said...

عندك حق والله فلوسنا كلها رايحة عالهشك بشك!! لما العيال دول بيموتوا من البرد والجوع كل يوم محدش بيسأل فيهم... لكن لما ممثلة ولا رقاصة تموت تلاقى الدنيا اتقلبت وقامت وقعدت زى اما يكون ابو الهول نفسه هو اللى مات!!
حسبنا الله ونعم الوكيل!! ربنا يورينا فيهم 100 يوم ويشردهم فى الشوارع زى العيال الغلابة دى.. قولوا امين

manal

Utopian said...

الموضوع ده فعلا مهم جدا...التكافل شيء مهم جدا في المجتمع..و العيال دي عيال مصر. و لو كان ابوهم و امهم رموهم..مينعش كمان البلد ترميهم كده.. و الا لا يمكن ان نتوقع منهم غير كل ما هو سيء

حيجيبوا الحلو منين و حيعملوه ليه

Haitham Abu Akrab said...

المشكله ان الموضوع ده من زمان موجود
يعني فيه ناس مقتوله من 10 سنين
وجايين يدوروا عليهم دلوقت
------------------
المشكله
ان دول اطفال شوارع
وقتلو اطفال شوراع
-------------------
تفتكري لو خطفو ولا قنلو ابن
مسئول
مش كان زمانهم
ف الاعدام

الأميره أوسه said...

صدقينى يا كلبوز
الموضوع مش موضوع هدوم الموضوع أكبر من كده
لما طفل أصحابه يرفضوه بيكون ناقم عليهم ... أما بقا لو المجتمع كله رفضه
أكيد الموضوع هايكون ليه دلاله أكبر عنده ويكبر وهو بيبص للمجتمع ده على انه مش بتاعه وحلال أنه ينتقم من المجتمع اللى لفظه
الأطفال أولاد الشارع محتاجين مؤسسه بجد
ترعاهم معنويآ وماديآ ولازم العاملين عليها يكون متطوعين مش أجريه
أما بالنسبه لموضوع التربينى فأنا عندى قناعه راسخه أنه ملوش علاقه بالجرايم دى
خاصة بعد أشتهار الشرطه بعجزها وعدم قدرتها على البحث والتحرى لأيجاد الجناه الحقيقيين
ثانيآ هل معقوله الجرايم دى اللى تم أكتشافها فجأه يتم العثور على الجانى بالسرعه دى
ثالثآ أفادة أهل التوربينى أنه عبيط ويكاد يكون متخلف عقليآ .. بالطبع العبيط معندوش قدره على التخطيط للجرايم دى وكمان يكون ليه أتباع لمساعدته و كل ده من أجل أغتصاب أطفال
اطفال الشوارع بيمارسوا الشذوذ مع بعض بشكل منهجى ومن الضغر وبدون الحاجه الى العنف القاتل
رابعآ وده الأهم أحساسى البوليسى بأن الموضوع أكبر من كده
مثلآ ممكن يكون الموضوع خاص بسرقة أعضاء الاولاد دى ورمى جثثهم فى مكان ما
وبعد أكتشاف الجثث كان لابد من أيجاد الجانى بسرعه ويجب أن يكون مأطوع من شجره أو ملوش حد يدافع عنه
نفس سيناريو قضية بنى مذار
وطبعآ أنا مش متشككه فى قدرات الأمن
المصرى ده أنا متأكده من عدم وجود أى قدرات
أنا بفكر أشترى كلب كنيش ,و أسميه رعد
و أستخدمه فى حل الجرايم دى مع أنى مش بحب الكلاب طيب هو ينفع قطه سيامى


0
0
0
كل سنه وأنت طيبه
عيد مبارك عليكى وعلى المسلمين
كيلو اللحمه فى مصر بكتــيررررررر
أشتريت أرنب أنا وشهروزز من فتره
و بنعلفه وبننفخه وناويين نعمله مكياج
عشان يكون شبه الخروف بتاع العيد
بس مــحتاجين القرون بتاعت الخروف
فى أزمة قرون فى مصر الحكومه أحتكرت القرون وكل مسؤل شايل قرن على دماغه
ياريت لو دبحتى السنه دى خروف تبعتى القرون مع أى عيل صغير وحته من لية الخروف عشان شهروزز بتحبها
هو أنتى فى السعوديه ولا فى ليبيا
طيب أيه علاقة جده بالموضوع ده
طيب ممكن أجى أزورك قريب أصلآ أنا بحب لبنان أوى
طيب أشوفك على خير
سلامى للأسره و للسبع الهمام
أأأأأأأأمواااه
العيد فرخه
كاك كاك كاك

ام العيال said...

يا قلنا
و لسه بنقول
بس مافيش فايده
واخدين دواء بيخليهم يشيفو حاجات اه و حاجات لأ

ربنا يهدي

الأباصيرى said...

للأسف ياكلبوزة الحياة بقت صعبة وإذا كان اللى بيشتغل بيقدر بالعافية يعيش لغاية أخر الشهر أمال المشردين بياكلوا ويعيشوا إزاى. طبعا سؤال سهل وإجابتة معروفة ، يإما يسرق يإما يشحت على الارصفة وإشارات المرور وفى الحالة دى المفروض نقولة برافوا أنك منحرفتش وسرقت،أنت بتشحت أينعم بس مبتسرقش. والمفروض على الحكومة بدل مابتعمل للأطفال دول محاضر ياريت تعملهم عشة فراخ يناموا فيها.
بلد معندهاش دة

mahmoud said...

صباح الفل يا كلبوزة , اقرى دول

http://benhoz.blogspot.com/2006/12/blog-post_25.html

و

http://benhoz.blogspot.com/2006/12/blog-post_22.html

أو ادخلى على البلوج بتاعى حتلاقيهم أول تدوينتين

محمد الدسوقى رشدى said...

مساء الفل
عارفة الحل ايه
اننا نشرد الحكومة
أو نشرد لها
http://tarposhman.blogspot.com/

أُكتب بالرصاص said...

اه ...اصلها ناقصة !!

اولا
كل عام وانتم ونحن وهما بخير

واللي في بالي عمرهم ما يشوفوا خير

ثانيا
زماااان واحنا في ابتدائي كانوا دايما بيقولوا معونة الشتا

وكانوا بيحصلوها بطرق عديدة
وكنت باسال نفسي يعني ايه معونة الشتا دي ؟
لما سألت ماما
قالت يعني يدوا هدووم للناس المختاجة

قلت لها
طيب احنا في كل مكان بيخصموا مننا معونة الشتا
ومع ذلك شايف برضه في كل مكان عيال مرمية في الشارع بلا غطا..
تيجي ازاي؟



والسؤال قائم لحد دلوقت ...جاوبي عيا انت بقا يا كلبوزة ؟


تيجي إزاي.
ومعونة الشتا
راحت فين ؟