Tuesday, January 02, 2007

من أول يناير


عملا بالحكمة الشهيرة للمطرب الشعبي المغوار شعبولة((من أول يناير حبطل السجاير))واكون انسان جديد
قررت انا كذلك ان ابدأالسنة بقرارات جديدة و تطورات ايجابية في حياتي
من أول يناير
حخلي في وقت ثابت عندي للرياضة و اخف النت شوية لان قاعدة النت تطلب كباية نسكافية و شوية كرواسون و مفيش مانع من بسكوت او اي نوع تسالي,ححاول امشي كل يوم نصف ساعة و بعد شوية ساعة و يمكن اشترك في ماراثون 2007 من يعرف
من أول يناير
حنظم مواعيد اكلي و ابطل ارمرم بين الوجبات و حتعشى بدري علشان انام خفيفة
من أول يناير
حبطل اخد دواء عمال على بطال و حسيب جسمي يقاوم اي صداع او مغص او دور برد لاني حاسة اني مدمنة دواء و بقيت لو عايزة اسرح شعري اخد دوا
من أول يناير
ححاول اكون اكثر صبرا مع اللي حوليا و متنرفزش, و ارمي ورا ضهري, اي شئ يضايقني و معملش من الحبة قبة
من أول يناير
كقلل من ساعات الفرجة على التليفزيون و انا على النت و حوجه اهتمامي الى القراءة بمعنى اني امسك كتاب و اقرا بدل القراءة على النت اللي قورت عنيا و شتت تركيزي. بلا مبالة انا ببقى فاتحة عشر صفحات لمواقع مختلفة و بقرا فيهم في وقت واحد و انا فاتحة التليفزيون و مفيش مانع اكون برد على تليفون في نفس الوقت
اية الوش ده
لازم اركز شوية ده صاحب بالين كداب
من اول يناير
حعمل وقت ثابت لقراءة القران لاني للاسف مش بختمة غير مرة واحدة في السنة و هي في رمضان و ده عيب قوي و حرام و ميصحش
لازم اخلي وقت و ليكن بعد المغرب مثلا لقراءة جزء ثابت من القران علشان الزم نفسي اختم القران حتى لو مرة كل شهرين
من اول يناير
حرجع ارسم تاني و اطلع العدة بتاعتي القلم الفحم و الالوان و الفرش و الكاتالوجات و امارس احب هواية الى قلبي و اللي كنت بعبر بيها عن نفسي قبل الكتابة و مش عارفة ليه سبتها
من اول يناير
حجيب سيديهات برامج تصميم تعليمية و اقعد اتعلم في البيت عليها زي ما اتعلمت الفوتوشوب قبل كده و اهو فرصة اعمل حاجة تانية علي الكمبيوتر غير النت
من اول يناير
حبدأ احوش شوية بقى لان بيني و بينكم ايدي مخرومة بطريقة فظيعة و لازم اعمل حساب لبكرة
من اول يناير
حبدا اسال على قرايبي و اجمع ايميلاتهم و ارسل لهم باستمرار لان الغربة باعدت بينا قوي و مش بتصل و لا بسأل و انا مقصرة معاهم قوي
من اول يناير
حرتب كل الدواليب و ارمي اللي ملوش لازمة يا نهار ابيض انا عندي كمية كراكيب مهولة لازم اسيب اللي محتاجاله و ادي حد تاني اللي مش لازمني
اكيد انتم كمان نفسكم تبدأوا صفحة جديدة مع نفسكم و ترتبوا افكاركم و تنوا تعملوا حاجات كتيــــــــــر
من أول يناير
ربنا يوفقنا كلنا للخير
و سنة سعيدة عليكم يا حبايبي

46 comments:

بيسوو said...

والله انتي بتفكريني بنفسي جدا يا كلبوزة لاني كل سنة اقول نفس الكلام وبحاول والله انفذه بس مش عارفة ايه الي بيحصل ويشتت انتباهي
ربنا معاكي ويقوكي على كم القرارات الرهيبة دي وتقدري تحققيها
وكل سنة وانتي طيبة
سلام

Sampateek said...

و انت طيبة يا بيسو
ربنا يقوينا كلنا و نقدر نعمل اللي نفسنا نعمله
ميرسي يا جميلة

Ma-3lina said...

kol sana we enty tayba

i read ur agenda for this year we isa 7a7wel anfezha m3aky especially 7ikiat el qr2an isa

ama mawdo3 el akl da fa m3lsh b2a m3a nafsek ana ma2dersh aseb el akl

ahmEd_H said...

كل دا حتعملى من اول يناير


هو دا اول يناير يعدى عليكى ولا ايه

كل سنه و انت طيبه يا سمباتيك

أحمــــــــدبــــــــــلال said...

لما نشوف
بكره نقعد جنب الحيطة و نسمع الزيطة

بس أنا مش بكسر مجاديفك بس كان لازم تبقى تفكرى بالراحة فى التنفيذ لأن هاتتعبى أوى علشان تضغطى على نفسك لعمل كل ده

عاوزة تعمليه فعلاً
بالراحة كده و بشويش و كل حاجة هاتحصل أن شاء الله

حلوة أوى باخد دوا علشان أسرح شعرى

aymen.farouk said...

وانتى طيبه يا ست الكل
وكل سنه وانتى طيبه
ويارب تكون قرارتك دى من اول يناير لغايه اخر ديسمبر
عارفه انتى زيى انا برضه كنت باخد دوا عمال علبى بطال وقلت لازم ادينى لنفسى فرصه اقاوم التعب من غير ادويه بس القرار ده مكنش من اول يناير كان من اخر فبراير اللى فات

صفصف لادي said...

كلبوزتشي
ايه ده؟؟؟
ده بالظبط اللي نفسي اعمله
انظم نفسي
اخس شوية
ارجع لهوايتي
اختم القران و الاهم من كده افهمه تاني

و حاجات كتير
بس بجد نفس الاماني


فكرك السنة الجاية حكون حققت منها حاجة؟؟
دايما ببدا لكن مش بكمل
مش عارفة ليه

el2ahwagi said...

ya sampateek..!

ana hageelik awel febrayer was2alik 3amalti eh fil lista..!!

rabena ywafa2ik...
3agbani 7ekayet el rasm di.. doosi feeha gamed..!!
wel2ahwa 3andi mate2ala2eesh.. :)

shaimaa said...

كلبوزة
وانا كمان هاعمل زيك من اول يناير

انا قررت حاجات كتير من اللى انت كتباها بس مكنتش متخيلة انها جاية من اول يناير


يا رب استمر عليها
و يلا نشجع بعض
من اول يناير

حائر في دنيا الله said...

ربنا يعينك يارب ويقويكي
بس على فكرة الفنان المعجرم الكبير شعبان بيه لو عرف ان دعوته جابت معاكي نتيجية أوي كدا هيطلب من حضرتك حقوق ملكية وضرايب
:)

Reformer1976 said...

بعد إذن سيادتك
يعني لو مفيهاش عيب في الذات الكلبوظية يعني
هو ليه معظم الجدول بتاع سعادتك مركز على التخسيس في جزء كبير منه؟
أمال فين بقى جماعة كلابيظ من أجل التغيير وبيانها التأسيسي؟
من حق كل كلبوظة أن تبقى كلبوظة وعلى المجتمع غير الكلابيظي أن يتوقف في عام 2007 عن معاداته للكلبوظية
نريد عام 2007 عاما للتسامح بين الكلابيظ واللا كلابيظ
وأن يتمتع الكلابيظ بحقوق كلبوظية غير منقوصة

لا للتوريث ولا للتمديد ونعم للكلبظة

عاشت كلبوظة السمباتيك روزا للنضال الكلبوظي في وجه طيور الظلام المعصعصين

والله الموفق

(بقية البرنامج أنا موافق عليه... حد برضه يكره النظام؟)

shabfa2re said...

جدعة بجد
وانا زيك
فى حاجات كتير كتبتها
جنبنا مركز شباب هشترك فيه
وهبقى اجرى فيه براحتى
اما النت مش هينفع اقلل منه اوى
لان شغلى عليه صحافة وتصميم مواقع وحركات
وموضوع عسل ومكتوب بطريقة حلوة اوى

Wafa said...

كل عام وأنتم بخير

ody911 said...

كلبوزة


فكرة جميلة جدا إنى الواحد يحاول يعدل فى نفسوا مع بداية سنة جديدة

ويارب تقدرى تعملى إللى كتبتية

وربنا يقويكى

وعادى بقة
أودى

An Egyptian in UK said...

سمباتيك...خطوه ايجابيه بان الواحد يبتدى السنه الجديده باهداف محدده...و عموما طريق الالف ميل بيبدأ بخطوه...واحده واحده...وربنا معاكى

شادي فايد said...

من اول يناير
ح قولك كل سنة وانت طيبة
من اول يناير
يارب تكوني انسانة جديدة
في العام الجديد
من اول يناير
يارب تكون سنة ناجحة وتحققي فيها
اعمال مفيدة وهادفة
مش بس اللي قولتي عليهم
من اول يناير
من دلوقتي ح استنى منك التهنئة بيناير القادم

ام العيال said...

كلبوزه
انت بنت حلال
انا بعمل كده في عيد ميلادي بعمل خطه سنويه
بكره ابدأ رحله العذاب رايحه دكتور الرجيم بتاعي
علشان مفيش فايده
بقعقد طول النهار ماكولش و اول ما اروح من الشغل هات يا رمرمه كل ما حد ييجي ياكل يعزم عليا
مفيش مانع يعني حسيبه ياكل لوحده ما يصحش
على فكره انا مش تخينه بس كلبوزه شويه
و الدكتور حيديني على دماغي و حخس
بكره ابقى فشر
سعاد خله
بالتوفيق يا قمر

منظمه كلبيظو و الي مش عاجبه هع

hebaz said...

كل يناير و أنت طيبة:)
ولاهى لو نفذتى الخطة تبقى بجد جدعة و عارفة ممكن نشجع بعض كمان :)
تحياتى

smraa alnil said...

وانا نفسي اعمل زيك والله واتلم بقي
بس ياريت اقدر
تيجي نشجع بعض
المهم ان يناير دة يعدي علي خير
لحد اخر دسمبر
ربنا يسترها

BackBone said...

ياخاااااااااااااااااااااالتشي

اراهنك ان عملتي حاجه واحده من كل
الليبتقولي عليه ده
و ربنا يوفئك

Amr Ahmed said...

كل سنة وانتي طيبة

ربنا يوفقك وتعملي كل اللي قولتي عليه

بس شكلك كده ناوية متبقيش كلبوزة

هاتبقي سمباتيك بس

اوبااااا

انتي كده زي الفل وعوازين منظمة الكلابيز من اجل التغيير

انا هانضم مع اني افقتقد اهم شرط للانضمام لاني مش كلبوز خالص

ربنا يوفقك

Utopian said...

انا كمان نويت و النيه لله أعمل حاجات حلوه كتير و ابطل حاجات وحشه كتييييير

قوينا يا رب و ثبتنا علي الحق

zordeak said...

اتمنى انك تنفذى كل اللى قررتى تعمليه .., لانى لما بقول كده ومبنفذش بكتئب .., بس انا شايف ان نيتك جامدة وانك ناوية تعملى اللى قولتى عليه ان شاء الله

كل سنة وانتى طيبة .., وكل سنة وانتى سمبتيك .., وكل سنة وانتى مفرحانا بكلامك الحلو

انا عملت بلوج جديد وحطيتك فى اللينكات بعد اذنك

اتمنى تبقى تزورينى


http://ma3nafsy.blogspot.com/

daktara said...

من اول يناير
كل سنه وانت طيبه

frozen love said...

ربنا يقدرك وتنفذي المخططات دي..ومتبقيش زيي لاحسن انا غاوي اخطط ومنفذش ..خصوصا في الحاجات اللي تخصني

ربنا معاكي وتحياتي

tota said...

كلبوظتى الجميلة

الحقيقة ان كل امنياتك وتصوراتك للعام الجديد عادلة ومقبولة ويمكن تنفيذها فقط اذا رغبتى فى ذلك

فعلى مدار سنوات طويلة كنت اشاهد وضع الخطط والخرائط والحماس والاستعداد للتنفيذ وبعدها لا يتحقق شىء لان فى اغلب الامر الخطط تكون اكبر من القدرات او يتسرب الكسل لذلك بدأت التعليق بانها عادلة فمخططك يمكن تنفيذه
اتتذكرى يوم اتفقت عندك الا اشاهد التليفزيون فى رمضان الا برامج هادفة

الحقيقة انى نفذت ذلك فعلا وكنت اشعر انى مراقبة منك اذا حاولت التخلى عن وعدى

اجعلى نفسك انت رقيبا على نفسك لتحقيق وعودك

سعدت بمراقبتك الغائبة لكن الحاضرة
تحياتى

451 فهرنهايت said...

كل سنة وانت طيبة .... وربنا يقدرك على الشغل اللي مستنيكي من اول يناير .... كان نفسي اعمل زيك واحط خطة طويلة المدى ليناير القادم ... انما مافيش نصيب .... الحكاية عندي بتصفصف على تسطير جداول

كل سنة وانتي طيبة .. كل سنة وانتي سمباتيك
:)

sherif gharib said...

اتمنى يا سمباتيك انى تقدرى فعلا تعملى اللى انتى مخططاه ده
لان انا بصراحه كل سنه بقول حاجات زى كده و غالبا ما بتتعملش
بس يا ريت انتى تطلعى احسن منى فى الموضوع ده
تحياتى

Taher said...

والله شكلك كده حطبقى الكلام ده وتحطيه فى الدولاب

اعتقد يا قلبوظة لو نفذتى ده فعلا والله تبقى بجد ميه ميه يعنى

عموما بالتوفيق

No Fear said...

السلام عليكم
أزيك عاملة أية
أنا كمان ناوي علي التغيير إن شاء الله
بس نصيحة بلاش تقولي أو تعملي جدول لحاجات كبيرة أبدأي بالراحة يعني قرأة القرأن مثلا لو أنت مش بتقري خالص و عاوزة تبدأي بنصف جزء علي ما أعتقد ده ممكن يكون صعب أبدأي مثلا صفحة في اليوم و شوفي نفسك أبدأي زودي حبة حبة هتلاقي نفسك ممكن توصلي لأكتر من جزء في اليوم
و الله أعلم
و أعملي كده في كل شئ
و بلاش نخطط بس أبدأي التنفيذ علي طول
سلام

ادم المصري said...

كل سنه وانتي طيبة يا اجمل كلبوزة في الدنيا

عيد سعيد عليكي انشاء الله

كل سنه وانتي طيبة تاني


بس انتي ما قولتيش غربة ايه اللي عاملة فيكي كدا يا شابة ما كانش يومك يا ختشي

لسه بدري عليكي يا لهوووووووووووووي

Amany said...

والله انتى رائعة
المشكلة ان كل اما اخد قرارات ضخمة زيك اكتر من نصها مش بعملوا لكن ربنا يسهل وانتى تعملى كل اللى انتى قلتيه وتوالينا بالاخبار

tamer said...

كل دة من اول يناير

ياترى هتلحقى تعمليهم ولا على السريع بقى نظام كروتة

اعترفى

بسرعة

هههههههههههه

Noran said...

ده على كده أنتى هتكونى المرأة المثالية فى مجتمع مكركب

مش هعايزة أحبطك لكن ان بأخد نص القرارات الأنتى أخذتها من سنتين ولسه منفذتش أى قرار فيهم


ربنا معاكى انت وقرارتك

لو نجحتى فى تنفذها ....شئ غريب ..بس
رائع

;)

واحد من الناس said...

الى كلبوظة والي كل اللي ساندوها في اللي هي عايزة تعملوا
انا عاندي راي في موضوع التغير

سؤالين مهمين نكتبهم ونجاوب عليهم وبعدين نحطهم قدامنا في البيت او في الغيط او اي مكان بس لازم نقراهم كتير

احنا حانتغير ليه؟
واحنا حانعمل ايه علشان تغير؟

بعد مانجاوب عليهم بصدق نحطوهم ادام عنينا في اي مكان المهم نشوفهم كتير

وبعدين نعمل الخطة ونتعلم من المرات اللي مش بنمشي على النظام ليه ماعملناش كده برحر ومن غير مانجلد نفسنا

وواحدة وواحدة حنيجي في نهاية 2007 نلاقي نمفسنا غيرننا حاجات وماغيرناش حاجات ونعيد الكرة مرة في مرة ونجاوب علىالسؤالين ونحطهم ادام عنينا

بس
خطة مجربها
غيرت حاجات كتير بيها

شكرا

shaimaa said...

كلبوزة
اول يناير عدى وفات
انت بداتى تنفذى القرارات ولا ايه وبطلتى النت

حــلم said...

حلوة اللستة دى
هاحاول اقلدك فى امانيك رغم انى عارفة نفسى

كل سنة وانت طيبة

بين الأمل و اليأس said...

كل عم وانتي بخير يارب
وتعدي السنة دي على خير وتحققي اللي نفسك فيه
وترجعي لللرسم ده تاني اهم حاجه قريتها مع احترامي لقراراتك
طبعا ايه اهم حاجه هي قراية القرءان
معلش عدي سؤال صغنون
من امته احنا بنعرف نعيش من غير كراكيب
دا الكراكيب جزء لا يتجزء من البيت دا هي شيء مهم حتى لو مش عايزنها
يابنتي انا بفرز دولابي ميت مره وبردو بيرجع كل حاجه تاني
يالله وكل عام وانتي بخير
وربنا يسترها

che husam said...

كل سنه وإنتى طيبه وربنا معاكى فى القرارات دى

Aoossa said...

كلبوزه
كل سنه بتقولى كده ومفيش فايده
بصى أنا أقولك تعملى أيه
أولآ بلاش عشاء ممكن كوب زبادى
قبل أى وجبه أشربى كميه من الماء
ممنوع الأكل بين الغدا والفطار
أنا وزنى 54 كيلو
وده نتيجة للخطه دى
وأتمنالك تحققى أحلامك كلها
أنتى فين مختفيه اليومين دول
أنشاءالله خير
أسمك نزل فى أخر بوست عندى
فياريت تشرفينا أنت والأولاد
و السيد حنفى ربنا يخليه

يا مراكبي said...

عدنا

كل سنة وإنتم طيبين .. طبعا الكلام جميل ولو إني ما أحبش إني اربطه برأس السنة الميلادية .. ممكن الواحد يبدأ في قرار التغيير في أي وقت

عموما أنا سبقتك في موضوع التغيير ده من نص الصيف اللي فات .. رجعت لمعظم هواياتي وحددتلها وقت علشان أنتظم فيها .. ونجحت

لكن اللي يهمني إني أنصحك بيه إنتي والجميع هو إزاي نختم القرآن أكتر من مرة في السنة .. أنا شخصيا بأقرأ يوميا نص جزء بعد صلاة العشاء ولو فاتني بأعوضه تاني يوم .. كده بيبقى خفيف وبأقدر أختم القرآن مرة كل شهرين .. واللي يزود يبقى أفضل .. الخلاصة .. حاولوا تحددوا مقدار من الآيات تقدروا على قرايتة كل يوم وعلى طول .. كل واحد حسب ظروفه ووقته

تحياتي للجميع

karakib said...

أنا برضه عندي أحلام كل أول سنه كده في أول يناير بس بنساها في أخر الشهر
كويس أنك كتبتيها :) كل سنه و أنت طيبه

أُكتب بالرصاص said...

من اول يناير
هأبطل البانجو
واشرب شيشة

هأبطل اروح الشغل في ميعادي.... أيه الغلب ده .. خمسة وعشرين سنة وانا ملتزم بالدوام عالدوام

هأبطل انام بعد العصر
وهنام قبله

هابطل اسهر للساعة اتنين الصبح
وكفاية قوي لحد الساعة واحدة ونص

هابطل حاجات كتير

bondok said...

دي اول مرة افتكر سياسة التخلص من الكراكيب تقريبا من تانية جامعه ياه كمان فكرتينى بالكرسيين اللى بمشي بيهم في طريق زحمة.
جميل انك تتخلصي من كل الكراكيب وكراكيب المشاعر كمان ويكون لكل من ليهم فيكي نايب نصيب من وقتك ومشاعرك. ربنا معاكي

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر