Saturday, March 24, 2007

استفتاء شوربة و رز

شعار المرحلة القادمة
تحديث

طلعت نتيجة التحاليل و الحمد لله الست تعديلات طلعت حامل و المولود جاب 75 في المية و حيدخل كلية التربية زغرطوا يا حبايب و وزعوا صندوق سفن اب علشان نهضم الاستفتاء اللي اثبت نظرية عبقرية جديدة و هي ان صناديق الاقتراع بتولد استمارات ممضية بنعم و احنا طول عمرنا كنا فاكرينها بتبيض

معجزة مش كده

==============================



احلى استفتاء ممكن يتعمل استفتاء العيش الناشف المفقع في الشوربة السخنة و ياسلام لو تكون شوربة لحمة ضاني و علشان الاستفتاء يكمل لازم يتحط الرز على العيش المستفتي و تترش التقلية ام خل و توم على الوش

و طبعا تترص اللحمة(لحمة الغلابة) المسلوقة على وش الصينية

و مقلكوش على الريحة تبقى مفحفحة و مالية البلوج و المدونات المجاورة و الكل يجي يهني: الف مبروك يا جماعة

استفتيتوا..اتفضلوا يا جماعة استفتوا معانا بس كل واحد يستفتي من قدامه مش عايزين زروطة


و دايما جنب صنية الاستفتاء يجي معاها طبق السلطة بفتح السين اه عايزين نربي عيالنا

و السلطة دايما فيها خيار و طماطم و جرجير ملخبطين على بعض و ده اللي بيخلي بعض الناس الوحشين يقولوا على الغش و التدليس و التزوير سلطة

لا بجد اخص عليهم اخص

لا و الاغرب انهم بيقولوا البلد مليانة كوسة

كوسة اية؟؟ اية جاب المحلسة والحليطة و النفاق و شيلني و اشيلك للكوسة !!يمكن علشان ما الكوسة دلعة و صايصة و ملهاش طعم زي كل شعور رخيص في الدنيا!!احتمال


المهم اننا بعد الاستفتاء لازم ناخد صابونة

و نروح نغسل ادينا بعد الاكل علشان الجليطة متمسكش في هدومنا و نبقى شعب نضيف اموور بنسمع الكلام و الاهم ان الشمامة متجيش تشمنا رغم اني سمعت ان الشمامة وصلت مصر و بتشم في اسوان دلوقتي

اتفضلوا يا حبايب

استفتوا معانا

بس اوعوا الشوربة السخنة تلسعكم

111 comments:

3aziz 3eni said...

انا ناوى استفتى قلبى قبل الاكل علشان بردة الواحد لازم ياخد احطياته ....ولا ايه؟

ام العيال said...

جوعتيني يا شيخه
بس انتي استاذه بربطك للاحداث
احنا لازم نعمل حزت الكلبزه
بس الفته دي بتحرق و ملهلبه
و تودي بستين داهيه

عبدالله said...

ايه النظام انا مش معزوم علي الفته دي و لا ايه
لا مينفعش كده اي سلطه انا جاهز بس المهم اكون موجود في القعده دي

ربنا يسترها علينا بعد الاستفتاء شكلنا هناكل جامد و مش هنعرف نعمل اي حاجه تاني

تحياتي

TAMTAM said...

في ايه يا سمباتيك ؟؟

فته ايه بس انتي خلتيني احس اني في العيد الكبير

احييك على اسلوبك اللذيذ

micheal said...

هههههههه...رائع هذا البوست يا كلبوزه بس ربنا يستر علي معدتنا بعد الاكله دي
تحياتي لكي

basma saghir said...

ايه ده...ايه النظام ده؟
هي الحكومة كان عليها ندر ولا ايه..؟
طب والله كويس..بتوفي الندر الي عليها
ربنا مع الجميع..ومنصحش حد يقاطع الفتة دي خالص..لازم نروح نفت معاهم

... said...

انت يا هانم
الموضوع دة تايه وللا ايه
مكانه فى تاء مربوطة ما توديش نفسك فى داهية
ولادك عايزينك ياختشى
:)

Noony said...

الفوضى بالانجليزي هي
Chaos
وعشامن كدة احنا أخدناها من الإنجليزية دون تفكير ..مع إن كلمة فوضى فيها حركة أكتر من الكوسة المظلومة....بس احنا اللي ظلمنا الكوسة زي ما ظلمنا نفسنا وأكلنا السلطة وأخدناها حقن كمان

ربنا يتولانا برحمته الواسعة

tota said...

كلبوظتى
استعنا على الشقى بالله
وبما ان الاستفتاء يوم اتنين والحلاقين قافلين يعنى العدد هيزيد

تفتكرى يا كلبوظة لو كلنا رفضنا نفت وناكل الفتة دى هيكون فى صدى للكلام ده ولا كده كده الفتة اتعملت وريحتها طلعت واكلناها من غير ما نحس ويمكن النتيجة كمان فى الكونترول من دلوقتى
مش عارفة اخرت الاكل غصب عننا ده ايه شبعنا مش عايزين تانى مفيش فايدة
حسبى الله ونعم الوكيل

Anonymous said...

و بالهنا و الشفا يا مصر



وده استفتاء حبنا

bastokka طهقانة said...

او استفتاء باللحمة الضاني جريت
طهقان بيحبها موت بس انا بعملها دايت مش بتعجبه
حبعته يستفتي يوم الاتنين و اهي فرصة يمكن يمشي في مظاهرة و يقبضوا عليه
و هناك بقى الاستفتاء بالعدس و الليمون
ما تبقي تيجي

Iskanderani said...

مساء الخير يا كلبوزة لكن سمباتيك ,

والنبي ماتنسيش تخديعة التوم بالخل علي الفته علشان الجيران اللي ماعندهمش فته بالضاني يحسوا ويتعلموا أول الفته بالشربه وعصير الليمون لكل من تسول له نفسه بالاعتراض على الشربه بزيت الخروع علشان كله يمشى حاله ان وقف حاله كدلع من رجال حفظ الفته فى الحله

وماحدش يمد يده فجيبى وإلا راح أنادي
وأصرخ ....الحقوني فى جيبي يد خفيه تلعب فى السرير بدون سابق علم من أي شخص على الطبليه

الكوارع على الطبليه من فضلك فلا تبحث عنها فى السرير هناك مفيش كوارع

تحيات إسكندراني في بلاد الله الواسعه

قاسم أفندي said...

سمعت من دكطور بلدياتنا ان الاستفتاء الكتير بيعمل عسر هضم وبيطلع ريحة وحشة كمان وملوش علاج غير بالحقنة الشرجية .. لذا لزم التنويه

مجهول said...

صباحك عسل
ومساكي عسل
ايه الوصفات اللي عاملاها دي يا سمباتيكا
فته ورز ولحمه
انا معزوم ولا ايه؟
وبتتريقي علي الدستور ولا ايه
دستور ياسيادنا دستور
ههههههههههه
ربنا يريحنا بقا من الرز و الشوربه
وخلينا النباتات اخف
ومش شكلها مفضوح كده


علي فكره تعليقي وردي عليكي موجود عندي
واشكرك لمرورك وبسعد بيها دايما
وياريت تقريه يمكن يعدل دماغك الجميله دي
بدل من الصداع اللي عملته في الاول ليكي

خمسة فضفضة said...

السلام عليكم ورحمة الله وبركاته

ايه يا كلبوزه يا اختشي الاكلات اللي تودي في داهيه دي ...اخزي الشيطان يا اختشي احنا عاوزين نبدأ نعمل رجيم وياريت نبدأ من يوم الاثنين الجاي

Eric Matt said...


والله العظيم بكيت

بكيت بشدة لأني محروم من الكلام ده هنا و مش حعرف أشوفه بكل التفاصيل التمام دي غير لما أنزل مصر

جوعتيني و حسرتيني

بس ربنا يكرمك برضو فتحتي نفسي على ماكدونالدز دلوقتي يعني على قد فلوسي

سلااااام من ماناساس البلد

محمد عبد الغفار said...

أتلسعنا . . اتلسعنا .. اتلسعنا

أتلسعنا يوم مهب الجيش وثار ، يوم ما اشعلناها شوربة نور ونار

اتلسعنا بالنار

يا مراكبي said...

أنا بجد زعلان منك

الموضوع كان حلو ولذيذ وكنت باقراه وقت الغدا .. فته وتقلية ورز .. منتهى الجمال

لكن بعد كام سطر لقيت لينك يسد النفس

قلت أرجع للفته تاني .. وبعدين ألاقي لينك تاني يسد الأنفاس .. وهكذا لحد آخر الموضوع .. وفي الآخر .. إتلسعنا

ليه بس كده؟

yasser_auf said...

صدق من قال شر البلية ما يضحك
و هم يضحك و هم يبكي

عموما انا اختلف مع الاستاذة توتا في تعليقها انها وصلت للكنترول خلاص
( الفتة طبعا )
انا اظن ان المسودة بتاعتها ممضية و نزلت للجرائد خلاص متجهزة علي النشر و نسبة الاكل طبعا معروفة تقيدوتوريث و تشجيع و معاك لاخر نبضة كلب بنسبة 99.999 %
و يعني نقدري تقولي مجموع يدخل يا طب يا هندسة

بعدك على بالى said...

والله اجمل مافى الاستفتاء/الفتة بتاعتك .. وتسلم ايديكى على السلطة (بفتح السين برضه ولنفس السبب اللى قالته كلبوزة)، ومعاها كمان الكوسة اللى هى القرع يجننوا ...

يجعله عامر وكل فته أقصد استفتاء وانتى طيبة..

ما تبقيش تغيبى كتير علينا فتتك بتوحشنا

تحياتى ياأخف دم

safa said...

بوست جميل و كل رموز سمينة يا قمر

Anonymous said...

ممكن حد يهفلي في الشوربه لحسن سخنه بجد :)...عموما انا بستفتي على روحي حد عنده علاج للمشكله دي؟

Egyptians in the UK said...

سمباتيك ...من فضلك ابقى اقفلى شباك المطبخ بتاعك علشان ريحة التوم بتاعة الفته طالعه و قالبه الدنيا عندنا بره على المصطبه....هههههه
عموما انا عايز اقول لك حاجه انت كتاباتك لما بتلمس اى شئ متعلق بالتدبير المنزلى بتبقى حلوه...اللى عايز اقوله بصراحه ...ياريت كل كتاباتك تطلع من منطلق البيت و الاسره...يعنى المقال ده علشان طلع عن طريق البيت و الاسره و المطبخ طالع شكله حلو و دمه خفيف...عموما جوعتينا و شكرا

bluestone said...

منك لله يا شيخة جوعتينا
وبوظتي الرجيم .. :)

عجبتني جدا فكرة الفتة المصرية ..
بس يا خسارة الطبيخ المصري دايما صايص
عشان ناقصة حاجات كتير

رشة ديموقراطية على سنة عدل
على معلقتين أمانة ونص لتر حرية

كلبوزة لكن سمباتيك said...

Sokomonoce
الاستفتاء بكرة حتعمل اية؟ مقاطع و لا ؟
---
ام العيال
الاستفتاء ده احسن من اي رجيم حرررق دم
---
عبد الله
احنا مغتربين زي بعض حنستفتي ازاي؟
---
TAMTAM
بالظبط يا طماطم حنندبح بكرة
و نتسلق و يتعمل على دمنا الفتة
---
تحياتي للجميع

كلبوزة لكن سمباتيك said...

micheal
ربنا يستر
---
بيسوو
لو على الحكومة تعمل استفتاء نابت على باب السيدة
---
حــلم
هههههه بوست تايه يا ولاد الحلال
---
Noony
امين يا رب
----
تحياتي للجميع

كلبوزة لكن سمباتيك said...

tota
حتستفتي حتستفتي شئت ام ابيت
انا خايفة ينزلوا اسمي في كشف اللي استفتوا رغم اني مغتربة نصابين و يعملوها
---
Epitaph
ازازة سفن اب بقى علشان نهضم
---
bastokka طهقانة
انا حاسة ان بكرة حيبقى معجنة و ناس كتير حتتسحل في المظاهرات
---
ربنا يستر

كلبوزة لكن سمباتيك said...

Iskanderani
فتة بزيت الخروع ؟ دي تبقى شربة بفتح الشين
---
قاسم أفندي
الريحة الوحشة طلعت قبل الاستفتاء جديدة دي
---
مجهول
انت نباتي حعملت فتة نابت
---
تحياتي

كلبوزة لكن سمباتيك said...

sosa
ان شاء الله
---
خمسة فضفضة
متقلقيش سد النفس جاي في السكة
---
The Groom
متنزلش حتنزل فين البلد مبقتش بلدنا
استفتي عندك اسهل
---
تحياتي

كلبوزة لكن سمباتيك said...

Mohamed A. Ghaffar
لسة انتم لسة شوفتوا حاجة
---
يا مراكبي
معلش يا مراكبي ادي حال البلد
---
yasser_auf
مجموع يدخلهم النار شعبة تدليس و تزوير
---
تحياتي

كلبوزة لكن سمباتيك said...

بعدك على بالى
و الله مفقوعة من اللي حيحصل في البلد متهيئلي حنخاف نكتب بعد كده
---
safa
شكرا يا صفا
---
ert3ashat
استفتي و لا يهمك
---
تحياتي

كلبوزة لكن سمباتيك said...

An Egyptian in UK
انا بكتب اللي بحس بيه مش محدودة في فرع معين ميرسي على النصيحة
---
bluestone
الحرية غالية اليومين دول الكيلو بعشرتاشر جنية
---
تحياتي

sarah la tulipe rose said...

مطبخ الدستور البرلماني قام بالواجب

Anonymous said...

هى دى الاستفتاءات ولا بلاش
مش تعديل ومش تعديل وفى الاخر اللى فى دماغهم هيعملوه
على الاقل الاستفتاء بتاعك يرم العضم زى ما بيقولوا

كراكيب عادل said...

ايه ده فية اكل هنا يا جماعة مش تقولوا عموما انا بحب الاكل بارد علشان مبحبش اتلسع

انا كنت جعان ونفسي اتسدت

محض روح said...

اوبس ايه الاكل الى يعمل تلبك معوى ده

وصفه هيله الصراحه
ربنا معنا
معدنا يوم الاثنين فى المائده الرحمن

:)
تحياتى ياجميل

moodysalihamidzic said...

هتوحشينا
:(

shabfa2re said...

يا جااااااااامد
D:

ibn nasser - ابن ناصر said...

ههههههه انتي لخصتي الاستفتاء وعلي فكره مابحبش اقرالك حاجه وأنا جعان ! لحسن اسلوبك كلوا اكل ههههه
تحياتي لاسلوبك الرائع

Anima said...

أنا ما باستفتيش غير في بيتنا و خصوصا إذا الحكاية فيها أكل

صحة يا بنتي بليز اعملي رجيم

شيماء الجيزى said...

سمباتيك...هى الفته دى فرض ولا؟
على العموم
الاستفتاء شغال من الصبح
وانا بستنى اعرف
بفارغ الصبر
عشان انا شوفت
اللجان مهويه
والناس مطنشه
يمكن الطناش يجيب نتيجه
ولا ايه؟

قصاقيص said...

بصراح تصفيق حاد وغنحناء قدام عبقرية التناول الجديد للموضع
بجد روعة ..... الربط كان لذيذ جداً......"لذيذ"...مش فتة ولحمة وسلطة؟
بالهنا والشفا.......بس صحيح ماجبتيش سيرة الحلو.......اوعي تقوليلي "كل وإشكر" ولا"لقمة القاضي"؟!؟
تحياتي

حاول تفتكرنى said...

الطبخة كلها حمضانة

micheal said...

تلقيت دعوه من يومين من زميل مدون عزيز ..محمد التهامي لحضور ندوه عن المدونيين في مصر بمجله كلمتنا 22 ش سوريا المهندسين..الدور ال8 ..عماره جريده الوسيط بالقرب من جامع مصطقي محمود..و تم تحديد الميعاد يوم 4-4 الساعه الواحده و النصف...الللي ناوي يجي يا ريت يسيبلي تعليق عشان أبقي عارف و عامل حسابي و أقول لمحمد
متخافوش مفيش حد مننا متراقب

Anonymous said...

يا عينى يا عينى عالاكله دى ,بس يا ترى هنقوم نقف على رجلينابعد كده ولا مش هتقوملنا قومة بعدها...يعنى من التوم يعنى والذى منه
;)

bentfalestine said...

ممكن ممكن انا اشارك بالاستفتاء؟؟ الله يسامحك يعني الواحد بيقرا البوست الي يفتح النفس و و بعدين يرجع للحقيقة عن الاستفتاء تنسد نفسه من تاني ؟؟
بس بجد ممكن اشارك بلاستفتاء او مش ممكن طب بس طنجرة اذوق بس اذوق مش رح اكل يعني بس اذوق اصل الحجة عامله علي حجر طعامي
تحياتي ... اعذري تطفلي و اسمحيلي اجي اذوق كلامك الي زي العسل دايما
تحياتي

ody911 said...

هههههههههه

واللهى مفيش أحسن من إستفتائك يا سارة

إستفتاء إنما إيه ؟؟

يستاهل بقى

هههههههه

وعادى بقة
أودى

koukawy said...

بس ازاي يا كلبوزه مايكونش في زروطه ده هو الموضوع من غير زروطه مابيقاش ليه معني

ana ga3an said...

تلاحظي يا سمباتيك يا اختي
ان مواضيعنا انا وانتي دايما يكون محورها الاكل
تفتكري دة راجع لعقد مترسبة في الطفولة؟؟؟

كلبوزة لكن سمباتيك said...

sarah la tulipe rose
فعلا يا سارة طبخوها و احنا اكلناها بالشفا
---
hend
اللي عايزينه حيعملوه فعلا
---
كراكيب عادل
معلش يا عادل كلنا نفسنا اتسدت
---
محض روح
شربنا الاستفتاء خلاص و لا عزاء للمصريين
---
moodysalihamidzic
هههههههههه متشفش وحش
---
تحياتي

كلبوزة لكن سمباتيك said...

shabfa2re
عجبك الاستفتاء!
---
ibn nasser- ابن ناصر
افتكر مفيش حد عنده نفس ياكل النهارده
---
Anima
متقلقيش الحكومة حتنشف ريقنا
---
شيماء الجيزى
الامتناع عن التصويت سمح لهم بالتزوير
---
تحياتي

كلبوزة لكن سمباتيك said...

قصاقيص
الحلو على حساب الحزب الوطني علبة حلاوة مولد النبي لكل من صوت بنعم
---
حاول تفتكرنى
فعلا و ريحتها طلعت
---
micheal
متعملوش حسابي
---
shayma
ف الغالب حنبطل نكتب
---
تحياتي

كلبوزة لكن سمباتيك said...

bentfalestine
الله يحييك تشرفي دايما
--
ody911
احلى ازازة سفن اب ليك
--
koukawy
الزروطة للركب
---
ana ga3an
هههههههههههه
عقدة جوع
---
تحياتي

Hannoda said...

آدي حالنا يا كلبوزة

مابقالناش غير اننا نتريق على المهازل اللي بقينا فيها... ما أكيد القلب اللي اتملى هم بيقول و أنا حاكركبها ليه على نفسي و على الناس

ما علينا خلينا في الفتة

بجد اسلوبك رائع... على قد خفة الدم ... على ما السها صابت جواي


مع احترامي الشديد

كلبوزة لكن سمباتيك said...

Hannoda
بنضحك على الخيبة
يا نضحك يا نطق
تحياتي

ibn nasser - ابن ناصر said...

ده طع بتنجان مش شوربه ورز

مصر هى أمى said...

سمباتيك
اول مرة اجى عندك
بس بصراحة ريحة الاكل جوعتنى بس الطبخة بصراحة تجيب تسمم للشعب الغبان لكن هتبقى زى الفل على قلب المنافقين بتوع السلطة و الحكومة

يا مراكبي said...

ألف ألف مبروك ليكي ولكل المصريين

أنا عرفت النتيجة من الكونترول من يومين وإتأكدت النهاردة

مجموع يفرح ويشرف صحيح

ياللا عقبال الخرجة الكبيرة إن شاء الله

متغيرة شوية said...

بالهنا والشفا
عارة لو الحكومة بتعرف تطبخ أكل زي ما هي بتطبخ دساتير مكنش حد نام جعان في البلد دي

بس يالا بالهنا والشفا والتاني.

الدبور said...

انا شايف تحاليل و زغاريط
وشوربه و عيش
يبقي احنااكيد في المستشفي و دي اكيد وجبه المستشفي
طيب و اللحمه اخبارها ايه
انا عاوز نايب كبير اصل انا كان عندي نباتشيه طول الليل في الطوارئ
و سمعت انهم هيغروا الطوارئ تماشاي مع تغيير قانون الطوارئ
يلا مش مهم حصل خير يا كلبوزة بقي اتوصي بيا في النايب المرة اللي جايه

FATMA said...

هههههههههههه
انتي كل حياتك اكل كده

بيتنا القديم said...

الحمام فين

الإستفتاء وجع بطني !!!!

كراكيب عادل said...

لولليييييييييييييييي

مبعرفش ازعرد حلو اصل لثاني محروك من الاثتفتا بثاع امبالح

يالا يجعلة عامر فين اجرتنا ؟؟؟

LAMIA MAHMOUD said...

لاء في الجون

ملعوبة بجد

šσяšαяαα said...

ياااى..فته ايه بس دلوقت..الرجيم دلوقت بقى موضة العصر الحليوة اللى عايشين فيه..يعنى بدل ماتاكل قوانين تعملها رجيم..وبدل ماتروح وتهد فحيل نفسك عشان تقضى مصالحك يبقى الرجيم برضو احسن وتختصر المشوار لانه سيبقى الحال كما هو عليه..وبدل ما نتعلم وناكل فى الكتب علشان حتت ورقه هتاكلها العته يبقى برضو الرجيم احسن وناكل فى نفسنا..وهكذا تقع الفته من القبه ويبقى الرجيم فى المقدمه!!!

أحمد سلامــة said...

همم
بسم الله
حاسب الحبر السحري يخفيلك صباعك
ماتقلقش الصوابع جاية كتير
همم ، همم ،
الله
تسلم إيد الترزي
يوه جاتني ايه قصدي الطباخ
يا سيدي أهو كله خيار
----
نعم
نعم
نعم
يدالعادي

šσяšαяαα said...

ياااى فتة ايه بس..دلوقتى الرجيم بقى موضة هذا العصر الحليوة..يعنى مثلا بدل مانحشى دماغنا بقوانين مكلكعه تجيب الجنان والعياذ بالله يبقى الرجيم احسن بكتير..وبدل مانهد فـ حيل نفسنا وندوب رجلينا علشان نقضى مصالحنا يبقى رجيم الجلوس فى المنزل افضل كثيرا لانه سيبقى الحال كما هو عليه..وبدل ماناكل الكتب علشان فى الاخر ناخد حتة ورقه هتاكلها العتة يبقى برضو رجيم الجهل هيكون احسن ونريح دماغنا..
ممكن لحسه من الصلصه احسن فتتى خلصت:)

Diyaa' said...

أوبجيكشان دي أول كلمة قلتها لما عرفت النتيجة
تاني حاجة ...خفة دمك تخفف همك
كلمة كانت ماما بتقولها ..بطلت تقولها لما صدام مات ..ولما أنا كمان بقيت من الموتي الاحياء بس شكلك خفة دمك أكبر بكتير ومخففة هموم كتيرة
واضح إن البوست اتكتب من المطبخ بس كنتي متابعة كويس ودي حاجة تتحسدي عليها
يعني تشوفي رايس وهيا جاية نافخة نفسها علي دستتين وزراء خارجية + دستة رؤساء مخابرات
ولا واحد بيتحايل علي البغل الكبير عشان ياخد باله من مهزلة التعديلات ويوقف الوضع عند حده
ولا كداب زفة بيقول إنهم مش هيتعدوا علي الحريات رغم القول المأثور للعادلي ..إنه اللي يخاف ميتكلمش ..
ولا الضرب والنفخ اللي حصل لكام نفر بيقولوا لأ علي سلم نقابة ..
بصي يا كلبوزة ..نصيحة من أخ صغير ..ربي عيالك علي إنهم ميكونش فيهم كل عيوب الشعب المصري اللي كانت السبب في إن اسوأ حكم في العالم يكون هو المتحكم فينا ..
ووقتها هتكون عملتي اللي عليكي
ومفيش مانع من بوستاتك اللذيذة اللي بتنضح بالمرارة برضه ..
وكفاية كده عشان اتنرفزت بما فيه الكفاية
سلام عليكم

karakib said...

:) ضحكتيني
ما هو فعلا السخرية هي وسيلة المصريين في الأستنكار شأنهم كشأن معظم سكان الأنهار الطويلة

..........tahayo2at said...

كل ما روح حتة او ادخل على بلوج الاقي بسلامته-الاستفتاء- في وشي

خلاص انا يئست

عندي اكتئاب غير عادي
ربنا يتولانا برحمته

تمر حنه said...

هى دى الصحوبية؟ سايبانى أتبهدل هناك و انتى جايه تطبخى هنا؟؟
سيبك من الأستفساءات و الحركات مبقاش ييجو منو - نفسى يا كلبوزة فطبق فتة من بتوعك .. يا سلااااام و نحبس بكوبايتين شاى بالنعناع .. ننسى شوية السياسة و التدوين و نسرح بقى .. يالا تعالى بقى

sara said...

تصدقي يابنتي انا جيت علي الريحه
ريحة الفته مفحفحه وواصله لحد مدونتي هناك ..والله وطبيخك اتقدم ياحوريه

اما بقي بخصوص صناديق الاقتراع اللي كنا فاكرنها بتبيض _بعيد عنك ياختي الجهل وحش_ طلعت بقي بتولد وبالجوز كمان توائم يعني ..علي اساس اني وانا بتمشي كدا خير اللهم ما اجعله خير لقيت يفط ساده الشارع نعم للتعديلات الدستوريه واكتشفت في الاخر انها بتاعت خلتك ام احمد الدايه اللي اشرفت علي عملية الولادة بكل نزاهه وصدق وامانه

وايكش تولع

smraa alnil said...

الف مبروك يا كلبوظتي

الحمد لله ربنا ظهر الحق وزهق الباطل

النتيجة بتقول ان الواد هيخش تربية
لولولولولولوييييييييييي

طب اقول ايه بس ياربي واروح فين
حسبي الله ونعم الوكيل

بقولك ايه سيبك من الاكل الحمضان دة
وتعالي ناخدلنا وجبة كنتاكي

اهي بيوزعوها برضه علي اللي بيقولوا نعم

ماحنا قاطعنا قلنا لا اسامينا اتكتبت بنعم

vetrinary said...

وقلنا ننضف بقى
قالو بلا وكسه
والله لتحصل بدال النكسه ميت نكسه


متقلقوش 67جايه جايه
مش هتتاخر
اللى عاوزين يعملوه خليهم يعملوه
التاريخ بيساجل الرجاله رجاله
وبيسجل التانيين
تانيين

كلبوزة لكن سمباتيك said...

ibn nasser- ابن ناصر
اهو كله طبيخ حامض للاسف
---
مصر هى أمى
اخويا هايص و انا لايص
---
يا مراكبي
مفروض نلم من بعض و نجيب اسكوتر للحزب الوتني هدية النجاح
---
تحياتي

كلبوزة لكن سمباتيك said...

متغيرة شوية
و ليه الشعب بينام جعان
هو عامل دايت؟!
---
الدبور
حديلك نايبين اصلك قلت نعمين
امه نعيمة
---
توتة توتة
لا مش كلها
---
تحياتي

كلبوزة لكن سمباتيك said...

سمسم
الحمام المدونة اللي جنبنا
---
كراكيب عادل
ليه هو كان عثل اثود ثخن و لا اية؟
---
LAMIA MAHMOUD
اغرفلك ؟
---
تحياتي

كلبوزة لكن سمباتيك said...

SoRsaRaa
فكرة كويسة
---
أحمد سلامة
ايوة صحيح
---
Diyaa'
ارابيهم و اكبرهم و بعدين يجي الدستور يدهولهم
؟؟؟؟
---
تحياتي

كلبوزة لكن سمباتيك said...

karakib
مش عارفة ليه حاسة ان جملة الانهار الطويلة دي شتيمة
:))
---
DR.SHERBO
لا حضرتك احنا استفتائنا غير
مش حتقدر تغمض عنيك
---
تمر حنه
الفتة عليا و السبارس عليكي بس متنسيش الاسبرسو و شوية ماية في الطفاية
---
تحياتي

كلبوزة لكن سمباتيك said...

None
منها لله ام احمد مش كانت سيبت سرة التعديلات و ريحتنا
---
smraa alnil
لا مش عايزة تنتاكي لو منكن ابو شقرة اوكي
ازيك؟
---
vetrinary
التانيين دي ممكن نشيلها و نحط بدلها كلمة تانية
ابيحة
---
تحياتي

Eric Matt said...


يا رب يدخل كلية تربية

ربنا يستر علينا يا رب


تحياتي من ماناساس البلد

محمد عـنـانـى said...

بعد التحيه
انا اسف انى مكنتش بزورك بس كانت عندى مشاكل كتير اوى المهم بوست جامد جدا والبقاء لله
وخلى بالك احسن لو اثنين دخلو عندك المدونه يبا تجمع والحكومه مش عيز كدا احسن بيتصنف عندها ارهاب
وربنا يستر علينا
وحسبيا الله ونعم الوكيل فى الظالمين

Dr. Tantawy said...

اموت انا فالشربه دي
على فكره انتي ظالماهم اوي
الشوربه بتاعتهم جميله و همه تعبانين فيها .. المفروض نكون شعب محترم ونقدر الشوربه دي .. بلاش ظلم بقه

قنديل said...

إيه هوه الدستور
ليه نكشف المستور
ونزعل حسني وسرور
ده حلة سخنة علي وبور
بيطبخوا فيها الأمور
ويشووا بيها الضهور
ويعكننوا بيها عالمسرور
دستور منهم دستور
داهية تاخدهم وتغور

قنديل said...

إيه هوه الدستور
ليه نكشف المستور
ونزعل حسني وسرور
ده حلة سخنة علي وبور
بيطبخوا فيها الأمور
ويشووا بيها الضهور
ويعكننوا بيها عالمسرور
دستور منهم دستور
داهية تاخدهم وتغور

Fo2sh said...

nice one
http://engafm.blogspot.com/

الراقـــص مع الذئـــــاب said...

بجد بجد بجد
احسن بوست قراته عن قضية ت ع د ي ل ا ل د س توووور

طهقان said...

يعني الحكومة عملت زي ما كل زوجة بتعمل مع جوزها


ماحدش هايقدر يفتح بقه



مع الاعتذار للزوجات

رفقة عمر said...

هى 75 % بدخل تربيه دلوقتى اعتقد بدخل معهد صرف صحى

خيرالدين said...

عندنا فى الارياف بيقولوا بكره تتعدل آديها اتعدلت اما نشوف هيعملوا فينا ايه اكتر من كده

SomeOne said...

ايييييييه

كلنا لها

يجعلها اخر الاحزان

رفقة عمر said...

انا اعتقد انى علقت هنا ممكن اعرف راح فين التعليق ولا هنا برضه عندكم النظام ذى نظام الاستفتاء

Radwa said...

ايه يا كلبوزه العك دا كله مش ممكن انا حاسه بحاجات كتير كده ملخبطه

انا الوقتى فعلا حسيت بان نظامنا مقرف اوى كده انا كنت عارفه بس بالقرف دا ياى وخااصة حكاية الشمامه

احلى وصف والله بس سلطه بالقرف

هههههههههههههههههههههههه

دينا فهمي said...

بجد ضحكتيني (:
شر البلبة ما يضحك

khaled said...

بس انا ما بحبش الضانى
ممكن اكل بطيخ؟
:)
و على فكرة احب الكوسة جدا قوى خالص حتما

يا مصر اكتب إليكي رسائلي said...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

BackBone said...

مبدئياً النتيجة 75و9منعشره
و بعدين انا بحب سيبريت و مبتقش السفن اب ده خالص

محاشي بقه لحسن متعجل

admelmasry said...

لا تعليق

محروس said...

انت جوعتيني

بس نفسي مسدوده من الاستقتاء مفيش حاجه تاني

-_- said...

انتى صدقتى حوار الاستفتاء ؟؟

Anonymous said...

مبروك الألوان الجديده يا كلبوزه

History Of Me!!! said...

هذه الطبخة استوة وانتهى الموضوع
بس الخوف على الطبخاة الي جاي
الله يستر

الوردة السوداء said...

يابنتى خافى على نفسك

اللى انتى كاتباه يودى فى داهية

طهقان said...

مبروووك
على النيو لوك

zordeak said...

مش عايزين تعديل دستووور



عايزينك ترحل وتغوووووور

Memo said...

mabrok 3la shkl elmodwna elgediddddddddd
alf alf mabrok

كلبوزة لكن سمباتيك said...

معلش يا جماعة سوري لكل اللي معلقتش على كتابتهم
ظروف صحية طارئة
ان شاء الله تتعوض في البوست الجاي
تحياتي لجميع من شاركني

كلبوزة لكن سمباتيك said...

معلش يا جماعة سوري لكل اللي معلقتش على كتابتهم
ظروف صحية طارئة
ان شاء الله تتعوض في البوست الجاي
تحياتي لجميع من شاركني

أبو ضحى said...

مش معقولة اللى انتى كاتباه ده كله
حاجة تجوع

بس الحقيقة ربط هايل

monmon5 said...

انا جعت خالص بس ربنا يستر واللى ناكلة وزوز ميطلعش علينا بطبط

monmon5 said...

انا جعت خالص وربنا يستر شكلنا كدة اللى حنكلة بط بط حيطلع علينا وزوز