Monday, July 02, 2007

يا بنات الحجاب مش كده


بصراحة وضع ميتسكتش عليه منظر البنات اللي ماشيين في الشارع و لابسين محزق و ملزق و حاطين على راسهم طرحة و الاسم قال اية؟؟؟متحجبة و هو حجاب من غير حجاب
و لا موضة البنطلونات اللي وسطها نازل دي و تلاقي الملابس الداخلية باينة وضوح الشمس و الاسم قال حجاب
مش معقول كل واحدة مكسلة تسرح او شعرها اكرت و مستخسرة تروح عند الكوافير تقوم تحط طرحة على نافوخها و تشْبهنا و تسمي روحها محجبة

و كله كوم و الاحمر و الاخضر اللي بيلطخوا بيه وشهم و كانهم طالعين فرح و مفيش مانع من خصلة شعر ضالة طريقها تطلع من الطرحة تشم هوا ...ده اسمه حجاب ده؟؟!!!0

ده طبعا غير السلوكيات اللي بتصدر من بعض البنات المحجبات و اللي بتسيئ للشكل العام للحجاب و للاسلام

:(
يا اخوانا... يا اخواتنا... الحجاب مش كده
و حتى اللي بتسمي روحها محتشمة و بتلبس كده دي مش حشمة خالص
فين الملابس الفضفاضة اللي بتستر محاسن الجسم و في نفس الوقت لا تصف تفاصيله مش باديهات اليومين دول اللي لو في حسنة او وحمة حتعمل لها فوكس
فين الطرح الطويلة اللي بتستر مش الدانتيل اللي طالعة مبينة كل شعرة في الراس و كله كوم و لفة الطرحة اللي عاملة زي العصبة بتاعة الشغالات بتوع زمان اللي بيسموها الاسبنش قال تطور يعني و منظرة فارغة و هي مبينة كل الرقبة مش عارفة مين قالهم ان الاسبانيات محجبات و بيلفوا طرحهم كده اصلا
احنا بنضحك على مين على نفسنا و لا على الناس؟ لاننا لا نملك اننا نزور في حجابنا قدام ربنا
بصي بقى يا اختشي يا تتحجبي يا تقولي انا مش محجبة انا بس مكسلة اسرح لكن اللي بيحصل ده يغيظ و يغيظ لاني كمسلمة بفتخر باسلامي و بحب ربي و بغير على اخواتي و بغير لمحارم ربنا اللي بتنتهك في الشوارع ليل ويا نهار
و عايزة بنت ديني تبقى شمعة منورة فوق اي نقد و استهزاء و علشان محدش يقول بصوا اهم دول المحجبات و الحجاب منهم براء

طيب فين اخو او ابو او ام البنت اللي بتلبس كده؟؟؟ مطنش و لا مش واخد باله و لا واخد اجازة بدون مرتب من النخوة و الضمير و الغيرة اللي ربنا خلقها في قلب كل راجل شهم و لا احنا خلاص شربنا محلول بلادة الاحساس و الضمير و مبقاش حد يغير على حد و يخاف عليه من عذاب ربنا؟

جاهدوا نفسكم يا جماعة قبل ما نحاول نصلح مجتمعنا تعالوا نصلح نفسنا و نوصِل اللي اتقطع بينا و بين ربنا و هو قادر يصلح احوالنا و بلدنا و ييسر لنا كل عسير
تعالوا نجاهد رغبتنا في المعاصرة الشكلية و اتباع الموضة اتباع اعمى و نعيش عصرنا بقلوب نقية سعيدة و راضية و نحاول نرضِي ربنا علشان يرَضّي علينا عبادة
ايدي في ايدك نرجع لدينا و حجابنا و نشوف اية الهدف منه و صدقيني الراحة و السعادة و الرضا كله في طاعة ربنا
شوفي الرابط ده
و الرابط ده
و ده
و ده
و الله من وراء القصد

130 comments:

اسكندراني اوي said...

ايوه قولي وسمعيهم والنبي لحسن الواحد خلااااااص روحه حتطلع
انا نفسي اخد البوست ده وعاوز اخلي كل واحده من اياهم تقراه

بجد بجد بوست فوق العشره على عشره

تسلم ايدك

Bella said...

سلمت يداك

الواحد استوى صراحة من المناظر المخجلة اللى بنشوفها
مش بس اللى بيلبسوا محزق وملزق
واللى لابسين بنطلونات وسطها ساقط والحزام واحد نص الوسط
والبادي اللى قلته احسن صراحة
واللى تلاقيها مطلعة قصة برة الايشارب

وكمية ماكياج غير طبيعية

وتعرفي مين بينزل يشتري معاهم اللبس

أمهاتهم

تصوري لما تروحي محل ملابس ماتلاقيش اي حاجة تنفع تتلبس لان البلوزات كلها اصبحت شيفون شفاف
وقصيرة لدرجة انك ماتتصوريش انها حتى نصف متر
وتلاقي اللى واقفة تنقي حاجات لاتلبس خارج غرفة النوم وقال ايه بلوزة وهي اقل وصف يقال عليها انها قميص نوم

ومين بينقي معاها اللبس

امها

والواحد لما بيعترض على اللبس ده تصوري ان الناس بتوصفه بالعتيق والقديم
وان المفروض البنت تبقى روشة ودلوعة

مش عارفة روشة ايه ودلوعة ايه برة بيتها

وهو مفروض الست تبقى نغشة ودلوعة وفرفوشة في الشارع ويتفرج على جمالها ودلعها ودلالها كل من هب ودب ولا ايه

واللى ماتعملش كده وتحترم نفسها ودينها وتتكلم باحترام وتلبس لبس حشمة يتقال عنها انها الشاويش نفيسة

الناس خلاص اصبحت عديمة التربية والنخوة اختفت خلاص

عدى النهار said...

بشوف هنا بنات كتير مغطيين شعرهم لكن لابسين بنطلونات وبلوزات محزقة جداً. أعتقد الأمر فيه شىء من الجهل

ربنا يهدى

كراكيب عادل said...

دة اسمة حجاب التبرج باختصار

البنت تلبس الاول شئ لايشف ولا يجسد

والزينة تكون في بيتها وبعدين يكون حجاب الفرض

موضوع هايل كعادتك

يا مراكبي said...

اله عليكي .. بوست أكتر من رائع وفي الجون

ماتستبعديش تشوفي بعد كده واحدة لابسة ميني جيب أو ميكرو جيب وتكون محجبة

ماهي الأمور بتيجي بالتدريج والتعود

حلو قوي سؤالك عن رجالة البنات دول .. هو ده الجون التاني

خمسة فضفضة said...

السلام عليكم ورحمة الله وبركاته

قلتي اللي فقلبي يا سمباتيك

والله انا كمان مش عارفه اهل البنات دول بيبقوا فين هل بيبقوا مغيبين ولا عاملين مش واخدين بالهم ولا مطنشين وخلاص
هما ماسمعوش الحديث الشريف اللي بيقول :

" ثلاثةٌ قد حَرّمَ اللهُ - تَبَارَكَ وَتَعَالَى - عليهم الجنةَ : مُدْمِنُ الخمر ، والعاقّ ، والدّيّوثُ الذي يُقِرُّ في أَهْلِهِ الخُبْثَ " رواه أحمد والنسائي .

والخبث المقصود به الزنا ، وبواعثه ودواعيه وأسبابه
واعتقد يعني ان مافيش اكتر من كده مناظر تعتبر بواعث ودواعي واسباب ....ولا ايه

حاجه تانيه كمان مش برضو الربطه الاسبانش بتبقي عاليه من ورا و بيبقي شكل الرأس فيها عامل زي اسنمة البخت وينطبق عليها الحديث اللي بيقول :

" نساء كاسيات عاريات مائلات مميلات رؤسهن مثل أسنمة البخت لا يدخلن الجنة ولا يجدن ريحها وإن ريحها لتوجد من مسيرة كذا وكذا"
صدق رسول الله صلي الله عليه وسلم

ربنا يعافينا ويعافي بنات ونساء المسلمين اجمعين


تحياتشي يا قمر

Shower-Mirror said...
This comment has been removed by the author.
Shower-Mirror said...

البوست فوق الفظيع بجد ..حاسس انك اديتيهم دش بارد ...برافو عليكى


نسيتى الموضه الاخيره بقى اللى طالعه دلوقتى و منتشره جدا بين المحجبات و بالذات صغار السن منهم

و هى انها بتلبس بنطلون محزق جدا و عليه بدى ملزق جدا جدا اسمه كارينا و العياز بالله

:)
و غالبا بيكون لونه بيج عشان اللى يشوفها من بعيد يبقى كأنها عريانه ملط

و بعدين طبعا عشان هى محجبه مش هاينفع تخرج كده ...فاخترعوا حاجه بتلبسها فوق البدى بالظبط -و الله العظيم- عباره عن برا - اسف على اللفظ - و الوانه اخر دلع

و حياة ولادى كذا مره اشوفهم جايين من بعيد كأنها واحده عريانه ولابسه برا فى الشارع

و الله تانى انا عمرى ماشفت واحده غير محجبه لابسه لبس مهزأ كده


لما تنزلى الاجازه الجايه مصر ابقى افتكرينى لما تشوفى الطقم التحفه ده مالى الشوارع


ههههههههههه

اللهم ام احفظنا يارب و ارحمنا ياكريم

كلبوزة لكن سمباتيك said...

اسكندراني اوي
احيانا الواحد مبيحسش هو اد اية شكله وحش و منتقد في لبس معين لكن ده دور الاصدقاء انهم ينصحوا بعض
و قال على راي المثل
يا بخت من بكاني و بكا عليا و لا ضحكني و ضحك الناس عليا

تحياتي

كلبوزة لكن سمباتيك said...

bella
الله يسلمك
مشكلتهم انهم فاكرين شكلهم حلو كده و الواقع ان شكلهم مقزز و مستنكر حتى من الشباب نفسهم
الام اللي ترضى تبين تفاصيل جسم بنتها في الشارع للرايح و الجاي لا تختلف كثيرا عن النخاس اللي كان بيعرض الجواري في السوق
و يرجعوا يقولوا مش لاقيين عرسان
طبعا هو في راجل عاقل يتجوز واحدة امة لا اله الا الله شافت تفاصيل معالم جسمها
اعوذ بالله
ايوة و الله صادقة في بتاع كده بيتلبس بحملات فوق قال اية البادي شبه البيبي دول الله يهديهم
كسفونا

تحياتي

كلبوزة لكن سمباتيك said...

عدى النهار
اصلهم فاهمين الحجاب غلط
و بالمناسبة انا مش بدعو للكلفتة و التهجم و الهطل
لا
انا بقول كل شئ بالاعتدال حلو
بقول للبنات افرحي و انبسطي و البسي بس راعي ربنا في مظهرك
لانك في الاخر بتعبري عن مظهر دينك
تحياتي

كلبوزة لكن سمباتيك said...

كراكيب عادل
تعرف الطبيعي ان البنات مرووشة وان الام او الاب هم اللي بيظبطوا مخهم لكن اللي يحزنك انك تلاقي الاب و الام فرحانيين بهطل بنتهم و كانها لسة نغة بالبربتوز
اتمنى الناس تفوق و تتقي ربنا في عيالها
تحياتي

كلبوزة لكن سمباتيك said...

يا مراكبي
و انت بتقول فيها يا هندسة
ما هو فعلا لبسوا الميني جيب
انا شفت بنات كتير لابسين بنطلون استرتش و فوقيه جيبة ميني جيب قال يعني بتداري العار


لا و طالع يا خويا الباديهات الاسترتش اللي لون الجلد فعلا مسخرةةةةة


ربنا يهديهم
اهلا وسهلا
تحياتي

كلبوزة لكن سمباتيك said...

خمسة فضفضة
و عليكم السلام و رحمة الله و بركاته
امين يا رب ربنا يعافينا و يعافي بناتنا و يهدي بنات المسلمين و يكفينا شر تقلب القلوب
و نسال الله الثبات على الحق
صدقتي
و صدق رسول الله صلى الله عليه و سلم


تحياتي

كلبوزة لكن سمباتيك said...

Shower-Mirror
و لاني مشجعة لنظرية المؤامرة فانا حاسة ان في شركات ملابس بتحارب الحجاب و بتهيئ للبنات لبس خليع يشوه حجابهم و اكيد بقصد
اولا اغراء الشباب و اشاعة الفاحشة
و ثانيا افساد طاعة واجبة على العباد و هي الحجاب
ربنا يهدي و يصلح حالنا و حال المسلمين
تحياتي

To a friend said...

موضوع مهم فعلا يا سمباتيك خصوصا ان الناس في الصيف مخهم بيهنج شوية

هي الفكرة ان اي واحدة تسأل نفسها انا لابسة الحجاب ده لميــــن؟؟ و ليه؟

لابساه عشان اطيع ربنا
ولا عشان ماحدش يضايقني و يقولي اتحجبي
و لا عشان موضة

و لا عشان زي ما قلتي مكسلة تسرح شعرها!!!!!ه

حاجة كمان ماظنش ان سلوك واحدة (محجبة او لا)
يأثر علي باقية الفتيات ... من احسن احسن لنفسه و من اساء فعليها

sakayar said...

على فكرة هوه تقريبا اول مرة اقرأ في مدونة حد بيتكلم ع الحجاب بس عرضك للموضوع واصل أوي خصوصا اننا بنشوف بنفسنا ده في الشارع
الغريبة فعلا ان محدش بيجاوب ع السؤال بتاع اخوها او ابوها او اهلها
يعني فعلا على طول بسأل هوه انا لو بنت كان ابويا هيسيبني انزل كده؟؟؟ وهيبقى شعوري ايه اساسا وانا ماشي وعارف ان الناس كلها بتبصلي وبتتصورني بشكل معين مفيش غيره؟
بجد جزاكي الله خير
تحياتي

Anonymous said...

نداء عاجل الى كلبوزة

انتى يا بنتى
فيه اوف لاين امانة سايباه لك فى البوستة
شفتيه ووصلتى الأمانة ولا اية؟؟؟

طمنينى لأنى مش بأشوفك فى البوستة

===============
عن البوست بقاا
بنات عاوزة حش رقبتها
وأهالى عاوزة الولعة بجاز وسخ
فصامفصام فصام

ماهو يا اما تلبسوا حجاب صح
او تخلعوا راسكم
عادى يعنى
محدش حيعترض
دى حرية شخصية

لكن الكوكتيل دة بيبقا نشاز وشكله زى اللى هربان من مستشفى المجانين

Amr Ahmed said...

موضوع مهم فعلا يا كلبوزة

بس غالبا ده بسبب لبس الحجاب دون اقتناع

تلاقي اللبس مش ماشي مع الحجاب

والتصرفات اللي بتخلي الواحد دمه يغلي

لان ابسط حاجة بيتقال ادي واحدة محجبة شوف بتعمل ايه

دي بلاوي بتحصل
ابسط حاجة روحي اي جامعة هتلاقيهم ناقص يقعدوا علي رجلين بعض

مسخررررررررررة

ولا الموضة اللي تفقع
تلاقي واحدة محجبة ولابسة جوب قصيرة

يعني شعرك عورة ورجليكي مش عورة

ويظل السؤال قائما

الناس دي مالهاش اب ولا اخ راجل كده
يقولها انتي نازلة كده ازاي

ولا ابوها واخوها بيعملوا من بنها ولا ايه

ده غير الام اللي بتمشي مع بنتها وهي فرحانة انها بتتعاكس

ياختي جتك وكسة

دي حاجة تغيظ

بيتنا القديم said...

ايه ده بنت وبتتكلم كده

الله يكرمك

واحنا كلنا بنأيدك

وبنأيد

الاصالة

العفة

الثقة بالنفس

الحجاب

تحياتي

ويجعلوعاااااااااااااااااااااامر

خليك فى البيت said...

ندعوكم لزيارة مدونة خليك فى البيت والمشاركة فى الحملة

emos said...

wallahi el 2a7ed beyetkalem w beyshed fe sha3ro lamma 7'alaaaaaaaaaaaaaaaaaaas

mafesh amal
rabena yehdehom ya rab w yeb3ed 3anena amena shelbaya elly bawazet el 7egab w 3amlalna feha moda

سجدة said...

بصراحة عندك حق
انا مش ضد اللى مش محجبة اللى مش عاوزة تتحجب هى حرة
لكن ضد الإساءة للحجاب
دا لفات الطرح بقت ملفتة للنظر اكتر من تسريحات الشعر

خيرالدين said...

عارفه لما عادل امام بيجيب فى افلامه ان الملتزمين بدينهم هم الارهابيين بس
هو عارف ان مش كل الملتزمين بدينهم بالشكل الكاريكاتورى المستفز ده بس هوعاوز الناس تصدقه
بالضبط البنات المحجبه الحجاب نص كم ده بتعطى فرصه لناس زى اقبال بركه ونوال السعداوى وجمال البنا انهم يقولوا ليس معنى لبس الحجاب انه العفه بدليل من يمشين على كوبرى قصر النيل وهن يرتدين كذا وكذا
بالطبع هناك من غير المحجبات من هن محترمات ولكن اذا ما رأوا صورة المحجبات بهذا الشكل سيفكرن الف مره قبل ارتداءه
يسلم عقلك العالى

Unknown said...

جزاكى الله خيرا على البوست ده سمباتيك والله

انا بتخنق جدا من المناظر دى خصوصا لما ادخل التويلت فى الكلية واشوف ازاى بتفننوا فى وضع الميك اب وبنات صغير لسة فى اولى .. والله انا فى رابعة ومابعرف اعمل زيهم .. فن فن يعنى

ده غير اللبس اللى اتكسف امشى بيه كأنى عريانة والعياذ بالله

واللى يغيظك لما تلاقى واحدة كدة ماشية جمب مامتها وتلاقى مامتها بقا محجبة وبعباية او منتقبة مثلا وكدة

طب ازاى سبتى بنتك كدة؟؟؟

البيت هو الأساس بكل المقاييس
انا فاكرة زمان ياسمبتيك لما كنت فى اعدادى واجى انقى بلوزة قصيرة ولا حاجة ماما كانت ترفض وتقولى لأ كدة غلط وماينفعش و و و
وسبحان الله بقت هى دلوقتى اللى ساعات تنقدنى عشان بحبكها فى اللبس شوية
بس انا اتربيت على كدة وده اللى يرضى ربنا اولا واخيرا

تحسى ان الأهل اللى بيسيبوا بناتهم كدة بيحاولوا يخلوهم يظهروا فى مفاتنهم اكتر خوفا من شبح العنوسة وعشان الفرص تزيد فى إصطياد العريس والله اعلم

ربنا يهدينا ويهديهم يارب

david santos said...

Hello, Sampateek, my friend! This day 8 I go for Africa. I go I stop next to abandoned children. When I to arrive, in October, go to visit you. I take you in my heart. Until always

Halawa said...

ينصر دينك

ايه ده لسه في كده

في البلد دي

فكرتهم خلصوا خلاص

تحياتي

Ma 3lina said...

ربنا يخليكى لينا ببتكلمى بصوتنا

ممكن الموضوع دا ننشره فى التليفزيون توعية علشان بجد زاد اوى

وفعلا يا فرحتى نسبة المحجبات زادت بس الزيادة قلة و الله

مشكورة على اللينكات

max.adams said...

بصراحة الكلام مايخرش الميه صح الصح احنا بنعمل اللي نقدر عليه نرشد وننصح المحيط الاخوات و القرايب بس اللي برا اللي مش عارف بيفكروا ازاي دول مافيش سكه خالص لأن مجرد ان واحد يقف يقول لوحده منهم كلمه تبقى شبهة وش كده
حسبنا الله و نعم الوكيل
أنا فعلا سألت نفسي هي بتفكر في ايه و هي طالعه من بيتهم كده؟؟
أو ولي أمرها بيسيبها كده ليييه ايه اللي بيلف في دماغة
أنا سمعت مرة واحد بيقول عشان البنت تتجوز طب ازاي ده حتى اللي يشوفها بيقول دي...... يعني حتى صاحبها لو كلمته يقوللك دي تمشيه انما جواز لااا

يعني هو بوظان دماغ من الأول للآخر
وتخيلي أشوف واحده لابسه برمودا وضيق ولابسه على نافوخها حته قماش و مزحلقاها و نص شعرها باين ؟؟؟
وقال ايه حجاب

حسبنا الله و نعم الوكيل

تسلم ايدك

mohamedgado said...

قوليلهم الله يخليكى
عشان عاوزين نشوف مصالحنا
والله هما دول اللى جايبنا ورا
ربنا يهديهم
تحياتى

Eric Matt said...


ربنا يصلح الحال يا رب ويهدي كل نفس

تحياتي لك من ماناساس البلد وجزاك الله خيرا على حرصك

غمض عينيك said...

ايووووووووووووووه
كده تمام عشان خلاص بقه الواحد مبقاش عارف يعمل ايه....دا انا لما بنزل الشارع في اي مكان بشوف العجب العجاب...حرام والله اللي بيحصل ده على رأيك شبهة والله انا احترمها اكتر لو قلعت الحجاب ع الاقل تكون صريحة كع نفسها

تحياتي ليكي
محمد سمير

S H A H said...

كلام بجد كان جواياو عايز اقوله
بجد بوست اكتر من رائع, و يا ريت الناس تتعظ

MAKSOFA said...

والله ياكلبوزتي أنا مرارتي بتتفقع لما أشوف الناس دي ن دول فاهمين معني الحجاب غلط خالص ، موش عارفين ايه اللي يتغطي في الجسم ، وأنا كتبت مره زمان عن الموضوع ده

تحت عنوان أنا والحجاب وهواك

http://mkasofa-almaksof.blogspot.com/2006_06_01_archive.html

صاحب البوابــة said...

اشكرك بشدة

تحياتي لكِ

حقاً اتمنى لو كل فتاة مرت من هنا

لتقرأ ما خطته يداكِ

جعله الله في ميزان حسناتك

واحـــد مـــــن الـنـــاس said...

بوست اروع من الروعة يا كلبوزة
بجد ارفع ليكي القبعة
وربنا يكتر من امثالك

فى القلب said...

طيب وأيه رأيك فى البنات ألى لبسه الواسع الفضفاض الذى لايشف وليس لباس شهره ووقفه تحب على نفسها قدام كل الناس كأنهم فى فيلم من اخراج
أناس الدغيدى
خصوصا على الكرنيش

حسن ارابيسك said...

كلبوزة
بوست تحفة من تحفك
بس تفتكري هما مش عارفين الكلام ده !
لكن مين قال إن ده حجاب
في الخارج والدول المتقدمه ساعات الواحدة بتحط اشارب على سبيل الأناقة وعندنا بيحطوه على راسهم للسبب اللي ذكرتيه بالضبط
وربنا يرحمنا في الأيام اللي جايه دي ويعديها على خير مش ناقصين زلزال تاني عشان يفوقنا

ابو النجوم said...

انتم لية ظالمين الحجاب ماتسموة اى حاجة غير الحجاب
انتى عارفة انى فى يوم كنت فى السيما انا ومراتى وبنتى ووجدت فى الكرسى امامى واحدة محجبة من اللى بتتكلمى عنهم دول ومعاها شاب زى البغل خلونى سبت الفيلم وقعدت اتفرج عليهم واللة عملوا اللى مايقال علية ومن غيظى واحراجى ادام مراتى قمت من مكانى ورحت ليهم واخدت البتاع اللى بيسموة حجاب دة من على الارض وقلت لهم حوشوا اللى وقع منكم واللى ينقط ان البنت قالت لى عادى
بجد كدة ومن غير زعل الحريم اللى بيعمل كدة لازم ينضرب بالنار فى ميدان عام لانة بيسيىء الى الناس المحترمة
داتنا نيلة فى حظنا الهباب
ابو النجوم

البنت الشلبية said...

السلام عليكم

انا رأيى فى الموضوع ده انه بلاش تشدد فى الاول

وده لان خطوة لبس الحجاب او تغطية الشعر عند بعض البنات بتعتبر خطوة كبيرة اوى فى الاول فصعب نقولهم اعملو كده او كده

احنا عايزين نحببهم فى الحجاب او التحشم ,,الى هوا تغطية الشعر واللبس المناسب الى مش مكشوف ولا ضيق ..يعنى لو بنطلون جينز ضيق تلبس عليه تونيك طويل

لو شيفونات تلبش بادى تحته بنفس لونه

اصل واحدة لسه داخلة الجامعة مش ممكن تفكر انها تلتزم اوى فى الحاجب واللبس وانتى عارفة بدايات دخول الجدامعة فمجرد ان البنت ترتدى الحجاب ولبس محتشم ده شئ كبير وهى حبة بحبة هتلتزم اكتر

على فكرة انا واحدة من الناس خدت الامور دى على خطوات والحمد لله اتغيرت عن الاول بكتير اوى

وبتمنى من الله الهداية اكتر واكتر ليا ولجميع المسلمين

الف شكر

OPAZ said...

أكتر حاجة عجبتنى فى البوست دهالبقين الأخرانين دول(تعالوا نصلح نفسنا و نوصِل اللي اتقطع بينا و بين ربنا و هو قادر يصلح احوالنا و بلدنا و ييسر لنا كل عسير
تعالوا نجاهد رغبتنا في "المعاصرة الشكلية" و اتباع الموضة اتباع اعمى و نعيش عصرنا بقلوب نقية سعيدة و راضية و نحاول نرضِي ربنا علشان يرَضّي علينا عبادة)
ده كلامك صح؟ بس مش أهم اننانهتم بالجوهر أكتر من الشكل؟ اللبس الواسع الفضفاض الشرعى ممكن أوى يكون مدارى قلب لونه بلاك أسود حاقد و ناقم.
أنا على فكرة مش ضد الحجاب أبدا بل بالعكس لكن فى حاجات أهم منه نهتم بيها كدة ولا لأ؟

طهقان said...

ايوة يا ست
ديفيد صندوق حاطتك في قلبه خلاص


ماشية معاك
هنيالك يا عم

شيماء الجيزى said...

بصى يا سمباتيك الموضوع ده فعلا بقى منتشر بشكل غريب جدا ولازم يكون فى حد يوعى
ان ده مش الاسلام ولا الحجاب الصحيح ابدا

كمان عايزة الفت نظرك للاسدال الى هو موضة دلوقت اينعم هو لباس صحيح بس هو متاخد موضه
فى لبسه

مش كل موضه تنفع او تصح وتسمى حجاب

..............

احيكى على البوست الرائع
تحياتى وسلاماتى لكِ

Dr. Tantawy said...

بصراحه الواحد زهق من الموضوع ده
بس مبدئيا . كويس انها جت من بنت لأنى كان عندى احساس ان كل البنات مقتنعه ان ده عادي و مفيهوش مشكله

ملاحظة : المشكله انها جت من مدام .. فاضل بقه اللي تكون معترضه تكون انسه لسه متجوزتش و لسه مش شايفه ان اللبس ده عادي و بيجيب عرسان هههه

هوندا said...

السلام عليكم
ازيك ياسمباتيكا
انا معنديش كلام بعدك اقوله غير انى شايفة ان الحجاب بدأ يتاخد عادة ومعدش حد مهتم بيه كعبادة وفرض لربنا
اعتقد ان لو الواحدة فكرت كده هتحاول توصل للحجاب السليم الشرعى بدون تعصب ولا دياوله

أحمــــــــدبــــــــــلال said...

تعبت و الله من كتر ما بقول الكلام ده

أحمــــــــدبــــــــــلال said...

تعبت و الله من كتر ما بقول الكلام ده

محمد عبد الغفار said...

كده هيتهموكى بانك اصوليه ضد الحريه

shabfa2re said...

ربنا يهدينا جميعاً :)
محتاجين نقول
يا ناس السلوك مش كده
فين الاخلاق؟

klmat said...

بوست رائع وكلام واقعى ومن ترتدى الحجاب المفروض انها عايزه رضا الله
وفى الحقيقه انه لايرضى ربنا ولا الناس
بل تتعرض للسب اكتر من مره اركب تاكسى والاقيه يعلق على المحجبات من هذا النوع ويسبها ويسب اهلها
اتمنى لهن الهدايه والثقافه الدينيه والخوف من الله
اعتقد ان هناك خلل فى البيت والحجاب كأنه موضهم ش واجب دينى
احييك على مدونتك جدا

بيجاسوس المصرى said...

كلبوزة كل مرة اقولك وحشتنى وانتى ولا حتى راضية حتى تزورينى و الحصان زعلان قوى

خليها سمباتيك
المشكلة تفاقمت بطريقة غير طبيعية بل وزادت عن الحد المسموح له
و الله لدرجه ان اعرف اولاد بيتكسفوا بمشوا فى الشارع لوحده احسن البنات هما اللى يعكسوهم
يارب ابعدنا عن المناظر دى الواحد مش ناقص ذنوب
تحياتى
الحصان منتظرك

DantY ElMasrY said...

مع احترامى للجميع الحجاب مش مسألة دينية أصلا يعنى قصدى اننا نسيب البنات تلبس اللى هيا عاوزاه وكمان تصلى بيه
أيوه تصلى بالبادى والجينز زى الشباب بالظبط

صاحب البوابــة said...

اين جديدك ؟؟؟

تحياتي

سكتم بكتم said...

ينصر دينك يا أستاذ خليفااااااااااا
أقصدي يا سمبتيك هانم

والله الدنيا لسة بخير والأمل موجود فيكي وفي اللي زيك

يسلم عقلك وقلبك ولسانك

تحياتي

انحلت سيور العربه وسقط المهر من الاعياء said...

السلا م عليكم


بوست هادف ر ائع


تحيا تى

Unknown said...

ربنا يكرمك ويجعل البوست ده فى ميزان حسناتك

tamer afify said...

ربنا يكرمك
جميل ان ةيكون لسه فيه حد وسطنا بيأكد على المباديء دي

دكتور مستكنيص said...

والله ناس كتير صوتها ضاع في الموضوع ده وفي الاخر محدش بيسمع غير اللي جواه والناس ماشية تضحك علي نفسها الواحدة من دول عاوزة تحسس نفسها انها متدينة وروشة وشيك وحبوية وعايشة حياتها يعني ماسكة كل الخيوط في حين ان فيه خيوط كتير اوي مينفعش تتمسك سوا
تحياتي

safa7_karmooz said...

بيسموه حجاب مودرن

تعرفى من شدة ضيقى شفت بنت فى الجامعه لابسه حجاب ....والاكمام عشان نص كم يعنى ...هتقولى ماهى كويسه...تؤ...لابسه بنطلون برمودا...

والله قولتلها لازمة ايه حتة القماش اللى فوق راسك دى ...شيلها ...ملهاش لازمة ...قالت عليا متخلف :D لقب جديد انضم لالقابى

اصل يعنى يا نعمل الحاجه بتاعت ربنا بذمة وضمير يا منعملهاش خالص ...مش نعملها نص كم ...وناس تانية هتتحاسب معانا ...يعنى اهاليهم هيتحاسبوا انهم سابوهم يخرجوا كده ...نص حجاب

اييييييييييه

لنا الله ..:)

أحمد أبو القاسم said...

أختي الفاضلة

فعلا هذا البوست أجمل ما قرأت منذ فترة ليست بالقصيرة

تحياتي لكي على هذا الطرح الهادف والرائع

فما يحدث الآن تخطى الحدود وفاق الأوصاف

وأعطى لأعداء الدين ذريعة لمهاجمة التدين

وأخيرا أطلب السماح لي بنشر هذا البوست على مدونتي مع الإشارة لمصدرها بالطبع

بارك الله فيكي وسدد خطاكي على طريق الحق

لسه بعقلى said...

كلامك صح مليون فى المية ...بس نوعية البنات دى ما اختلفتش كتير عن بنات الاسترتش والبدى والايشارب ...اللبس بس هو اللى اختلف
ربنا يهدينا جميعا

Monzer said...

فعلا
احسن لهم ولينا يشيلوا الطرحة
هما يبخوا شعرهم
ويبينوا كل حاجة
مش فاهم ايه المنطق ده
طب خبوا كل حاجة وبينوا الشعر أرحم
طبعا لا بهرج
بس على الأقل نخبى المهم
مش محزق وملزق وقصير وضيق وكله متفصل، ونيجى نخبى شوية الشسعريتيتن الى حضرتك قلتى وقولك حقل انه شعر اكرت ماتسرحش علشان نبقى فى الانجاز وىد الطرحة بقت ألوان وكله فى التمام ومزركش وماركش

حسبى الله ونعم الوكيل
ده حتى بالمنطق
ندارى ايه ونخبى ايه

بجد فعلا الكلمتين دول مهمين منك اوى
جزاكى الله كل خير

maioya said...

والله كتير غلبوا يتكلموا في الموضوع ده
ومفيش فايده هما حاطين في دماغهم
طالما شعري متغطي رغم ان ممكن يكون نصه بره ابقي كده محجبه
وكده تتحسب في المحجبات
رغم انه مجرد حجاب موضه
ربنا يهدي

الأميره أوسه said...

كلبوزه حبيتشــــى
وحشانى جدآآآآآآ
عرفت أنك بتسألى عليا
صدقينى غصب عنى والله
بس ظروف
أنا بخير والحمد لله
وسأعود لزيارتك ومعايا حلة محشى وطبق فته
تحياتشى وتحرشاتى القلبيه

حسن ارابيسك said...

سمباتيك الضرب في الميت حرام كفايه كده
بقولك أنا عازمك عندي في المدونة على طبق فول مدمس
بالهنا والشفا

صاحب البوابــة said...

!!!!!!

Anonymous said...
This comment has been removed by a blog administrator.
عمر عاشق القرآن said...

أولا الحجاب زى ما قلتى مش كده الحجاب هو الزى الكامل اللى بيغطى الجسم كله ولا يظهر الا الوجه والكفين .. غير كده مسموش حجاب

ثانيا بقى :: انا كتت موضوع عن كده قبل كده .. بس سألت سؤال هل انتشار مظاهر الدين مع عدم انتشار جوهره بنفس المعدل شىء مبشر ولا وحش ؟؟

انا الصراحة مش عارف هو مش كويس بس يمكن يكون بداية ..

انتى رأيك ايه فى السؤال ده ؟؟
________
مستنى اجابتك على مدونتى علشان اقراها

daktara said...

الله ينور عليكي
د. خالد عزب

daktara said...

www.picstalk.blogspot.com
مدونة جديدة
شقية
اوعي تفوتك متابعتها

انظر حولك
د. خالد عزب

koukawy said...

ليكي حق يا ستي .. صدقيني انا لسه امبارح بليل
و ربنا يحاسبني لو انا بأفور و لا حاجه
لسه شايفه واحده لابسه طرحه
و بنطلون قصير لحد الركب ؛
و اعرف واحده زميلتي في الشغل
محجبه برضه و بتلبس الباديهات بتاعت كارينا دي و تشمرها لحد كوعها
انا عندي احسن تمشي بشعرها هيبقي اللبس مناسب

MZ said...

بوست رائع ربنا يكرمك

استئذنك هاطبع نسخ منه واوزعه عل بعض الأشخاص

ربنا يوفقك

soosa el-mafroosa said...

انتي فين يا قمر؟

أبو ضحى said...

الحجاب ليس اكسسوارا أو قطعة ملابس اضافية
هو طاعة لله

و الحجاب فى حد ذاته لا يعنى التزام الفتاة بالدين وطاعتها لله..بل ان كثيرا من الفتيات الغير محجبات أكثر طاعة و التزاما من كثير - و ليس كل المحجبات - فالمظهر لا يعنى أبدا الجوهر

و لكن فى النهاية هو أمر من الله لعباده
و فى النهاية أبدأ بالجوهر يستجيب لك المظهر


تحياتى

admelmasry said...

يا سمباتيك
ماهو كلوا بيطلع في الغسيل

كلبوزة لكن سمباتيك said...

اعزائي البلوجرز
اتابع تعليقاتكم باستمرار و ان كان الوقت اضيق من ان ارد على ارائكم القيمة
و لكن تعليق ملحد اضطرني لتسجيل الدخول و الغاؤه
==
اتمنى للجميع وقت سعيد و صحة و عافية
و خالص تحياتي

صاحب البوابــة said...

ارجو ان تنضمى الينا في حملة ( افضحوا تجار الكيف )

التفاصيل في مدونتي

سأنتظرك

الدبور said...

هنقول ايه غير ربنا يهدي
تسلمي يا كلبوزة علي البوست و ربنا يجعله في ميزان حسناتك

تحياتي
الدبور

R.O.U.R.O.U. said...

2lty 2ly ana 3ayza 2a2olo
kol kalamk sa7
fi 2l goooooooooooooooooooooonn

محمد عـنـانـى said...

ربنا يعزك
انتى جدعا جدا
اول مره اشوف بنت بتنقض البنات على غلط بيعملو
والبنات اوع يفتكرونى بشمت لسمح الله
بس بجد منظرهم مقززز جدا مع الحجاب
وحلو اوى التعبير بتاع شعرهم اكرت ولا مبيسرحوش
ههههههههههههههه
بجد ربنا يعزك
بوست اكثر من رائع
بس يا رب البنات الى بتعمل كده
تعقل
وتتحشم
تحياتى

خطــاب said...

موضوع متميز و ظاهرة سيئة جدا

كان فى حملة عن الموضوع دا قريب على مدونتى و عدة مدونات اخرى

ربنا يكرم و البنات تتحجب

الطائر الحزين said...

السلام عليكم
بارك الله فيك وجزاك خيرا
الأهم من هذا اذا صادفك الحظ وتحدثت مع احداهن وجدت عين بجحة
فشت الجهالة واستفاض المنكر فالحق يهمس والباطل يجهر

تحياتى

عروس البحر said...

فعلا المناظر اللي قولتيها دي بنشوفها كتير ده بصراحة ده يبقي حجاب نص كم
تحياتي

daktara said...

لتاني مرة اعلن تايدي لكي وتحياتي

Eric Matt said...


مفيش جديد؟

ربنا يكرمك

تحياتي لك من ماناساس البلد

The Eagles said...

سورى كلبوزة انا لما اقرا الموضوع الاخير
لقد دفعنى فضولى الى معرفة قصتك ما جمل كلماتها كلنا عشناها معكى
بس مش باللضبط
هههههههههههه
لا بجد مكتوبة باسلوب جميل ومؤثرة جدا ولما مات لالا
ان شاء الله ربنا يكرمكم فى حياتكم ويكرمكم بابنائكم

انا لى رجاء اتمنى ان يتحقق انا اريد ان اجمع جميع مقطوعات موسيقى
love story
بجميع الالات الموسيقية انا اعشق هذه الموسيقى
انا عندى مقطوعتها بالبيانو
اريد هذه المقطوعة الموجودة على مدونتك خاصة وانها اكثر من رائعة

اتمنى ان تحققى لى رجائى


والسلام...........

yousef said...

اصلا اللى بيحصل اسمه تحايل على الدين فى موال الاسبانيش وغيره
بجد انا بحمد ربنا كل يوم انه بعتلى اللى ينطبق عليه حسنة الدنيا
regards

CHICO said...

تهنيتى على المدونه الذيذه دى.. واسمح لى بان اكون من زورها الدائمين.. وان يبقى الحب بيننا

smraa alnil said...

جبتي لمفيد

وبسوت صح مية في المية

انا معاكي

علي فكرة حبيت اسجل اعجابي بالبوست اللي فات
لان دموعي نزلت وانا بقراه جد

ربنا يسعدك يا كلبوزتي

max.adams said...

DantY ElMasrY
أسجل اعتراضي على ما تقول عزيزي المدون الكلام ده تخريف لأن فيه أمر واضح و صرييح بالحجاب من الرسول صلى الله عليه وسلم و استغفر عن الكلام اللي قلته ده وهزأ اللي اداك الفكرة دي

شقاوة شعب said...

نفسى البنات يكون عندها شخصية بحيث ههى اللى تقرر هى عايزة تعمل ايه او تلبس ايه
مش قاعدة مستنية الموضة اللى هتنزل عشان تطبقها بالحرف كانها قران
ما كل واحدة يكون لها استايلها الشخصى اللى بيعبر عن شخصيتها وفى نفس الوقت لا يتنافى مع اللى أنزل بجد اللى هو القران

islamz said...

مش قادر اقول غير ربنا يكرمك على النصيحة دي .. ويا رب حد يسمع لانه بقي بجد موضوع زائد عن الحد بدرجة مقززة ومستفزة ...

اسكندراني اوي said...

في لحضرتك عندي تاج ممكن تتفضلي تاخديه
عشان المونه مش عاوزه تفتح من ثقله
ههههههههههههههه

max.adams said...

سمباتيك
أنتي فين بقالك كتيير أوي ماكتبتيش
أرجوا انك تطمنينا عليكي

أميرة said...

والله يابنتى عندك حق

بقولك ايه مدونتك حلوة اوى

nohamy said...

ده الطبيعيى عنا

بنوتة من وسط البلد said...

عزيزتى سمباتيك
انا كمان من زمان كنت عايزة اكتب عن الموضوع ده
وقولهم ارحمونا

والى مش هتتنيل تلبس حجاب عدل تقلعه اكرملها واكرملنا

وكل التفاصيل الى انت قلتيها واكتر احنا عارفنها وشايفنها واكتر منها كمان

وزاد وغطى كمان الى لابسة اسدال ولابسالى الكم الاحمر والطرحة الحمرا والفول ميك اب وماشية انجاجية مع صاحبها فى الشارع

طيب القبيحة وقلنا قبيحة وربنا خلقها كده .. لكن كمان الى عملالى روحها ملتزمة دى بتضحك على مين


بس خلاص اصل قلبى بيوجعنى
وتحياتى الغالية ليكي

رفقة عمر said...

سمبتيك ياقمر
انتى فين كل سنه وانت طيبه
يارب تكونى بخير بتقضى الصيف فى مكان هاى على البحر انت واسرتك وتكونوا كلكم بخير يارب اللهم امين يارب العالمين

misrology said...

لا فض فوك
هو ده الكلام
تحياتى

البِـئرُ والظمّأْ said...

السلام عليكم يا سمباتيك
بجد ياما هنشوف
بس موضوعك ده فعلا في محله
ربنا يهدي
نوريني
مستنياكي
تحياتي

bedo said...

ايه الكلام الحلو ده
لا بجد كلمات جريئة جدا
لكنها مطلوبة في مواجهة وجوه بجحة إن جاز التعبير

وياريت فعلا لو كلهم يقرو التدوينة الجميلة
ربنا يبارك فيكي
ويجعله في ميزان حسناتكم إن شاء الله

وجزاكم الل خيرا

sara... said...

طولتى اوى يا سرسورة
ان شا لله تكونى بخير يا قمر

sara said...

ربنا يهدينا جميعا يارب

تحياتي يا سمباتيك

bluesky said...

اولا اهنأك على الموضوع الجميل جدا و الخطير دة
ثانيا انا موافقة على كل كلمة فيه
عندك حق دى بقت ظاهرة بشعة...ظاهرة بتحطم كل امل للمسلمين في نيل احترام المجتمعات الاخرى ,للان بكل بساطة اذا كنا ما بنحترمش نفسنا مين هيحترمنا؟؟

bluesky said...

اه نسيت اقولك
الtemp.بتاع المدونة جميل جدا
مبروك

Omar Elgarhy said...

طيب شفتوا انتوا اكيد

الحجاب اللى على البرمودا صح ؟


لكن عمركوا شفتوا حجاااااااب

على

CUT

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بصوا من الاخر .. انا شفت فى مصر اللى ميتشافش فى حتة

ربنا يريحنا بقه

Nouran said...

حلو اوي الموضوع يا كلبوزة بجد الحجاب اليومين دول بقى مستفذ جدا عن ناس كتير زي ما انت قولتي بالظبط


انت فين يا كلبوزة اتاخرتي اوووووي
يا رب يكون التاخير خيييير :)

عصفور بلا أجنحة said...

يا سيتى دة مش حجاب دة اسمة موضة العصر و على فكرة قليل اوى لما تلاقى فى زمنا دة واحدة تقولك منقلبها انا لبساة عشان الدين امرنا بكدة دة يقولولك اصل صحبى بيغير عالية موت فلبستوة اصل شعرى لازم اعملة سشوار فبكسل واصل واصل واصل .........
اشكرك على هذا الموضوع

رفقة عمر said...

اولا حمدالله على سلامتك شوفت تعليق ليكى عند اكتب بالرصاص وفرحت قووووى انك بخير يارب دايما بخير ومش تحرمينا من كلامك الجميل

sahr said...

عندك حق والبوست كله رائع بس بيتهالي كل الكلام دا لا حياة لمن تنادي
بس كويس دعوتك دي

Malk Almasria said...

بمناسبة الحجاب

رمضان كريم



ملك المصرية

دولة خرابستان العظمى said...

مش عارف ليه كل ما اشوف بنت محجبة نص كم افتكر الشباب اللى مسقطين بنطلوناتهم ومبينين لا مواخذه اللباس بتاعهم بالعربيه الحديثه البوكسر

حسام مراد said...

بجد اديهم كمان وكمان
حاكم البنات دول بيستفزونى بطريقه

وقال ايه اسمه شراب ولا بنطلون كارينا
مين كارينا ده
ازاى من فوق كده ومن تحت كده كده كده
وعايزك تعملى حامله عليه وتديهم فى رقابيهم

تقبلى تحياتى

نسرين - أمة الله said...

السلام عليكم
اللهم امين اهدينا اجمعين

عصفور بلا أجنحة said...

يسلم قلمك يا سمبتيك و عقبال ما البنات تدهد و تهدى بأة

حسن ارابيسك said...

فينك
بنده عليكي من عنيكي ماتردي السؤال
مستنيكي

كلبوزة لكن سمباتيك said...

اشكر كل من اهتم بمقالي و شرفني بالتعليق
و اتمنى للجميع دوام الصحة و العافية و كل سنة و انتم بالف خير
تحياتي

رمـــوز الحيـــاه said...

أختى سمباتيك ...ماشاء الله مدونتك جميله وإن شاء الله أزورها تانى أصلى لسه جديده فى عالم التدوين وأتمنى تقبلونى بينكم ...

موضوعك فى الصميم ..

بجد البنات دى انا بنكسف لها سلف وأحيانا بفضل أراقب نظرات الشباب ليهم بجد منظر مش لطيف خالص ..

وبتذكر إن بكل نظره من الشاب البنت دى بتاخد بها سيئه ياااااااااااه كم كبير أوى ..اللهم عافنا يارب ..

أنا عن نفسى بتعجبنى السعوديه جداااا إنهم موحدين الزى الشرعى والإسلامى فى بلادهم ياريت نقتدى بيهم ...

اللهم اصلح شؤوننا وشؤوون جميع بنات المسلمين ....

بوركتى اخيتى سامباتيك ....

He and She said...

I am sorry my comment is too late. I just read the post now. there is %50 of the veiled girls are doing it for economic reason. The girl is a high maintenance creature and the family can not pay for either the hair dresser of the fancy clothes so we better leave them alone. they just lean on the religion to hide their poverty. I am sorry, I dont see any problem with that nor can I blame them. let everybody cope with his reality the way he can. Thanks

ميّويه said...

السلام عليكم
جيتي علي الجرح والله
أنا والله بخجل جامد لما ألاقي البنات بالبس دة ..بيشوهوا صورة الحجاب في كل خطوة بيمشوها ..وخصوصاً بتوع البارمودات دول ..يارب اهدي البنات والشباب كلهم في الأيام المفترجة دي..آمين ..جزاكِ الله خيراً

mesh2dra said...

السلام عليكم

ياه يا سمباتيك
بوست في الصميم

لأ
وكمان تلاقي محجبات ببنتاكورات
إزاى
معرفش

أو بإستريتش
الموضة الجديدة

ربنا يهدي ويعافينا

مهندس مصري بيحب مصر said...

بوست ممتاز و أنا موافق على كل كلمة فيه
اللهم إهدي كل بنات المسلمين و عرفهم بدينهم الصحيح يارب العالمين
أما الألعن لما بيلبسوا كده في رمضان كأنهم عايزيين يفطروا الناس عافية
الحمد لله إن أنا شغلي كله مع عمال و مفيش في الموقع بنات أصلاً لا محجبات بكم و لا بنص ولا من غير الحمد لله
لكن لما بأنزل وسط البلد-دمنهور- في نهاية الإسبوع-الخميس باليل-بأشوف فعلاً عجايب ماشية في الشارع
و لا اللي بتنزل محترمة و بعدين بتغير لبسها في المواصلات -حمام القطار و هيه مسافرة الكلية في إسكندرية أو طنطا- أو في بيت واحدة زميلتها-لو كانت كليتها في دمنهور- و مدية أهلها على قفاهم و مقرطساهم
و تلاقي فعلاً محجبات سواء حجاب حشمة أو أونطة و مصاحبيين صبيان و بيلفوا في الشوارع و الكافتريات و على الكورنيش
ربنا يهدي
أول زيارة مني لمدونتك و إن شاء الله ما تكونش الأخيرة

علياء said...

السلام عليكم
بوست رائع وواصف بدقه اللى حاصل .برافو عليكى وصفتى بامتياز وياريت يبقي في بوست جديد ملىء بالنصائح .وشكرا

عاوز اجوزبقه said...

انا شايف ان كلامك كله مظبوط بس فى حاجه مهمه جدا انت نسيها وهيا انك لازم تعرف البنات الاول ايه هو الحجاب الشرعى الا اشبه بما يسمى الخمار هو ده الصح ومن الاخر مفهوش كلام اما حجاب اليومين دول مايبقاش حجاب اى مصتلح تانى لكن مش حجاب خالص

ayar said...

اعتقد ان البنات اللى بتعمل كدا دى بتبقى عاوزة دنيتها واخرتها ترضى ربنا وترضى نفسها والناس بس طبعا بالمناظر دى عمرها ماهاترضى ربنا ولا عمر ربنا هايكرمها ابدا .. ربنا يعافينا

الجعرّ و أبورمّانة said...

وبعدين يعني أمال هنروح الجامعة نعمل إيه يعني لا تعليم ولا بنات..

mostafa rayan said...

اناشايف ان مايسمي بالدعاة الجدد هماالسبب فضلوا يقدموا تنازلات بحجة تحبيب الناس في الدين لحد مابقي عندنااشباه متدينن يرددون مايسمعونه ولايفهمون شيء ممايقال
وعلشان ماحدش يقول اني بظلمهم بصوا كدة قبل مايظهروا ماكناش بنشوف حجاب علي بدي اوجينز ضيق دلوقتي بقي عادي وربنا يستهرها علينا بجد

ionised said...

طاب ما تقنعوا الأباء الأول بتخفيض المهور

Wise said...
This comment has been removed by the author.
Wise said...

السلام عليكم ورحمة الله وبركاته
كلامك جميل ومؤلم لكنه للاسف واقعى
غياب الاهل
وثقافة التلفزيون
وقلة التوعيه الدينيه عوامل كتيرساهمت اننا نوصل للشكل ده
فى بنات ملتزمين الحمد لله
وفى اكتر بعيدين تماما عن للالتزام او الاحتشام حتى فى اللبس
الكارثه انك ممكن تلاقى قله الاحتشام بتم بمباركة الاهل او الزوج او الاخ كشكل من اشكال الرقى الاجتماعى
وعجبى
مقالك حضرتك عجبنى جدا
جزاك الله خيرا على كل ما يحويه