يوميات كلبوز

كلبوز يا سادة يا كرام و ما يحلى الكلام الا بذكر النبي عليه الصلاة و السلام هو شخصية حولينا في كل حتة الشارع و البيت و الجامعة و الشغل ، هو شخصية لذيذة و مرحة و خفيفة الظل انما ثقيلة الوزن،الناس ساعات بتتهمه انه معندوش احساس و حلوف و فشّل بتشديد الشين و كسرها و بياكل زي التور في العليق لا العليق بيخلص و لا التور بيشبع و لكن في الواقع هو شخصية حساسة و محبة للحياة و من ضمن نعم الحياة الأكل و اللي بيحاول يستمتع بيها لاخر طبق في التلاجة



كلبوز شخصية وهمية متجمعة من عدة شخصيات حقيقية ححكيلكم يومياته كما اتصورها و كما كتبتها من اكتر من اربع سنين مع بعض التعديلات البسيطة في اطار (اطار يعني برواز مش عجلة )كوميدي اتمنى يعجبكم



بسم الله نبدأ


يوميات كلبوز

الحلقة الأولى



كل يوم اصحى الصبح على صوت المنبة المزعج ده و اتمنى لو كان رن بعد خمس دقائق بصراحة بتبقى احلى خمس دقائق انامهم كل يوم بس باضطر اصحى علشان اروح الشغل و ابدا رحلة من الكفاح الغير مسلح للبحث عن لقمة العيش لا لا لقمة اية البحث عن صينية المكرونة بشاميل
اصطبحنا و اصطبح الملك لله هيلا هووووب اه دي اصعب لحظة لحظة استجماع كل قوتي للقيام من السرير و المسكينة رجليا بتشيل كل الحمل التقيل ده و توديه الحمام علشان يتروق يا قوي
ايه يا واد يا كلبوز الهاندسم اللي انت فيه ده كله

ده صوت
عقلي الباطن
و اللي عايزكم تتعودوا عليه علشان ده حيصاحبنا في مذكراتي و مش بس عقلي الباطن اللي عايزكم تتعرفوا عليه لا عايزكم كمان تتعرفوا على
صوت الضمير

وهو شخصية رخمة و بتظهر في اوقات ملهاش لازمة علشان تعكنن عليا و السلام بس حاليا هو لسة نايم ربنا يجعل كلامنا خفيف عليه
المهم بعد ما قعدت اقلب في وشي يمين و شمال و اتملى في تقاطيعي البيبي فيس لقيت صوت الضمير صحي و قالي
يلا ياخويا حتقعد تتملكع كده لحد ميعاد الشغل ما يفوتك ...اخلص
طيب متزقش يا ساتر يا رب اتوضيت بسرعة و خرجت البس هدومي و اصلي علشان اروح الشغل
يووووه... مفيش حد ابن حلال يخترع اختراع يلبسني الشراب مش بعرف اوصل لرجلي بسهولة يظهر اني زدت امبارح نص كيلو بعد العشا الخفيف اللي اتعشيته دول كانوا 3 سندوتشات كبدة من وصايا بس و مرضيتش اكل ربع كيلو البسبوسة كله علشان الريجيم و مع ذلك بطخن مش عارف الواحد يعمل اية في نفسه
المهم بعد محاولات و شقلبازات و التواءات عرفت اوصل لرجلي و البس الشراب و قعدت على السرير و لبست البنطلون اللي كل يوم بيكش سواء اتغسل او متغسلش حاجة غريبة و لا زراير القميص.. مش عارف ليه مبيعشليش زراير كل يوم ينتحر زرار او اتنين

و هبدت الحمالات الحمرا الشيك بتاعتي و نزلت اجري على لحم بطني اصلي مبفطرش في البيت علشان عامل ريجيم
وقفت قدام الاسانسير وطلبته و سمعت الست اللي في الدور اللي فوقينا بتقول لعيالها
لو لقيتوا جودزيلا راكب الاسانسير انزلوا منه فورا فاهمين
هههههه للدرجة دي الاطفال الصغيرين مرتبطين بالكرتون تلاقيها بتخوفهم علشان ميلعبوش في زراير الاسانسير و لا حاجة
و هوب الاسانسير وقف قدامي و فتحت الباب لقيت العيال قلتلهم:

صباح الخير يا حلوين اخبار جرندايزر اية هاهاها
راحو العيال طالعين من الاسانسير و خلوني ادخل قلتلهم
تعالوا اركبوا متخفوش جودزيلا حيخاف يركب و انا معاكم
قالولي :لا يا عموا احنا بنحب ننزل على الدرابزين اسرع
المهم و وانا مالي خلينا في موضوعنا

جينا لفيلم كل يوم و هو اخراج العربية من الجراج و ادخالي فيها و طبعا جمعة البواب هو المسؤول عن الليلة دي يطلعلي العربية من الجراج الزنقة ده و يساعدني ادخل جواها هو يزق من الباب الشمال و عطوة بتاع الجرايد يشد من الشباك اليمين لحد ما استقر قدام الدريكسيون و احس بسوست العربية و هي بتعمل صوت سمفوني جميل زيييييييئ مش عارف ليه بحس انها عايزة تقول الله يخرب بيوتكم
و ابدأ بقى مشوار الالف ميل و هو الذهاب الى العمل بهذه العربية المحملة فوق طاقتها و اللي لو طلعلها لسان بدل الدبرياج حتقول كلام يعاقب عليه القانون

الناس بقى خلقها ضيق قوي في الوقت اللي انا الابتسامة مبتفارقش وشي بلاقي كل شوية واحد مطلع ايده و راسه من الشباك و عمال يشوح و يقول:
سوقوا بسرعة شوية انت خايف على الاسفلت
الغريبة انه مش عارف ان السرعة من الشيطان و ان الشكمان اكمنه لازق في الاسفلت فبيحك لما اجري على 60 و كده
ايوة جينا للجزء المبهج في الموضوع وقفت قدام جاد حبيبي بتاع السندوتشات و انزل بقى اشتري لقمة خفيفة افطر بيها
كلبوز: سلام عليكم ازيك يا اسامة
اسامة: اهلا اهلا كلبوز بيه ازي حضرتك احضر طلب كل يوم الخمسة شاورما لحضرتك
كلبوز: لا بلاش يا اسامة اصلي ناوي اعمل ريجيم
اسامة:اؤمر سعاتك
كلبوز: بص هات حاجة خفيفة بيقولوا البيض بيخسس هات سندوتشين بيض و اتنين فول و اتنين طعمية و واحد حاجة ساقعة دايت
اسامة: كده يبقوا ستة سعادتك
كلبوز: اه معلش اصلي مليش نفس النهاردة
اسامة يبرطم بكلام غير مفهوم بس الابتسامة على وشه و دي اهم حاجة
اخدت الطلب و جيت رايح العربية لقيت واحدة ست في منتهى الأدب بتقول لاولادها
وسع يا ولد من قدام عمو

و عماله تلم الاولاد من قدامي ناس ذوق ذوق ذوق
ركبت العربية بقدرة قادر و اتجهت الى مقر عملي المصون و انا باكل السندوتشات و اهم حاجة الحاجة الساقعة الدايت
و اسيبكم بقى علشان اعرف اكل و انتم عارفين

اذا حضرت السندوتشات بطلت اليوميات

و نلتقي في الحلقة القادمة من
يوميات كلبوز
كتبتها لكم
كلبوزة لكن سمباتيك
برجاء عدم النقل الا بذكر المصدر