Monday, April 21, 2008

يوميات كلبوز







كلبوز يا سادة يا كرام و ما يحلى الكلام الا بذكر النبي عليه الصلاة و السلام هو شخصية حولينا في كل حتة الشارع و البيت و الجامعة و الشغل ، هو شخصية لذيذة و مرحة و خفيفة الظل انما ثقيلة الوزن،الناس ساعات بتتهمه انه معندوش احساس و حلوف و فشّل بتشديد الشين و كسرها و بياكل زي التور في العليق لا العليق بيخلص و لا التور بيشبع و لكن في الواقع هو شخصية حساسة و محبة للحياة و من ضمن نعم الحياة الأكل و اللي بيحاول يستمتع بيها لاخر طبق في التلاجة



كلبوز شخصية وهمية متجمعة من عدة شخصيات حقيقية ححكيلكم يومياته كما اتصورها و كما كتبتها من اكتر من اربع سنين مع بعض التعديلات البسيطة في اطار (اطار يعني برواز مش عجلة )كوميدي اتمنى يعجبكم



بسم الله نبدأ


يوميات كلبوز

الحلقة الأولى



كل يوم اصحى الصبح على صوت المنبة المزعج ده و اتمنى لو كان رن بعد خمس دقائق بصراحة بتبقى احلى خمس دقائق انامهم كل يوم بس باضطر اصحى علشان اروح الشغل و ابدا رحلة من الكفاح الغير مسلح للبحث عن لقمة العيش لا لا لقمة اية البحث عن صينية المكرونة بشاميل
اصطبحنا و اصطبح الملك لله هيلا هووووب اه دي اصعب لحظة لحظة استجماع كل قوتي للقيام من السرير و المسكينة رجليا بتشيل كل الحمل التقيل ده و توديه الحمام علشان يتروق يا قوي
ايه يا واد يا كلبوز الهاندسم اللي انت فيه ده كله
ده صوت
عقلي الباطن
و اللي عايزكم تتعودوا عليه علشان ده حيصاحبنا في مذكراتي و مش بس عقلي الباطن اللي عايزكم تتعرفوا عليه لا عايزكم كمان تتعرفوا على
صوت الضمير


وهو شخصية رخمة و بتظهر في اوقات ملهاش لازمة علشان تعكنن عليا و السلام بس حاليا هو لسة نايم ربنا يجعل كلامنا خفيف عليه
المهم بعد ما قعدت اقلب في وشي يمين و شمال و اتملى في تقاطيعي البيبي فيس لقيت صوت الضمير صحي و قالي
يلا ياخويا حتقعد تتملكع كده لحد ميعاد الشغل ما يفوتك ...اخلص
طيب متزقش يا ساتر يا رب اتوضيت بسرعة و خرجت البس هدومي و اصلي علشان اروح الشغل
يووووه... مفيش حد ابن حلال يخترع اختراع يلبسني الشراب مش بعرف اوصل لرجلي بسهولة يظهر اني زدت امبارح نص كيلو بعد العشا الخفيف اللي اتعشيته دول كانوا 3 سندوتشات كبدة من وصايا بس و مرضيتش اكل ربع كيلو البسبوسة كله علشان الريجيم و مع ذلك بطخن مش عارف الواحد يعمل اية في نفسه
المهم بعد محاولات و شقلبازات و التواءات عرفت اوصل لرجلي و البس الشراب و قعدت على السرير و لبست البنطلون اللي كل يوم بيكش سواء اتغسل او متغسلش حاجة غريبة و لا زراير القميص.. مش عارف ليه مبيعشليش زراير كل يوم ينتحر زرار او اتنين


و هبدت الحمالات الحمرا الشيك بتاعتي و نزلت اجري على لحم بطني اصلي مبفطرش في البيت علشان عامل ريجيم
وقفت قدام الاسانسير وطلبته و سمعت الست اللي في الدور اللي فوقينا بتقول لعيالها
لو لقيتوا جودزيلا راكب الاسانسير انزلوا منه فورا فاهمين
هههههه للدرجة دي الاطفال الصغيرين مرتبطين بالكرتون تلاقيها بتخوفهم علشان ميلعبوش في زراير الاسانسير و لا حاجة
و هوب الاسانسير وقف قدامي و فتحت الباب لقيت العيال قلتلهم:

صباح الخير يا حلوين اخبار جرندايزر اية هاهاها
راحو العيال طالعين من الاسانسير و خلوني ادخل قلتلهم
تعالوا اركبوا متخفوش جودزيلا حيخاف يركب و انا معاكم
قالولي :لا يا عموا احنا بنحب ننزل على الدرابزين اسرع
المهم و وانا مالي خلينا في موضوعنا

جينا لفيلم كل يوم و هو اخراج العربية من الجراج و ادخالي فيها و طبعا جمعة البواب هو المسؤول عن الليلة دي يطلعلي العربية من الجراج الزنقة ده و يساعدني ادخل جواها هو يزق من الباب الشمال و عطوة بتاع الجرايد يشد من الشباك اليمين لحد ما استقر قدام الدريكسيون و احس بسوست العربية و هي بتعمل صوت سمفوني جميل زيييييييئ مش عارف ليه بحس انها عايزة تقول الله يخرب بيوتكم
و ابدأ بقى مشوار الالف ميل و هو الذهاب الى العمل بهذه العربية المحملة فوق طاقتها و اللي لو طلعلها لسان بدل الدبرياج حتقول كلام يعاقب عليه القانون

الناس بقى خلقها ضيق قوي في الوقت اللي انا الابتسامة مبتفارقش وشي بلاقي كل شوية واحد مطلع ايده و راسه من الشباك و عمال يشوح و يقول:
سوقوا بسرعة شوية انت خايف على الاسفلت
الغريبة انه مش عارف ان السرعة من الشيطان و ان الشكمان اكمنه لازق في الاسفلت فبيحك لما اجري على 60 و كده
ايوة جينا للجزء المبهج في الموضوع وقفت قدام جاد حبيبي بتاع السندوتشات و انزل بقى اشتري لقمة خفيفة افطر بيها
كلبوز: سلام عليكم ازيك يا اسامة
اسامة: اهلا اهلا كلبوز بيه ازي حضرتك احضر طلب كل يوم الخمسة شاورما لحضرتك
كلبوز: لا بلاش يا اسامة اصلي ناوي اعمل ريجيم
اسامة:اؤمر سعاتك
كلبوز: بص هات حاجة خفيفة بيقولوا البيض بيخسس هات سندوتشين بيض و اتنين فول و اتنين طعمية و واحد حاجة ساقعة دايت
اسامة: كده يبقوا ستة سعادتك
كلبوز: اه معلش اصلي مليش نفس النهاردة
اسامة يبرطم بكلام غير مفهوم بس الابتسامة على وشه و دي اهم حاجة
اخدت الطلب و جيت رايح العربية لقيت واحدة ست في منتهى الأدب بتقول لاولادها
وسع يا ولد من قدام عمو
و عماله تلم الاولاد من قدامي ناس ذوق ذوق ذوق
ركبت العربية بقدرة قادر و اتجهت الى مقر عملي المصون و انا باكل السندوتشات و اهم حاجة الحاجة الساقعة الدايت
و اسيبكم بقى علشان اعرف اكل و انتم عارفين
اذا حضرت السندوتشات بطلت اليوميات
و نلتقي في الحلقة القادمة من
يوميات كلبوز
كتبتها لكم
كلبوزة لكن سمباتيك
برجاء عدم النقل الا بذكر المصدر

30 comments:

Ahmed Mubarak said...

بسم الله ما شاء الله ..اطفال مثقفه

بيعرفوا جودزيلا ..

حوار ظريف اوي
:D:D
تحياتي
:D

محمد عبد الغفار said...

خطوة رائعة والأروع الأستمرار

أعانك الله

إنسان || Human said...

هههههههههههه
إيه ياسمباتيك ...الكلام ده حقيقي فعلاً...موضوع لبس الشراب ...والكلام ده كله
؟....
ايه التفاصيل الجامده دي ...انت كنت معاه ولا ايه؟؟؟
المهم القصه جميله قوي
ومساني الباقي

خمسة فضفضة said...

السلام عليكم ورحمة الله وبركاته

حمد الله علي السلامه يا كلبوزه هو انتِ كل شويه تختفي كده ، لا ماينفعش خالص مالص واكيد بالص

عموما يا ستي اليوميات روعه ومستنيين الباقي


سلام

عصفور المدينة said...

رائعة رائعة رائعة

Tamer Nabil Moussa said...

هههههههه


مية مية بجد

عشرة على عشرة

تحياتى

zahra said...

ههههههههههههههههههههههههههههه
تحفة يا سمباتيك
مستنيين باقى اليوميات بعد إنتهاء السندويتشات

Mafrousa said...

hahahahahahahiiiiihoooooooo
مش قادره امسك نفسى من الضحك .. و برضه صعبان عليا .. انتى عارفه يا كلبوزه ان الناس اللى بيبقى وزنها تقيل حبتين ...بيكونوا اولا طيبين جدا و دمهم خفيف جدا جدا ...و منتظره على احر من الجمر ..تكملة اليوميات

يا مراكبي said...

بس إنتي إزاي عرفتي التفاصيل الدقيقة دي عن الناس التخينة؟ إنتي تعرفي حد منهم؟

Mafrousa said...

سمباتيك....ليكى عندى تاج ......طبعا كرهتينى من قبل ماتعرفينى .....بس اعملكوا ايه ده سلو بلدكم...البلوجريه... وانا لسه جديده فى البلد ديه و اتكعبلت فى مدونتك ....اعمل ايييه؟

MAKSOFA said...

جميله جدا ، وساخره ، بس تعرفي حلوه قوي حكاية لبس الشراب دي، وحكاية الست ساندوتشات ريجيم ، أنا عملت ريجيم من 10 أيام تقريبا، بس عن طريق مركز بيجيب لي الأكل لحد البيت زي بتوع ستار أكاديمي كده بس ولاد الكلب سعرهم غالي ، بس أعمل أيه خلاص زهقت من الريجيم اللي بأعمله، وحكاية أن الأكل يوصلك لحد البيت وتاكلي حاجات بتحبيها بس مطبوخه بطريقه صحيه أمر مريح بجد

tota said...

يا كلبوظتى
اديلى مدة مش بشوف تدوينات امبارح حسيت انى عايزة اشوفكم كلكم واعرف اخباركم
بعرف من نوع التدوينات حالة كل واحد

تدوينتك وضحتلى انك فى مود حلو يا رب دايما

اه كلبوز بيه صورة واقعية هو حد زينا كلنا انسان طبيعى جدا بس احنا اللى بنعامله على غير كده ورغم كده هو احلى كمان مننا كلنا بيتغلب علينا دايما بابتسامته رغم معاناته الكتيرة وزعله الداخلى اللى مش بيقوله لحد

تصريحات كلبوز بيه ممكن تخلى ناس كتير تغير طريقة التعامل وتحاول تكون اكثر سماحة مع كلبوز بيه

بوركت كلماتك والهدف منها
تحياتى

Ma 3lina said...

looooooooooooool

waiting for the 2nd episode

gamda moot we regoo3 kawi :))

قوس قزح said...

طبعا انتى مش محتاجة اقولك اد ايه مدونة جميلة
بس الشخصية دى حكاية بجد
و فعلا فى ناس كده و الاغرب من كده ان فى ناس رفيعة و بتاكل كمية الاكل ده بردو و دول بستغرب عليهم اكتر من التخان لانى بكون عايزة اعرف الاكل بيروح فين :)

فى انتظار باقى اليوميات

تحياتى

جيفارا المصري said...

رائع جدا
انا هاموت من الضحك و الله
ننتظر المزيد

ftafeet said...

هههههههههههههه جااااامد موووووووت
بجد رهييييييب كلبوز ده عسول اوى
حبيته

انتى هاتخلينى كل اما اشوف واحد كده اعدت اضحك وافتكر كلبوز عاجبك كده لما اضرب مره ولا اتحدف بطوبه من حد

بس خليه يسبلى حتت سندوتش انا جعااااانه


نوناااا

R-H-S said...

اول زياره بس مش هتبقي الاخير
عسل كلبوز دا قوي
سلام

بحبك اوى said...

اشكرك على تعليقك الجميل :


بشكرك على مرورك لمدونتى المتواضعة



بس بجد دة كلام بقوله من قلبى



وبداخل نبض قلبى

بحبك اوى said...

اشكرك على تعليقك الجميل :


بشكرك على مرورك لمدونتى المتواضعة




بس بجد دة كلام بقوله من قلبى



وبداخل نبض قلبى



تحياتى ليك



من ملــــــــــــ الرومانسية ــــك

د/اجدع بنوته said...

جودزيلا

هههههههههههههههههههههههه

عسل ياكلبووووووووووز

مصريين بيحبوا بلدهم said...

كلبوزة ..ازيك انا اول مرة اشوف مدونتك بس جميلة ..عارفة انتى بتفكرينى بنفسى بجد ..لان عملت مذكرات زيك كده حتى اسلوبك قريب من اسلوبي فكاهي بس فيه معلومة بسيطة ..ربنا يوفقك يارب ..

وبتمنى ان تزورينى في مدونتنا محطة مصر هى تحت الانشاء لسه اصل جديدة في عالم التدوين ده الخلطبيتة ده هههههههههههههه

مواطن مصرى نايم said...

انتى عارفة
انا كان وزنى وصل حوالى 125 كجم و طولى 177
عملت دايت
وزنى بقى 85 و طولى زى ما هو طبعا
بس بجد مفيش حاجة مستحيله
رغم انى تعبت جدا لكن دلوقتى بقيت موز موز موز
شكلى اتغير بنسبة 100 فى ال100
و فى ناس بتشوفنى مش بتعرفنى
و انا بفتخر بكده
و انا لسه مستمر فى الدايت
بس مش زى الاول
ــــــــــــــــــ
انا حبيت اطول فى التعليق و اكتب الكلام ده بجد عشان كله يعرف ان مفيش مستحيل
و كل ده بإذن الله طبعا
سلامى ليكى

أسما عواد said...

كلبوظة
اسم طيب وطفولي حفظته من أول مرة شكرا لمرورك على مدونتي
ادراجك خفيف الدم جدا وهحرص على قراءة الباقي والآتي
تحياتي

محدود الدخل said...

أيه ده
أنتي تعرفيني منين ؟؟
بهرج تبعا تبعا
بس حقيقي كلبوز ده فيه شبه كبير مني
بس أنا بعرف أوصل لرجليه لسه والحمد لله ومعنديش عربية
وأحتمال كبير السنه الجايه الحاجتين دول يتحققو
ههههههههههههههههه
بجد زي العسل
ومستني اليوميه الجااايه
..

basma saghir said...

:)

حلو الموضوع قوي يا سمباتيك
اكمنه بيلمس الواقع بطريقة عجيييييبة

ااااااه من الكلبظة وسنينها يا اختشي

Dr. Ahmed Wagih said...

عزيزتي سمباتيك، انا رديت على تعليقك في مدونتي بس شفت ان الموضوع هنا ملوش علاقة فمرضيتش احطه. تحياتي

FaceMoon said...

بجد اسلوبك رائع فى الكتابة وحقيقى كمان لانى اعرف ناس فعلا بتعانى من المشكلة دى وفعلا مش بيكون فى ايديهم حاجة وانا بحس بيهم وبتغاظ اوى من الناس اللى بتسخر منهم لان دة يعتبر مرض زية زى اى مرض تانى بس الناس مش فاهمة كدة
حبيت اقولك ان اسلوبك جميل اوى وفعلا ضحكتينى متحرمناش بقى من بقية الحكاوى
تحياتى وحبى

دكتور مستكنيص said...

بيعجبني اوي النوعية دي من الكتابة وبحب اكتبها شكلنا هنبقي صحاب
شيك هاند
تحياتي
امضاء...واحد رفيع اوي

GWAD said...

بعد يوميا ت كلبوز ياريت يوميات كلابيزو فى الجيش وكلابيزوو ورا الشمس
وكلابيزووو فى الواحات
تحياتى

مجرد انسان said...

ههههههههه

جميل اوى حكايات كلبوز


كتابة ممتعة جدا


تحياتى