Tuesday, April 29, 2008

يوميات كلبوز - الحلقة الثانية



و بعد الفطار الخفيف اللي حكيتلكم عنه في الحلقة الأولى وصلت لمقر العمل السعيد_ اه طبعا سعيد علشان شغال فيه واحد كول و طيوب زيي - و بعد ما ركنت العربية و عرفت اطلع منها بتساهيل ربنا ، توجهت مباشرة الى الريسبشن علشان اركب الاسانسير. اية ده هو الطريق من الباركنج للاسانسير طول كده ليه !!!و لا انا دماغي تقلت من الفطار.. اه اصل كان في بطاطساية محمرة هي اللي كبست على قلبي

وصلت للريسيشن لقيت مجموعة موظفين متجمعين على غير العادة قدام باب الاسانسير و عملين يتناقشوا بصوت عالي

الاستاذ شوكت: يعني ميحلاش الصيانة الا يوم السبت و في ساعة وصول الموظفين ؟!!حاجة غريبة
الاستاذ يحيى:يا اخي طيب كانوا عملوها بعد ساعات العمل الرسمية

مدام فوقية: دي حاجة تقرف بجد

انا:مالكم يا جماعة في اية(و على وشي ابتسامة طولها مترين )0

الكل في نفس واحد زي الكورال : الاسانسير متعطل علشان بيعملوا صيانة

عقلي الباطن: يا نهار مش فايت ...صيانة..مع 6 سندوتشات و واحد حاجة ساقعة دايت يبقى كتير قوي
أنا: طيب اية العمل يا اخوانا

الاستاذ فكري : انا حطلع على رجليا دول كلهم 3 أدوار

موظفين كتير رحبوا بالفكرة و حتى اللي مرحبوش اضطروا يطلعوا غصب عنهم


طيب و أنا !!!سابوني لوحدي ليه؟


قعدت افكر في الثلاث ادوار اللي مفروض اطلعهم و بدات احس بالتعب في رجليا و النهجان و العرق اللي بيصب على وشي و القميص اللي اتبل من العرق، اية ده انا لسة مطلعطش امال حاسس بكل ده ليه؟!!0


عقلي الباطن: طيب ما انا اقعد هنا و هم ينزلزا لي الشغل... صوت الضمير: لا ميصحش

عقلي الباطن :طيب ما انا ممكن اروّح و احسبها اجازة عرضة ...صوت الضمير : و لما تتزنق بجد و تحتاج اجازة حتجيب منين يا خفيف

المهم ..وقفت اخد و ادي مع صوت ضميري الغلس ده اللي بيقفلها في وشي لحد ما ظهر لي رجل الأمن بتاع الشركة

قالي: يا استاذ كلبوز حضرتك متنعاش هم اطلع على السلم و انا حجيب لك كرسي تقعد في كل دور شوية
أنا: كرسي اية يا راجل ده انا نشيط جدا انا بس صعبان عليا مدام نبوية اكمنها حامل في السادس يعني هيهيهيهي
و فعلا اخد حارس الامن كرسيين و طلع حط واحد في الدور الاول و التاني في الدور الثاني و نزل قبل ما انا اكون فكرت اطلع خامس سلمه ، مش بقر عليه و الله بس عاجباني اللياقة اللي عنده و بتفكرني بلياقتي قبل ما أفطر الفطار الخفيف بالظبط

وصلت لاول كرسي و انا حموت من النهجان و رحت قاعد و ريحت ،و فضل الموظفين يعدوا عليا و انا قاعد فاتح بقى كالعادة بالابتسامة الطفولية البريئةو عمال اسلم عليهم

انا: اهلا استاذ عطوة ...و عليكم السلام يا مدام نفيسة ... اتفضــــــــــل يا استاذ مرعي

كويس انا شايف على وشهم ابتسامة يظهر انهم قرروا يقلدوني و يبقوا بشوشين

و هكذا فضلت اطلع دور و اريح شوية لحد ما حققت الحلم و وصلت للهدف اللي هو الدور الثالث
مكنش تاعبني السلم قد ما انا كنت تعبان من التفكير.. حنزل ازاي كل ده تاني!!!0

و لقيت الساعة بقت 10 يا نهار ابيض ده انا يظهر بالغت شوية في الحبة اللي كنت بقعد اريح فيهم في كل دور

و بسرعة و اتقان جمعت الورق اللي مفروض اعمله و بسرعة بسرعة دخلت كل البيانات على الكمبيوتر و ظبط معظم الشغل المطلوب قدامي

و هوووب سمعت صوت لذيذ بحبه و هو صوت صوصوة عصافير بطني الامورة بس انا جعت بدري ليه كده النهاردة؟ يمكن من المجهود الجامد اللي عملته في طلوع السلم

ندهت حمادة موظف البوفيه و قلتله : بص بقى يا ابو حميد انت تشوفلي حاجة خفيفة كده اقزقز فيها لحد ميعاد الغدا مع كباية شاي سكر تقيل ...هارش؟

حمادة: هارش..تحت امرك يا كلبوز بيه

و شوية و جه حمادة بطبق متغطي رقص له قلبي اول ما شافه جاي يتمخطر من بعيد و كان الطبق هو عروستي و هاين عليا اقوم اخده بالحضن

و اول ما شلت الغطا لقيت مجموعة منتقاه من الكحك و البيتيفور و المنين و الغريبة كويس قوي شوفتوا بقى فايدة الفرن اللي فتح اول الشارع بيعمل حاجات منقِذة زي دي كتير

و مع كباية الشاي عزفت احلى سمفونية ممكن تسمعوها من امتزاج البيتيفور مع الكحك في خضم الشاي اللذيذ
و طبعا انتوا اكيد حفظتوا ان

اذا حضرت المعجنات بطلت اليوميات

و نلتقي في الحلقة القادمة من

يوميات كلبوز

كتبتها لكم

33 comments:

FaceMoon said...

رائعة اليوميات دى
وانا حتابعها كلها ان شاء الله
استمرى لان بجد اسلوبك اكتر من رائع
صعبان عليا كبوظ والله انا حاسة بية جدا
تحياتى ليكى

Tamer Nabil Moussa said...

جوعنا كلبوز

ينفع بقى انزل فى الوقت المتأخر دة اجيب اكل ههههههه

فى انتظار الحلقة القادمة من كلبوز

تحياتى

Rivendell** said...

جوعتيني جدا جدا جداااااا

المـــفـــــــقــــــــوعـــــة مــرارتـهــا said...

هو كل شوية يعمل فاصل الأكل ده
جميلة اليوميات ياقمر
منتظرة المزيد

خمسة فضفضة said...

السلام عليكم ورحمة الله وبركاته

حرااااااام عليكطي يا سمباتيك كده تطلعي الواد كلبوز 3 ادوار بحالهم انت مستغنيه عنه ولا ايه ، المفروض كان اجر ونش ويطلعه ولا جاب العربيه بتاعصيانة عواميد النور تشيله لحد شباك مكتبه
:-)
يلا بقي الحقينا بالجزء التالت

سلام

saso said...

:)
حلوة يا جميلة اليوميات والفكرة

وسط كل ده مفكرش ايه اللي تاعبه
ومخلية مختلف عن الباقيين

Mafrousa said...

جميله جداااااو مشوقه جداااااااز دمها خفيف جدااااااا اكملى

sebofy7alo said...

أول تعليق
الأسم الsampateek ماشي أوي مع أستخدامك للكلمات الرقيقة جدا والوصف المدهش .
أكثر من رائع

Ahmed Mubarak said...

شوف الرشاقة .. شوف توازن الطعام ..
مش تقولي ابو تريكه بلا خيبه

:D

قوس قزح said...

ضحكت اوى على سمعت صوت لذيذ بحبه و هو صوت صوصوة عصافير بطني الامورة

ده واحد بيدلع بطنه و بيحبها كانها بنته الصغيرة

طيب يجيب كحكاية يعزم على الناس اللى قاعدة دى


فى انتظار باقى اليوميات
تحياتى

نوري said...

لما بيبقي عندنا كلبوز
في حياتنا اليوميه
بيبقي من اطيب خلق ربنا
واخفهم دم
واحلاهم شخصيه
وده في غالب الاحيان

فكرتك حلوه قوي
ويومياتك جميله جدا
وانشا الله هتابعها ديما
عشان انا بدات احب كلبوز باشا قوي
اسمحيلي بقي اصل كتاكيت بطني زقزقت
هروح اضربلي بيتزايا كده في السريع
سلام بقي يا قمرايه

و(بست وشز فور يو)0

شيماء الجيزى said...

بجد يوميات جميلة وخفيفه
بس يا سامبتيك
هو كل التخان بتوع اكل ده
وربنا احنا غلابه
عااااااااااا

بس تحفه موت

تحياتى لكى

حاول تفتكرنى said...

والله أسلوب كلبوز أفندي فى تدوينه ليومع خلانا نراج كل الايام

وكمان نستني بكرة



تحياتي

غضبان said...

هايل جدا

نعكشة said...

انا جوعت مينفعش اندة احمد بتاع البوفية يجيبلي من اللي جايو دة :D

خير خير

منتظرين المزيد

CrY2DaY said...

خفة دم مش موجودة غير فى كلبوز

فى انتظار باقة الحلقات

تحياتى

محدود الدخل said...

حرام عليكي بجد
طلعتي كلبوز الحبوب على السلم 3أدوار

ههههههههههههه
مستنيي اليومية الجديدة

خيرالدين said...

يا سيدى على المبادىء

Ahmed Kamal said...

أنا حاقوم أشوف حاجة أكلها ..

نبض اسكندرية said...

سمباتيك

من زمان يا قمر مدخلتش عنك

واسفة على فترة الغيبة

ودائما متألقة يا جميلة

تحياتى

محض روح said...

كميله اوي اليوميات ديه
:)

اهو ده عيبه said...

وربنا انا جعت من الكلام ده
يا حرام 3 ادوار ومش قادر يطلعهم المفروض يطالب باسانسير خصوصى يشيل الاوزان دى

فى انتظار الحلقة الثالثه

عين فى الجنة said...

اظرف حاجة ، الصراع بين عصافير البطن واللى ما يسماش الضمير
كوميديا لذيذة

يا مراكبي said...

طيب وليه الشاي ما كانش دايت؟

Eric Matt said...


جيت أسلم بس

تحياتي

كيكى عوووووو said...

ههههههههههههههه..انا راى يجيب اسكوتر اسهل واضمن...على الصور واديها......ياريت كلبوز يعدى عندى فى المدونة متخفش..عندى اكل قد كدة..بس انت تعال

Unknown said...

يا ستى ابقى خفى من البطاطس المحرمة بعد كده

هههههههههههه

جميلة و ظريفة يومياتك دى

حسن ارابيسك said...

سمباتييييك
وحشاني واللهي
بالطبع طالعت المسلسل من بدايته حتى هذة اللحظة
بس انتي في البوست ده تعبتيني بجد حسيت اني أنا اللي طالع السلم وبالنهجان وبالقاعدة البايخة على كلم بسطة قدام اللي طالعين وكأني بواب مفروض عليه يرسم ابتسامة خمس نجوم بلهاء بس كلبوز هنا بيداري كسوفه
لكن الحقيقة
مواقف كلبوز ما هي إلا تداعيات لأنظمة بالية تعاقبت علينا لم تفعل شيئاً لهذا البلد الجميل وناسه الطيبين
مافعلته هو التمادي في حفر صورة قبيحة له في تمدينه الأعرج لسياسات بالية وخدمات مبتورة وثقافات لاتعرف غير الآف والباء في كل أمور حياتنا حتى في أقرب الأشياء الينا وهي صحتنا
والحقيقة اهل هذا البلد الجميل ناسه راحت صحتهم في حاجات تافهة كتير كتير
الله يكون في عونه كلبوز ويسامح النظام والإجهزة المعنية المتسببة في مشاكله اليومية

ارابيسك

كلام على بلاطة said...

لرشاقة رشاقة الفكر مش الجسم
ورشاقة العقل
جميلل

دنيتى الجميله said...

بجد يوميات جميله يا سمباتيك
وكلبوز اجمل حاجه فيه انه مبتسم على طول ومتفائل ودمه خفيف
عارفه وانا بقرأ البوست بتذكر اغلب الناس اللى اعرفهم فى حجم كلبوز
سبحان الله ليهم نفس خفه الدم

Miss. Sosa said...

اولا ربنا يستر علي العامل اللي حطت الكراسي شكله خد عين وف الحلقة الجاية دوره هينتهي
بجد فكرة جميلة وتخلي الواحد يتابع ومفيهاش كلكعة
استمري جو هيد يعني متابعينك يا قمر

.:.-=- ELGaZaLy-=-.:. said...

هههههههههههههههه


جميلة اوى يا كلبوزة يوميات كلبوز دى...


انا مجوعتش يمكن لانى لسة متغدى ...

بقالى كتير مجتش هنا...

تحياتى

حركات said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up