Saturday, May 24, 2008

يوميات كلبوز- الحلقة الثالثة

الصيف كبس يا واد يا كلبوز و انت محتاجلك كام قميص شيك على بنطلون اشيك و شوية تيشرتات على الموضة علشان تزيد عسالة على عسالتك
ده صوت عقلي الباطن الحبيب و انا طبعا بسمع كلامه فقررت انزل يوم الجمعة العصر الف على المحلات و اروق نفسي
قام صوت ضميري قال: هدوم اية اللي حتشتريها يا منيل! ما الدولاب عندك مليان هدوم ضيقة لسه متلبستش ،بدل ما تشتري جديد.. اعمل ريجيم و خس و البس اللي متْكوِّم عندك ده


يوووه ما انا عارف ان الدولاب مليان هدوم ضيقة و غلبت اعمل ريجيم و مش عارف اخس انت دايما كابسني كده و موقف المية في زوري طيب اعمل اية يعني اروح لبتاع الشاورمة اقوله ينسل من لحمي نسايل علشان تنبسط !! و لا انزل تحت بلدوزر اتسفلت علشان اتفرد!!؟0
و طنشت صوت ضميري الرخم و نزلت اعمل شوبنج و قعدت الف على المحلات و كل ما ادخل محل اقولهم: عندكم مقاسات كبيرة ؟
يقولولي: اه طبعا في يا فندم تلاتة اكس لارج
ادخل البروفة اقيس الاقيها ضيقة قوي و لا كأنها ميديم
اطلع اسأل: مفيش اكبر من كده؟؟
يقولي البياع :اكبر من كده مفييييش يا فندم
يعني اعمل اية يا ربي!! اشتري قميصين و افتحهم على بعض؟! و لا اجيب تلات بنطلونات اشبكهم في بعض و ابقى بست رجلين زي العنكبوت!!0

و طلعت من المحل متضايق لاقيت محل ايس كريم بيلعلط قدامي.. قلت مكافأة ليك يا ابو الكلابيز لازم تأخد واحد ايس كريم كومبو بالمكسرات و الفواكة و الكريم شانتيه اهو تصبيرة لحد الغدا



واحد صاحبي عسول كلبوز زيي كان وصفلي محل جنب عبده كفته عنده مقاسات كبيرة الغريبة ان صاحبي ده بيوصف اي مكان بأمارة محلات الاكل اللي جنبه ...كلبوز بقى حنعمل اية!! المهم ..رحتله لقيت في المحل بنطلون كبييير قوي دخلت اشتريت واحد ..طيب دي مشكلة اتحلت فاضل القميص
رحت اشتريت 4 متر قماش مقلم و فصلت قميص ظريف لطيف عند الترزي و لو ان الترزي سألني سؤال خبيث مستريحتلوش


قالي:اعمل التقليم بالطول و لا بالعرض يا باشا؟!0

و عنيه لمعت كده بضحكة مستخفية

قولتله:بالطول طبعا يا ظريف

طيب بالنسبة بقى للتيشرتات ..ممم..دي ملهاش صرفة غير الجاهز

لفيت لما رجليا الحلوة ورمت و لاقيت محل مكتوب عليه يوجد لدينا تيشرتات

اليفـــــانت سايــــــز

شوفوا السخافة

يعني اية اليفانت سايز هي الافيال بيلبسوا هدوم ؟؟!! ليه يجرحوا مشاعر الناس المكلبزة؟!!انا طبعا مش منهم بس بتعاطف معاهم ، و لذلك قاطعت المحل ده ..زي ما انا مقاطع المنتجات الدنيماركية والهولندية و الامريكانية و الانجليزية و لما نشوف مين تاني حيتطاول علينا علشان نقاطعه

سو ..سو ..سو

ايوة عرفت ده انا جعت ..اكيد بعد المجهود الشاق ده و بما اني في نصف البلد يبقى لازم اكل كباب و كفته و ربع ممبار و فرخة مشوية بالطحينة و الذي منه من عند ابو شقرة اه نسيت لازم كمان سلطة علشان الرجيم (وش بيغمز)0

و انتم عارفين يا حلوين

اذا حضرت المشويات بطلت اليوميات

و اتفضلوا معانا ..شموا بس
----
و نلتقي في الحلقة القادمة من
يوميات كلبوز
كتبتها لكم
كلبوزة لكن سمباتيك

28 comments:

أميمة كامل said...

ناس كتيرة قالت لى ان الناس القلابيظ بيكون دمهم شربات وكلامهم ظريف
لم اكن مؤمنة بهذا الكلام اوي
لكن بعد زيارة هذه المدونة
آمنت وصدقت فعلا بخفة دمهم
مدونة لطيفة

Tamer Nabil said...

والله كلبوز طلع جدع انة قاطع المحل اللى كاتب يافتة مش حلوة دى

وبعدين يعمل اية يعنى اذا كان مش عارف يخص لازم يشترى هدوم جديدة

ربنا يكرمك اختى العزيزة

تحياتى

Diyaa' said...

هاهاها
حلوة أوي قميصين نفتحهم علي بعض :))
وبعدين ريجيم إيه
هو فضل فيها رجيم
يلا بالهنا

المـــفـــــــقــــــــوعـــــة مــرارتـهــا said...

هي بطنه صوصوت بس دي باين عليها هوهوت

خمسة فضفضة said...

السلام عليكم ورحمة الله وبركاته

بقي كده تجري ريقنا وبعدين كلبوز يقلنا تشموا بس

لا ياستي انا هاجي وهاكل كمان اه ماليش دعوه
:-)
سلام

Ahmed Mubarak said...

يخرب عقلك دا انتي مشكله
مشكله لكن كلامك سمباتيك فعلا

:D:D
تحياتي

monaliza said...

انتى عسولة اوى

قوس قزح said...

لا لا
مينفعش الكلام ده
انت بتغيبى كتير اوى
و لما ترجعى تحكى حبة نونو ؟؟
كنتى احكى لحد ما اليوم خلص طيب

على فكرة تجنن صورة الفيل :))

متغبيش بقى
تحياتى

دكتور بهــدوء said...

اول مره ادخل
بس دمك خفيف موووووت
اااااااه جوعتيني

CrY2DaY said...

انا جعان من غير حاجة وانتى كدة كملتى علية

نورتى المدونة بعد فترة غيااااب

فى انتظار باقى الحلقات

تقبلى تحياتى

خالتى بمبة said...

ربنا يخليكى انت صوت العقل الباطن لكل الكلابيز ههههه وخصوصا الايلفانت سايز جديدة وجميع المتمتعين بجمال جذع شجرة الجميز اللى انا واحدة منهم

حسن محمد توفيق said...

والله يا شيخ حاسس انى كلبزت من كتر الكلام المكلبز بتاع كلبوز عن يوميات كلبوز واكيد سوف اتابع باقى اليوميات اهى حاجه تفرج عن النفس ما تعانيه من متاعب الحياة..شكرا لك واتمنى التواصل ولك كل التحية والتقدير والسلام

د/أبا يحيى وادم said...

السلام عليكم ورحمه الله وبركاته
اضحك الله سنك وجزيتم خيرا
مدونه جميله جدا
كانت تلك اول زياره ولن تكون الاخيره أن شاء الله
والسلام عليكم ورحممه الله وبركاته
اخوك
أحمد جمال

شفقة و احسان said...

كلبوز كلبوز بس نعيش ...بس بجد بجد لازم تعمل ريجيم....مشكور على خفة دمك

.:.-=- ELGaZaLy-=-.:. said...

ههههههههههههههههههههه

هايل موضوع المكافئة دة ...


كافئ نفسة لانة ملقاش مقاسة بجد\ جامد موت الافية دة وعالى كمان...

تحياتى ..

أم أحمد المصرية said...

اول مرة ازور المدونة اللذيذة دي بصي يا بنتي حقول لك حكمة السمباتيك سمباتيك الروح و الكلبوز كلبوز الدم
و عليه انت مش بس سمباتيك انت سمباتيك جدا :)
فوتي لي حته كباب بقي
تحياتي

كلام على بلاطة said...

هل فيه علاقة بين الكلبزة والقلوزة
وخفة الدم
هاعمل بحث وابلغك بالنتيجة
تحيلتى

FaceMoon said...

مش بينوبنى من اليوميات دى غير انى بفطس من الضحك وبجوع فى نفس الوقت معرفش ازاى

دنيتى الجميله said...

ازيك يا سمباتيك
مش ممكن خفه دمك دى
بس ايه حكايه اذا حضرت المعجنات بطلت اليوميات
واذا حضرت المشويات بطلت اليوميات
لالالالالالا
انتى لازم تعملى اضراب عن الطعام لحد ما تكمللنا الحكايه
يوميات كلبوز جميله وبزعل لما الاقى اليوميات خلصت
وبجد بشكرك على تنويرى فى دنيتى الجميله

Sherif said...

أول مرة أدخل المدونة اللذيذة دى

عسل فى خفة دمك

هاجى كتير طبعا

smraa alnil said...

بعيدا عن الموضوع

ياريت تشاركوني في موضوع علي مدونتي
وتنشره معانا
تحياتي

bernard n. shull said...

i did a little research after you told me about your "thing", and if you want a way to make more money using your your blog you can enter this site: link. bye.

Sherif said...

على فكرة

ادعوك لزيارة مدونتى

أرجوك .. لاتعتذرى بلطف

Sampateek said...

شكرا لكل من يتابع اليوميات
و اتمنى ان اكون عند حسن ظنكم جميعا
تحياتي
سمباتيك

will said...

6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲

言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO

情趣用品,情色,成人,A片,自拍

情趣用品,色情,成人影片,色情影片,免費A片

情趣用品,成人網站,A片下載,日本AV,做愛

情趣用品,美女交友,A片,辣妹視訊,情色視訊

情趣用品,色情聊天室,聊天室,AV,成人電影

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام