Wednesday, June 25, 2008

يوميات كلبوز- الحلقة الخامسة والاخيرة




اتعرفت على بنت كلبوزة من الوزن التقيل معدية الميت كيلو بمترين كده ، و كان مكان التعارف احسن مكان في الكرة الارضية و هو مطعم اكلات شامية مشهور في البلد و سبب التعارف اننا طلبنا نفس الطلب اللي هو
شركسية بالديك الرومي
و كان اخر طبق شركسية في المحل و كان لازم حد مننا يتنازل للتاني عن الطلب و من هنا جت المعرفة .. احلى معرفة
طلبنا يومها حاجات ملهاش علاقة ببعض خالص و قعدنا نضحك و لا كأننا ضحكنا قبل كده و اكلنا اكل عمرنا ما اكلناه و اتكلمنا في امور كتير اهمها الاكل و طلعت بتحب نفس الاكلات اللي باحبها
أمل...اسمها أمل.. و من يوم ما اتعرفت عليها و بقى عندي أمل في الحياة الاسرية السعيدة القائمة على الحب و الاكل و الحلويات و الذي منه
و فكرت اعرفها على والدتي، و اتعرف على اهلها، و تبقى مقابلة تعارف تمهيدا للخطوبة و اتفقنا نتقابل في محل الايس كريم اللي بنحبه
و اول ما اتقبلت الاسرتين نسينا كل حاجة و طلبنا كاس عملاق لا هو في الواقع سلطنية أيس كريم بالمكسرات و الشيكولاتة و الفروت سلاط و البسكوت و حاجات كتير حلوة ملزوزة كده على الوش
و سبنا العيلتين يتعرفوا بطريقتهم و قعدنا احنا نمزمز في القنبلة بتاعة الايس كريم
و بعد ما خلصنا ... و من كتر حلاوة الايس كريم ، قررت اطلب ايدها من والدها على سبيل الخطوبة يعني مش الاكل و فوجئت بيه بيقولي:
والد أمل: لا و الف لا ...انا مجنون!! اجوز بنتي لواحد مدمن اكل زيك؟! ده انا عايزها تخس، و هي لو اتجوزتك مش حتعرفوا تخرجوا من باب الشقة بعد شهر العسل من كتر الاكل
بص يا كلبوز يا ابني لازم تخس ..و تبقى رشيق علشان تعرف تعيش حياتك و شبابك و تلاقي بنت الحلال،
اما أمل فانا حسفرها لعمها في لندن تدخل مصحة تخسيس، و مش حترجع الا لما تخس بتاع 40 كيلو كده


اسودت الدنيا في عيني ...بقى بعد ما الاقي انتمتي اللي بتحب نفس الاكلات اللي بحبها ابوها يرفض يجوزهالي علشان قال اية
كلبوز!!!0
انا كلبوز؟؟؟؟؟؟؟؟؟؟؟؟؟؟؟ ابدا انا بس الاكل بيبان عليا، ياما في ناس زي القطط بتاكل و تنكر و لا بيبان عليها ، اصل انا مامتي كانت دايما تدعيلي و انا صغير و تقولي يا رب يا حبيبي مطرح ما يسري يمري.. و اهو مرى

و حاولت اتصل بأمل كذا مرة بعد كده ، لكن كنت بلاقي موبيلها مقفول، يظهر سافرت بجد ، يا خسارة كان نفسي اعزمها عند (عبده تلوث) على اكلة حواوشي و شرمبان قبل ما تسافر
و رحت اتعشي في محل السندوتشات بتاعي و طلعت همي في الاكل و زودتها في الطلبات حبتين و فوجئت بالجرسون بيقولي
الجرسون: يا كلبوز بيه مش كويس علشان صحتك الاكل الدسم ده بالليل كده
كلبوز: اعمل اية بس ...انا اصلي متضايق تصور بيقولوا عليا كلبوز ..انا كلبوز ؟؟؟ انا؟؟؟
الجرسون: بصراحة ..صلاة النبي عليك يا كلبوز بيه انت تملى عين الشمس
كلبوز: يا راجل بجد؟؟
الجرسون: الشمس و القمر كمان يا بيه
يااه معقول الناس كلها شايفاني كلبوز!!! وانا لا
و يومها قررت اني اخس بجد بقى مش هزار، و العب تمرينات و امشي و ابطل رمرمة و حلويات و اوصل لوزن مثالي، علشان امل لما ترجع من لندن تلاقيني بقيت استاهلها
و بعد شهر من المعاناه و الجدية و الصبر فرحت قوي لما صبحت على البواب و معرفنيش رجعت
قلتله :انا كلبوز انت مش عارفني؟
البواب : معقول؟؟؟ انت خسيت قوي يا بيه.. كلبوز اية بقى
و كملت و حفضل مكمل.. لحد ما ترجع أمل حياتي و نتجوز، يمكن نرجع نرمرم تاني سوا و ارجع اكلبز تاني و اكتب لكم يومياتي
انما دلوقتي انتم عارفين



اذا حضرت السمباتيكات بطلت اليوميات
و انا بقيت سمباتيك
و بكدة انتهت يوميات كلبوز
كتبتها لكم
كلبوزة لكن سمباتيك

34 comments:

بثينــــــة said...

وحشتيني بجد
ياريت ترجعي تاني
وتنوري بلوجر

appy said...

انتي عارفه انك خلتيني فعلا اتعاطف مع الكلابيز دول واخد بالى انهم مشاعيرهم حساسه قوي
نورتى بلوج سيوت تانى

محمد حلمي مخلوف said...

ربنا يكرمك يا اخ كلبوز وتخس كده وتتجوز امل
بعدين لا ده عاجبه حاله ولا ده عاجبه حاله

واحدة مفروسة said...

ايه هوه بجد خلااااص
لا والله
خليكي اكتبى اي حاجه تانيه
انا كنت بحب يومياته اوي
لا مش تمشي

blue-wave said...

دمك زى العسل بجد

Do not Press F1 said...

السلام عليكم
اينعم انا مش قريت غير الحلقة الرابعة والخامسة اللى كانت لأسف الاخيرة بس جيت اقولك انها كانت جميلة بجد حرررررام انها تخلص عاوزين امل تيجى وكلبوز يتجوز امل بجد شوفى حل واعملى حلقات تانيه
انا اتعلقت بكلبوز دا


عن اذنك هروح اكمل الحلقة التانية والتالتة والاولى

بلييييييييييييز كملى الاجزاء بليييز

سلامووووووووز

خمسة فضفضة said...

السلام عليكم ورحمة الله وبركاته

خياااااااااااااانه

بقي كده كلبوز يخس ويسيبلنا احنا الكلبزه

لا اخص عليه اخص
:)))))))))))))))


منوره يا سمباتيك عاوزين بقي واضيع كتيره جميله زي زمان


سلام

ketchup said...

يعني مفيش يوميات كلابيظ بعد كدا
؟؟

لذيذة بجد

بس في ناس لو خسوو و بطللوا كلبظة معتقدش هيبقا دمهم خفيف

يارب كلبوظ يفضل كلبوز

واحد مش فاهم حاجة said...

اية يا جماعة

كل قصة اقراها الاقى النهاية

كدة

نظام قفل الباب

ومتجيش هنا تانى

هاعمل نفسى مخدتش بالى من كلمة الاخيرة

وهاستنى باقى اليوميات

تحياتى

انا مش سلبى said...

دمك خفيف ولذيذ

دمتى متميزه

Hu-man said...

ههههههههه...شركسيه بالديك الرومي ..فعلاً طبق جدير بإن هو يكون بدايه علاقه مابين إتنين كلابيظ ...أتمنى كلبوز يفضل سمبتيك على طول
......
فعلاً الحب يصنع المعجزات

ادم المصري said...

كلبوزة مش كلبوزة
المهم اننا بنحبك
.
.
بنحب كلبوزة .. خفيفة الدم واللي روحها حلوة
مش مهم شكلها ايه .
.
.
بجد وحشاني

المـــفـــــــقــــــــوعـــــة مــرارتـهــا said...

ولو انك هاتوحشنا
بس ميروك الرجيم عقبال عندنا

sara rabie said...

من الواضح انى اكتشفت البلوج ده م تاخر شوووويه

وبما انى واحده من كلابيز القاهره المحروسه
اقدر اقول :)) كملى ..البوست لطيف

وكل تحياتى ليكى



مساءك جنة

حلم الحرية said...

لالالالالالالا

يعني كلبوظ يخس ويفرح

واحنا نتعاقب باننا نتحرم من يوميات كلبوظ
هتوحشنا يومياته
كانت يوميات حلوة جدااااا
عايزين ابداعات زيها كتييير


دمتي مبدعة

ابتسم من فضلك said...

متفتكرش ان الرفيعين كمان راضيين بحالهم هم كمان زعلانين
وانا واحدة منهم

فرنسا والرايق said...

انا مش فاهمه يعني إيه خلاص المدونه منغلقه الي حين اشعار آخر
و لا إلى ان نتخن من تاني
ماهي ممكن نتكلم مثلا فى الاكل الصحي
او نتكلم فى اي حاجه
لأ ده حتي ميصحش يوم ما آجي اجيب ضرفها

نوري said...

ياحياتي
كلبوز ده بجد راجل سكر
ورافو عليه القرار ده
بس الخوف بقي انه يخس اكتر منها وبعدين يعايرها
وده مش كويس
بس ربنا يستر عليهم هما الاتنين بقي

بست وشز فور يو

قهوة بالفانيليا - شيماء علي said...

مبروك الريجيم يا كلبوز :)
______________

بعيدا عن كلبوز ..
هستناكي تكتبي تاني ..
عشان اتابع من الاول :)
بالتوفيق..
و بانتظار ما سيلي بعد

يا مراكبي said...

أنا مش مصدق اليوميات دي

سيما أونطة .. عايزين فلوسنا

عاليا حليم said...

انا كلبوز؟؟؟؟؟؟؟؟؟؟؟؟؟؟؟ ابدا انا بس الاكل بيبان عليا، ياما في ناس زي القطط بتاكل و تنكر و لا بيبان عليها

هههههههههه

ضحكتنى اوى كده
بترسمى صور كويسة تقدر توصل الضحكة

تحياتى

ست البيت said...

كلبوظة أبوس ايديكي طمنيني على تمر حنة أنا قلقانة قوي عليها
بقالها يجي سنة لا حس ولا خبر ....لو حد يعرف عنها حاجة يطمنا عليها
حفصص اليوميات واتعكرت في المدونة شوية وارجع

FaceMoon said...

اية النهاية السعيدة دى
ربنا يكرم كل الكلابيظ ويتجوزوا
ونخس كلنا بقى
امين
تحياتى

sakayar said...

بقالي كتير مجيتش
ياااااه بقالي كتير كتيييير يعني
بس تابعت الحلقات الكلبوزية
على فكرة بخلاف طريقتك القصصية الشيقة اللي قلتلك عليها زمان
بجد بتجيبي صور تحفة
بس حاسس انك بتغيبي فترة طويلة اوووي
يا رب تكوني بخير
سلاااام

وينكى said...

هههههههههههههههه
عسوله مووووت
عاوزه اتخيل شكلهم لما يشوفوا بعض من تانى وهما خاسين
يضحكوا على باباها ويتجوزوا
ويرجعوا يكلبظوا تاااااااااانى
عسوله

لماضة said...

النبي ياختي ملاقيش واحد زي كلبوز ده يكلبزني ويعديني
ايه حكاية سمباتيك هي طهقانه دي
انتي كنتي بتبعتينا ولا انتوا الاتنين انضميتوا لبعض ولا ايه العبارة يعني
على العموم الاتنين بموت فيهم

خالتى بمبة said...

انا رجعتلك يا كلبوز اوعى تتعب نفسك في الريجيم وتخس لانى رجعتلك اتخن من الاول وياريت نتجوز انا موافقة بس انت توافق والا هتجوز فوزى
امل يا احلى كلبوز

bastokka طهقانة said...

سعيدة جدا بضم المدونتين بتوعي
و بالتعليقات اللذيذة للزوار المحترمين و اتمنى دايما ادخل البسمة على وجوهكم سواء هنا او في مدونتي الثانية طهقانة


تحياتي
و
اوروفوار

كلبوزة لكن سمباتيك said...

خالص شكري و امتناني للجميع

بستوكة طهقانة= سمباتيك

emy said...

بجد فرحت جدا لما قريت البوست دة كتير من الناس مش بتحس بالمعناة الفظيعة الى بيعنيها اصحاب الوزن الذائد و بيعتقدتو ان ذيادة الوزن مرض و يساوية مع المصابين بمرض عضال بس بجد لازم نحس بالناس دى شوية ونقدر انهم بنأدمين بيحسو و بيتألمو الناس دى مش محتاجة تعاطف او شفقة من حد محتاجة لحد يعملهم بطبيعية شديدة و ميحسسهمش انهم مختلفين او مصابين بمرض
شكرا جدا على البوست ارائع

دعاء زيادة said...

.

بجد أنت تحفه و أسلوبك يجنن
يا رب يتحقق لك كل اللي انت عاوزه


و متتأخرش يا سمباتيك

.

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام