Wednesday, December 30, 2009

وزارة ميكي ماوس

قديما .. كنت احب مجلة ميكي و انتظر يوم الخميس بشغف حتى ارحل مع مجلتي الى عالم ميكي ماوس الجميل الخيالي.

فاشارك ميكي- ذلك الفأر الذكي- مغامراته لإعادة الحق إلى أصحابه ،و حل كل الألغاز المعلقة.

و طالما تمنيت أن أمتلك - في يوم ما - هذا البيت المسقف بالقرميد الأحمر ،و هذه السيارة الصغيرة المكشوفة، و التي أحلم أن أجوب بها شوارع مدينة البط ؛لالقي التحية على باقي أبطال مجلتي.

فاصطحب بندق؛ ذلك الصديق المخلص الساذج و أسافر معه

إلى الريف بيت الجدة بطة ،لأغسل عيوني بالخضرة الممتدة واستمتع برائحة فطيرة التفاح الشهيرة و أشاهد لوز و أراقب مدى كسله


ثم امر بها على ميمي و كوكا؛ لأشارك في حفلات الشاي الرائعة و أتابع أحدث صيحات القبعات المضحكة.



و اذهب الى عبقرينو؛ ليخترع لي آلة تمنع الحروب و تغسل قلوب البشر من الكره و العناد.

و اذا ما انكسر مني أي شئ ؛ ذهبت الى أبو طويلة ليصلحه في ورشته العجيبة.

و لطالما كانت تضحكني عصبية بطوط ، صاحب الشخصية الفضولية الغيورة،و كنت اسعد بتفوق أبناء اخيه عليه في تفكيرهم و تدبيرهم في أغلب الاوقات

و منافسته مع محظوظ على حب زيزي ،تلك البطة المعتدة بنفسها المهتمة بأناقتها و التي تشارك في حفلات خيرية طوال الوقت

لم احب عم ذهب ، و كنت افرح عندما ينقلب عليه بخله و بالرغم من عدم حبي له ؛ فلم احب الساحرة سونيا ولا عصابة القناع الأسود و خططهم الغبيه المستمرة لسرقة قرش الحظ و التي دائما ما تبوء بالفشل

و لم لا و((الخير دائما ينتصر)) هذا المبدأ الذي ترسخ في وجداني عندما كنت صغيرة و اثبتت لي الأيام مدى سذاجته و سذاجتي


و السؤال الآن:

هل نستطيع اليوم أن نجد وزيراً للداخلية مثل ميكي؟ يرجع الحقوق إلى أصحابها و يرسخ الأمن دون أن يهين البسطاء و يظلم الأبرياء؟

أو وزيرة للتموين مثل الجدة بطة؟ تستطيع أن تكتفي ذاتياً بإمكانياتها و تطعم الشعب من غرس يده؟

أو وزيراً َ للمالية مثل عم ذهب ؟ يحافظ على الموارد و ينميها و يوسع ثروة البلد ، حتى لو اشترى مناجم الذهب في كاركوتيا العليا!

أو وزيراًَ للبحث العلمي مثل عبقرينو ؟يستخدم العلم في إختراعاتٍ تحفظ للمواطن ماء وجهه المنسكب ليلَ نهار ، و يجعل شغله الشاغل هموم القرية البسيطة لا القرية الذكية

أو وزيراً للخارجية مثل بطوط؟ يغار على مصلحة البلد و شرفها و يرد عنها كل اعتداء ، و تدفعه حميته أن يجوب البلاد لإصلاح الشروخ العميقة في كرامة البلد ؟

أو وزيرة للبيئة مثل ميمي؟ تملأ سماء بلادي برائحة الزهور، بدلا من السحابات السوداء التي احرقت صدورنا؟ و تجمل الشوارع بالحدائق؛ بدلا من غابات الأسمنت الكئيبة؟

أو وزيرة للسكان مثل كوكا؟ تنسج للفقراء و المهمشين و أطفال الشوارع نسيجا يستر عوراتهم و يغلف قلوبهم بالحب و الأمان!

أو وزيراً للتعليم مثل محظوظ؟

يبتكر نظاما ناجحا لتعليم أبنائنا ،بدلا من قشور العلم المتطايرة في عقولهم؟

او وزيرة للثقافة مثل زيزي ؟ تنشر الثقافة و لا تنسي ان تطعم الشعب اولاً.. فالبطن الفارغة لا يمكن ان تهضم الثقافة!!

حتى اللصوص..هل يمكن ان يصبج اللص أو المزور أو المحتال في بلادي مثل عصابة القناع الأسود ؟ ابله ،غبي ،فاشل ، بدلا من أساتذة النصب و الإجرام؟

لا.. لا يمكن ذلك.. فلسنا في مدينة البط.. و لا نمتلك صفاء أرواح الكائنات الكرتونية...للأسف

و اليوم عندما تغلق الدنيا بيبانها أمامي ،و يتهشم قلبي و أنا أرى أطفال تنموا في برد الشوارع ،و لصوص تسرِق حتى الدماء و الأعضاء من جوف المواطن ، و مباني تهد فوق رؤوس أصحابها و حصار... و دمار... و حروب...

ابحث عن عدد مخبأ من مجلة ميكي، و انزوي خارج حدود الزمن لاستمتع بنفس الروح الطفولية و اخوض من جديد في وهم عالمي الخيالي المفضل .


20 comments:

Unknown said...

اعتقد صعب نلاقي ناس محترمة زي ميكي كدة واعوانه فى الوزارة

لان ببساطة ميكي ده اختراع امريكاوي .. وفى امريكا والدول المتقدمة في حاجة اسمها ديمقراطية تقريبا محدش سمع هنا عندنا فى بلدنا وانتخابات نزيهة ورئيس مش بيقعد على كرسيه لحد ما يموت

فمتحلميش كتير بوزارة ميكي...اقريها للبت خوخة وبس
:D

Mafrousa said...

الاول و حشتينا يا كلبوزة
و كل سنة و انتى طيبة و بخير يارب
تصدقى انا لغاية و قت قريب جدااا كنت بحب اقرا ميكي
و كنت اتعايش مع الشخصيات
بس عالم ميكي ده عالم جميل
مش ممكن تلاقى زيه
احنا بس فى عصر عصابة القناع الاسود
بس حتى دول يا بنتى و النبى كانو ساذجين
احنا عصابة القناع الاسود بتاعة اليومين دول متودكة
واخدة كورسات
ربنا يكفينا شرهم

Ahmed Mubarak said...

مفيش وزير زي ميكي كله دنجل

خالتى بمبة said...

اولا هتودينا في داهية بشطحاتك يا كلبوزة
وثانيا لما يكون عندنا وزارة زى وزارة ميكي يروح فين الوزير اللى بيقول هطلع .......اللى جابوهم
ثالثا رجعتينا سنين كتير لورا بأبطال مجلة ميكي ياااااااااااااه يا كلبوزة كنت بمووت في المجلة دى
رابعا مش احباااط ولا حاجة لكن على ذكر المجلات بتاع زمان والقصص الوزير اللى انتي بتحلمي بيه ده في الزمن ده اصبح رجل المستحيل
بس بوست يجنن وعودا حميدا يا اجمل كلبوزة

عبدالله said...

حمدلله علي السلامه ليكي غيبه كبيره اختفيتي ليه مره واحده كده

بالنسبه بقي لميكي فكرتيني بالذي مضي ياه لحد دلوقتي لما احب لحظه هدوء افتح المجلات القديمه اشوفها بس بالمناسبه الجديده بقيت رخمه قوي :)
لو الوزاره بقيت زي ميكي كده هنبقي كلنا بط :) خلينا كده احسن

تحياتي

blue-wave said...

رجعتينا لأيام حلوة والله
لكن للأسف الكلام دا فى الحكايات بس

blue-wave said...

تحديث
تم القبض على ميكى وبندق وعبقريو وعم دهب بتهمة تنظيم سرى لقلب نظام الحكم:))

Enbee said...

حمد الله على السلامة ..طولتي الغيبة .. ورجعتي بتدوينة فعلا جعلتني أسرح في هذا العالم المثالي الجميل البسيط الغير معقد .. اللي مشاكله دايما محلولة ... يا سلاااام .. للأسف أرتباط الأجيال الحالية بهذه المجلة غيرنا نحن

على فكرة أنا حطيت اللينك بتاع الموضوع على الفيس بوك عندي عشان الناس تقرا الكلام ده وتسترجع وتفكر

تحياتي العطرة

Tamer Nabil Moussa said...

ياريت نجد زى الحلوين دول حالنا كان بقى غير الحال

بس نرجع ونقول ربنا يصلح الحال ونجد اللى زيهم واحسن منهم

مع خالص تحياتى

اقصوصه said...

سنه سعيجه

اتمناها لك :)

-_- said...

انا بحب بطوط جدا

ميرام said...

هههههههههه
بجد أول حاجة هعملها بكرة ان شاء الله
اني اشتري ميكي
(:
فكرتيني باللذي مضى
(:
تحيـــاتي

The Eagles said...

ياااااااااا
والله وحشتنى ايام التدوين دى انا بقالى اكثر من سنة ما دخلتش على المدونة بتاعتى
تحياتى للجميع وتحية مخصوصة لميكى الصغير

Eagle

جود said...
This comment has been removed by the author.
جود said...
This comment has been removed by the author.
الأرمـوطــي said...

الاول ازيك عاملة ايه
الموضوع جميل جدا كالعادةوانا كمان اوقات كتير بلاقى الحقيقة صعبة نعيشها فبعيش فى احلامى

يا مراكبي said...

ونسيتي حاجة كمان تمنع تشكيل الوزارة دي .. اننا معناش قرش الحظ .. وما فيش حاجة أصلا دلوقت اسمها حظ .. فقط لكل مجتهد نصيب

مصطفى الشيمي said...

موضوع رائع وذكي
المشكلة الاساسية أن الخيال يا عيني مكسورة رقبته بادين الواقع
عشان كدة الحل - للاسف- اننا احنا اللي بنروحله ونمسك المجلة ..ونختفي شوية .

مدونة جميلة أوي
ودي زيارتي الأولى بس

Empress appy said...

الحاجات دى بنتعلمها واحنا صغننين لما بنكبر بنفهم ونعى ان دا فى الخيال يعنى الناس دى شقيت وتعبت علشان تعلمنا حاجه وفى النهايه الواقع ادانا على قفانا

الفقيرة إلى الله أم البنات said...

ياااااااااااااا يا كلبوزة بجد بوست يخرجنا عن حدود عالمنا البشع ياريت نعيش الايام دى ياريت يبقى فى حد عنده الإخلاص ده ياريت الاحلام تتحق