Monday, April 19, 2010

إلى أمي الصديقة الرائعة




هي عندي ابرع رسامة في الكون ، فقد علمتني كيف احب الرسم
وعروسة المولد التي رسمتها هي و لونتها انا بالوان مختلطة ؛ كانت اول ارهاصات الفن عندي ، و لا انساها أبدا و لم انسى قولها:
ماتطلعيش اللون برة الرسمة

علمتني كيف استحم و ان الاستحمام ليس مجرد لهو بالماء و لكن له فنون و اصول و لابد بعد الدش ان تقلم اظافري كما قلمت مشاعري و زرعت
فيها حقول من الخيال ، طرحت فيما بعد كلمات و قصص كثيرة
تقول لي اليوم: بتجيبي الكلام الحلو ده منين!

علمتني التفصيل و الكروشية و التطريز و التريكو و اللاسيه و ربت في قناعاتي ان المرأة المنتجة لبيتها قيمة لا يستهان بها
و غزلت على مشاعري احلى نسيج من الذوق و الرقة و العذوبة
فمبدؤها : الشاطرة تغزل برجل حمار

علمتني ان احب ما اكتب حتى و ان كان كلاما عابرا لا يعجب احد ،فقد استمعت لاول قصائدي باهتمام بالغ، جعلني احب الشعر و احاول التجويد فيه بل و تجرأت بحقنة الشجاعة التي اعطتني اياها ؛و وقفت امام طلاب المدرسة جميعا القي ما كتبته من شعر، و الذي حاز على اعجاب الجميع؛ لا لانه كان رائعا ؛و لكن لكم الشجاعة التي القيته بها ،و التي لم يعرف احد حتى اليوم انها منها لا مني.
تقول لي دائما: جمدي قلبك و متخافيش
علمتني ان اراعي الواجب ؛ فكنت اراها تهرع الى اي عزاء للجيران او المعارف . و ان اخفض صوت التليفزيون حتى نراعي شعور جيراننا حتى و لو كان بيننا و بينهم اكثر من عمارة.
روضت تلك التصرفات الطائشة ،فالضحك لابد ان يكون بحساب، و ما يقال في البيت لا يقال في الشارع،و الذي لم اعرف قيمته الا عندما كبرت
قولها:مش اصول يا اولاد

و لا انسى كم كنت احرجها احيانا بسذاجتي و كلامي المنفلت امام هذه الجارة او تلك القريبة ،و التي تحكيلي اليوم عنه و هي تضحك ،و انا متأكده انها كانت تستشيط غضبا وقتها ،و لكن حقول التسامح عندها لا نهاية لها.
كانت تقول لي: مايتبلش في بقك فولة
علمتني الطهي ، و اكلت من يدي اكلات فظيعة لا طعم لها ،و لكنها صبرت حتى اتعلم و حكمتها :اتعلمي فيا بدل ما تتعلمي في جوزك
حتى اصبحت اليوم اطبخ بنفسها ،و روحها الحلوة تحلي كل الاكلات.


اليوم اكتب لك يا حبيبة القلب، يا غالية، كلمات من قلبي الى قلبك ،تطبع قبلات من فمي على خدك الرقيق
رسالة يقرؤها كل من يتابع مدونتي، و لا اخجل من ان اعلن انني...
نقطة في بحر جمالك
يا مامتي
اريد ان اسمع العالم كله انني ممتنة لعطائك ،شاكرة لجهدك، و ان كلمات الدنيا لا تكفيكي حقك.
و لا تتصوري مدى سعادتي منذ ان اصبحتي تتابعي مدونتي،
اصبحت اشعر ان الكلمة امانة ، و انني لابد ان ازرع فيها ما تحبي و تتمني ،فقد اصبحت اكتب لتقرئي أنت.

مرسوم على وجهي الآن و انا اكتب ابتسامة، لا اعرف ان كانت ابتسامة خجل من تقصيري معك!! ام ابتسامة لاني استدعيت وجهك الصبوح!! ام ابتسامة لاني اخاف ان ابكي من شوقي اليكي!!

في مثل هذا اليوم.. كان مولدك فقد قدمت الى الدنيا مع قدوم الربيع ،و انا للأسف لا امتلك لآلئ الدنيا و لا كنوز الشرق و لا نجوم السماء.
لا امتلك الا حبي لك و شوقي اليكي، اهديهما مع اعترافي بالامتنان اليك.
و كل عام و انتي امي الطيبة، و بارك الله لكي في صحتك و رزقك العافية و انعم عليك بشكره وحسن عبادته أنت و أبي الغالي.
كنت اتمنى ان ارفق صورة لكي مع هذه الرسالة ليراها كل محبي المدونة و يعرفوا ان هذه الرائعة امي
و لكني اعرف انك لا تحبي ذلك ،ربما تخافي من الشهرة
:)

كل عام و أنت طيبة و بارك الله لي في عمرك و رزقك الصحة و العافية
قبلاتي الحارة و شوقي المنهمر
و
سلام

ابنتك
عبير عبد الشافي ابراهيم

كلبوزة لكن سمباتيك
طهقانة&

20 comments:

حفيدة عرابى said...

ربنا يبارك فى عمرها ويرزقها الصحة
وتستمعى بصحبتها دايما
أى كلام عن الام بيوجع قلبى
ربنا يخليكم لبعض

Lobna Ahmed Nour said...

رسالة جميلة ورقيقة أوي
ربنا يخليكم لبعض

Nasimlibya `√ said...

الله يبارك فيكم لبعض ويرزقكم الخير ويحفظهالك ويحفظك ليها وعقبال سنين وسنين فى المحبة والخير وطاعة الله

Nouran said...

ربنا يخليهالك يا كلبوزتي يا رب
و يا رب بنتنك تشوفك زي ما انت شايفه مامتك كده يا رب

Unknown said...

ربنا يخليها لكِ
وما يحرمك منه ابداً
اسمعى كلامها كله ونفذيه
عن طيب خاطر واقتناع صدقينى
لن تجدى احداً يحبك مثلها ابداً.

محمد عبد الغفار said...

ربنا ميحرمكم من بعض

كلبوزة لكن سمباتيك said...

جائني تعليق امي الحبيبة على الماسنجر و احببت ان اوثقه في مدونتي للذكرى الحلوة
كتبت امي الحبيبة:
حبيبة قلبى عبير مش ممكن ابدا اللى كتباه لى فى عيد ميلادى انا قريته بدموع عنيه والله
وقريته اكثر من مره رائع ياطاطا مش ممكن ابدا كان نفسى ارد عليكى فى نفس الورقه حتى يقرا كل الناس مدى شوقى لك ولزوجك واولادك بس للاسف مش بعرف
اعمل ازاى التعليق على العموم مسيرى اتعلم حد يصدق انى دلوقت بعرف اشتغل على النت اصل الحاجات دى جتنا على كبر والمخ مبقاش يستوعب التكنولوجيا دى
ياحبيبة قلب امك ربنا يجمعنا على خير قريبا باذن الله ونقعد نرغى بعدد ايام البعد ياغالية ربنا ميحرمنيش منك ابدا ويخليلك زوجك الغالى واولادك اللى وحشونى قوى وبعيش على امل اليوم اللى حشوفكم فيه واضمكم لحضنى ربنا يرجعكم بالسلامه امووووووه 0ماما

Ahmed Mubarak said...

ربنا يخليهالك ويباركلك فيها وكل سنه وهيا طيبه

Unknown said...

طب وانا ذنبي إيه تخلوني أفتكر امي اللي وحشتني ونفسي أشوفها واقعد اعيط معاكوا؟

ينفع كدة؟

كل سنة وانتى طيبة يا طنط .. وإن شاء الله لازم طاطا توصلك كلامي ده وتوصلك سلامي كمان

مش عارفة يا عبير بعد ما خلصت البوست حسيت انى اعرف مامتك كويس وإني مفتقداها زيك كدة بالظبط .. سبحان الله

ربنا يخليهم لينا .. هما الحاجة اللى محلية علينا الحياة والله

الحمد لله

ربنا يجمع بينكم عن قريب يارب ويخليكم لبعض دايماً يارب


سلامات

يا مراكبي said...

كل سنة وهي طيبة وبخير وبألف صحة وسلامة

ودايما يا رب تكوني باره بيها

miro said...

كل سنه وهى طيبه ويارب ميحرمناش منهم ابدا مننفعش من غيرهم والله

-_- said...

كنت محتاج اقرأ البوست ده

دنيا....او حياة said...

كل سنة وهي طيبة ..واضح انها ام رائعة وانتي مثلها ...انا كل يوم بدخل اشوف كتبتي بوست جديد لحد مازهقت مصدقتش لما لقيتك كاتبة حاجة جديدة رغم اني جديدة على المدونة بس حبيتها فعلا..
ياريت بجد متتأخريش في البوستات تاني ..
;)

رونا said...

ربنا يخليهالك ويرحم امى يا رب بجد كلامك خلانى اعيط يا ريت تشرفينى فى مدونتى يا عبير
http://7rbashat.blogspot.com/2010/04/blog-post.html?spref=fb

Tarkieb said...

ربنا يخليهالك

max.adams said...

اللــّـــه

جميل أوي أوي أوي

تحياتي لكِ

تحياتي لملاكك و تاجك ... أمك الحنون

(ست* جنى* الحسن) said...

سلامو عليكو..
ربنا يخلهالك ويبارك فى عمرها وميحرمكوش من بعض
لك تحياتى

زهرة said...

ربنا يخليكى ليها ويخليها ليكى ويكرمك دايماً
مكنتش متابعاكى لكن تمسحى لى أتابعك؟؟

كلمة على جنب
"أكتر اسم بحبه فى الدنيا اسم عبير "
^_^

Mohamed Badawy said...

كل سنة وماما طيبه ويارب يخليهالك ويخلى كل أم بصحة وسعادة لما تشوف بعنيها نتيجة مجهودها وتحصد بعنيها زهر الأمل اللى اتزرع فى اولادها وطرح كلام يتحس بجد كلامك جميل اوى لدرجة انى مش لاقى تعليق يليق غير ...انا حبيت مامتك زى ما انتى بتحبيها كل سنة وانتى وهى طيبين

خالتى بمبة said...

الله الله الله على جمالك يا عبورتى وكل سنة وماما طيبة ويارب يديمها فوق رؤسكم ويخليها ليكم ولينا يا حبيبتى اللى تربي وتطلع بنت زيك لاشك انها من انجح واعظم الامهات كلهم ويارب دايما اصدق صديقة واقرب حبيبة للقلب ويارب يرزقك بر اولادك كما تبري والديكي بموووت فيك يا اجمل صاحبة واخت في الدنيا كلها