Saturday, August 12, 2006

ساعة في أمن الدولة

بالليل وأنا قاعدة في البلاكونة و الجو كان جميل قوي
و كنت سعيدة لان الجو عادة بيكون حر في شهر اغسطس
بعكس الليلة
سمعت جرس الباب روحت افتح لقيت واحد طويل زي الحيطة بيقولي
عندك استدعاء في امن الدولة
انا: اية؟ ازاي؟ انا؟
هو:ايوة عايزينك دلوقتي
انا: طيب ..اصل..ممكن اروح الصبح؟
هو : لا دلوقتي حتغيري هدومك و لا تيجي كده
أنا:لأ ح ح حغير
---
ثواني أو ساعات مش فاكرة
دخلت مكتب في مبني عادي مش مكتوب عليه اي حاجة كانها عمارة سكنية عادية
لقيت واحد بيه قاعد علي كنبة سودا في حجرة فيها مكتب و كرسي و مفيش اي لوح متعلقة علي الحيطة
انا: سلاا اممم ع ع عليكم
هو:اهلا
انا: حضرتك اقصد في حد عملي استدعاء خير؟
هو: الست كلبوزة لكن سمباتيك؟
قالها بابتسامة صفراء تنم عن كره غير مبرر

انا: ايوة يا فندم بس ده اسم حركي لزوم البلوجرز يعني
قلتها بابتسامة خجل ممزوجة بمسح الجوخ و رغبة في التلطف
هو:اه و انت بقي عاملة حركة لتغير الحكم و مؤسسة وزارة و
قاطعته
انا:لا لا يا فندم و لا تغيير حكم و لا يحزنون ده احنا عاملينها مزحة من همنا
حركة كلابيز من اجل التغيير
يعني عايزين نغير من نفسنا للاحسن و كمان نغير اللي حولينا من اوضاع مععع
هو:نعم ملها الاوضاع ؟ مش عاجبكم البلد؟ طيب ما تسيبوها و تمشوا و لا انتم بتقوموا الناس علينا؟
أنا: يا فندم احنا معملناش حاجة من دي و لا نعرف بعض اصلا كمجموعة مشاركة في الدعوة
هو: تعرفي المدعو زنجولا
انا: ابدا يا بيه عمري ما شوفته و لا اعرفه
هو: امال مرشحك زعيمة ازاي؟
انا: علشان اسمي كلبوزة لكن سمباتيك يعني من باب اني زعيمة الكلابيز هزار بس
هو:و اية هيا اهداف الانقلاب ده
انا: يانهار اسود انقلاب اية يا بيه و لا انقلاب و لا حاجة
الموضوع و ما فيه ان في مجموعة ناس بيحبوا يعبروا عن نفسهم و تجتمع فيهم صفة الكلبزة و اتفقوا انهم يقترحوا اقتراحات تقدر تقول امال او احلام نفسهم يعملوها و نفسهم يجملوا الواقع من حواليهم او ينفسوا عن نفسهم فقلنا نعمل مجموعة كلابيز من اجل التغيير و كل واحد يتصور نفسه في موضع مسؤولية معين و يشوف حيعمل اية لو بقي في المكان ده
الاخت سوسه المفروسه مثلا حتبقي وزيرة الاعلام و ليها تصورات تتمني تكون في المستقبل و
قاطعني
هو:انت حتحكيلي تاريخ حياتك؟
انا بسالك دلوقتي الحركة دي ليها اي اطماع سياسية؟
انا: ابدا و الله يا فندم
هو: طيب انا سمعت ان في تحريض للناس علشان تشترك معاكي
انا:تحريض اية؟
هو: ايوة سمعت ان في سندوتش مربي لكل بلوجراوي يشترك معاكم و في كمان مكرونة بشاميل و حاجات كده مش فاكرها
انا:هاهاها لا يا فندم دي فنجرة بق بس هو يعني البلوجر فيه اتاتش فايل و لا اتاتش حلة و لا سيند سندوتش
اهو كلام تفاريح
هو:هممممم
طيب
في عندك
مكان فاضي ليا؟؟؟
انا: هه؟
اه طبعا يا فندم
......
و بصيت شمالي لقيت المنظر من البلاكونة جميل و الجو لسة طراوة
ده انا لا روحت و لا جيت بس يظهر سرحت بخيالي
وكل سرحة و انتم طيبين

15 comments:

tota said...

يلا كلابيظو يا حبيبتى ايه قعدك فى البلكونة الساعة دى ماله الحر
اقعدى فى الحر ده امان
المرة دى عدت على خير والراجل بتاع امن الدولة طلع من العشوائيات وساكن فى مساكن الايواء وبيدور على مكان فى بلوجر
المرة الجاية الحر يسيح دماغك تقعى فى واحد معندوش يا امة ارحمينى ويبعتك هناااااك
وهنااااك بقى مقولكيش على الحر
تحياتى بقى

كلبوزة لكن سمباتيك said...

tota
حاولت اوصل مدونتك اكتر من مرة
بس مش عارفة
انت ليكي مدونة؟
و لا لسة تحت الانشاء
يا ريت تبقي تسيبيلي الرابط
دايما منوراني يا جميلة

tota said...

كلابيظو
لسه معنديش الشجاعة اطلق المدونة الواقع ماشاء الله عليكم كلكم فى تغطية كافية لمعظم المواضيع وبأساليب مختلفة وجميلة
معتقدش لسه انى ممكن اضيف حاجة لكن التعليقات بتسعدنى اكتر
اوعدك اول بوست هبلغك بيه
تحياتى

Dr. Tantawy said...

ربنا يباركلك اوي اوي اوي يا كلبوزة
بعتيني ف اول ملف على الناصيه بتاعت جابر بن حيان .. لاظووووغلي

انا مش عارف اشكرك ازاي على انك تبيعي رئيس الوزاره بتاعتك :)))) هههههه .. هيه دي الرجاله ولا بلاش ههههه

تدوينه لذيذه .. دماغك بتسرح جامد لبعيد :) ربنا يستر علينا هعهعهعهع

Nouran said...

حرام عليكي وحطيني وزيرة دفاع الحمد لله اني لسه مكتبتش حاجة بصي انا هكتب وعند اول اعتقال ليكوا انا هخلع واروح اقعد عند بابايا ف السعودية انا ولا اعرفكوا ولا افضل واخلص ع ايديكوا ف المكان اللي هنهرب فيه المهم انا هكتب البوست بتاع الوزارة وايدي ع قلبي -واحدة ع قلبي والتانية بتكتب- شفتي الفهلوه ورجلي ف الكوتشي استعدادا للجري والجري للجدعان ونص الجدعنه برضه
خشي شوفي التفانين

أُكتب بالرصاص said...

ألبوست ده اتكتب أمتى ؟
انا مااخدتش بالي إلا دلوقت

شوفي

انت اتغطي كويس وانت قاعدة في البلكونة ،
وبلاش زبدة على الشندوتشات ، مشيها مارجريت
كمان بلاش مسبك على المسا

بالاضافة

هو في قعدات في البلكونة في الحر والرطوبة دول ؟

Nouran said...

خلاص انا كتبت البوست لازم موافقة حضرتك او رفضه

المسافر said...

علشان تبطلي تاكلي جلاث (جلاس) وتدوبي في قلوب الناث (الناس) حد يجيله قلب يقعد في البلكونة في الحر ده ، وآدي النتيجة أحلام يقظة متلعبكة .... وبعدين نقول بيحصلنا كده ليه؟؟؟

ماله التلفيزيون .. هو صحيح ممكن يجيب استبحس بس مش ح يعمل كده خالص

ونخلص في نهاية تلك القصة إلى أن الجبن (الجبنة يعني) سيد الأخلاق

وحصلت ألف بركة ... أو سيوة مش مهم

soosa el-mafroosa said...

الله يطمنك ياختي ..إحنا ناقصين رعب ..انتي عارفة المواضيع في بيتنا مش مستحمله ..و بعدين زنجولا تبيعيه مش مشكلة راجل و يستحمل ..لكن انا يا كلبوزة أهون عليكي..آدي أخرة النشاط و الوعي

Polka Dotted said...

tesada2y 7'aweftiny fil awel :D
anyway really nice post w mabrook 3alik el reyasa ya rayes... bas eftekrini b chocolate ;)

Anonymous said...

كلبظ يا اؤختشى
انت كل مرة يختى تفزعينا بحلم ولا كابوس من كوابيسك دى؟ بتكونى قاعدة فى امان اللة وتسرحى السرحة تجيبى لنا اسهال واحنا بنقرا...مرة احنا حاربنا اسمها اية دى اسرائيل ومرمطناها...ومرة تعملى كابوس من بتوع البدل السودا؟ ربنا يتوب عليكى يا كلبظ من السرحات بتاعتك دى...فى الاخر يا بنتى ممكن تمرضى بالتهيؤات..
انا صدقت

شريف ضياء said...

اللي حصل لك ده يسمى "بلكونيزم" و علاجه إنك تقعدي في الساونا أسبوع

و بعدين البوست ده بيفكرني بغنوة ساعة في قرب الحبيب

تفتكري ليه؟

gwad said...

انا حاسس بيكى انتى عاوزة تروحى وتعملى زعيمة بس انصحك بلاش حتى تفكرى
ورا الشمس فيها مكان لشخص واحدبس يكون مكلبز

BackBone said...

مممم, ايه يابو الكلابيز. انا شامم ريحت خوف في كلامكم (ممثلي الحركه). لاء احنا المفروض و لا بنخاف مالدنيا بحلها.

بصي يا كلبوزه طول عمر النظام بيحاول يهديدنا بانه ايده طايله و اللي بيوقع في سكته مبيترحمش و شويه الكلام الفارغ ده. الموضوع كله عباره عن بروباجنده بتعملها كل الأنظمه الطاغيه علي مر العصور. و لاكن لما الناس بتفؤق و تقف مع بعض, بتنكشف طبقة الفلاز الرقيقه جداً اللي رسمها النظام حوليه.

ياكلبوزه و يا كل الكلابيز, اوعوا تخافوا. اللي عايز حاجه يعملها, و اللي بيحلم لازم يحقق حلمه ده. مينفعش نكتفي بالاحلام, احلي حاجه اتعلمتها من الخواجات انهم عمرهم ما "بيبوصوا" علي المشكله ديما "بيفكروا" في ازاي يحلوها. و اللهي احنا مش اقل منهم لا عقل و لا ثقافه و لا امكانيات كفايه بقي تقليل من نفسنا. و تلاكيك.

كراكيب نـهـى مـحمود said...

السلام عليكم
ازيكم يا جماعه
أنا بقالي يومين ادخل كل يوم اقرا واستغرب واخرج النهاردة قلت مبدهاش
أنا أكلمها واقول ل اللي في نفسي
اولا انتي حد جميل اوي ومدونتك جميله ومطرقعه
ثانيا حكاية كلبوزة دي انا واخدة الناس هيه اللي تقولها لي لكن انا دايما انكر بشدة واقول هما كام كيلو كده زيادة وهيمشوا بعد شوية علشان كده بحسدك على الشجاعه دي
ثالثا انا عندي مدونة صغنونه بقالها شهر وكام يوم اسمها كراكيب عالم نهى اللي هيه انا احب اشوفك عندنا بس متنسيش وانتي جايه طبق كشري انا عن موضوع الخاطبة انا كمان متعمليش حسابي في الشغلانه دي ولا انا ولا الخواجة بيجو كراكيب نهى