Tuesday, August 22, 2006

شنطة سفر

انتهت الاجازة
كما تنتهي كل الامور
عشتها بحلوها و صعبها
اتفسحت و سافرت و ضحكت و حزنت
و جت اللحظة الصعبة
لحظة تحضير الشنطة
و اه من تحضير الشنطة
حاجة مزعجة لا يعرفها الا من اعتاد السفر
و خصوصا لفترات طويلة
يعني لو نسيت حاجة مش حتشوفها الا السنة الجاية و عليك خير
مئات الحاجات عايزة اعملها و كتبت ورقة بيها و علقتها و كل ما احط حاجة في الشنطة اشطب عليها
اقولكم حطيت اية
طاولة صدف من خان الخليلي
قصة يعقوبيان
سيديهات افلام و مسرحيات
كمية دواء رهيبة
عسلية و خروب و بهارات
حاجات جونية
المهم مطولش عليكم قولوا طولي
اتهد حيلي مشاوير
فاضل بكرة ارفع العربية و اغطي العفش و اقفل محبس المية و سكينة الكهرباء
سايبة في مصر حاجات كتير مش حقدر اخدها معايا
سايبة الناس و الأصحاب و الشارع والمية اللي في الحنفية
سايبة الفاكهة اللي ليها طعم و الجو الجميل
عارفة حتقولوا عليه فقرية
بس انا بحب مصر و حتوحشني
جدا
انتم مش حتوحشوني علشان لما اوصل ان شاء الله
و انضف البيت حنطلكم تاني
تعرفوا انا حبتكم جدا و بستناكم تيجوا تعلقوا عندي و بفرح قوي بكل كلمة
ربنا يخليككم ليه
اوسا
انا سايبة شوية رز و زيت في النملية تعالي خوديهم بدل ما يخززوا
تمر حنة
متنسيش تحشري ورقة في شباك الصالة لحسن معصلج مش بيقفل
توتة
اوعي تنسي تشقري علي الشقة و ابقي تعالي اتشمسي في البلاكونة
بعدك علي بالي
متنسيش الجوابات و لما فوانيس رمضان تنزل السوق ابقي هاتيلي واحد
غادة الكاميليا
ابعتيلي جوبات كتير احكيلي عن مصر و اخبارها و طمنيني عنك
نوران
انبي تلمي الملايات من علي المنشر و اوعي تضيعي المشابك
لحسن معرفش انشر المدونة الجديدة
ام مريلة كحلي
كل ما تعدي علي قهوة و تشمي ريحة الشيشة و تسمعي منير بيغني اذكريني
ابيتاف
كان نفسي اركب مركب في النيل بس لاني جبانة مقدرتش السنة الجاية ان شاء الله نعمل رحلة نهرية سوا
الي كل البلوجرية
بحبكم و حتوحشوني
و اللي مصبرني
ان مصــــر بخيـــر طول ما انــــتم فيـــها

35 comments:

الأميره أوسه said...

كلبوزه
حبيبتى
رايحه فين
انتى كنت فى أجازه
وبيتكم التانى ده فين
بعيد يعنى
حاتوحشينى
الدنيا دى وحشه خالص
توصلى بالسلامه
مستنيا تكتبى

BackBone said...

ايه الكلام الجميل ده.ـ
مش قولتلك يا كلبوزه انتي زي العسل.ـ

يا ألله انا أجي من هنا علشان انتي تسافري من هنا. نصيب.ـ

ياله خلصي الترتيب بتاع الشقه بسورعه و بجد هتوحشينا يا ست الكلابيز كلهم.ـ

فكرتيني اد ايه انا كنت هموت و انزل علي مصر و اد ايه انا كانت فعلاً ومحشاني كل الحجات اللي انتي سبتيها و مشيتي ديه.ـ

فعلاً احلي حاجه في الدنيا انك تستمتع بيها مع كل الناس اللي بيحبوك و بيعزوك.ـ

يارب توصلي بالسلامه.ـ

islamventura said...

السفر سبع فوائد
كلام باسمعه طول عمرى لا اجد السبع فوائد و لا المتع الا فى اولى مراتى و لكن بعد ذلك اذا كان سفر شغل فيكون بالفعل دمه تقيل جدا
او يمكن العشرة
كنت باسافر لشغلى باكون مخنوق جدا حتى يمر اول يوم يمكن لمرارة السفر و طول وقت الانتظار و غرابة الجو و الخوف من الغريب و القادم الذى تعودنا عليه و كان مملا بعض الشىء و لكن هكذا الدنيا لا تاخذى كل ما تريدى و لا تتمنى و لكن الحمد لله على كل شىء

ارجو لكى سفر سعيد و اوضاع افضل فيما بعد

Ahmed Shokeir said...

ايه ده ، انا كنت فاكر انك مثلا اجازة في اسكندرية وراجعة مصر أتاريكي زينا ، من عشاق الخليج ونازلة مصر اجازة
عموما نفس احساسك اكيد هو نفس احساسي وانا نازل اجازة مصر وراجع مسافر

ياللّا ربنا معاكي وعقبال السنة الجاية وسلميلي على مصر وشوارعها وناسها قوليلهم احمد شقير بيسلم عليكوا

Ensan said...

ماليش فى السلامات والوداع ومع السلامة
بعيد عنك
على العموم , اول ماتوصلى تدخلى المدونة
الف سلامة

tota said...

كلبوظة
تسافرى بالسلامة
ما تتأخريش علينا يا دوب تروقى الشقة وادخلى على النت
الشقة حدانا هنا فى عنيه بس سؤال يعنى
عندك جيران حلوين اشوفهم من البلكونة وانا بتحمص ولا هقعد الاغى نفسى
هنستناكى
تحياتى

Shower-Mirror said...

بالسلامه .. يا كلابوظه و ابقى طمنينا اول ماتوصلى .. المهم قوليلى التلاجه هنا فيها لحمه ؟؟ عشان نبقى نطمن على الشقه و بالمره ناكل لقمتين ..!! لازم اول ماتوصلى تكتبيلنا .. اصل انا بصراحه تهت .. مش عارف انتى كنتى فين و مسافره فين و ليه و مع مين و بكام ؟؟ يعنى شوية ايضاحات كده لزوم الفضول ... نشوفك على الغدا .... قصدى علةى خير ......تشاو

Lasto-adri *Blue* said...

بالسلامة يا سمباتيك

معلش.. لكنا لها

القلجاوى said...

عزيزتى : الرهيبة كلبوزة
تحياتى العميقة
انا بخير والحمد لله ، زيارتك الاخيرة اسعدتنى ، واختيارك لى ، زاد من سعادتى ، نشكر تقديركم لشخصنا المتواضع" متواضع قوى " المهم اننى احضر لشياء لأضعها بمدونتى
لك تقديرى وتروحى وترجعى بالسلامة
، ووو تشربى شاى

memo said...

كلبوزتى العسل اوعى تتاخرى علينا ولا الغربة تنسيكى انى فى ناس كتير بتحبك وبتحب المدونة بتاعتك

...دنيتي said...

ايه ده؟
انا زعلانة بجد
مع انك هتفضلي تكتبي من هناك
:((
هتوحشينا
متتأخريش علينا
ومتقطعيش الجوابات
متنسيناش
وكفاية كدة لحسن هعيط
انا مبحبش لحظات الوداع
انا هديكي ضهري وانتي تمشي :(

gwad said...

كلبوزة تيجى بالسلامة
بس انا عاوز اعرف انتى سفيرتى فين
خايف احسن تكونى سافرتى سويسرا
تحت اسم تنظيم البلوجرية بنت عم الملوخية
اتمنى لكى اجازة سعيدة وممتعة
جواد

أم أحمد said...

انتي رايحة فين ؟ وبعدين معاكي اوعي تكوني بتهزري بي اللي هايصبرنا اننا نقدر نكلمك من اي حتة

شريف ضياء said...

تروحي و تيجي بألف سلامة يا كلبوزة
بس ليا تعليق على حاجة كل البلوجرية فاتت عليهم

منين سعادتك حتبتدي ريجيم و منين واخدة عسلية؟؟؟؟؟
إستفسار

عمر said...

رايحه فين ياست الكل بس انا وبابا وماما نزلين اقصد طالعين مصر فى اكتوبر ومتشكر علي كلامك الحلو. توصلى بالسلامه

Adel said...

ايه اللي بتعمليه ده تبقى عارفة اني ميت وتسافري قبل الاربعين ما كنش العشم يا كلابيظو والله عرفت بزعلك وانك دعيتي على الجحش اللي عمل في الحركة الواطية دي وتوتا هبي اللي رستني على الدور المهم خشي عندي وانت تفهمي اكتر وبعدين والله هاتوحشينا بس اللي هايصبرنا اننا هانعرف ناكل براحتنا هههههههههه المهم اخدتي البراشوت بتاعك من تمورة هانم ولا اكلته عليكي ؟ وبعدين انت لسه ما صلحتيش شباك الصالة ليه بلاش بخل بقى ارحمي نفسك وفكيها والله ما عارف حتى اهرج معاكي بس بجد على الرغم ان انا ماعرفكيش غير على البلوجز لكن حاسس والله ان انت اختى واختى العزيزة الغالية كمان ولو اني ما شفتكيش وما كنتش هاتفرق لو بتكتبي من مصر ولا نيكاراجو لكن حاسس انك مفرقانه وده صعب جدا روحي ربنا يوصلك بالسلامة وترجعي تاني ومعاكي اكله حلوة وأنا الان قد غيرت مدونتي وهي

http://elmazagange.blogspot.com/

بدلاً من (من زماااااااان )ومستني دخلتك الحلوة على وبدل ما تصوتي افقعي لنا كام زغروووووووووووووته

محمد أبو زيد said...

تروحي وترجعي بألف سلامة
وما تنسيناش وانتي هناك

Dr. Tantawy said...

رايحه فين يا بنت
في رئيسه دولة تسيب دولتها و تكت على بره .. ده كلام هههههه

توصلي بالسلامه .. طمنينا عليكي

Anonymous said...

ياه فيه ناس بتحب مصر اوي كدا لسه
والله فيكي خير
وياريت باقي المصريين يحبوها زيك كده

بعدك على بالى said...

يااااااه ياكلبوظه .. كام بوست وخلونى احس انى اعرفك من مليون سنه، كاننااكلنا وشربنا وضحكنا ، اتخانقنا واتصالحنا و... عشرة طويله وعيش وملح، بعرفك من عينيكى لما تضحك .. ولما تخبى دمعه... مع ان كل اللى بينا مجرد "كلمات" ولكنها نسجت كل هذه الاحاسيس الحلوة، لدرجة انى اتخضيت امبارح لما حاولت افتح مدونتك وما اتفتحتش، وكنت قريت لك تعليق عند اكتب بالرصاص حسيت انه وداع (بعت لك اميل) وقد ايه كنت سعيدة لما لقيت مدونتك ..
كلبوزة
حتى لو سافرتى فى اخر بلاد المسلمين مكانتك جوانا مش حتتغير وحتفضلى معنا وجنبنا نضحك ساعات ونبكى ساعات، نسند بعض ونطبطب على بعض....
ترجعى لنا بالسلامه واوعدك اجمل و اول فانوس فى رمضان ومعاهم كمان صينية كنافة "دايت" لأجمل كلبوزة سمباتيك فى الكون .... طمنينى عليكى..

sydalany-وش مكرمش said...

بس بلاش القاهرة
تعالي إسكندرية و نركبك مركب و تلف بيكي لحد ما بطنك توجعك

بس بلاش القاهرة
أو نركبك مركب ف رشيد أهه برضه مش القاهرة

بلاش القاهرة

admelmasry said...

هو منم ناحية فقرية
فانت فعلا فقرية

بس اقولك ؟
احنا عاملين زي السمك ... ما ينفعشي يطلع م البحر

أحمــــــــدبــــــــــلال said...

أنا كمان موافق بلاش القاهرة

خليكى فى أسكندرية أحسن
هى حر شوية بس على الاقل هابقى عارف أنك معايا فى نفس المدينة
و بتتنفسى نفس الهوا بتاعنا ده

على فكرة مقاهى النت على قفا مين يشيل حاولى تقعدى فى اى واحد تكلمينا شوية
ده احنا غلابة

Nouran said...

تروحي وترجعي بالف مليون سلامة قوليلي هيا الملايات ع المنشر ولا ف البلكونة علشان اعرف الم انهي ولا اقولك هلم الاتنين وهشيل المشابك متقلقيش :)
وانا كمان بابا هيسافر السبت الفجر يالله ربنا مع كل الناس المتغربة دي

كلبوزة لكن سمباتيك said...

السلام عليكم
ازيكم يا احلي بلوجرية في الكرة الارضية
انا وصلت بالسلامة الحمد لله و فرحت قوي بكل تعليقاتكم الجميلة صحيح مصر حلوة بناسها و اهلها
--------
اوسا
انا كنت في القاهرة و دلوقت في جدة
و من اي مكان في الارض حكتبلك لاني فعلا حبيتك و حاسة اننا اصحاب من زمان
اسكتي جيت لقيت الجو حر مووووت هنا بوسيلي مصر
----
wa3d el3yoon
احلي نعمة في الدنيا هي نعمة الصبر و بعدها نعمة التكيف و التعود
لولاهما كان زماني طقيت
متشوفش وحش:)
----
BackBone
حمدا لله علي سلامتك متنساش تروح خان الخليلي و اقعد علي القهوة و اطلب سحلب و طولة
و افتكرني
----
islamventura
تعرف الوطن هو الانسان اينما تواجدت فانت في وطنك ربما لانك تترك بلدك بداخلك فلا تغيب عنها
اشكر لك امنياتك الكريمة
----
Ahmed Shokeir
الله يسلمك مصر كمان بتسلم عليك احنا طلعنا جيران في بلد واحدة جربت تتغدي عند الفيروز؟
اشكرك علي زيارتك و امنياتك الرقيقة
----
Ensan
الله يسلمك متشكرة جدا علي المرور الجميل
----
tota
الله يسلمك يا جميلة
بصي انا ساكنة في دور عالي قوي يعني اقرب جار حتشوفيه قد النملة لو نظرك قوي يبقي حتنبسطي قوي حتشوفي مصر كلها من البلاكونة
-----------------------
خالص تحياتي لكل احبائي المدونين

كلبوزة لكن سمباتيك said...

Shower-Mirror
التلاجة فاضية و زي الفل و الكهربا مفصولة و لو كنت داخل علي طمع اقصد علي غدا يبقي نابك علي شونة
انا كنت في القاهرة و دلوقتي في جدة و من ناحية بكام.. حاجة ببلاش كده
الله يسلمك.. تشاو و رحمة الله و بركاته
------
Lasto-adri *Blue*
الله يسلمك فعلا كلنا لها
وحدوووووه
-----
Epitaph
انت حتوحشيني اكتر و لكن مدونتك الجميلة حتكون دايما ملتقانا
في انتظار السنة الجاية لتحقيق الوعد
سعيدة بصداقتك الغالية
-----
السيول السميرية
الله يسلمك انا اسعد بيك و الله
اشرب شاي طبعا حد يقول لا علي الشاي:)
-----

Sad Woman
تسلم عنيكي يا اختشي..متشوفيش وحش ابدا انا عارفة ورايا بلوجرية زي العسل
اسعدني مرورك
-----
memo
متحرمش العمر كله من عطفك عليا
:)
-----
دنيتي
ربنا ما يجيب زعل ابدا و دايما اشوفك سعيدة يا دنيتي يا جميلة
----
gwad
الله يسلمك..انا سافرت جده و حخبط في الحلل بقي و لا يهمني ما انا طلعت برة و مبقاش في لازوغلي ححدفهم بالطوب
الله يسعد ايامك
----
sahar
انا هنا اهو يا سهر و لا يهمك ازي ابنك دلوقتي؟ عمل العملية؟ ان شاء الله اسمع عنكم كل خير
----
زنفل المعجباني
الله يسلمك يا فقسني
ايوة عسلية و ماله هيا العسلية ضد الرجيم!!لا
اسكت قدام اول محل البيك سقطت اخر حصون الدايت
البيك:محل زي كنتاكي لبيع الدجاج المقلي
-----
عمر
الله يسلمك يا عمورة و تيجوا بالسلامة ان شاء الله
--------------------
قبلاتي و تحياتي و صباع عسلية لكل من شرفني

كلبوزة لكن سمباتيك said...

المزاجنجي
اسكت يا عادل ده انا حزنت عليك قوي و جبت كل الجرايد و قعدت ادور علي النعي بالتاريخ المكتوب و قلبي اتقبض بس الحمد لله انك بخير و عمر الشقي بقي و مدونتك الجديدة جميلة بس النت عندي هنا بعافية شوية مش عارفة اسيب لك كومنت
و كل موته و انت طيب يا مزاجنجي يا طيب
-----
محمد أبو زيد
الله يسلمك مقدرش انساكم انتم احلي ما في مصر
-----
ZanGooLaaa
انا دلوقتي انطلقت و مبقاش يهمني لا امن دولة و لا بطيخ و حلعلع بقي و اديها قرارات و حبقي اسيبلهم عنوانك لاي استفسار او اعتقال ههههههه
ربنا يسمعني عنك كل خير
------
حائر في دنيا الله
بنحبها رغم سلبياتها و نفسنا تكون احلي بلاد العالم
شرفتنا
-----
بعدك على بالى
تسلميلي يا جميلة فعلا عندك حق الصداقة دي صداقة فكر و احساس قبل ما تكون صداقة جسد و لقاء
موصلنيش منك ايميل!! ده عنواني
sarah4eg@yahoo.com
يا رب دايما اسعد بيكي و بتعليقاتك الراقية الرقيقة
الله يسلمك و متحرمش منك
-----
sydalany
من ناحية اسكندرية فانا موافقة لكن موضوع اللانش ده موعدكش اصل انا جبانة جبن محض
و بعدين القاهرة حلوة هي حر و رطوبة و زحمة و عادم و بلاوي بس حلوة
-----
admelmasry
ايوة فعلا و لو اني هنا عاملة مجتمع و بزنس و شعلانة بس برضه مبحسش اني فول ابشن الا في بلدي
-------------------
خالص حبي و تحياتي
و العسلية خلصت

كلبوزة لكن سمباتيك said...

أحمدبلال
اسكندرية حبي الاول
مش محتاجة نت كافية انا من البيت عندي احلي كونكشن بالمنافلة صحيح هو كونكشن واطي لامؤخذة بس اهو كونكشن العارجة يغنيك عن سؤال النت كافية
:)
----
Nouran
الله يسلمك يا جميلة يا رب دايما متوفقة و سعيدة و ربنا يطمنك علي بابا
اوعي الدراسة تخدك مننا خلي يوم الخميس ساعة نطمن عليكي فيها
قبلاتي
------------------------
انا وصلت يا بلوجرية و اللي خايف علي نفسه يروح
خالص تحياتي

كلبوزة لكن سمباتيك said...

ايبيتاف
اموه اموه
انت وحشتيني جدا
البيك اللي في مصطفي النحاس ده فظيع لكن البيك اللي في جده تحفة و الشبراوي اللي في جسر السويس حلو بس بقالي 4 سينين مرحتش هناك
جوعتيني لما اقوم ادعبس في التلاجة علي حاجة اكلها
انبي بحبك

تمر حنه said...

غاليتى كلبوزة
بالرغم من انى قد ودعتك فى التليفون قبل السفر الا ان الوداع هنا له مذاق مختلف - حيث انك هنا لك مذاق مختلف : ألذ ألذ ألذ
حقيقى اكتشفت فيكى بعد رابع كنت قد أجهله عنك من قبل - عمق و دراية و تفاعل حقيقى مع كافة المتغيرات بالرغم من بعدك المستمر عن مصر الحبيبة ز بالرغم من مشاغلك الكثيرة التى أعلمها
أحببتك هنا كثيرا و أجد أن الوداع هنا أكثر حرارة حيث أن التواصل أكثر غزارة
ماتقلقيش أنا كهربت الشباك لأنى معرفتش أحشر فيه ورقة- ربنا يستر

كلبوزة لكن سمباتيك said...

اختشي الحبيبة تمر حنة
ربنا يخليكي ليا انا منكسفة قوي من كلامك ده و وشي بقي احمر زي التفته
بس كل الكلام الحلو ده مش حينسيني البراشوت اللي خرمتيه
نفسي في فنجان كبشتينو و سبارس معاكي علي النيل
قبلاتي و دعواتي
بحبك

Adel said...

كلابيظو اقولك ايه منك للي كلت دراع جوزها انت عارفة ان انت رجعتي ذاكرتي لعشر سنين فاتوا من ساعة ما نزلت من جدة 13.6 سنة هناك من احلى وابدع ايام عمري ياريت تروحي تاكلي لي في البيك اللي في ش فلسطين ولا اكلي لي في كنتاكي اللي في شارع ولي العهد الاكل حتى الاشباع وبتروحي الفيروز لا دا انت عيشتك مرتاحة بقى واكيد بتروحي الحمرا وتاكلي في بلو لاقون يا باشا يا باشا والله وحشني الرز الافغاني انت عارفة انك محظوظة يوم ما كنت نازل ما صعبش على قد الاكل ههههههههه حمد لله على سلامتك

Anonymous said...

بحبك مووت يا ريم

Anonymous said...

انا نفسى اقطع ودان احمد سليمانااجرىاا صل يقطعو ليك ودانك الى عملة زى القطة

Anonymous said...

هاى انا بحبك مووووت اوى يا قلبى انتى عاملة اية واية اخبارك انتى عاملة اية فى الكلية وانت الواد الامووووور اوى تامر التليميز اخوك عبدوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووم