Saturday, September 09, 2006

كلنا ليلي- ظلم و قهر


هدى جارتنا من حوالي عشرين سنة كانت جاية عروسة جميلة و كان الجيران بيقولوا ان بيتها متوضب و فيه من الابرة للصاروخ و كان جوزها راجل تاجر صاحب محل في الازهر و كسيب و الاشية معدن
و بما اني كنت طفلة رغاية و حشرية فكنت لما اشوفها واقفة في البلاكونة بتاعتها اللي لصقة في بلاكونتي ميفرقش بينا غير دور كنت اقعد اكلمها و اسئلها و احكيلها اخبار البيت كله طابخين اية و ماما اتخانقت مع بابا و حنروح فين بالليل و و و لوكلوكلوكلوك
و هي كانت بتحبني جدا لدرجة انها سمت اول بنت جاتلها علي اسمي
هي في الواقع مخلفتش غير ثلاث بنات سمعت انها لما حملت في البنت الثالثة جوزها زعل و امرها تسقط الجنين
و هي علشان ساذجة و متعلمتش راحت جابت بيرة و قعدت تشرب قال اية ولاد ال...قالولها ان البيرة بتسقط
و طبعا و لا سقطت و لا بتاع و جابت بنوتة تالتة
المهم انها بعد حوالي خمس سنين من الجواز احوال جوزها المادية اتلخبطت و بدات تبيع حاجات من عفشها و بدات بالغسالة الاوتوماتيك المستوردة اللي كانت كل جارتها بتحسدها عليها
و تلاها باقي الاجهزة الكهربائية و بدء يبان عليها و علي لبس بناتها اللي كان كله شيك و غالي ان ظروفهم المدية اتدهورت
في الاول كنا فاكرين انها مسالة ارزاق و السوق يوم فوق و يوم تحت
و لكن عرفت الحقيقة لما عرفت من واحدة زميلتي في المدرسة انها بتشتغل عندهم شغالة باليومية و انها اضطرت تعمل كده علشان تصرف علي بناتها بعد ما جوزها ادمن المخدرات وبقي كل فلوسه رايح علي الحشيش و الافيون و جلسات المزاج
صعبت عليا جدا و سالت نفسي لية متطلقش منه و تسيبه و ترجع بيت اهلها معززة مكرمة
و كانت الاجابة محزنة ان مفيش بيت اهلها طبعا بعد عشر سنين جواز ماتت امها و بيت العيلة بقي بيت مرات اخوها و كل اخت و اخ ليها فيهم اللي مكفيهم و محدش ممكن يستحمل ست معاها تلات بنات بهمهم و مصروفهم
و استجدعتها قوي انها فكرت تشتغل و لانها زي ماقلتلكم مش متعلمة مكانش قدامها غير الخدمة في البيوت و كانت حريصة قوي انها متعرفش حد في الشارع انها بتشتغل خدامة علشان كرامة بناتها و رغم دخلها المتواضع الا انها مكنتش مخلية البنات نفسهم في حاجة كل اللي يطلبوه تدبأ و تجيبه
اما جوزها فاهمل تجارته و مبقاش يروح المحل و الحالة بقت ج
حاولنا نساعدها بشتي الطرق و رغم حوجتها الا انها كانت عزيزة النفس

السؤال
مين المسؤول عن اللي وصلتله الست دي من ضعف نظر و دوالي في رجليها و حيل مهدود و هي اللي كانت ست بيت بقت تخدم في البيوت!!؟؟
لحد امتي حتفضل الست عبدة لتصرفات جوزها و جنونه و استهتاره اللي مبيأذيش حد غيرها!!؟
مين الهيئة المسؤولة عن رعاية المتزوجات و المطلقات و الارامل و توفير فرصة عمل شريفة كريمة ليهم!!؟؟
و امتي وزارة الشئون الاجتماعية حتعرف ان الخمستاشر جنيه معاش الإعانة دي مبقتش تأكل عيش حاف!!!؟؟؟
القهر و الظلم و الحوجة
ثلاث وحوش بتنهش في لحم كتير من سيدات مصر و الحكومة و الاهالي واقفين ساكتين

لحد امتي الست حتفضل تعشش و الراجل يطفش!!؟


المدونة الأم

http://laila-eg.blogspot.com/

71 comments:

بعدك على بالى said...

للأسف ياكلبوزة .. هى دى يامصر

ليلى.. قهر وظلم وكبت

للاسف كتب على ليلى ان تعيش على

هامش الحياة والمجتمع على السواء، وللأبد

تحياتى ..
وكلنا مع ليلى ضد القهر

BaTaBeeT said...

:(
y3nee kaman mesh mekafeehom ya kalboza enena mak'horeen w homa wa7'den 7o2ohom
la2 kaman 3aizenna nesref 3alihom w 3la mazag'hom m3 en da mesh 7a2ohom asasan :(
law kol omm teraby ebnaha,..makansh da 7asal
bas kol om btefra7 ama betshof ebnaha bye3ml fi merato eli et3amal fiha zaman..
3adi. e7na mogtama3 3aiz yetrabba !

shaimaa said...

فكرتينى مرة كنا فى منطقة حوض 5 فى عين شمس و نازلين نعمل ابحاث لحالات فقيرة ووقف راجل زى الشحط او التور تقريبا
يقولى اصلى انا عندى 8 عيال
طيب بتشتغل
لا مش بشتغل
ليه يا عم
اصل عندى دوالى
طبعا لسانى لعب دوره ومسكته و بترصف منيين
الست بتاعتى بتشتغل فى البيوت
قلت له يعنى انت راجل زى الشحط كده و صحتك تهد جبال و ماسكة علبة السجاير و هى اللى بتصرف

طبعا اللى كانوا معايا كل واحد ديله فى سنانه و فكّوا منى قبل ما ننضرب

و الحالة دى منتشرة اوى فى المجتمعات الفقيرة و خاصة اللى فيها رب الاسرة بيحشش و لا بيشرب مخدرات و بياخد من رزق العيال و امهم
و الست مستسلمة
وتقول ضل راجل ولا ضل حيطة

يا ستى .. الحيطة ضلها احسن
وحسبى الله ونعم الوكيل فى اللى بيبهدلوا عيالهم و ستاتهم كده

قال رجالة قال

taty said...

اللي عمل فييها كدة يا كلبوزة
الانانية و الإستبداد
و الغرور اللي مخلين الزوج ميفكرش غير في نفسه
و ياريته بيفكر في نفسه تفكير ايجابي
و يفكر في بيته

شيماء ياريتهم يسيبولنا الحيطة تضلل علينا
هيبيعوها هي كمان مع كل المشاعر و الأحاسيس و الحاجات الحلوة اللي باعوها و مسحوها من حياة ليلى

M-i-D-o said...

السلام عليكم و رحمة الله و براكته
تحياتى للجميع و اولهم كلبوزة هانم و بدعيلك بالتوفيق يارب على الموضوعات الجميلة اللى انتى كاتبة فيها اما بالنسبة للموضوع اللى قدامنا ف الطرح فى الموضوع ده كتير جدا جدا و من الحكايات بدل الواحدة الف حكاية بس المهم الواحدة منكم تبص كويس قبل ما تختار انا كان قدامى تجربة واضحة ل واحد من زملائى و اكتر من اخويا قدامى شفته و خطيبته بترميله كلمة افسخ الخطوبة علشان عريس احسن منه طب ليه يمكن اللى انتى بتبيعيه دلوقتى ده هو اللى هايحبك و يحافظ عليكى و حكاية ليلى دى فعلا حكاية مؤثرة بس اكيد الحكاية دى واراها جواز تقليدى جدا مش تقليدى عادى يا جماعة يا شباب و بنات و هوانم و سيدات مش المهم ان الزوج يكون كويس اووحش عند اول زيارة لكن وراء كل عظيم امراة ما تنسوش الكلمة دى انتو النص التانى للدنيا و من غيركم الرجالة تضيع انا لغاية دلوقتى مش متصور نفسى عايش من غير امى دهلانى بدرس فى القاهرة و منزل الاسرة مش فى القاهرة و مش متصور مدى البهدلة و انا بتاثر جدا لما تكون المراة مضايقة من الراجل و علشان ايه مش متصورة ان الراجل يكون وصى عليها مع ان ربنا و القران و الرسول عليه الصلاة و السلام هم اللى قالو كده مش احنا ياجماعة لو الواحدة منكم وقفة ورا جوزها و خطيبها و حبيبها بجهدها و بتساعده و واقفة جنبه اكيد ها تلاقى منه كل احترام وحنان بس اللى بتختار غلط ذنبها على جنبها و لازم نبص كويس على شريك العمر لانها تابيدة باذن الله كده او كده و اما تكون تابيدة سعيدة و نفرح لكم او تابيدة مش حلوة و ساعتها ها نجرى ورا بعض فى المحاكم فكرو يا جماعة ولله العظيم هى الفكرة فى التفكير الكويس و التانى و صلاة الاستخارة و باذن الله فيها الشفا و تحياتى للجميع
و عاوز اسمع صوتكم باذن الله فى اجتماع بنعمله كل جمعة على الكونفرنس على الياهوو و بيجتمع فيه ناس بسم الله ماشاء الله و الهدف منها تنوير العقولو الاستفادة من أراء الغير
على الاميل الاتى
mido_amedo@yahoo.com

MAKSOFA said...

اللي وصلها للحاله دي ضعفها وأستكانتها ، لماذا صبرت وتحملت الي هذا الحد ؟ لماذا تركت نفسها الي أن ساءت أمورها هكذا ؟ هل ظروفها الأجتماعيه والثقافيه والتعليميه جعلتها أمرأه مسلوبه الآراده لا حيله لها ؟

arabesque said...

مش عارفة الوم الراجل جوزها ده على انعدام المسئولية و لا هي على سكوتها و لا أهلها اللي ماعلموهاش و لا المجتمع اللي ما وفرش سبل أكثر إنسانية لمساعدتها

الغـــــــــــــريب said...

أنت عارفه أن الزوج المدمن اللى بيعذب زوجته
بطريقه مهينه لو راحت القسم تشتكيه
فى الغالب بيقولولها روحى بيتك
المشكله كبيره جدآ ومحتاجه ثوره على فكر مجتمع مريض ورغم أن الدين الأسلامى كرم المرأه لكن مجتمعنا الشرقى أساء اليها
المرأه بتهان حتى خارج منظومة الزواج
من بداية نشأتها فى بيتها للمدرسه
للأستاذ فجله بتاع البنات
لمضايقات الشارع لتحرشات الشغل
وبعد كده يبدأ عذابها بمجرد ولادتها لأول طفل وتغير جسمها بفعل الحمل والأرضاع والولادة القيصرى الزوج يبدأ يقارن بينها وبين عارضات الأذياء ويبدأ فى هجرها والسخريه منها ومن جسدها
علمآ أنه بكرش بس مش مهم
ولو مخلفتش يبقا وقعتها زى وشها
كما لو ان الأنثى تم أختزالها فى أدوار معينه وتناسى الجميع عن قصد مشاعرها
و حقها فى العيش بكرامه
للأسف هو ده المجتمع الشرقى اللى بيميز الولد عن البنت فى المعامله من نعومة أظافرهم الى أن يكبروا
وطبعآ الشباب اللى ماتجوز ممكن يدخل المدونه يعملك فرح على الموضوع ده
و خدى عندك بقا كلام أنشا
ومش بعيد لو طولتى معاهم يقيموا عليكى الحد

Bent Masreya said...

الغريبة ان ستات كتير اوى فى مصر عاملات
وعاملات بالشكل المتعب ده

ومع ذلك ييجوا يقولوا الست بتخرج وتشتغل ليه، طيب ما هى لو ماشتغلتش ولادها هياكلوا منين.. وجوزها ما شاء الله سايب كل حاجة

الست دى ليها الجنة
الله يكون فى عونها

مشكلتها كمان، ان جوزها مش ممكن هيكون موجود بينا ويقرا الكلام ده عنها
لو اتكملن عن بنت بتعانى مشاكل مع والدها، يمكن نلاقى اباء كمتير هنا، ويلاحظ التصرفات دى ويطبقها على نفسه، لكن واحدة زى جارتك.. مين يقول لجوزها

شكرا يا كلبوزة هانم على التدوينة الجميلة والدعم الجميل :)

أحمــــــــدبــــــــــلال said...

كلبوزة
لا أجد ما أعبر به من كلمات عن موقف المرأة فى مجتمعاتنا
بالطبع نرغب بالتقدم و لكن يجب أن رنى أنفسنا فى المرآة لندرك اننا كائن ضخم و لكنه يحمل الكثير من الامراض التى سوف تتسبب فى فنائه و نهايته

المرأة فى النهاية ظلمها المجتمع
المجتمع الذى يسمح لمرأة بالذل و المهانة الى تلك الدرجة لا يحمل لها أى مكانة و أحترام بالرغم من الشكل الرسمى الذى يظهر بها المجتمع ألا أنه يحمل فى خباياه ما سوف يدمره



ياللأسف
و
ياللعار

سندباد مصري said...

والله المدونه المره ديه عكننه

حيث كده

لازم نعمل الواجب برضه عشان تعرفوا اننا في الحلوه والمره مع بعض

ومن هذا المنطلق احب اجاوب علي الكام سؤال الأخرانيين دول لعل وعسي

من المسؤول عما وصلت اليه تلك السيده؟

اتعرفين .. انا اري المتسببون كثيرون

امها وابيها ومجتمعها وهي نفسها وصلت بها الي تلك الحاله المزريه من الشقاء

كل يتحمل جزء صغير يبدوا تافها من الخطاء الكبير والوزر الفاحش

ولكننا تعودنا ان نتهاون مع الأخطاء الصغيره حتي تكبر وتتجمع فيبدوا انه لا حل في

اما لحد امتي هتفضل الست تحت طوع جوزها في الصواب والخطاء ؟

تفتكري فيه كام واحد عنده استعداد يقعد ويتناقش مع مراته الي هي غالبا ادني منه في مستوي التعليم أو علي الأكثر في نفس مستواه

وكذلك القدره الماديه والأجتماعيه وغير ذلك الكثير

سوف نظل هكذا حتي يتحول الزواج الي مشروع شراكه متكافئه ناجحه لا يهتم الشريكان فيه بمقدره بعضهما الأجتماعيه أو الماديه قدر حرصهم علي انجاح ذلك المشروع نفسه

دون حب يا كلبوظه اي شيء يبقي صعبا ومستحيلا دون اراده هي فقط احلام تنتهي حين تري الضوء وتخرج الي النور والواقع و تختفي

اما عن سؤالك الخاص بالهيئات

فأنت تحلمين فلا يوجد

وإن وجد فهو غالبا لا يصلح إلا كماده سخريه قد نضعها في احد المدونات ....في ايه يا كلبوظه دا انا كنت بقول عليك فاهمه ايه السؤال ده والله زعلت منك

اما عن وزاره الشئون الأجتماعيه

فلن ارهق اصابعي بكم الشتائم التي تتهافت علي لساني الأن حرصا علي بلوجك كي يبقي نظيفا خاليا من اي قذاره

وهتفضل الست تعشش لحد ما كل حاجه تتغير ونفهم ونتعلم ان طريقتنا كلنا في الحياه فيها حاجه غلط

اما عن الرجل فمش هيبطل يطفش ابدا

عقبال المرءه

بس تسيبها من حكايه الأكياس ديه

ويجعله عامر

والسلام

shady said...

هل اصبح الجواز نظام اجتماعى فاشل فى بلد ظروفها الاقتصادية ذى مصر وفيها حكومة ذى مصر

ايه يا جدعان الحل ايه؟

ME said...

آآآآه يا كل ليلى يحك عليكى زمنك براجل زى ده .. وظروف زى دى
جميل يا كلبوزة .. ومؤلم أوى

Aoossa said...

صباحه تعاوير
وجروح
وكلام
وسلام
وعيون تسهر
مابتنام
وعجبى

أوسه جاهين

KazaBaza said...

يعني بعد موضوع الخاطبة و الجواز
أكلنا الكشري
و بعد يومين من الفرح نتكلم في الحجات دي

طبعا عمر المجتمع عندنا ما كان عادل
لأننا بنهتم بالعرف اكتر من الدين

تحياتي الي كل سيده عانت و صبرت من اجل أبنائها

بس ايه الحكايه هو الي نازل كله ليلي
انتي و عوزه اتجوز و سوسه المفروسه
بالراحة يا جماعه شويه
يعني واحده تضرب و التانيه تلاقي مش كله ضرب ضرب

sha3'af said...

آهٍ على آهٍ على آه

ليلى لو ما كانتش حاطة في حسابها كويس جداا ان يكون لها استقلالها المادي و المعنوي من البداية ، يبقى أكيد هاتخسر كل شيء في النهاية

ليلى لازم تاخد بالها من نوائب الدهر : زوج يدمن ، يتزوج بغيرها ، لايبالي بها و لا بوجودها
أو عائلة تهملها ، و يبقى كل الأخبار المهمة اللي ممكن تقولها لهم عنها هيه في حقيقتها أشياء تخص زوجها أو أطفالها ، حيث ينتفي وجودها في ظلالهم ... فليس هناك من ليلى تضيق أو تتأزم أو يكون لديها مشاكلها

Nesrina said...

أنتى عارفة... الرسول صلى الله عليه و سلم أوصى بالنساء و قال "رفقا بالقوارير" ... نفسى الناس تفضل فاكرة الكلمتين دول.

الغـــــــــــــريب said...

أهداء الى كل ليلى


ليلى خرجت من صمتها
وحطمت كل مشربيات البيوت
عـــدت من فـــوق
جبال وركــام ألـــــــم
وسنين صــبر وســـكــوت
حلـــــفت ماتــزحــــف
أو فــ قــلب الخــوف
يوم تضعف أو
تمـوت
أدم الأبن والزوج والحبيب

safa said...

السلام عليكم, بصرف النظر عن أن مثل هذه الحالات تظهر فى الأسر الفقيرة لكن أنا وجدت حالات مشابهة من هذه الحالة فى أسر غنية و نتيجة ادمان الزوج للمخدرات أصبحوا فى حالة لا يرثى لها. قبل أن ندين الحكومة و الأزواج أنا شخصياً من وجهة نظرى بدين الزوجة لأنها قبلت هذا الزوج من البداية حتى لو كانت غير متعلمة, رسولنا الكريم عليه أفضل الصلاة و السلام كان أمى و لكنه قال" من جاءكم من ترضونه دينه و خلقه فزوجوه" هى القاعدة الأساسية للاختيار مش محل فى الأزهر و غسالة أوتوماتيك أو كان أفضلها لا تتزوج من أساسه و تفضل فى بيت أهلها بدل الشقاء التام التى تعيشها الآن مع زوج ليس لديه دين و لا خلق. الناس بتغلط و ترجع تقول الحكومة و هى كانت الحكومة هى اللى اختارته ليها و لا هى بنفسها اللى اختارت. معليش يا كلبوزة طولت عليك

أبو أمل said...

عشان ما نظلمش الزوج
لازم نبقى مطقيين
ونبص اعمق من الكلام اللى قلناه
شايف ان السبب اقوى من الزوج
السبب هو الحالة المتردية التى وصلنا إليها والفقر الذى نعانى منه
وإلا ما السبب الذى دعا الزوج إلى الإدمان
غيرر كم الإحباط الذى يعانى منه على جميع المستويات
بدلاً ان نلوم على احد الطرفين
يجب ن نعالج الموضوع من أساسه بأن يشعر الواحد بآدميته مما ينعكس على مشاعره ويعيش كفرد سوى فلا يلجأ إلى الإدمان

أبو أمل said...

كلابيظو
لو الواحد عاوز ينز صورة فى البروفايل بتاعة يعمل إيه
بالتفصيل
fathyhmdlh@yahoo.com

مفلس افندى الرايق said...

ايه يا جماعه الغم ده وانا اللى داخل المدونه بتاعت كلبوزه وقولت اروح اكل الرز باللبن بعد الكشرى واتارى الموضوع جد

ياجماعه لازم يبقى فى جهات مختصه مسئوليه عن رعاية الاسر والزوجه اللى زوجها يبتدى يتصرف باستهتار لازم يبقى له عقاب وفى قوه تردعه الرجاله جواهم جبروت والام هى اللى بتشيل الهم والراجل لو العيال ماتوا قدامه ولا ف دماغه الا من رحم ربى من الرجاله المحترمين

Sampateek said...

بعدك على بالى
اتمني ان نكون انا و انت و المتعلمات بمثابة طوق النجاة لامثال هذة الليلى
خالص تحياتي
----
BaTaBeeT
صحيح يا بطابيط و ده دورنا اننا نغير مفاهيم الجيل الجديد
----
shaimaa
لا عايزين ظل الراجل و لا ظل الحيطة
عايزين وعي الراجل يحمينا
و علمنا و دراستنا تقوينا
----
taty
تفسيرك سليم و لكن احنا محتاجين الحل تعمل اية دي هي و اللي زيها
----
M-i-D-o
اكيد الاختيار مهم جدا بس ازاي الانسانة الجهلة ممكن تحسن الاختيار
ده مشكلة جهل قبل ما تكون مشكلة اختيار
----
MAKSOFA
هي بدات تصبر لان مكنش في غير الصبر يا اما تشرب من البحر اصل حتعمل اية؟ لو بتقبض مرتب محترم من مكان محترم كانت قالتله مع السلامة يا لولو
لكن لانها محتاجاله زلها و جابها الارض
و المجتمع بيتفرج
-----
arabesque
صحيح معضلة صعب تحديد الضحية فيها و الجلاد
لكي الله يا كل ليلي
----
الغـــــــــــــريب
جميل تعاطفك معى ليلى يا الغريب
سعيدة ان هناك ادم غير متعصب
شرفتنا
----
Bent Masreya
اكيد هو عارف من غير ما حد يقوله المهم الناس كلها تسمع صرخة ليلي ونحاول كمجتمع دعم كل ليلي بتمر بظروف مماثلة
نورتينا
------
الي كل من شرفني
و دعمني
و دعم ليلي في صرختها
تحياتي و حبي

Sampateek said...

أحمد بلال
ادم يعترف بظلم المجتمع ل ليلي
سعيدة بشهادتك علي عصرك
لا تأسف فلم تعد ليلي تعاني الخرس العاجز
بل انفجرت ينابيع الكلام و لن تقف امام اي سد
------
سندباد مصري
تفوح منك رائحة ادم يا سندباد
لماذا تقول,,,,تفتكري فيه كام واحد عنده استعداد يقعد ويتناقش مع مراته الي هي غالبا ادني منه في مستوي التعليم أو علي الأكثر في نفس مستواه
--
ليه يعني دي دايما ليلي في نفس مستوي الرجل و اغلب الاحوال احسن منه
و بتقول كمان,,,امها وابيها ومجتمعها وهي نفسها وصلت بها الي تلك الحاله المزريه من الشقاء
يعني جوزها ملاك بجناحين ملوش اي ذنب
--
لن تترك ليلي الساطور مادام ادم هو ادم
الله يسلمك
-----
shady
لا الجواز مش نظام اجتماعي فاشل و لكن نظرة الرجل للست هي النظرة الفاشلة تحتاج الي نظارة
او ربما منظار
----
ME
انت اجمل
و الزمن مع ليلى
فقد اعطاها الفرصة ان تعبر و تصرخ
و الدور علي ادم يسمع
-----
Aoossa
صباحك ورد يا اوسة
لميت نصبة الكشري و طلعت الشاكوش
بحبك
----
KazaBaza
دي حملة مكثفة لاسماع ادم صوت ليلي
يا كل ادم
كلنا ليلي
----
sha3'af
صحيح لازم ليلي تدكن جزء من مصروف البيت في اليوم الابيض تحسبا لليوم الفوشيا
----
Nesrina
صدق رسول الله صلي الله عليه و سلم
خالص تحياتي
----
كلنـــــــــــــــا ليلى

Sampateek said...

الغريب
رائعة
رائعة
رائعة
اشكر لك تعاطفك
يا ادم
----
safa
نورتيني يا جميلة
و عندك حق في كل كلمة
لكي الله يا كل ليلى
----
أبو أمل
يعني خايف تظلم الزوج و مش همك الزوجة
ادم سيظل ادم
تحياتي
----
مفلس افندى الرايق
النهارده مفيش رز بلبن في ساطور و مسن و اكياس بلاستيك
سنذبح الصمت
و نقتل الخوف
و نعلن الثورة
وو اوعي وشك
--------------------------------
انتبه يا أدم
من ثورة ليلى

عبدالله مفتاح said...

طيب نبتدي الكلام بالصلاة على خير الخلق عشان الشيطان ميدخلش بينا
صلى الله عليك يا حبيبي يا رسول الله
هتكلم بالمصري مش بالفصحى عشان محدش يخاف
بداية انا شامم ريحة مش كويسه مش هقول ريحة ايه عشان المتصيدين ميمسكوش فيها
مبدئيا قريت معظم الكلام والمقالات اللي كتيت في موضوع انا ليلى
كلها مستخدمة الفاظ وتعابير مش موجوده في ثقافتنا العربية اولها الكلمه البغيضه اللي ادخلها جورج بوبر وامثاله وهي كلمه ذكوري
بالاضافه لجمل مقيته جدا كلها ترمي لنفس الهدف اللي هو البنت مظلومة ومقهورة
مفكرتوش في الراجل اللي يبقول لمراته متشتغلش بيكون قايلها كده عشان ميجبلهاش البهدلة
راجل بيرضى لنفسه البهدلة ولاة ان راجل (مدير او ما شايه يدايقها بكلمه
الراجل ده بيبص لمراته فعلا على انها ملكه متوجة على عرش النساء وبيكون حاسس ان الشغل ده مش ليها
هو بس اللي يتبهدل لكن هي لا
اشتغلت فترة في شركة كان الراجل بيبقل الذل والله وكان بيشتغل 5 ساعات بالليل مقابل 200 جنيه وكان بيرفض دايما ان مراته تشتغل
لكن طبعا المقالات اللي تناولت الموضوع ده تناولت نموذج الرجل السيء حاد الطباع كعادة كل المقالات اللي بتتناول الموضوع ده
عن نفسي بشكل شخصي انا لو طلبت من من مراتي متشتغلش مش لاني بقلل منها اطلاقا انا عندي استعداد اشتغل اليوم كله ولا اني اشوف مراتي مدايقه
انا وامثالي ذلك الرجل الذي تتحدثون عنه
لكن انا بقدر المراه جدا والموضوع مش تشتغل او متشتغلش الموضوع ان مهمة المراه الاولى في الحياة بيتها ده موضوع مفروغ منه طبعا هتقولولي ده بعد ما تتجوز طيب قبل الجواز؟
قبل الجواز بتكون بتشتغل
ما عيلنا طبعا الكلام ده هيقابله سيل من الاتهامات
لكن والله لو حد قرا القران هو موضح جدا راي الدين في عمل المراة اللي انا مش ضده مبدئيا
قصة سيدنا موسى
ما خطبكما ؟
البنتين مكانوش واقفين بيزاجموا الرجاله
كانوا واخدين جنب\
ولما سالهم ما خطبكما
قالو لا نسقى حتى يصدر الرعاء .... يعني مش بنزاحم الرجاله
والسبب؟ ابونا شيخ كبير
يعني لولا ان ابوهم شيخ كبير مكنوش هما طلعوا واشتغلوا لان الشغل مهمة الرجاله
يبقى عمل المراة مش حرام لما يكون في داعي ايا بقا كان الداعي
بس مفيش واحده تقول الداعي هو تحقيق ذاتي وتعمل بيتها
ده بخصوص العمل اللي انتي اتكلمتي عليه يا سوسة
الفكر اللي انتوا بتقولوه ده يا جماعه بيبتدي بكده وبينتهي بنوال سعداوي واقبال بركة
على فكرة انا تقريبا قريت اغلب كتب نوال سعداوي
والله معظم الكلام اللي اتقال مكتوب بنفس طريقة نوال سعداوي
نفس طريقة التفكير بتبدي كده وفي النص بنتحايل على الدين وفي الاخر نتطاول على الدين
مش بقلكم انا شامم ريحة وحشه
وبما انكم كلكم زي اخواتي فانا بنصحكم بلاش تمشوا على خطى هدى شعراوي ونبويه موسى
مش ملاحظين ان جوازات زمان كانت سعيده ودلوقتي معدلات الطلاق زادت جدا
احد اهم الاسباب ان البنت عايزة تاخد اكتر من حقوقها ومش عايزة تادي واجباتها
بجد والله انا خايف عليكم
بس الطريقة اللي بتفكروا بيها غلط
ولو مليتوا بيها نفوسكم هتخسروا كتير اوي
ذكوري؟ يا خبر
يلا كله على الله

LAMIA MAHMOUD said...

حقيقي ان الست دلوقتي احسن من الراجل وعشان كده بيحاول على قدر الامكان انه يقلل منها لانها فعلا بقت اعلى

Epitaph said...

يا يا ليلي
كلنا موجعينلك

كلنا معاكي

كلبوزة انتي رائعة

soosa el-mafroosa said...

نص الرجاله في الطبقات الفقيرة على فكرة بأو عايشين من عرق مراتتهم ..مش عارفه يا شيخه ..الراجل الفران اللي كنا بنجيب منه العيش فرنه وقع و بدل مايدور على شغل قاعد ع القهوة طول النهار و الليل و مراته بتشتغل في البيوت و هو بيراهن بفلوسها على ماتشات الكورة

يل بنتي ..النخوة ماتت

Hope said...

This story is very common. Not necessarily because the man became a drug addict, but many times because he became unemployed or even deserted the family.

Abdullah Muftah,
postulates that women work to prove themselves. While there is nothing wrong with that, the truth is that women HAVE TO work because in this day and age they cannot garantee there will be a man to work and provide for them.

It is essential that girls get a solid education and grow up to be financially and emotionally independant.

شــهــروزة said...

للمرة الالف ياقووول
لااااااااا لنموذج نوال السعداوى يا اخ مفتاح علشان منخلطش الامور
هو يا اما اماء وجوارى يا اما نوال السعدواى وهالة سرحان؟؟
ورينا بقا ثقافتك الدينية بتقول اية فى النموذج اللى عرضته كلبوزة
جتقول لى التفانى؟؟
هو البية متفاناش لية من اجل اسرته واكتفى بالتفانى فى المقاهى والغرز
حتقول لى تسانده؟؟ طيب ماهى ساندت بناتها وهى اخر الليل ترجع محنية الضهر والبية ياخد من عرقها ويشرب ويعمل دماغ
ورينى بقا ثقافتك الدينية حتنصف واحدة زى دى ازاى

-------
معلش يا كلبوزة يا حبيبتشى اصل الاخ مفتاح لقيته فى كام مكان كدة عامل نفس النشرة دى وانوال السعداوى وبتاع
عصبنى اللة يسامحه
حسسنى اننا عاوزين نعمل عمليات تغيير جنس ونغير
------
اموووة على مخاميخك السكر

Sampateek said...

عبدالله مفتاح
اللهم صلي و سلم عليك يا نبي
شرفتنا و نورتنا يا ابو المفاتيح و ان شاء الله الشيطان ملوش مكان بينا
بص يا سيدي و ما ستك الا انا
الراجل اللي مش مكفي طلبات بيته و حاوج مراته لغيره ملوش حق يقولها متشتغليش امال تجيب طلبات اولادها منين انما الراجل السكرة البلسم اللي مش عايز يتعب مراته ده انقرض و الباقي منه اتنين تلاته يتعدوا علي صوابع الرجل الواحدة
و صدق القران الكريم في وصفه لابنتي عمران بان العمل للضرورة مقلناش حاجة
و القصة اللي في البوست بتوضح ان الست ليلياو هدي متفرقش اضطرت تشتغل علشان جوزها ادمن و اهمل عمله فمفيش اختلاف في الراي بالعكس انا اوافقك تماما
و ما عاش و لا كان اللي يتحايل علي الدين الدين اولا و قبل كل شئ
و بعدين يا سيدي متزعلش و لا ذكوري و لا انثوي
نحن في عالم ادم و ليلى
شرفتنا
----
LAMIA MAHMOUD
انا ضد اطلاق التعميم
في ستات كويسة و في ستات وحشة و في رجالة كويسة و في رجالة وحشة
عادي كلنا بشر المهم ان ادم يسمع هموم ليلى و يناقشها بموضوعية
-----
Epitaph
و انتي سكرة
دايما منورة
-----
soosa el-mafroosa
ايوة اصله لما كان صغير كانوا بيسألوه تحب لما تكبر تبقي اية يقول
حتجوز و اقعد في البيت
تحياتي
-----
هوبي
تعددت الاسباب و الضياع واحد
ادمن اترفد جاتله حصبة الماني
المهم مفيش عائل و الست مضطرة تشتغل علشان تصرف علي بناتها
تعمل اية؟
----
شهروزة
عسولة يا جميلة
انا ارفض اي نموذج لست تجنب الدين او تخرج بدعاوي تحررية عمياء
انا مسلمة و احب ديني و ربي و رسولي
و اول شئ لما بختلف مع جوزي بحكم امر الله
و اللي في قراني علي رقبتي
و ربنا علي ما اقول شهيد
بحبك
----
اناشدكم ايجاد حل لكل ليلى تحولت بالاكراه الي ادم مسؤوول عن مصروف بيته
كيف نوفر لها عيشة كريمة في مجتمع مثقف
دون دفعها للحرام
حلوها معي

moorgen said...

هىىىىىىىىىىى

طول ما البلد حالها مايل ومافيش رقابه على حد ومفيش اهتمام بالناس اللى عايشين فى البلد هايبقى الحالات اللى زى هدى دى مش هاتنقرض بل هاتزيد
ولا حكومه حاسه ولا شئون داريه ولااصلاح نافع الاحوال بتدهور

زمان كان فيه حاجة اسمها بيت المال بيصرفو منه للمحتاج او اللى ظروفه مش سامحه فين دا عندك
وكان برضه الراعى مسئول عن الرعيه واحوالهم مش الراعى ظالم وناهب حق الرعيه
والحمد لله انها حافظت على نفسها وما نحرفتش كدا اهون
عموما مش هانقول سوء اختيار للزوج
بس اللى يعرف ربنا هايراعى بيته واهل بيته
واقول ( لو علمتم ما فى الغيب لاخترتم الواقع) دا نموذج من نماذج كتير لو دورتى هاتلاقى اشد الم منها

Sampateek said...

moorgen
فعلا عندك حق
طبيعي انها تختار غلط لانها جاهلة و المجتمع مسؤوول عن ده
نورتيني

أحمــــــــدبــــــــــلال said...

بعض الرجال يمنع زوجته عن العمل لمجرد عدم الثقة فيها
و خوفاً من أن يحدث لها ما يحث للأخريات فى اعمالهن و الذى يفعله هو نفسه فى بعض الاحيان من كلام أو نقاش أو ضحك و هزار مع نساء متزوجات

أوافق مفتاح على كلامه و لكن ليس كل الرجال يعتبروا زوجاتهم ملكات متوجات بل جوارى وضعوا لخدمتهم

أستشهادك بقصة سيدنا موسى عليه السلام مع الفتاتان التى ستصبح أحداهن زوجته فيما بعد
لا يعنى أن هذا طبع الرجل
أضف الى ذلك التغيرات الأجتماعية و السياسية و النفسية و الأقتصادية الثقافية التى مرت على الرجل كل هذا الزمن منذ سيدنا موسى

حتى الآن

إ بـ ر ا هـ يـ م said...

و الله يا كلبوزه الامثله كتير بس انا شايف انها هي اللي اخطأت في حق نفسها لانها من البدايه مكنتش ليلي و كمان محولتش تكون ليلي

Abdou Basha said...

أنا شايف ان برضه بيفضل للإنسان مساحة في تحديد طريقه ومستقبله أيا كان نوعه راجل أو ست وأيا كانت صفته أو انتماءاته.....

عموما احب أحييكم على الفكرة دي..

gwad said...

الى كل المقهورين اذا كانت ليلى اوحسن
يا شباب حالة ليلى فردية بصوا وشوفوا المجتمع المجتمع كلة مقهور
احنا مربوطين فى ساقية
والساقية مش بتقف
لا دى بتزود سرعتها وتفرم الى ميقدرش يسايرها
لكى الله يا ليلى

sahar said...

اذاي واحدة تعيش بالشكل ده في بلد بنقول عليه مسلم المفروض انه فيه تكافل اجتماعي وبلد ذي بلدنا مليان اغنية ومليونيرات ليه مايبقاش فيه جمعيات اهلية تساعد الناس دي وتوصلهم اعانات ربنا معاها يارب ويعينها هو اقدر من اي حد علي اعانتها

tota said...

كلبوزة العزيزة

طبعا ليلى الضعف الانسانى المتكرر نتيجة لمجتمع متمسك بعادات وموروثات واهية وبالية وقديمة لم تتغير برغم تغير الظروف
حالة الجارة البائسة متكررة جدا لان الست الفاضلة ماما سوزان لم تهتم بعمل شىء يخدم المراة بحق
السيدات وزيرات التأمينات والمعاشات السلبيات لم يفعلن شىء سوى الاحتفاظ بكرسى الوزارة اطول فترة ممكنة
لن يتغير المجتمع الا اذا ليلى تغيرت وتحررت من خوفها ونفضت عنها خوفها بمساعدة ادم والحكومة

شكرا يا كلابيظو على انك فكرتينا باوجاع غيرنا اللى نسينها ومهمومين بنفسنا وبس
تحياتى

Reformer1976 said...

أول مرة أدخل عندك يا كلبوزة لكن قريتلك كومنتات كتير قبل كدة
وأنا أعلن إنني مع ليلى إلى النهاية
(بس هوا فيه هاية أكثر من اللي احنا فيها)
كان نفسي حد منكم يا بنات يمتلك الجرأة وكان يناقش الطامة الكبرى اللي هي ختان الإناث
بس واضح إنكم لسة بتتكسفوا تتكلموا في الحاجات دي
ابقوا قابلوني بقى لو خدتو حقوقكم وانتم مش عنكن الجرأة اللي تفتحوا فيه موضوع ختان الإناث

أشكرك إنك رديتي على الأخ مفتاح وثبتيه
العقلية الوهابية المرائية دي هيا اللي جابتنا وجابتكم معانا ورا

أكرر ما قلته في مدونة سوسة
يا عزيزيتي كلنا في مصر ليلى
والرجالة ليلى قبل الستات كمان
معرفتيش؟
مش الحكومة لبستنا كلنا طرح؟
والواحد فينا بعدما اتخصى معنويا ما بيعملش دكر إلا على ليلى الغلبانة اللي في البيت

نيابة عن كل الرجالة الأغبيا في ها البلد الغبي
أنا آسف يا ليلى
حقك عليا

sara said...

فكرتينى يا كلبوزة بواحده اسمها امال كانت وانا صغيرة اوى مازالت لحد دلوقتى بتيجى توضب لتييته البيت
مره كانت تبتتكلم مع تيته وقالتلها ان باباها كان اكبر تاجر جمال فى بلادها
ممكن كانت بتسرح بتيته
بس الست دى جوزها مش شغال اساسا ومخلفه منه اولاد كتير وبنت اسمها ياسمين البنت دى مش معمولها شهاده ميلاد وساقطه قيد ومجوز عليها ومراتاته هى اللى بتصرف عليه وبتجبله سجايرة
المهم الست دى كانت بتيجى وتورى تيته الكدمات اللى فى جسمها من ليل امبارح ودى حاجه ما كانتش اكيد بتسرح بتيته فيها..

Aoossa said...

هو فيه أيه
متسمعونا زغروطه حلوه
وبعدين كل مادخل بلوج
عم المفتاح عمال يتكلم ويشبه بنوال السعداوى والتانيه دى
زى ماتكون الدنيا أقتصرت على النوعيات دى ، وبعدين مش زنبنا أنك طول النهار ماسك كتاب نوال وقاعد تذاكر و داخل حامى كأنك داخل مناظره
الدين الأسلامى كرم المرأه وأنت بتشبها بالسعداوى
لا يااامفتاح يابنى مش كده
عامل زى أودى اللى جاى يقول كلام غريب أن الراجل مش لاقى شغل بسبب ليلى
ياعم الأرزاق بالله
كلبوزه معندكيش حتة فسيخ فاضله من أمبارح أصلى جعانه
أنا لما حد ينرفزنى بجوع على طووول
خاصة لو الشخص مش قدامى ومش عارفه أهبشه من ودنه
على العموم أنا ماشيه وراجعه تانى أى حد هايهجس يا ويله مفيش ديمقراطيه بقا
عواااف

مفلس افندى الرايق said...

بعد اربعتاشر سنه خدمه فى مدونتك ومتحمل شغل البيت وانا ساكت تقولى اوعى وشك طيب ازاى عيونى تتحرم من رؤيتك يا سمباتيك ثوانى ههههههههههههههههه

مش هاوعى وشى واللى هيتكلم هيتعور

مفلس افندى الرايق said...

انا جعان يا كلبوزه ونفسى اشرب من الترعه وابل رجلى والشراب يبقى مبلول وامشى واقول

انالك على طول

خليك ليييييه

وشرابى مبلول

يا كلبيزو رد عليه

Violena said...

حين يختفى الحد الفاصل بين حقوق الرجل وواجباته ستتكرر هذه المأساة

لا املك احصائية توضح عدد النساء العاملات والمعيلات لاسر قد يتعدى عدد افرادها 10 .. لكنى اراهم كثيرات ولا تكفى معاشات الشئون لحفظ كرامتهن للاسف

أُكتب بالرصاص said...

الحالة الاجتماعية ، والثقافية بل والتعليمية هي اللي بترسم رد فعل الست للتعامل مع مثل هذه الامور ،


يعني مش بطولة من الست ليلي ، انها تروح تشتغل في البيوت علشان خاطر بناتها ،

يمكن لو لاقت بديل تاني كانت هتتصرف،
انما الحالة الاجتماعية فرضت عليها كده

لا أنكر ان هناك ليليات كثيرات ،

وعند تفضيلهن بين عدة خيارات بيختاروا برضه خيار التضحية

وظل حنفي ولا ظل حيطة

واللي تشوف حنفي غيرها
يهون عليها حنفيها

nirfana said...

هذا هو الواقع الاليم .. لنظل نناشد ونرفع صوتنا لعل يوما ما يسمعنا احد



تحياتى

منار منجد said...

لحد ما نفهم
ان تعليم البنت أهم من تعليم الشاب
ونفهم ان الزمن ممكن يجور على البنت
سواء بزوج سئ، أو حتى بفقده عن طريق الوفاة..


لحد ما نتخيل، مجرد نتخيل ان البنت تركيب دمها نفس تركيب دم الرجل
صباح الخيرات

nefertiti said...

كلبوزه أنا حاسه أن الشمس ستشرق من جديد بس محتاجة شوية صبر وربنا معانا

bosbos said...

و طبعا طبعا لو هدى فكرت بس مجرد تفكير انها تسيبه و تهرب هي و بناتها من انحلاله و دماره كل مش هتترحم من المجتمع و هيقولو اهي خليت بجوزها و باعته و مش بعيد كمان يحملوها مسئولية فشله و ادمانه كمان

ربنا يتولاها

Sampateek said...

أحمدبلال
انت صوت العقل يا احمد
صحيح كلامك
المشكلة في رغبة الست انها تشتغل ام لا المشكلة في اضطرارها انها تشتغل غصب عن عينها علشان الراجل نفض ايده
----
إ بـ ر ا هـ يـ م
هي غلطانة و بنت ستين في سبعين
و الراجل جوزها فلة و وردة مفتحة
وصلت المعلومة يا سي ادم
----
Abdou Basha
الله يحييك
بس مش دايما بايدك تغير مسار حياتك
----
gwad
نحن الان بصدد حملة لجمع الاصوات مع ليلي و لسة الحملة الجاية ان شاء الله نبقي نكفل رجل في بيتنا
تعاطفك لوحده مش كفاية
----
sahar
تساؤلك في محلة يا ام احمد
انا خايفة نتسال عن الست دي و غيرها من الارامل و المحتاجين
----
تحياتي و احترامي للجميع

Sampateek said...

tota
انا اللي اشكرك علي كلامك الرقيق و حضورك المتزن
وزيرات الشئون لو جربوا يشتغلوا في البيوت حيطلعوا قرار بصرف معاش للشغالات الف جنية شهري
لابد ان تنقلب الاحوال و لو يوم في السنة ليشعر كل منا بالاخر
----
Reformer1976
اتمني متكنش اخر مرة
و انا اعتقد ان ختان البنات لو يعد من مشكلات القمة فاغلب بنات العصر لم يغتلن
مرحبا بالطرحة لليلى
و لا عزاء لادم
----
sara
الامثلة كتير يا سارة و طول ما في ادم حيفضل في ليلى
المهم امتي يحس علي دمه بقي
---
خالص احترامي و تحياتي للجميع

Sampateek said...

Aoossa
لا مفيش اكل خالص دلوقتي ده ميعاد الشاكوش
و انا عاملة زي صبي المحامي فارشة ترابيزة و شمسية و قاعدة الم كومنتات و ارد عليها و لابسة منديل علي راسي و فوقية الطربوش و المنشة في ايدي
مينفعش فيسيخ خالص دلوقتي استني المدونة الجاية
قبلاتشي
----
مفلس افندى الرايق
انا بس خايفة عليك
يجيلك و يحط عليك
ينزل كومنت علي رجليك
او يخبط شاكوش في ايديك
علشان كده بقولك اوعي وشك
بس مش قصدي اهشك
-----
مفلس افندى الرايق
مش وقت معاكسة يا رايق انا رافعة راية ليلى
لما اخلص كومنتات ابقي اجيلك و انا شايلة
صينية شاي بنعناع و شوية قراقيش بالية
----
Violena
ايوة حلوة قوي الجملة دي
حين يختفى الحد الفاصل بين حقوق الرجل وواجباته ستتكرر هذه المأساة
صراحة هو شايف ان ليه حقوق بس و كلمة واجبات دي مش في قاموس ادم
----
أُكتب بالرصاص
صح كلامك يا سي ادم
لا فض الله فوك
شرفتنا
---
خالص احترامي و سلامي للجميع

Sampateek said...

nirfana
خالص تحياتي
---
منار منجد
صباح النور و الورد عندك حق
---
nefertiti
خلاص اشرقت بيكم نورتي
----
bosbos
ايوة و الله عندك حق و بعدين تهرب فين
لكي الله يا ليلى
---------------------------
ما اجمل العالم بكم
تحياتي

مفلس افندى الرايق said...

انا مابخفش من الشواكيش

انا من غيرك ماقدرش اعيش

ولو سيبتنى ف نار الوحده

راح انحرف واشرب حشيش

وشيش شيش شيش

Sampateek said...

مفلس افندى الرايق

كل ما اهشك مبتتهشش
و لا ادبك مبتتهدش
امشي يا افندي
روح اتمشش
ههههههه
-----
زجل برئ لصديقي اللدود

سندباد مصري said...

بالفعل انا ادم

لماذا انكر

وانا ايضا ابن هذا الجتمع واحد افراده المكونيين له

ليس بالطبع زوجها ملاك

ولكنه ليس شيطانا

لا يوجد ملائكه ولا شياطين بيننا كلبوظه

فقط خليط بين هؤلاء وتلكم

واخده بالك من تلكم ديه

تفوح مني رائحه ادم لأنني ادم

وتفوح منك رائحه حواء لأنك كذلك

اتتهميني

اذن انا اعترف

ادافع عن الرجل الذي لم يأخذ فرصته بالدفاع عن نفسه امامنا

انت هاجمته وهاجمت كل الرجال حتي اصبحت تهمه

وهي لعمري فخر كبير

نعم انا رجل لست احتقر المرئه ولا احتقر قدرها بل احترمها ولكنني كذلك احترم نفسي ولا اخاف ان اواجه هذا

اعلنتم الحداد واطلقتم الرصاص من اجل خطاء لرجل ليس وحده المنوط به

اتظنون الرجل احب فقره وما وصل اليه

ان س~لتموه سوف تحصلون علي روايه اشد قسوه من التي ترويها زوجته المظلومه

وربما تعاطفتم معه ايضا

هوني علي نفسك كلبوظه

ولا تكرهيني لأنني رجل ادافع عن بني جنسي

ولي بالطبع الحق في الخوف ممن هم يحملون الساطور ويتطلعون الي الأنتقام

والسلام

BaTresYa said...

ربنا مع الجميع ..صدقوني ربنا مش بيسيب حد

BackBone said...

ياخاااااااااااااااااااالتي:ـــــ

لو تسمحيلي انا هستغل الود اللي بينا و ارد علي بعض الاراء

ده علي الرغم من اني زعلان منك علشان طرحت الموضوع بمثال لراجل قذر بشغل مراته و ياخد فلوسها.في حين ان امثلت الستات اللي استغلوا اجوازهم وبيعوهم اللي قدامهم وهربوا بالعيال مليا المحاكم برده.ـ

ان رائي عموماً في موضوع عمل المرئه, ان الست لازم تشتغل علشان نفسها و الفلوس اللي تجيبها تصرفها ذي ماهيه عايزه, بس لازم تشتغل علشان حاجات كتير قوي منها انها تاخد خبرت الحياه في التعامل مع نوعيات مختلفه من البشر, و بعدين افرضي ان جوزها مات (زي ابويا) يبقي لازم تشتغل علشان متبقاش تحت رحمت الظروف...و طبعا كل حاجه و ليها راوبط, و يفضل الشغل اللي ملوش احتكاكات مباشره بالعملا, يعني يكون الاحتكاك مع الرؤساء و الزمايل اي كان عددهم.


soosa el-mafroosa:
النخوه ماتت!!!!!!!!!!!!!!ـ

بلاش تعمييييييييم لو سمحت, ذي مافي رجاله متستهلش غير كلمت ذكر, فيه برضه ستتات تستاهل ضرب النار. وكلاً منهم لا يجب اتخاذه علي انه مثال معمم.


شهروزة:
طب وهوه يعني الرجل ملوش في نظركم غير انه بتاع قهاوي وحشيش او عاجز جنسياً.

انا ارفض التعميم في كل شئ. لاكل البنات المتحررات "نوال السعدواى" و لا كل الرجاله بتوع حشيش و بيكلوا عرق مراتتهم.
وبطلي نرفزه ونتكلم بالعقل. الدين بحفظ للمراءه حقها و زي مابيقول للست لاء لازم تطيعي جوزك بيقول للراجل لاء لازم تحترم مراتك و تخطي اي من الطرفين حدوده بيعتبر تعدي علي الدين.

و ملحوظه صغيره: "ورينى بقا ثقافتك الدينية حتنصف واحدة زى دى ازاى" لو عايزه فعلاً تعرفي يبقي تسألي اهل علم من اصحاب المساجد او تشتري كتب و تقريها, مش تتكلمي بتهكم كده علي الدين او الثقافه الدينيه.ـ

sahar:
مهوه ده اللي عاملين نقوله, البلد بيتقال عليها مسلم و مفيش اي حاجه تانيه فيه بتخضع لقوانين الاسلام, و بصراحه بقه لازم نانخدوا كله لان مينفعش نسيبه في حاله, انما نظاما اسماً بس ده مبيجبش غير السمعه الهباب للاسلام و المسلمين.

Reformer1976:
انا برده قريتلك في كذا مدونه بس لسه مدخلتش عندك. كلنا بنرفض حالة ليلي و كلنا عايزين نغيرها و نمنع حدوثها.
موضوع الختان ده يعتبر موضوع خارج مجال المناقشه في البوست ده, و انا كمان اتمني اناقشه رغم انه قتل بحثاً فعلاً و لن يزيد الكلام عنه في هذه المدونه المحدوده نسبياً شياءً.

بس مين اللي قالك ان عبد الفتاح ده شخصيه وهابيه و مرائي كمان, بمعني اخر انت مين اداك الحق عشان تحكم علي حد بالصفات ديه. انا ضد اي نوعية من التصنيف بأن فلان ده كده شكلوا شيوعي نتن او رأس مالي متحزلق, حاول توسع افقق و تستوعب تباين الافكار من غير تصنيف.


ياخااااااااااااااالتشي,
عجبني ردك في الكومنتس قوي, و بس برده واخد علي خاطري حته زغنونه قوي قوي علشان طرحتي الموضوع بالكيفيه ديه و انا عارف اد ايه انتي تفكيرك واسع و ثقافتك عاليه, وعارفه ان مينفعش ناخد زريعة من مواقف فرديه الي تعميم قضيه مهمه ذي ديه, نبقي عملنا ذي الحملات الصليبيه لما دخلت بدعوي تحرير القدس و اول لما دخلت قتلت كل ساكنيها علي اختلاف ديناتهم و اعتقادتهم.

بالعربي متمشيش ورا حد و تناصريه لانه فقط يتفق معك في قضيه معينه, لانه لما هيمسك السلطه هيمشي يقتٌل في كل اللي في البلد.

و تحياتي و وحشتيني

Anonymous said...

لو عايزين تعرفوا اشد صور الظلم و القهر ضد المرأة ابحثن عن رواية الاديب المغربى "الطاهر بن جلون" la nuit saccree و اسمها بالعربية "ليلة القدر" و انت تشوفى العجب و ممكن تنزليها على مدونتك لكى يرى الجميع ما بها على فكرة الاديب قال فى حوار مع مجلة انها قصة ""حقيقية"

Anonymous said...

صحيح نافصات عقل ..
ربنا يشفى .. و ربنا يرحم الرجال الذين يعاشرون نساء من صنفكم

روحوا عالجوا نفسكم نفسيا افضل من حالة الفشل و الإنهزامية اللى ماسكاكم

Anonymous said...

بطلوا نظرية المؤامرة دى و نظرية الشماعة و تعلقوا فشلكم على شماعة الرجالة .. يا ريت كل ليلى تدور على السبب الحقيقى لفشلها و تعاستها علشان تعرف تعالجة

Sampateek said...

Anonymous


كل السعادة و الانشراح
اقول
لك







اتنيل




متجيش هنا تاني ياد
لما تعرف تكتب اسمك ابقي تعالى

Anonymous said...

ايوه كدى اظهرى على اصولك و طلعى الردح المستخبى جواكى .. برضه الأسم ؟ شوف التماحيك البلهاء .. حاورى الفكرة يا شاطرة .. هذا حوار المروض انه فكرى .. اى نعم انتن تتناولنه بطريقة حريمى مفعصة و خايبة و فاشلة كعادتكن .. لكنه فى النهاية فكر .. فكر ضال .. و ربنا يكون فى عون الرجالة الذين يعاشركم

Anonymous said...

طيب ما اللى قبلى كانت انينوموس برضة .. ما كلمتيهاش ليه ؟؟ و لا دى كوسة ؟؟ اهى بتستشهد بكتاب كتبه (راجل) .. و بعدين انتى حاطة صورة قطة ليه ؟؟؟!!!! انصحك تحطى ثورة افعى .. ان الأفاعى و ان لانت ملامسها .. عند التقلب فى انيابها العطب

يغلبن الكرام و يغلبهن اللئام

Sampateek said...

اللي مايتسماش



ولا










حعبرك




:))

Anonymous said...

قصر ديل يا أزعر

مانتى مش لاقية حاجة تقوليها و مش عارفة تردى ازاى .. مع انك كنتى من شوية عاملة زى الباربانط .. هاهاهاه ..

Anonymous said...

يا كلبوزة الرجوع للحق فضيلة .. لا تأخذك العزة بالإثم .. ياريت تصلحى موقفك .. فكرى

milf said...

black mold exposureblack mold symptoms of exposurewrought iron garden gatesiron garden gates find them herefine thin hair hairstylessearch hair styles for fine thin hairnight vision binocularsbuy night vision binocularslipitor reactionslipitor allergic reactionsluxury beach resort in the philippines

afordable beach resorts in the philippineshomeopathy for eczema.baby eczema.save big with great mineral makeup bargainsmineral makeup wholesalersprodam iphone Apple prodam iphone prahacect iphone manualmanual for P 168 iphonefero 52 binocularsnight vision Fero 52 binocularsThe best night vision binoculars here

night vision binoculars bargainsfree photo albums computer programsfree software to make photo albumsfree tax formsprintable tax forms for free craftmatic air bedcraftmatic air bed adjustable info hereboyd air bedboyd night air bed lowest pricefind air beds in wisconsinbest air beds in wisconsincloud air beds

best cloud inflatable air bedssealy air beds portableportables air bedsrv luggage racksaluminum made rv luggage racksair bed raisedbest form raised air bedsaircraft support equipmentsbest support equipments for aircraftsbed air informercialsbest informercials bed airmattress sized air beds

bestair bed mattress antique doorknobsantique doorknob identification tipsdvd player troubleshootingtroubleshooting with the dvd playerflat panel television lcd vs plasmaflat panel lcd television versus plasma pic the bestThe causes of economic recessionwhat are the causes of economic recessionadjustable bed air foam The best bed air foam

hoof prints antique equestrian printsantique hoof prints equestrian printsBuy air bedadjustablebuy the best adjustable air bedsair beds canadian storesCanadian stores for air beds

migraine causemigraine treatments floridaflorida headache clinicdrying dessicantair drying dessicantdessicant air dryerpediatric asthmaasthma specialistasthma children specialistcarpet cleaning dallas txcarpet cleaners dallascarpet cleaning dallas

vero beach vacationvero beach vacationsbeach vacation homes veroms beach vacationsms beach vacationms beach condosmaui beach vacationmaui beach vacationsmaui beach clubbeach vacationsyour beach vacationscheap beach vacations

will said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人