Friday, November 24, 2006

فلان القـــــــــرد

من وحي الخيال:

كان لا يتمتع بأي قدر من الجمال بل أنه كان معروفا في الحي و العمل و من قبلهم المدرسة و الجامعة بفلان القرد فقد كان وجهه قريب الشبه بالقرود علاوة علي شعره الكثيف الذي يملأ رأسه و يظهر ممتدا من صدره الي رقبته و كان صوته الأجش يكمل الصورة و يلصق به اللقب عن جدارة ,كان فلان القرد رجلا طيب يعيش في شقة في حي متوسط وحيدا بعد أن ماتت أمه و فشلت محاولاته في العثور على عروسة ترضى بأن تكون زوجة القرد و كان في الصباح يذهب الي العمل و في المساء يتجول في شوارع المنطقة يلقي السلام علي كل من يراه و يجلس يتحدث مع أصحاب المحلات و يسأل عن الغائب و يبادر بعرض المساعدة لأي محتاج ,فكان معروفا بشهامته و طيبته وحسن خلقه ,و لا انسى له أنني عندما تخرجت من الجامعة عرض علي أن يجد لي عملا في الشركة التي يعمل بها و بالفعل توسط لي عند المديرين لأتعين تحت التدريب و ما لبثت أن تعينت تعيين ثابت بعدها لأحظى بفرصة يتمناها الكثيرون ,و كان فضولي يدفعني أن أسئله لماذا لا تتزوج نريد أن نفرح بك فيرد مبتسما :ربنا يكرمك .و كان إذا عرض عليه أحد الجيران عروسا تبسم و قال :كل شئ نصيب
كأنه كان يعلم ما يخبأ له في حقائب الأيام ,حتي حدث يوما أنه مرض و غاب عن العمل فما كان مني الا أن زرته فوجدت حالة بيته يرثى لها فوصل بي الفضول منتهاه و سألته ليه مش عايز تتجوز لحد دلوقتي؟ فرد في إبتسامه في عمقها المرارة:
و مين دي اللى ترضى تتجوز فلان القرد!!
وكانت صدمة لي أنه يعرف الإسم الذي يتهامس به الناس من وراء ظهره و الذي أطلقه عليه أولاد الحي فإحمر وجهي خجلا و قلت :أنت طيب و إبن حلال و في بنات كتير تتمني تتجوزك و نقلت دفة الحوار الي موضوع أخر بعد أن فجر في وجهي قنبلة معرفته بلقبه .
و ذات يوم رزق زميل لنا في العمل بمولود و عرض عليه فلان القرد ان يذهب معه الي حلقة الغنم لإختيار شاتا جيدة تصلح للعقيقة و ركب معه سيارته و توجها الي حلقة الغنم و اشتريا شاتا و رفض أبو المولود أن يضع الشاة في سيارته الجديدة,حتى لا تتسخ, فعرض عليه فلان القرد أن يركب هو مع سائق سيارة نقل صغيرة و يقود أبو المولود سيارته وراءهم في طريقهم للبيت و وافق الطرفان ,و كان الليل قد رسم الرطوش الأخيرة في اللوحة المعتمة. و جاء سائق سيارة للشحن مسرعا ليدلي الستار علي حادث مروع هشم السيارة التي يستقلها فلان القرد, و هشم معها أخر ملمح من ملامحه ,دخل فلان القرد الإنعاش و كانت حالته خطيرة حيث أصيب بكسر مضاعف في الجمجمة و جروح متفرقة أغلبها في رأسه من أثر تكسر زجاج السيارة و ارتشاقه في وجهه و ذهبنا لنزوره في المستشفى.

و كانت المفاجأة أن استقبال المستشفى يعج بأهل الحي و أصدقائه و زملائه و كل من يعرفه فكل واحد منهم يحمل له جميل أداه له في حزنه قبل فرحه و رأيت عيونا قد أدمعت و أكف قد رفعت و عرض كل واحد من الحاضرين أن يساهم في مصاريف العلاج بالمستشفى فكانت مظاهرة حب في من يتقدم بدفع نقود تحت حساب العلاج, إلا أن زميلنا أبو المولود أصر أنه المسئول و لابد أن يتكفل بالمصاريف كاملة.و أمام باب الإنعاش اكتظ الحاضرون كل يريد أن يطمئن و يلقي نظرة على فلان القرد .إلا أن الأطباء رفضوا و منعوا الزائرين من الدخول و بحكم أني جارته عرضت علي الدكتور أن ادخل لأراه و اسأله إذا كان يريد أي شئ من بيته احضره له و وافق.كان رأسه مغطي بالشاش لا يظهر منه غير مخرج بسيط للتنفس و خراطيم الهواء و كان يبدو انه بعد سبع ساعات في حجرة العمليات ان حالته خطيرةاقتربت منه متماسكة مبتسمة هامسة :ألف سلامة يا فلان إن شاء الله تقوم بالسلامة بسيطة ان شاء الله
فرد علي بصوته الأجش: الحمد لله الإصابة جت في الرأس و معدش حد يقدر يبص في وشي اخيرا حريح الناس من منظري البشع
صدمت لرده و قلت:متقلش كده الناس كلها بتحبك و قلقانين عليك و بيدعولك تقوم بالسلامة
قاطعني بصوت متعب:انا كنت بشوف في عنيهم السخرية و القرف لما بكلمهم
قلت:ابدا مش صحيح دول بيحبوك
قال:بيحبوني ازاي و هم كانوا كل يوم بيقتلوني بنظراتهم
قاطعنا الطبيب قائلا :كفاية كده سيبيه يستريح
سألته : مش عايز حاجة من الشقة او اي حاجة؟
قال:ربنا يكرمك
و ما هي الا ساعات حتى رحل فلان القرد عن دنيا المظاهر و الأشكال ليترك أصحابه و جيرانه يبكون دموعا علها تغسل الدماء التي نزفت من قلبه بسبب خناجر نظراتهم له
و إكتشفناجميعا أننا قتلناه من قبل أن يموت.

53 comments:

tota said...

كلبوظة

برغم كلامك ان القصة من وحى الخيال الا انها تعالج واقع مرير يعيش فيه ناس كثيرون
اسردت القصة وكنت دقيقة فى اختيارك للكلمات الموحية وتعايشت معاها كانها قصة فلان اعرفه او مر على فى حياتى يوما ما
لكن ان تصفى احساسه الشخصى وكأنك داخل نفسه هو الذى نجهله نحن فمنا الكثير الذى لا يعترف ان فلان لا اختار شكله ولا حتى اسمه انما يعطينا الخالق هذه الخلقة ويظل الانسان يسخر منها ولا يدرى يوما انه كان من الممكن ان يكون هو فلان الذى سخر الجميع منه
فلان بروحه الجميلة هو ما يجب ان ننظر اليه كما يفعل الخالق ان الله لا ينظر الى الصور ولكن ينظر الى القلوب والاعمال
عسانا نتعلم من ذلك وندركه ونقول لمن احترمنا واحببنا مشاعرنا قبل ان نفقدهم فنندم اننا لم نقل يوما كم احترمناهم واحببناهم

تحياتى على البوست الرقيق

FrEe.PhArAoH said...

عزيزتى

اكرر من جديد .. لن تفر العبرتان .. لن ادمع طالما هناك امل
لكن هذا يفوق الاحتمال بالفعل
تحياتى لخيالك الخصب ومشاعرك الرقيقة .. اسمحيلى ان ابعث برسالة ساخطة الى مجتمع المظاهر كما اسميتيه .. رساله لا يوجد بها غير نظرة تنم عن الاستصغار وكلمة عتاب على ما فعلوه ويفعلوه بالكثير .. هل فلان القرد هذا باخلاقه الحسنه وسلوكه السوى اقل من فلان اللص بشذوذه الفكرى وغطرسته ورغم ذلك يعامل معاملة الكريم
الا تبا لك مجتمع بلا عقل .. بلا حكم او حكومة .. بلا قلب رحيم

خالص مودتى

بعدك على بالى said...

كم من نظرات تقتل و أخرى تحى

وجعتينى



تحياتى

islam said...

عزيزتى الغالية كلبوزة ...

عارفة انك تعبتينى بالقصة دى جدا .. والله حسيت بوجع فى نفسي بعد ما خلصتها
زمان ايام المدرسة .. كان فى واحد فى فصلى برده شكله وحش كده .. او هكذا كنا نعتقد .. وكنا نفضل نتريق عليه ومش هكدب عليكى واقولك مكنتش بضايقه .. كنا عيال صغيرة مش فاهمين حاجة .. ويومين تلاته وصاحبنا مبيجيش المدرسة .. واليوم الرابع اعلن الناظر انه مات فى حادثة عربية .. ساعتها المدرسة كلها اتفلقت من العياط .. كنا بنحبه بس مش عارفين .. انتى فكرتينى بذكري بعيدة .. وحى خيالك استحضر الطفل بداخلى وسقطت دمعة صغيرة منى .. محستش بيها الا وهى بتقع على الكيبورد ..

تحياتى لك .. وتقديرى لخيالك واسلوبك الرائعين ...

Ayyam said...

كلبوزه أوكيه أنا مش عارف ليه حاسس أنها قصه حقيقيه لأنك كتبتيها بصوره دخلت جوه قلوبنا...عموماً هذا لايهم كثيراً فالموضوع شيق ويجدث فى أماكن كثيره فى هذا العالم..نظره المجتمع أن الرجل لايعيبه إلا جيبه إذا كان خالى...أما الغنى ممكن يظبط نفسه حتى لو شكله قبيح...لو كان بطل قصتك غير ميسور الحال فبكل تأكيد أتوقع أن تسير الأمور فى أتجاه تلك المأساه أى يكون عنده عقده نفسيه...بكل تأكيد، أصعب شيء فى هذه الدنيا أن لا تجدى من يحبك أو يبادل الأحسان بالأساءه ...المشكله الحقيقيه الثقه بالنفس والأراده القويه التى لاتفلها المشاكل السطحيه مثل شكل الوجه

مصـ( الخير )ـعب said...

لكل منا على عيوب غيره عينان جاحظتان بألف عين
ولكن على عيوبنا نحن، .. عين واحدة عمياء!

7ayran said...

وكمان طلعتي مؤلفه قصص قصيره يا كلبوظه هانم
:)
تحياتي علي البوست الرائع الملئ بالمشاعر

aymen.farouk said...

لوكان ده بجد من وحى الخيال
فتحياتى لكى ولخيالك الخصب


وتحياتى ايضا لبطل القصه القرد


واقوله متزعلش ده انت روحك طيبه وراحت للى يستحقها
فهناك يا صديقى القرد اناسا وجوههم وجوه ملائكه
وقلوبهم قلوب وحوش جائعه
وداعا يا قبيح الملامح
يا جميل الروح


كلبوزه احييكى يا صديقتى

حنيـــــــن said...

حرام عليكى وجعتيلى قلبى

ما اخدتش بالى من تنويه "وحى الخيال" ده الا من التعليق الاول ل توته

بس بعد ايه .. ابكيتينى بشده

بصراحه صدقتها لانها طبيعى جدا تحصل ونقابل ناسها فى حياتنا

عارفه
من اوائل الحاجات اللى علمها لى بابا الله يرحمه هى ان نظرتى لاى حد مصاب
سواء ذوى الاحتياجات الخاصه او الاعاقات او او

علمنى انى لازم انظر لهم بابتسامه جميله مصوبه الى عيونهم فقط
مهما كانت الحاله صعبه او حتى بشعه

انا تالمت جدا للانسان الجميل ده اللى كل موافقه وتفانيه فى خدمه اى محتاج ما شفعتش للناس دى وخلتهم يشوفوا الانسان اللى جواه

الله يسامحك
بس بجد رائعه

تحياتى

Crazy Programmer said...

ابكيتني...

ربما كانت قصة من وحي الخيال, لكنها تصف واقعا اعيش جزءا منه

تحياتي

soosa el-mafroosa said...

ليييييه يا كلبوزة كده ..حرام عليكي يا بنتي

دانا بحاول بأي طريقة أخرج من حالة الإكتئاب اللي عندي

دانا قولت أسيب الخناقة اللي دايرة في المدونة عندي بقالها 3 أيام و آجي أفرفش عندك

تقهريني كده؟

عليه العوض في نفسيتي

love4u said...

القصه بتفكرنى بحاجات كتيير
فعلا لقد ابكيت عيونى
قد نخطى فى حق اشخاص دون ان نشعر لكنهم يشعرون

فابتسم فى وجه صديق
و لاتنتظر دمعه قريب
و لاتخدع يوم الغريب
ولا تجرح يوم الحبيب
و سامح

Hafsa said...

احلى كلبوزة
على قد ما اوقات كتيرة بكتيني من الضحك لكنك قوية برضة انك تبكيني من الحزن

فعلا لقد قتلناه من قبل ان يموت

سلام يا احلى كلبوزة

أحمــــــــدبــــــــــلال said...

مش عارف ليه دمعت و أنا بقرأها
بس بجد حزنت عليه أوى

بالرغم من أنه بطل خيال

labido said...

سمبتيك
كل واحد فينا عنده القرد بتاعة
وبصراحة دي مش قصة خيالية دي قصة واقعية
فعلا ياما ناس بنقتلها وبنمشي في جنازتها بافعالنا وكلامنا ونظرات عنينا
انا تاثرت جدا وبصراحة كنت مستني نهاية سعيدة
بس ياخسارة
النهاية رجعتني لارض الواقع اللي احنا عايشينة
وشكرا
عبدالفتاح

Taher said...

زى الزفت يا معلم

القصة جامدة جدا جدا جدا بس نكدية اوى لدرجة انها عكننت على وبتمنى فعلا انه ميكونش فيه كده فى الواقع

هو مش شهر 11 لسه مخلصش برضه

بس بامانة القصة ممتازة

Sampateek said...

أصدقائي الاحباء
القصة من وحي خيالي و ليست خيالية
و لكنها مغرقة في الواقعية و ان كانت لم تحدث معي و انما هي مجرد مشاهد مختزنة في ذاكرة الايام
ايلامي لقارئ القصيصة دليل نجاحي
و ان كنت اتنازل عنه
من اجل الا ازعج احبائي البلوجرية
---
احببت ان اقول اني لست سطحية و لا اميل للنكت لكي اجذب كومنتات و لكني اهرب من البكاء الي الضحك
مخافة ان تغرق المدونة في الاسى


بحبكم

Taher said...

الموضوع مش موضوع سطحية يعنى الحاجات اللى بتضحك اللى انتى قولتيها كان جواها معنى مش كانت سطحية يعنى

عموما سواء ضحك او نكد مواضيعك بتحمل معنى (من وجهة نظرى ) ومعرفش ايه اللى جاب موضوع السطحية هنا

!!!!!!!

zabady said...

مين اللي قال إن كلبوظة سطحية شاوريللي عليه بس

الكلام إللي بيكون جواه كلام تاني كبير وله معني يبقي كلام مهم وكلام بجد .. وكلامك من النوع دة بس أنا شايف إنك موهوبة في الكتابة بسخرية من الأشياء شديدة الإيلام
خليكي زي ما إنتي كلبوظة .. لكن سمباتيك
تحياتي

sendrlla said...

كلبوزه انا مش عرفت ان القصه دى خياليه غير من اول كومنت

المهم بقى ان القصه جميله جدا غير كده انى حسيت انها واقعيه وخاصة من موضوع الشغل اللى ساعد البنت اللى بتحكى فيه

بس والله قصه ممتعه جدا وكلها معانى جميله ياريت الناس تدركها ومش لازم كلبوزة تألف قصه دى علشان نعرفها المهم ان البوست هايل وجميل

الزعيـمة said...

القصة دي بتتكرر كل يوم ومش بس مع الناس الحظهم فى الجمال بسيط دا كمان مع الناس اصحاب الاعاقات والعاهات الله يشفيهم جميعا بإذن الله

تشوف واحد معدى حالتة صعبة والناس نازلة بص وتغميز علية لو كل واحد منا حط نفسة مطرح الانسان دا وحس اد اية النظرات دي حتقتلة كان كل واحد قال الحمد لله ومشي باصص اودامة واحترم نفسة

قصة روعه يا كلبوزة

Dananeer said...

بقى كده يا كلبوظه تعيطى الواحد و اكتشف انها من وحى الخيال

القصه حلوه اوى و بتوجع اوى

و احنا كتير بنكون وحشيين و قاسيين اوى اوى اوى

No Fear said...

السلام عليكم
أسمك جامد بس ياريت تغيريه
القصة دي جميلة جدا بس في سؤال إنت خيالك ده جبها منين حرام عليكي بتوجع قوي
أسوأ حاجة إننا مش بنعبر عن شعورنا غير بعد فوات الأوان ليه دايما مش عارف
تخيلي حب الناس دة ليه معبروش عنه

safa said...

حضرتك متأكدة و واثقة أن القصة من وحى الخيال, مش عارقة ليه حاسة أنها حقيقية, أصل الشخص المذكور ده فى زى أمثاله كتير بيعانوا و محدش حاسس بيهم. الكل بيفكر فى نفسه, بات شعار الجميع نفسى نفسى و ليذهب الآخرين إلى الجحيم.
شكراً يا كلبوزة على اللمسة الإنسانية فى البوست بتاعك

miro said...

روعة يا كلبوزة

ايه ده موهبة والله

بس انتي معودانا علي الفرفشة

انا بصراحة اتخضيت لما لقيتك كاتبة تراجيدي

بس تغيير جامد

القصة جامدة جدا جدا

أُكتب بالرصاص said...

العبرة مش بالمظاهر ولا اللي ظاهر
العبرة بالقلب وما حوى

دروس كثيرة من هذه القصة

إزاي فعلا ان في ناس اخفياء ولكن لغيابهم تاثير كبير

وناس حاضريين
ولكن بلا قيمة



شكرا
بس امي بتسلم عليكي وبتقولك

غيري اللون

Hafsa said...

كلبوظتي المكلبظة الجميلة
محدش يجروء انه يقول انك سطحية او بتكتبي حاجات مالهاش قيمة
واللي يقولك كده شاوريلي عليه و حيكون مدضعضع في المستشفى قريب اوي
المهم
اللي عاوزة اقوله
اكتبي ما يحلو لكي و كيفما تشائي
ده بلوجك انتي و محدش له دعوة بنوعية المكتوب
و لعلمك انت لما بتكتبي حاجة و بتضحكينا انا متاكده انك بتاخدي حسنات لانك فرحتي قلوب زعلانة
الضحك بقى اغلى من مليون دمعة بنعيطها كل يوم
صدقيني

ولا يهمك
انت ارئعة في جميع الاحوال
سلام

بعدك على بالى said...

اكتبى اللى انت عاوزاه ، اهبى من البكاء للضحك، ومن الخاص للعام ومن الواقع للافتراض، اعملى اللى انتى عاوزاه واللى مش عاجبه يشرب من البحر ولو مكفوش يتفلق...

المهم انك متلتفتيش لاى محاولات هدمك او عرقلتك عن الكتابة، لانك فعلا بتكتبى رائع وجدا سواء بتضحكينا او بتبكينا
(فى الحالتين اسلوبك مميز ومختلف)
ثم محدش ضرب حد علشان يدخل مدونتك او يعلق، ده قرار اختيارى وعلى مسئولية صاحبه..
فعلا.. مالقوش فى الورد عيب

ولايهمك ياقمر من اى حد واكتبى لانه فى كتير غيرى بيحبوا يقروا لك ..

مع محبتى واحترامى وتقديرى الكبير لقلمك وللكيبورد كمان

ME said...

مؤلمة .. و واقعية جداً .. كان نفسى تنتهى نهاية سعيدة عشان كفانا حزن .. بس الحكاية واقعية تبقى لازم حزينة

منتهى الإحساس يا كلبوزة .. دايماً فى كل كلامك حتى اللى يضحك منه

تحياتى

Sampateek said...

مش بقولكم



بجد



بحبكم

أنـــا حـــــــــرة said...

اه يانى يا قلبى
انا قريتها ووجعتنى ورجعت لما خلصتها أتأكد انها من وحى الخيال
خيالك بيوجع قوى
فعلا عالم المظاهر مفيش اكبر منه

ربنا يرحم البطل و امثاله و يعلى شأنهم و يهدينا

Aoossa said...

النهايه واقعيه جدآ
وبتحصل كل يوم
لما الناس تسخر من أنسان دميم فى الغالب هو كمان بيشاركهم سخريتهم على حاله لكن من جواه بيكون بيموت من الألم لكنه بيصطنع الضحك
الناس بتحكم على المظهر
مع أن كل أنسان وله مشاعره وأفكاره وهى دى اللى بتميز البشر عن بعض
و بعدين مين ده اللى مزعلك
أنا أشرب من دمه
أنت تكتبى يا عسوله عشان اللى بيحبوكى
وعشان يفضل التواصل رغم المسافات
و رغم مرارة الواقع وغربتنا اللى ساكنه قلوبنا
محدش عارف حاجه
محش فاهم أن ضحكنا ممكن يكون وراه ألم وحزن مدفون
أستمرى من أجل الجماهير ومن أجل مصر
أنت من الأحرار يا كلبوزززززززززززه
أمواه ليكى وللكتاكيت وللأفندى

تمر حنه said...

كلبوزة
أن تكتبى كوميديا فهذا ليس دليلا على السطحية حيث تنبع الكوميديا الصح من المأساه
فاذا لم تنبع الكوميديا الحقيقية من منتهى الجدية فسوف تصبح هجايص.
كتاباتك الكوميدية فى منتهى العمق و منتهى الجدية و من هنا يأتى تميزك يا كلبوزة قلبى
فى جميع الحالات انتى : ألذ ألذ ألذ

سندباد مصري said...

أولا

مبروك النيو لوك

ثانيا

ازيك عامله ايه

ايه اخبارك

مقطعنيش عنك غير الشديد القوي

ثالثا

القصه جميله قوي

هوا انا صحيح مبحبش الأسلوب الوعظي في الكتابه

رغم أني بستخدمه احيانا بصراحه

بس جميل يا كلبوظه احييك

والسلام

ذكريات said...

walahy kont 7abky bas eftakart mam3ayeeesh kelenks

nor said...
This comment has been removed by the author.
nor said...

قصة جميلة جداً
وموجعة جداً

سلامي لكي جدا جداً

nadine said...

قلبى وجعنى و انا بقرا القصة
بجد
من المؤلم انك تبقى حاسس انك عايس مع ناس مش بيحبوك
و من الأكثر الما ان الناس دول يبينولك عكس كده, يعنى ينافقوك
و من المؤلم ايضا ان تقابل الإحسان بالإساءة
إنما القاتل بجد
انك تكون بتعز حد و تضيع منك فرص قبل ما تقوله بمشاعرك

حاولت احط نفسى مكان الشخصيات
بجد قصة مؤثرة و مؤلمة بس جمييييييييلة جدا
احييكى على ابداعك و اسلوبك و تفكيرك
سلااااام

elkamhawi said...

برغم ان القصة من وحى الخيال لكنها اتسمت بالواقعيه والصدق وقدرت انها تكون صورة معبرة على الواقع الاليم اللى احنا بنعيشه ويجب ان انحنى احتراماً للبوست ده

karakib said...

كلامك صعب اوي و مؤلم اوي لكني فاهمه اوي يوما ما كنت اعاني من مرض جلدي مفزع ... لكن صدقيني هذه العاهات تنقي النفس بشكل لا تتخيليه ... القصه مش من وحي الخيال الله يرحمه يا كلبوزه ...جوائز السماء لا تضل طريقها ابدا الي من يستحقونها حتي و لو ماتوا ...
هاني جورج

Sampateek said...

سعيدة بتشجيعكم ليا و متابعة لارائكم
غيرت اللون زي ما طلبتم
و حكتب تاني و تالت
لان ليا اصدقاء فنانين زيكم
بيشجعوني
بحبكم
جدا

Mamdouh Dorrah said...

وجعتيني اوي

epi said...

مين فين ليه اللي قال سطحية هي الكوميديا

هي اقوي الاسلحة لكشف ندبة مجتمعنا لنعالجها

اكتبي يا ستي اللي انتي عايزاه
لانك بكل الطرق شعر و نثر و كوميدي و تراجيدي كمان
بتوصلي المعني الي قلوبنا

حتي الضحكة بتكون ال
Catharsis التطهر كما قال ارسطو
كما هي الدموع
لتغسل ذنوبنا

عزيزتي
في قصتك هذه
ابدعتي حقا

islamventura said...

mad city
فيلم امريكى يوضح الى اى مدى لو حدث و اكتشف الناس عجز بنى ادم فى شىء
و يوضح ان هذا المجتمع يجب ان يحترم جميع افراده
ارى انى شعرت بما شرحتيه و ذلك الامر يعتبر بالنسبة لى مخيف جدا
فكلنا و الحمد لله كاملين ماذا يحدث عندما يفقد احدانا ميزة
و اشكرك على المثال الجميل جدا

المواطن المصري العبيط said...

قصة مؤثرة جدا لعب فيها خيال الكاتبة دورا كبيرا في التأثير على القراء، المشكلة أنه أحيانا الواحد بيحب يشوف الجمال بعينيه من أجل الشعور بالراحة، وقليل جدا من الناس هم من يرون الجمال بقلوبهم

أحييكي على القصة الجميلة

Sampateek said...

ربنا يخليكم اخجلتم تواضعي
انا كده حتغر في نفسي و حعرض القصة للبيع و اطلب فيها رغيفين و بيضة
ما انا مبقاش حد قدي
البلوجرية بيشجعوني
ربنا ما يحرمني من حبكم

ana ga3an said...

جزر اية و نيلة اية
دي بقت زي نيلة خالص
انا اول ما دخلت عندك اتصدمت
بذوات الاربع اللي انتي حاطة صورهم دول في الموضوع اللي تحت دة
في اية يا بنتي
هو الواحد ناقص
مش كفاية مراة البواب
اخر مرة شوفتها كان الاسانسير واقف و انا محشور جواة
و هي اللي فتحتلي و انا مرضيتش اخرج

ana ga3an said...

الموضوع بتاع فلان القرد دة
كما ذكرتي
بالنص مر علي في الحياة الواقعية
مع اختلاف النهاية
فقد تزوج
و انجب قرود صغيرين
و القرود تزوجوا و انجبو قرود اصغر

و ان شاء الله هايمسك القرد البكر رئاسة الجمهورية

Sampateek said...

الحق يا انا جعان مدونتك مبتفتحش باين عليك مدفعتش الايجار و البلوجراوي الكبير حجز عليك و رمى لك المدونات في الشارع
:)

مُزمُز said...

تحياتي
بجد موضوع كله كده على بعضه رائع

من ناحية الفكرة فهي رقيقة وانسانية لأقصى الحدود

أما الأسلوب فأنا أول ما بدأت القراءة قلت ف نفسي ايه الأسلوب الساذج ده مفيش تفنين في الكتابة ولا أي حاجة

بس بعد شوية اكتشفت ان انا خلصت الموضوع كله وانا مش حاسس

سحر البساطة اللي حكيتي بيها الموضوع فتنني تماما

وسواء قصدت أم لم تقصدي ذلك

فان الأسلوب جاء بسيطا وتلقائيا جدا معبرا عن فكرة رفض المظاهر التي يقدمها هذا الموضوع البديع

تحياتي

بيسوو said...

كلامك وجعني قوي يا كلبوزة لان الموضوع ده يمسني بشكل خاص..استمري ياستي بس متوجعيش قلبي تاني

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر