Sunday, February 04, 2007

رسالة من 67



زوجتي الحبيبة فتحية
وحشتيني و وحشني العيال و البيت و الزريبة و الأهل و الأصحاب و البلد كلتها و نفسي و منى عيني أغمض و افتح ألاقي روحي جارك في الدار و حولينا العيال و ريحة المشلتت مفحفحة و مالية الجيهة كلتها
بس أقولك أية!!! الحال هنا صعبة قوي قالوا لنا تعالوا امسحوا اسم إسرائيل من على وجه الأرض و اتارينا جينا عشان يتمسح بكرامتنا الأرض . و قالوا لنا تعالوا حرروا فلسطين و محدش أتأسر غيرنا . ده حتى النفر مننا كان بيهرب و يسيب سلاحه و دبابته و لا همه يحرقها و لا يدمرها لجل العدو ما يظفر بيها من بعده، كان كل واحد فينا بيقول ياالله نفسي و بيفر بأجله زي النمل كل واحد بيجري في جيهة، و لا عارفين فين القائد و لا ايه هي خطة الانسحاب ده حتى بيقولوا في المثل تفيد بإية يا فرس و أنت من غير خيال


تهنا و عطشنا و جعنا و أديني اهو مرمي في خندق مع خمسة من الأنفار مستنيين المدد و بنسمع في الراديو كلام بيطري على قلوبنا سمعنا إن الطائرات الإسرائيلية بتسقطت بالعشرات و إننا محققين نصر ساحق
بس اللي مستغربله إن مات مننا كتير و اتأسر مننا اكتر و مش شايف في الجو غير طيارات العدو أمال الكلام اللي بنسمعه ده أصله أية؟

فتحية أنا راجع متخفيش و إن شاء الله خاخدك أنت و العيال و ننزل على البندر نشتري الكردان القشرة اللي كان نفسك فيه و حجيب للعيال كسوة المدارس و نزور السيد البدوي و نأكل حمص و حلاوة
متخفيش عمر الشقي بقي

71 comments:

shabfa2re said...

موضوع جامد اوى
ومدونتك كلها جميلة موت

ody911 said...

سارة

عادى بقة يا سارة

كلنا لها

ربنا يرحمهم جميعا

وبقولك صحيح

مش بتعدى لية

مش تبقى تيجى

وكمان فى تدبيسة ليكى عندى

تعالى علشان تقعدى على كرسى الأعتراف

وعادى بقة
أودى

ادم المصري said...

احلي كلبوزة في الدنيا

اكيد الرسالة دي اتكتبت بالدم .. والبسطجي ليها كان الهوي

واللي قراها دع القلب اللي لم ينحاش

تحياتي

صفصف لادي said...

ااااه يا كلبوزتي
نكات جرح حتى احنا اللي معشناهوش لسه حاسين بيه
اقولك ايه
احكيلك على جوز خالتي اللي رجع مشي على رجله هو اصحابه 6 ايام من غير اي زاد
ويا ريت على الزاد
الا كل شوية يموت واحد منهم و يدفنوه بايديهم
و شوية منهم يتجر لانه لسه في الروح لكنهم مش قادر يمشي و لا هما قادرين يشيلوه
ولا اقولك على خالي الكبير اللي اتزنق زي صاحب الرسالة دي و فضلوا ايام بلياليها محصورين
يشربوا من بولهم و ياكلوا تعابين و فران
ولا على جدي الفلسطيني اللي كان فاكر انه خلاص كلها كام يوم و يرجع قريته
بص لقى الباقي اتاخد و انقهر
جدي لسه ايض لكنه مقهور

ولا اقولك على الشوارع ازاي اتملت صوانات عزا
ولا على هلع الناس
اقولك ايه ولا ايه
حسبي الله و نعم الوكيل

وكل ده كوم و كرامة الشعب كله اللي اتداست بالجزمة بايد ما يسمى بزعيم الامة نفسه
مش بايد المحتل الصهيوني
و لسه فيه ناس بتهتف بأسمه

حقك كنت خليتي الرسالة ليوم 5 يونيو
تحياتي يا احلى كلبوزة
ده انتي حتى احلى من مامافي الكلبزة
ههههههههههههههههههههههههه

Mamdouh Dorrah said...

عارفة يا كلبوزة اية اللي جايبنا ورا.؟..

ان في حد ضحك علينا و قالنا ان احنا عرب
و وهمنا بحاجة اسمها القومية العربية
و كمان كدب علينا و قالنا اننا مسئولين عن الدفاع عن العرب لأن العرب عولة مش عارفين يدافعو عن نفسهم

اقري التاريخ و هتلاقي ان سبب كل البلاوي اننا فاكرين اننا عرب

Taher said...

قلبوظة

وايه يعنى هى اول مرة

ما فى حرب اليمن مات مننا الاف ولا حد سال عنهم

احنا شعب زبااااااااااالة ورخيص كمان

يا بنتى دا دية اللى يموت فى حادثة تعويض قيمته 2001 جنيه

بتتكلمى فى ايه بس

قطر الندي said...

سمباتيك

اصعب احساس في الدنيا هو احساس الهزيمه و الاغرب اننا نشوف دا بعنينا و نلاقي اعلامنا بيكدب علينا كالعاده و يقولنا العكس بيعيشنا وهم
بس تعرفي انتي فعلاً عندك حق ان الجندي اللي انتصر في 73 هو نفسه اللي انهزم 67 و دا ان كان بيدل فهو بيدل علي ان النصر عمره مابيجي بالشعارات و الهتافات و الخطب اللي ادمنها الشعب المصري علي مدي سنين حكم الرئيس الراحل جمال عبد الناصر لكن كان لازم يقود الحرب تعلب زي القائد العظيم انور السادات

albida said...

الأسلوب القروى البسيط ده بيدوس على الجرح فعلا... ربنا يرحم كل شهدائنا يارب

واكشف شعرى وادعى على اللى كان السبب
:)

manal

Reformer1976 said...

برافو إنك بتفكرينا بدم الشهدا وحياتهم البسيطة وأحلامهم وذكرياتهم والرسايل أجمل طريقة تبين لنا مين كان بيحس بإيه... عارفة الجواب ده بيفكرني بجوابات حراجي القط العامل بالسد العالي لزوجته فاطنة واللي كتبها الرائع الأبنودي وكانت خير تأريخ لبناء السد العالي

يا ريت لو فيه المزيد من هذه المراسلات اللي بجد بتقول لنا البني آدم المصري كان بيحس بإيه... الرائع أبو ريشة في ذكرياته عن النكسة يحكي العديد والعديد من الحكايات اللي تفاصيلها توجع القلب بس في قمة الروعة والجمال وتحسسك إنك جزء من الحدث ابقوا اقروها وادعوا لي

ahmEd_H said...

الكبار ضحكوا على الصغيريين

الصغيريين صدقـــوا الكبار

الصغيريين مــــاتوا مقتولين

الكبار كانوا فى مكاتبهم مستنين

جالهم خبر النكسه

راح التانى قالهم انسحبوا

فانسحبوا و هم مكشوفيين

فاضربوا فى ظهرهم

فماتوا مقتولـــين

و منهم اللى اتأسر

و دول بقى ماتوا مدفونيين

و دا جزات اللى يسمع كلام الكبار اللى مش فهميين

انا كتبت الكلام دا تحيه لبساطة الجندى و اهديه لروح كل واحد ضحى بدمه علشان البلد دى تعيش

karakib said...

فليرحمنا الله

قاسم أفندي said...

الحمدلله خبطنا تحت بطاطنا

يامحلا رجعة ظباطنا من خط النار

ياأهل مصر المحمية بالحرامية

الفول كتير والطعمية والبر عمار

والعيشة معدن وأهي ماشيه آخر أشيا

مادام جنابه والحاشيه بكروش وكتار

ح تقول لي سينا وماسيناش ماتدوشناشي

ماستميت أوتوبيس ماشي شاحنين أنفار

ايه يعني لما يموت مليون أو كل الكون

العمر أصلا مش مضمون والناس أعمار

ايه يعني في العقبه جرينا ولافي سينا

هي الهزيمة تنسينا اننا احرار

ايه يعني شعب في ليل ذله ضايع كله

دا كفاية بس أما تقول له احنا الثوار

الحمد لله ولاحولا مصر الدولة

غرقانة في الكدب علاوله والشعب احتار

وكفايه أسيادنا البعدا عايشين سعدا

بفضل ناس تملا المعده وتقول اشعار

أشعار تمجد وتماين حتى الخاين

وان شاء الله يخربها مداين عبد الجبار

أحمد فؤاد نجم

MAKSOFA said...

خلينا نفتكر شويه أشياء تفرحنا
وبلاش نعكنن علي نفسنا
ايه اللي فكرك بس دلوقتي ياكلبوزة بنكسه 67م

أُكتب بالرصاص said...

تهنا وعطشنا وجعنا..

انا فاكر الجملة دي..

تهنا وجعنا ..وفسينا

يعني في سيناء الحبيبة
:)

yasser_auf said...

صدق من قال : اصعب بكاء هو البكاء من غير دموع بكاء داخلي لا يحسة الا المجروح و لا اظن ان في هذا البلد من اسوان الي رشيد من لم يتكوي بنار النكسة سواء من شهيد او مصاب او مفقود

عموما دة موش بس كان بسبب عبد الحكيم عامر لا كان بسبب عبد الناصر برضة قالولة لو الخروف دة قامة من علي الطرابيزة يبقي فية امل ان اسرائيل تحس بالي بيجرالها دة احنا حنخش تل ابيب في 48 ساعة
عادي طول عمرنا بيضحك علينا و الاونطجية و المنافقين بيضحكوا علي حكامنا بس حنقول اية دة نصيبنا
و علي فكرة موش نفس العساكر هو الي حارب في 73 في 73 السياسة اتغيرت ما بقيتش عدد و بس و لاكن كانوا من ذوي المؤهلات فبالتالي التفكير اتغير و السلاح اتغير القادة نفسهم اتغيروا اظن ان السادات لم يغلط غلطات عبد الناصر بل بالعكس استفاد من اخطائة و كان ما بيصدقش غير الي بيشوفوا بعنية موش اي حد يقولة اي حاجة يصدقها

عموما توقعي من اي انسان بق و عنجهي انة حمار بياخد علي قفاة و موش عارف حاجة ...عبد الناصر كان عندة حلم و هو انة يكون رئيس الدول العربية جميعا و حلمة قتلة و من حلمة يظهر غبائة السياسي

و عموما الحكومات ما بتكذبش علي شعبها الا لما بيكون فية كارثة و مصيبة فكانوا يقولوا للناس 100 طيارة وقعوا فعلا بس كانوا بتوعنا موش بتوعهم

رحم الله المفقودين و الشهداء بس مع الاسف انهم شهداء العند و غباء الحاكم و القائد موش السبب في استشهادهم الاسرائيلين بمعني ان كل منهم يدة ملطخة بدم كل من استشهد من اهلنا

Sampateek said...

اعزائي
اتابع تعليقاتكم
و اشكر زوقكم الرقيق
تحياتي

tamer said...

موضوع جامد ومش جامد

ازى معرفشى
ههههههه

لا بجد بوست جميل

تحياتى

Sokomonoce said...

اله يرحم الجندى الراجل اللى كان اسمه المصرى دلوقت بقى حاجة لا تسر عدو ولا حبيب
يادوب بيعبى ازايز ميه معدنية ويحلب بقر ويزرع بطيخ وزيتون قال ايه احنا فى وقت السلم لا حاجة لنا بالاستعداد للقتال
امال ليه بيموت كل يوم ناس على الحدود

yasser_auf said...

نظرا لاني مقدرش انك تطلبي مني طلب و معملهوش
و نظرا لجمال عيونك الي اسراني

تم الغاء الخظر علي الكومنت طرفنا
و حضرتك بس تامري و احنا ننفز دة شغبتة ابنك الصغير علي الورق تحديد لمسار حياتنا

تحياتي يا كلبظ

ام العيال said...

دي مش رساله دي تاريخ
و قصه قصيره معبره
عن حاله دامت لسنين و سوف تدوم
احييكي

maged stephen said...

عن دون قصد أصبتينى بنوبة من البكاء
شكرا على تقليب المواجع لى ولكثيرين
أعذرينى

أصلى واحد من اللى ايدهم فى النار
الله يسامحك

الوردة السوداء said...

دول يابختهم
فى الجنة دلوقتى

تفتكرى جندى مصر 2007 عامل ازاى

hebaz said...

عارفة يا كلبوزة بحس أن مصر البلد و الناس كانت بلد تانية و ناس تانية زمان يعنى مش هية دية بتاعة دلوقتى
فين الرجولة و الشهامة و الصلابة و فين الدم الحامى و أولاد البلد و الجدعنة
كلها حاجات أختفت مبشفهاش غير فى الأفلام

Sexoona said...

ايه يا بنتى انت شطبتى ومعدش عندك حاجة عدلة تكتبيها .. إيه الهبل اللى انت مألفاه والا ده فى أحلام اليقظة مش لاقيه حاجة عدلة تكتبيها تقومى تسكتى مش هوه بروباجندا على الفاضى ... اهدى شويه

الحصان الأسود said...

أول ما قريت البوست دة افتكرت تعليقي من كام يوم في بلوج "مفقوعه" على بوست انها مابتكرههش اسرائيل

ولذلك ساعيد كتابة التعليق الذي كتبته هناك حيث أرى انة تقريبا نفس الموضوع ولكن بصيغه مختلفة


احنا حربنا اسرائيل علشان خاطر فلسطين
مكانش فية سبب للعداء المباشر
يعني احنا اللي زجينا بنفسنا في عداوة وحرب من نفسنا و بدافع اتفاقية الدفاع العربي المشترك

طيب هل فية حد ساندنا في كفاحنا وحربنا
سواء ضد الاحتلال الانجليزي او الفرانسي او الاسرائيلي

طبعا لأ لانها مشكلتنا احنا وبقيت الدول العربية مالهاش دعوة وسيبكم من حكاية البترول وقطع امداداتة اثناء الحرب دي مش قصة لانها اصلا كانت مصلحه اقتصادية لرفع اسعاره وبعدين مش معقول كمان انتم عاوزين تمونوا الدبابات الاسرائيلي بنزين من بترول عربي واحنا بنحاربهم

حد وقف معانا في حرب 67 ولا 56 ولا 73 من الاخوة اللي حوالينا

للعلم الدولة الوحيدة اللي ساندت مصر سياسيا في 56 و 73 هي روسيا وهي من منع التدخل الامريكي المباشر في 73 خوفا من المواجهه المباشرة مع روسيا

حيث كان الاسطولين متواجين بالفعل في البحر المتوسط ولذلك فكرت امريكا 1000 مرة قبل توجية ضربة اجهاضية لمصر

بالنسبة بقى لموضوع الاردن الذي ذكرتية وهي دولة عربية وليها حدود مشتركه مع اسرائيل لم تتدخل في اي مواجهه عسكرية لا في 67 ولا 73 بل ورفضت مساندة مصر وسوريا او السماح باستخدام المجال الجوي الاردني في المواجهات مع اسرائيل وكان من المعروف ان ملكهم خائن وتابع ودلدول لإسرائيل
ولذلك فقد اخفى السادات عنة اي معلومات عن حرب اكتوبر

الاحتلال والحرب مشكلة كل شعب مع محتلية وغلطان اللي يتدخل و يتصدر في اللي مالوش فية

احنا اتدخلنا في الكويت لما العراق ضربتها سنة 90 واحنا اول ناس خدنا بالجزمة منهم بعد مارجعناهم بلدهم وكل عقود المقاولات واعادة الاعمار اخدتها شركات امريكية وبريطانيى واحنا كسبنا صلاة النبي بل واتقالنا "بفلوسنا" ولا حتى شكرا ولا اي اولوية للمواطن المصري في الكويت اللي هوة رجعالكم

صدام اخد عشارت الوف المصريين العاملين في العراق في الجيش اثناء حربة مع ايران
واول واحد ضربهم بالجزمة و قتلهم في مذابح جماعية و اترموا في مقابر جماعية بعد الحرب

احتلال الجزائر استمر 132 سنة وانتهى سنة 1962 ولم يساندهم مسانده فعلية اي حد يعني الشعب هو من حرر نفسة بنفسة
بغض النظر عن ان ناصر ساندهم سياسيا لان المساندة مش بالكلام

9- احنا برضة رمينا نفسنا في حرب اليمن و خسرنا فيها كتير وهيه سبب هزيمة 67 اصلا لان الجيش كان متوزع في كذا جبهه
والسلاح لا يكفي
وللعلم المصدر الاساسي للسلاح كان روسيا وتشيكوسلوفاكيا
كذلك كان يوجد قوات مصرية في الكونغو الديمقراطية في وقت النكسة

ملحوظة انا والدي حارب كمان في اليمن مش بس في 67 و 73
واقولكم انة حكالي في اليمن كانوا في الصحرا وفوق الجبال بالليل بيتجمدوا من البرد و مايقدروش يولعوا نار حتى يتدفوا لانهم لما ولعوا نار كل شوية تسمعي صوت طلقة رصاص وواحد منهم يقع في ثانية من القناصة اللي فوق الجبال بيصطادوهم على ضوء النار
اذكر كلمتة ان تسمع صوت الرصاصة ونبص لبعض واحد واحد عينينا بتتجول في عيون الدائرة حول النار نترقب من الذي اصابتة الرصاصة وسيسقط
او يستجمع كل منهم اعصابة ليبحث عن موطن الألم في جسدة ليتبين ما إذا كان هو المصاب ام احد رفقاء السلاح الآخرين في دائرة الراقدون حول النار

قمة الضغط النفسي والعصبي

هذا هو ما أدىاة بنا دسنا لإنوفنا فيما لا يخصنا و جرنا إلى حروب استمرت عشرات السنين من أجل قضية خاسرة لا تخصنا في الأساس


تحياتي

الحصان الأسود said...

اة نسيت

ممدوح درة

عجبني تعليقك وانا من المؤيدين تماماً لما تقولة

العرب عولة و ينتظرون من يدافع عنهم او يحارب عنهم او يحميهم

والآن أمريكا هي من يقوم بدور الشرطي الأجير "المرتزقة" في الخليج و يقدم فاتورتة اليهم

وانا لي رأي آخر

نحن كمصريين لا تعزد أصولنا لعرب شبة الجزيرة البدو الرحل

فنحن المصريين جغراقيا أفارقة من قارة أفريقا ولسنا من شبة الجزيرة العربية

وكذلك, نحن المصريين, تاريخياً فراعنة

ابناء حضارة ال7000 عام من بنوا الاهرامات وبرعوا في فنون البناء والزراعه و الفلك وكل شيء ولسنا سلالة بدو رحل عاشوا على التنقل بالأغنام خلف الخضرة

تحياتي

el2ahwagi said...

ana 3asert el7arbeen...

tefl soghayar ayam 67 ...
weshoft kasret elraas...
wekaman shamatet ba3d el 7aqedeen...
weshoft israar waldi ennena nekoon men aakher elnaas elli thager lelqahera ..!

mesheet marfoo3 elraas fe 73 ...
weldam gery fe3roo2i lamma la2eet kalam 3ebri 3ala bab sha2etna fel suez ...

intasarna 3ashan asareena 3alnasr... kan iman elgeesh beanfoshom webqodrathom...!
webardo kan feeh 7aqedeen beysagharo men kol intesar lemasr weyhawello kol monawra lel3ado...!

kerehtohom ...el7aqedeen ... !!

الحصان الأسود said...

انا معاك يا قهوجي

همة شوية حاقدين قاعدين لا ليهم في حرب الرجال بشيء ولكن كل ما يعنيهم هو كلام النسوان

لو انتصرنا يقولك ان العرب هما اللي انتصروا وهما اللي قطعوا البترول عن العدو والفضل يعود ليهم
وانة انتصار لكل العرب

ولو اتهزمنا يقولك مصر انهزمت ويتبرى مننا ولا كأنة يعرفك و يقعد يتكلم ويتفذلك على اهالينا كأنة البعيد خبير سياسة دولية و قوة عسكرة عظمى وانة بعيد النظر ولو كنا سمعنا كلامهم كنا انتصرنا

وهو اصلا لا يفهموا شيء غير تربية المعيز و السرح بيها في الصحراء ورا الاخضر

انا كمان زيك يا قهوجي بيوتنا اتضربت في الحرب ولا زلت اذكر الحطام والبيوت المضروبة في طفولتي كأني رأيتها بالأمس

تحياتي

Sokomonoce said...

كلبوزة انت صحيت كثير من الماضى لكن صعب اننا نقاشة فى تعليق الموضوع محتاج سرفر مخصوص لاسترجاع الماضى وبلوج خاص جدا انا احى الحصان الاسود اللى قدر انه يلخص القصة فى كلمتين

شــهــروزة said...

زى ما شفت فى التعليقات اللى قبل منى
اتأكدت فكرة واحدة
النصر له ألف أب
أما الهزيمة فهى ابنة سفاح

النكسة كانت بنت حرام ومالهاش أب
شال الليلة كلها واحد بس اسمه عامر
ومحدش حاسب زعيمن الأمة الغافل عن قدرات جيشه وشعبه والغافل أكثر بقدرات خصمه
زعيم الأمة مكانش فاضى الا انه يعمل وعيم وشيخ عرب برة مصر
وترك الشعب جوة لكلابه تنهش فيه
الجندى راح الحرب مجبور
مقهور
عنده أخ او ابن عم أو ابن خال مرمى فى المعتقل
وياعالم
عايش ولا مات
ومن ترك أرضه وزرعه عرضه لمن ينهبه وهو هناك شايل سلاح ميعرفش يشيله ازاى


جدتى لم يخل بيتها من الأحزان
قدرها ان أبناءها كانوا يشكلون كتيبة وانها كانت أرض خصبة للبنين
عم راح فى النكبة 48
وعم تانى فى 67
والوالد كان فى 73
يعنى كتيبة متنقلة
ورفض الوالد انه يخرج من الجيش بعد صدور قرار باعفاء كل من كان له شقيق استشهد فى حروب سابقة

ألا لعنة الله على كل حاكم غافل غبى لا يعباء بأرواح جنوده

bluesky said...

كلبوزة....مدونتك جميلة من الاسم للتعليق على البوست
موضوعك جميل بجد و انت شخصية مهتمة شخصية بتحارب بقوةالفكرة
keep up

شادي فايد said...

انا يبدو اني غبت كتير عن التدوين

بس انا عايش اجازة قمة في المتعة

ومش ناوي ارجع للتدوين قبل أسبوع

بس عشان خاطرك نزلت بوست كنت حاطه درافت

وهو مستوحى من بوست قديم عندك
كوني نغشة

رأيك اهم رأي بالنسبة ليا في البوست ده

أما عن بوستك ده فانا اسف انا مقرتوش
بس خدت فكرة سريعة عن فكرته

اول لما افضى اكيد حقرا كل اللي فاتني في كل المدونات و اقول رايي فيه

مهو لازم ادفع ضريبة الاجازة

Epitaph said...

وبلدنا ع الترعة بتغسل شعرها


:(

ياسمين said...

ألف حسرة على الرجال الأيام دى

غادة الكاميليا said...

كلبوزة السامباتيك
معرفش ليه جالي احساس كبير اوى انى محتاجه اقولك وحشتينى
بجد وحشتينى

frozen love said...

(((إن الجندي المصري في 73 هو نفسه في 67 من حيث الشكل والمظهر، ولكنه غيره من حيث الباطن


72e2a atfk m3aky feha klytn..elkhtab da ra23 3la fkra we khlany et2srt awy fe aktr mn gz2 feeh

يا مراكبي said...

الرسالة دي من 67 ولا من 2007؟

حائر في دنيا الله said...

في 67 أخذنا ضربة مطرقة حتى نستفيق
أعتقد أنها كانت مستحقة
ووجابة حتى نفيق فعلا
المشكلة أننا لم نفيق للآن بالقدر الكافي
فهل ننتظر مطرقة أخرى
أعتقد

مع تحياتي

BackBone said...

بقولك ايه متسيبك من الموضيع اللي ملهاش لزمه ديه و تيجي تديني شويه نصايح في المشاكل اللي عندي علي البلوجر

انا مش بعمل اعلانات بس بجد انا في حجات محتاج فيها خبرت حد عدي بيها قبل كده

جبهة التهييس الشعبية said...

إيه ده إيه ده

إيه اللون الحزايني ده

حرام عليكي بتخليني اعيط ليه؟

وانا ناقصة؟

عين ضيقة said...

أعتقد ان الوطن مش رخيص..يعنى يستاهل ان ملايين زينا وزى عبدالعاطى يموتوا
وبعدين احنا هنقنط ليه من رحمة ربنا ,مسيرنا نفرح تانى زى مافرحنا فى 73
سلام ياقمر

sherif gharib said...

لا يغير الله ما بقوم حتى يغيروا ما بانفسهم
صدق الله العظيم
اذا كان ربنا نفسه قالها
نفس الجنود هما هما
بس الاختلاف فى الروح فى الايمان بالقضيه فى الرغبه فى استرداد الكرامه الضائعه بين براثن اليهود
الحمد لله

bastokka said...

رمونا زمان و رمونا امبارح و لسة حيرمو اولادنا بكرة

منهم لله

تعالي شوفي جوزي عامل فيا ايه
في طهقان و طهقانة

Human said...

الرسالة دي فاكرتني برسائل الأبنودي مش عارف ليه(حراجي القط العامل بالسد العالي)....يمكن عشان الأثنين مصريين والأتنين كانو بسطاء ومش فاهمين حاجه من اللي بيحصل حوليهم

Moog Alb7ar said...

خلاص يا كلبوزة العرب بقى فى خبر كان
ومحدش معترف بينا
واحنا واقفين فى مكانا مبنتحركش

smraa alnil said...

والله دمعت وانا بقرا الكلام دة
وحياتك جندي 67 زي جندي 73 زي جندي 2007 زي جندي
2500
ربنا يتولانا
بوست رائع وعجبني اوي ربنا يكرمك يارب

sara said...

كده برضو يا كلبوزة مش تقوليلي انك سارة زى
انا كده فهمت كومنت كنتى كاتباهولى مرة عن ان فى سارات كتير
يا غامض يا جميل انت
وحشتينى بجد يا كلبوزة اقي تعالى عملالك كيكه ورق عنب وشاى بلمون
...........
عن البوست ده بقه
رساله محزنه جدا
بس هم الناس بتوع بلدنا اللى عايشين فيها كده من زمان والحكام كده من زمان وعبثيه الحياه كده من زمان برضه
انا ما بحبش السياسه ولا بهتم بس بحب تفاصيل الناس والمشاعر دى البوست ده فعلا حلو
باي يا كلابيزو

ekraammalik said...

السلام عليك

انسيابيتك في التعبير رائعه احببتها جدا وطريقة سردك للهزيمة والرغبه في الحياة ممتعه...مع كل تمنياتي بالتوفيق

اكرام/بغداد

ريما said...

عايزة اقولك اني بجد قشعرت لما قريت البوست واتخيلت منظر الراجل المسكين ده وهو بيكتب الجواب واتخيلت بمنظر اولاده وهما بيسمعوا كلامه ده ومنظرم لما عرفوا انه مات
مش عارفة انا مهتمتش اوي بالكلام على اسرائيل قد مااهتميت بالحكاية دي
اصل اسرائيل حاتفضل زي ماهي زمان ودلوقتي وحتى بعد 100 سنة
سلامي لكي

Sexoona said...

زوجتي الحبيبة فتحية
وحشتيني و وحشني العيال و البيت و الزريبة (فى حد يبعت فى جواب يقول وحشتنى دورة المياه ... بالزمة مش ده هبل )و الأهل و الأصحاب و البلد كلتها و نفسي و منى عيني أغمض و افتح ألاقي روحي(كلمه حديثة تكثر بين النساء وبديلها فى كلام الرجال الدارج ...نفسى) جارك في الدار و حولينا العيال و ريحة المشلتت مفحفحة(لعلمك اهتمام الفلاحين بالمشلتت لا يذكر بالنسبة لأهل البندر لأنه متلقح قدامهم كتير فلا يذكروه بالمرة إلا إذا كان جايلهم ضيف من البندر) و مالية الجيهة كلتها(وبعدين واحد متنيل فى نكسة حيقعد يقول رايحة فايحة ... الظاهر السمنة بتجيب غباء وهذا أمر واقع)
بس أقولك أية!!! الحال هنا صعبة قوي قالوا لنا تعالوا امسحوا اسم إسرائيل من على وجه الأرض (الكلام ده ما اتقلش للعساكر لإنهم أصلا لا بيعرفوا يكتبوا ولا يهببوا)و اتارينا جينا عشان يتمسح بكرامتنا الأرض . و قالوا لنا تعالوا حرروا فلسطين و محدش أتأسر غيرنا (منين أتأسروا ومنين قاعدين فى خندق ده 76 إسمه انسحاب مهرجل). ده حتى النفر مننا كان بيهرب و يسيب سلاحه و دبابته و لا همه يحرقها و لا يدمرها لجل العدو (تأليف غبى .....) ما يظفر بيها من بعده، كان كل واحد فينا بيقول ياالله نفسي و بيفر بأجله زي النمل كل واحد بيجري في جيهة، و لا عارفين فين القائد و لا ايه هي خطة الانسحاب ده حتى بيقولوا في المثل تفيد بإية يا فرس و أنت من غير خيال(يا سلام ......)


تهنا و عطشنا و جعنا و أديني اهو مرمي في خندق مع خمسة من الأنفار مستنيين المدد و بنسمع في الراديو (وكمان معاهم راديو بطارباته ما خلصتش) وكلام بيطري على قلوبنا سمعنا إن الطائرات الإسرائيلية بتسقطت بالعشرات و إننا محققين نصر ساحق
بس اللي مستغربله إن مات مننا كتير و اتأسر مننا اكتر و مش شايف في الجو غير طيارات العدو أمال الكلام اللي بنسمعه ده أصله أية؟(بينسحب وبيكتب جواب لمراته ده أنت كده ينطبق عليكى القول كلبوزة بس غـــ .....)

فتحية أنا راجع متخفيش و إن شاء الله خاخدك أنت و العيال و ننزل على البندر نشتري الكردان القشرة اللي كان نفسك فيه و حجيب للعيال كسوة المدارس و نزور السيد البدوي و نأكل حمص و حلاوة(هوه فى إيه وإلا إيه)
متخفيش عمر الشقي بقي

(المصيبة إن تمر حنه صدقتك وده حيخلينى انظر لها نظرة تانيه)

إمضاء
زوجك
عبد العاطي

whyme said...

البوست بينقل حال المصريين من خمسين عام

فهم غلابه بسطه جداً منقادين و مقيدين باقتيادهم للرؤسائهم و ايمانهم به

شعبنا طيب اوى و اهتماماته على قده مش عايز الا الستر و الكردان القشره و كسوه العيال

و يا ريت لاقيهم

تحياتى يا كليوزه على مواضيعك الجميله اوىو احساسك الرائع

rasha said...

حلو بس ايه اللي فكرك بالوضوع

ياسمين said...

انتى فين يا بنتى بقالك مدة مختفية

فى بوست مهم على مدونتى وعاوزة رايك فيه

koukawy said...

هي دي بتاعت الأبنودي و لا شباهها؟

el2ahwagi said...

masa2 elsambateek...

akhbarik eh..??

raspoutine said...

انا كنت عايز اقولك انتى مره تتكلمى عن العشرات والبرابز ومره تتكلمى عن الحرب والجوابات
انا مش عرف انتى ميولك ايه؟؟
هل انتى من الاحرار

ام من الاشرار



يعنى انتى معانا ولا مع الناس التانيين

سمسم said...

ما شاء الله وكمان سيادتك نكدية موت...إحفظنا يارب

tota said...

كلبوظة

خلتينى احس ان اللى كتب الرسالة جندى بسيط من الامن المركزى بس مش من النوع بتاع دلوقتى نوع تانى
نوع فاهم بسيط بس عارف بيقول ايه
خايف وزعلان بس لسه عنده امنيات
نوع اندثر مع الايام اللى ولت
نوع مات مع 73 ومع 67 ومش باقى غير نوع موديل 2007 اللى صعب قوى تقارنيه بيهم

تحياتى

elgharep said...

ما حدث فى 67 نكسة بكل المقاييس
نتيجة أخطاء فادحة للنظام عبد الناصر هذا الزعيم الفذ والذى أعترف بهزيمته وتنحى ورفضشعبه وقاد بلده فى الأستنزاف وتوفاه الله قبل المعركة الفاصلة
رحمه الله
الغريب

el2ahwagi said...

basalem bas...
wem3aya 2ahwa .. !

ROMIL said...

ماتخلينا في اللى أحنا فيه
67 تاني
أنا شايف ان حتى 67 كان فيها كرامه وعزه
خلينا في دلوقتي
بس بجد رساله جميله من مجند بسيط وكل حلمه انه ياكل حمص مع زوجته في السيد البدوي

ROMIL

أنـــا حـــــــــرة said...

كنت ناويه اقولك
جميل انه عنده أمل ينزل
لقيتها قلبت بانه مفقود
تفتكرى البلد دى بتاكل شعبها لحم و ترميه عضم و للا احنا عضم م الأول

micheal said...

أولا تحياتي لكي علي هذة المدونة الرائعة اللي كنت بتصفح فيها شوية اليومين اللي فاتوا و لفت نظري فيها الموضوع الجريء المثير للجدل بتاع العادة السرية
بخصوص الايمان ..أقدر اقول ببساطة انة شيء جوهري متأصل في المصري منذ القدم و هو دة اللي خلي الجندي المصري في 73 يلقن الصهاينة درسا قاسيا لن ينسوة أبدا بالرغم من أن كل المؤشرات كانت ضدنا
تحياتي

omar مشروع بطل said...

زمان مكانش فيه اعلام ولا فضائيات ولا جرايد مستقلة ولا نت ولا مدونات ولا كان فيه "كلبوزة" او "Omar" كان فيه بس اعلام الحكومة

علشان كده عبد الناصر من كتر ما كدب والشعب بيصدق افتكر انه ممكن يكدب حتى فى الحرب

احنا شعب طيب اوى .. حتى لما عرفنا الحقايق كلها .. عملنا ايه؟؟؟؟؟

بعدك على بالى said...

عبد العاطى ومراته وولاده دول اللى دفعوا التمن غالى.. وغيرهم اللى قبض.. اجرهم عن العادل يوم الحساب

AbdElRaHmaN AyYaSh said...

صعبه اوي اوي اوي
:( فعلا مؤلمة
لكن بردو المدونة كلها روعه
أحييكي

sendrlla said...

على فكرة كلامك جميل اوى ومؤثر وحقيقه مش خيال ومدونتك هايله

М€ŝЋМΣŞĦ said...

كانو 67 كومنت .. وبصراحه كانو لايقين علي الاسم لكن مقدرتش معلقش انا كمان

اولا رد للحصان الاسود
الدعم العربي كان موجود من اول لحظه للهزيمه .. السعوديه قدمت دعم مالي مفتوح(مفتوح و مش قرض, سلفه لا ترد يعني ) وليبيا قبل الحرب امدتنا بسربين ميراج لسه بشوكتهم ودول تانيه امدتنا بقوات بريه .. بس الدعم مكانش ظاهر في الجبهه المصريه لاداء الجندي المصري الفريد في حرب 73 , وفي مرحله معينه تم توجيه معظم الدعم الي سوريا لاسباب معروفه للجميع , وقطع البترول كان ذره في بحر

هجومنا علي اسرائيل في 48 كاد ان يكلل بالنصر لولا الخيانه والاسلحه الفاسده

و حرب 67 كان من الممكن ان تأخذ منحي اخر لولا وجود قاده متخاذلين غير اكفاء وهيكل قيادي هش و سوء العلاقه بين القائد و جنديه

امر الانسحاب كان اسواء قرار يمكن اخذه .. وباعتراف اسرائيل ان الجنود لو كانو قررو الدفاع حتي بدون غطاء جوي كانت الحرب ستأخذ منحي اخر, منحي دموي لهم اكثر مما هو لنا

حرب 67 خلفت لمصر حوالي 10000 شهيد مصري , ولاسرائيل علي كل الجبهات ما يقارب 400 قتيل

وكل هذا بسبب خطأ قيادي,وارواح بلا ثمن
--------
سمباتيك, رساله معبره واسلوب جميل

will said...
This comment has been removed by a blog administrator.
قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر