رسالة من 67

زوجتي الحبيبة فتحية
وحشتيني و وحشني العيال و البيت و الزريبة و الأهل و الأصحاب و البلد كلتها و نفسي و منى عيني أغمض و افتح ألاقي روحي جارك في الدار و حولينا العيال و ريحة المشلتت مفحفحة و مالية الجيهة كلتها
بس أقولك أية!!! الحال هنا صعبة قوي قالوا لنا تعالوا امسحوا اسم إسرائيل من على وجه الأرض و اتارينا جينا عشان يتمسح بكرامتنا الأرض . و قالوا لنا تعالوا حرروا فلسطين و محدش أتأسر غيرنا . ده حتى النفر مننا كان بيهرب و يسيب سلاحه و دبابته و لا همه يحرقها و لا يدمرها لجل العدو ما يظفر بيها من بعده، كان كل واحد فينا بيقول ياالله نفسي و بيفر بأجله زي النمل كل واحد بيجري في جيهة، و لا عارفين فين القائد و لا ايه هي خطة الانسحاب ده حتى بيقولوا في المثل تفيد بإية يا فرس و أنت من غير خيال


تهنا و عطشنا و جعنا و أديني اهو مرمي في خندق مع خمسة من الأنفار مستنيين المدد و بنسمع في الراديو كلام بيطري على قلوبنا سمعنا إن الطائرات الإسرائيلية بتسقطت بالعشرات و إننا محققين نصر ساحق
بس اللي مستغربله إن مات مننا كتير و اتأسر مننا اكتر و مش شايف في الجو غير طيارات العدو أمال الكلام اللي بنسمعه ده أصله أية؟

فتحية أنا راجع متخفيش و إن شاء الله خاخدك أنت و العيال و ننزل على البندر نشتري الكردان القشرة اللي كان نفسك فيه و حجيب للعيال كسوة المدارس و نزور السيد البدوي و نأكل حمص و حلاوة
متخفيش عمر الشقي بقي

إمضاء
زوجك
عبد العاطي



رسالة كتبها احد المجندين في حرب يونيو 67 و لكنها لم تصل إلى أهله و إنما وصلهم خبر فقدانه

(((إن الجندي المصري في 73 هو نفسه في 67 من حيث الشكل والمظهر، ولكنه غيره من حيث الباطن والجوهر، إن الإنسان إنما يقاد من داخله، لا من خارجه، ولا يقود الناس في بلادنا شيء مثل الإيمان، ولا يحركهم محرك مثل الإيمان.)))