Thursday, July 06, 2006

أقوال مش مأثورة قوي

1
واحد متلبسهوش شبشب في رجلك
!
اسمع الجملة دي من ناس كتير بيقولوها علشان يعبروا عن واحد
ملهوش اي لزمة في الحياة أو واحد متحكم في الناس و هو واطي
الغريبة ان الشبشب ليه اهمية كبيرة و أنا شخصيا مقدرش امشي
من غيره. علي كده الجملة دي مش بتأدي المعني المطلوب منها
و أقترح أن نقول
واحد الشبشب اللي في رجلك له اهمية عنه
ده اذا كان ضروري نذكر الشبشب في الموضوع
-------------------------------------------
2
العجوز لما يتدلع يبقي زي الباب المخلع
!
معروف ان سن المراهقة بين العاشرة و الثامنة عشر
لكن الغريب ان بعض الرجالة بتحصلهم نكسة و بترجع لهم
المراهقة في سن الخمسين
و لا تنتهي الا علي يد الحانوتي
و أقترح ان نقول
عجوز و عامل توتي مايتوبش الا علي ايد الحانوتي
---------------------------------------------
3
فلان مقطع السمكة و ديلها
!
و هي تطلق علي الواد الجن اللي عارف و عامل كل حاجة و مقطع
بطاقته مستبيع يعني
و الغريبة ان تقطيع السمكة ليس معضلة بل ان اي طفل صغير
يستطيع ذلك
و أقترح أن نقول
فلان تربية أسود لا يهمه سجن و لا حدود
-----------------------------------------------

18 comments:

غادة الكاميليا said...

والله انتي زي العسل ودمك سكر يابنوته
أول مثل عندك فيه مليون حق
...............
بتصادفني النوعيات دي كتير

ام المريله الكحلى said...

يخرب بيت العسل
زى السكر
بجد
يا سمباتيك
وحلوه حكايه تربيه اسود دى هابقى اضيفها للمصطلحات الخاصه بيا
اول زياره ليا هنا بس اوعى وشك مش هامشى من هنا تانى ابدا

Sampateek said...

*~*~*غادة الكامليا*~*~*
يسعد أيامك يا جميلة
العيون الحلوة بتشوف كل اللي حوليها جميل
تسلميلي
كلام في سرك عاملة صينية بسبوسة عجب حسيب لك حتة في المدونة مع أحلي كباية شاي
انستينا يا غادة

Sampateek said...

*#*#* أم المريلة كحلي*#*#*
يا دي الهنا و السرور اللي أنا فيه
نورتيني يا أختشي
طبعا ريحة صينية البسبوسة ضاربة في البلوج و أحلي حتة مقرمشة للجميل اللي نورنا
بلا رجيم بلا وجع قلب:)
متحرمينيش من طلعتك البهية
خالص تحياتي

عوليس said...

صباح الامثله

Sampateek said...

عوليس
صباح الخير بالليل
الا صحيح هو يعني اية عوليس؟
معلش اصل انا تعليم مجاني و كده

كلمه said...

loooooooooooooool ... aeh el7war elgamed a5er 7aga da ....
عجوز و عامل توتي مايتوبش الا علي ايد الحانوتي
gamda elteneeeeeeeeeen ..... btw ... matrakzeesh ma3 elnas fel klam .... 3shan esra7a hatenhebly aw tetganeny ..loool .... awel masal ana sme3to be tare2a tanya & it was somethin like (ma2la3hosh men gazmety):D

Sampateek said...

كلمة** خلاص مبقتش ضيف و بقيت صاحب **
دار
بعد كباية الشاي و الذي منه
انستنا يا فندم و نورت بلوجنا
و ان كان علي الشخص اللي متقلعوش من رجلك فصدقني احيانا الجزم لا مؤاخذة بتبقي أحن علي الواحد من بني أدمين كتير
أنا بقابل ناس مقدرش البسهم في رجلي لأن عقلهم ضيق حيعملي كالوا هاهاهااااا
أنسنا دايما

film69 said...

فكرتيني بالمثل بتاع
كلبوزة لكن سمباتيك ساعات تصادك وتشويك
:)))

كلمه said...

looooooooooooooooool

WLAHY 3andek 7a2 ..... fe nas teb2y 3ayza te7dfeha bel gazma f weshaha 3shan mtshofehomsh tany .... w nas tanya teb2y 3ayza tedrabha bel shebsheb 3la senanha 3shan mytklmosh odamek tany ..... loool .... nice blog gurl
btw ... motshakreen 3la kobayet elshay we alazy menoh :D

...دنيتي said...

هههههه
جامدة جدا الأقوال اللي مش مأثورة دي
خصوصا اول واحد فعلا الشبشب حاجة مهمة جدا في حياتي

so7ab said...

حلوة اوى يا سمباتيك بس انا طول عمرى كان عندى مشكلة فى تقطيع السمكة عشان كده عمرى ما حسيت انى الواد الفت النت

Sampateek said...

film69
هاهاهاهاها حلوة يا فيلم لأ و أنت الصادق:: كلبوزةتحافظ عليك و تشيلك لوقت عوزة
__________
كلمـــــــة
و الله عندك حق في كلامك
لو في اي خناقة انا جاهزة
و انهاردة مفيش شاي في حاجة ساقعة
لزوم الحر و كده
__________
دنيتي
نورتي البلوج يا جميلة
ابقي شرفينا دايما
احلي وردة ليكي
__________
صحاب
ايوة تفصيص السمك مشكلة لكن تقطيعه سهل متهيألي
و بعدين انا بخرت البلوج علشان ريحة السمك ضربت
نورتنا
------------------------------
شرفونا دايما يا حبايب

المزاجنجي said...
This comment has been removed by a blog administrator.
المزاجنجي said...

ما شاء الله عليك يا كلبوظة دمك خفيف

مـحـمـد مـفـيـد said...

والله واقوال في نتهي الجمال احييكي عليها

sha3'af said...

حلو جدا بديل مثل رقم 2

ومعلش بقى تقطيع السمكة صعب / التقطيع بالسكين وفصل الشوك عن اللحم

و الأصعب هوه انك تقطعي ديلها لأنه صلب / والتركيز غالبا في المثل على ديلها

بس بديل المثل برضة لذيذ جداااااااا

Anonymous said...

جميله جدا الاقوال دى وانا بحسدك على خفه دمك وربنا دايمايبسطك زى مابسطينى