Sunday, July 02, 2006

صيدلية المرض



رايتة يتسند علي السيارات و هو يمشي في الشارع و لم اكن معتاده ان اري عم عبده البواب يفعل ذلك
و لما سالته مالك يا عم عبده سلامتك رد بصوت ضعيف الله يسلمك يا فندم بس اصلي عندي روماتيزم واجعلي معدتي
و تعجبت ازاي يا عم عبده الروماتزم مش بيجي في المعده
فرد في الم ما انا لما الحكيم كتبلي علي دواء للروماتزم و اشتريته من الصيدلية وجعلي معدتي و الحكيم بيقولي دي قرحة
و هكذا ياخذ ابني مضادا حيويا للجهاز التنفسي فيصاب باسهال و تاخد امي دواءا مسكنا للصداع فيسبب لها الدوار و انطخ في عقلي و اتناول دواء للبرد فيصيبني بالحساسية و هلم جرة
و كاننا نصر جميعا علي اثبات صحة المثل القائل :جه يكحلها عماها
و اذا كنت تعاني من مود سئ (مود يعني مزاج أكتبوها يمكن تنفعكم) فتستطيع ان تقرا النشرة الطبية لاحد انواع قطرة العين فسوف تجد نفسك تضحك بصوت مسموع و يمكن يفتكروك البعيد اهبل
و فيها: القطرة قد تسبب عمي جزئي ,او انفصال في الشبكية ,او خلل بصري, او بعض انواع المياه البيضاء و في حالات نادرة تسبب عمي كلي بعيد عن البلوجرية كلهم
و بهذا تضمن شركة الادوية انه لو واحد محامي فاضي اخد الدوا الفلاني و جاله بري بري ميتبرعش و يرفع عليهم قضية تعويض و كانها بتقوله : القانون لا يحمي المغفلين يا حماده
لما تعالت الاصوات بالعودة للطب البديل و طب الاعشاب وجدنا وزارة الصحة تتشملل و تتنفض و تقول علي لسان متحدثها الرسمي مختار ابو فلة( و الفلة هي التي توضع علي قمة الزجاجة )و ليس لها اي لازمة
نحن نحذر من استخدام اعشاب مجهولة المصدر قد تسبب مشاكل صحية للشعب
اسم الله
قال اليانسون و الكراوية و الشمر حيسببوا مشاكل و الادوية المهببة مش بتسبب للناس حاجة
و المخجل انك لو سالت عن معظم الادوية الموجودة في الصيدليات المصرية في اي بلد عربي سيقول لك الصيدلي الهندي: لا بابا هدا دوا خربان مافي موجود في موت واحد صديج هدا دوا ممنوع واحد نفر يجي تعبان منه
و اتسائل هل صارت الصيدليات كما كانوا يسمونها زمان (دواخانة) ام انها اصبحت (مرضخانة) بين قوسين صيدلية المرض

3 comments:

تمر حنه said...

على فكرة أنا من الناس اللى بتحب الأدوية جدا
معرفش ليه بحس انى بدلع نفسى بالعلاجات - يعنى ممكن شوية صداع تلاقينى خدت لها تلات أربع حبايات متباينة التأثير
و يا سلام لو داخل عليا برد - أحلى مضاد حيوى و رينوبرونت و ستوب بين و هيصصصصة
أما بالنسبة للطب البديل و الحاجات الديليكات دى مبتجبش معايا - أحنا بتوع الكيمى كيمى كا و سلملى على محمود عبد العزيز يا حلو انت يا متركب

كلبوزة لكن سمباتيك said...

صديقتي الحبيبة تمر حنة دلعي نفسك زي ما انت عايزة يا اختاه بس ابعدي عن الادوية لان اعراضها الجانبية بتودي في سكة اللي يروح ميرجعش حاولي تسيبي مناعة جسمك تثبت نفسها و اديلها الفرصة مرة تحاول
بالنسبة الي الطب البديل فقد اثبت نجاح عالمي و يمتاز بقلة الاعراض الجانبية و هو ما لجأت له الكثير من شركات الأدوية العالمية
خالص الأماني لك بالصحة و العافية
و ربنا لا يحوجنا يا اختشي لصيدلية المرض

أُكتب بالرصاص said...

كلام سليم

بس مبالغ فيه