Wednesday, August 02, 2006

لبلابة الحزن

كنت بسمع زمان الناس تقول الحزن مكانه القلب
لكن انا حاسة ان بذرة الحزن هي اللي في القلب
نبتت و اتشعبت فروع الحزن في كل حته في جسمي
لحد عنيا و جلدي و حتي احبالي الصوتية
بقيت شجرة حزن متنقلة
مش عارفة افرح
و اكتشفت ان الشجرة دي مدت جذوعها لبرة و بدأت تلف علي كل شئ حوليها
زي اللبلاب
الهوا بقي حزين مخنوق كانه خارج من قلب بركان
الشمس حامية و قوية و بتنفر حرارتها عليا
الارض يابسة و قاسية زي الفولاذ
بطلت اسمع و اشوف نشرات
بس الايميلات اللي بتجيلي بتسقي شجرة الحزن و الاقيها كبرت و كبرت
ازاي اخرج شجرة الحزن دي من جوايا و اقطع جذوعها و جذورها
ازاي اقضي عليها و هي بقت متلفلفة حولين شراييني
خايفة لو قلعتها تطلع بالدم
حسبي الله و نعم الوكيل

29 comments:

Nouran said...

تصويرك جميل جدا لحالة الحزن اللي انت عايشاها بس مش انت بس كلنا حاسين ان احنا مخنوقين ومش عارفين نفرح موضوع التنسيق اللي حالي هو اللي فرحني غير كده الحالة بتزدادا سوء فعلا حسبي الله ونعم الوكيل ويااااا رب نتخلص من شجرة الحزن دي

أُكتب بالرصاص said...

للبلابة ..

في البداية ظننت انك غلطت في كتابتها
لبلاغة

ولكن بعد ما مفهمت المقصد
أقول لك
هذا ابلغ تعبير عن شبكة الحزن التي تلفنا
الواحد مش عارف يحزن على ايه والا أيه
على بلده
ولا بلد جيرانه
ولا بلاد المسلمين
والا على حياته الخاصة
والا على ايه ولا ايه
فعلا لبلابة
شبكة من الاحزان اكسبت الواحد مرارة في الحلق



ز

islamventura said...

انا ممكن اسال سؤال

انتى احزانك كبيرة للدرجة دى ؟
انتى افضل حل لكى لو انتى حزينة تغيرى اى حاجة تسبب ذلك
تغيرى حياتك
شغلك
اصحابك
كل العوامل اللى ممكن تسبب الحالة دى

و انا مدرك جدا لصوت الحزن

my blog is
islamventura.blogspot.com

Anonymous said...

والله يا سمباتيك رسمتي لوحة بكلامك عن الحزن اللي أصبح شجرة بتتطرح فواكة مرة
وللخلاص من مرارة طعم الثمار لازم الأرض حوالين الشجرة تتقلب زي اخواننا الفلاحين ما بيعملوا بيقلبوا الأرض ويسقوها أكتر .. مية حلوة لأن الشجر بيموت من المية المالحة اللي نشفت ريقنا
لكن أوعي تقلعي الشجرة لأن الشجر حياة .. والشجر يعني بكرة .. مش يمكن بكرة تطرح ثمر حلو وزي السكر

كلبوزة لكن سمباتيك said...

باشمهندستنا نوران

انت اللي جميلة ربنا يفرح قلبك دايما و ينجحك كمان و كمان
-----
ابراهيم
تسلم و تعيش
ان شاء الله ربنا يفرجها علينا و علي لبنان
-----
itstoolate
ايوه عندك حق مرارة و علقم
و اكتر ما يؤلم في الموضوع العجز
قاعدين مستنين الدور يجي علينا و احنا ساكتين
يا رب
----
Eng/ Islam M.S.M.S
شرفتنا يا فندم يا رب يسعد ايامك
----
زبادي
ربنا يستجيب لدعائك و يفرجها علينا و يورينا ما يثلج صدورنا
----
الي كل من شاركني حزني
و واساني
خالص دعائي و احترامي و تحياتي

Tamer Nabil Moussa said...

فعلاا حالة الحزن بداخل كل انسان فينا.

تموت اطفال ونساء وشيوخ والامة تتفرج وكان الامر لايعنيها فى شىء

الحزن فى هذة المرحلة صعب التخلص منة لانة حالة انسانية

والاسباب مازالت موجودة بل كل يوم تزيد

تحياتى

Mai Kamel said...

mmmmmmm
معاكي حق..
انا الضحك مخاصمني بقاله كتير
مع اني عمري ما كنت كدة.. بس الظاهر الواحد كبر ولازم يبدأ يحجز للحزن مكان في نفسه

محمد أبو زيد said...

يا حزين يا قمقم في بحر الضياع
حزين أنا زيك و ايه مستطاع

الحزن مبقالهوش جلال يا جدع

الحزن زي البرد زي الصداع

وعجبي
صلاح جاهين

islam yusuf said...

dont be sad
sadness is agreat pain

أجدع واحد في الشارع said...

الحزن لازم يكون
بس هنعمل ايه
ايه اللى فى ايدك او ايدى انا او غيرى
عشان نعمله
اللى نقدر نقوله
حسبي الله و نعم الوكيل

soosa el-mafroosa said...

لو سمحتوا يا جماعه ..انا طالبه منكم خدمه .فيه واحد ابن كلب يهودي دخل يأيد إسرائيل ع المدونة بتاعتي ..تعالوا عندي و اشتموا أهله لحسن انا للأسف ضعيفه في الشتيمه بالإنجليزي


شكرا

Polka Dotted said...

that's so sad dear.. :(
well try to stop watering it and try to take it out bit by bit.. it will work.. dont worry :)

marktwain said...

الحزن رغم مرارته و رغم جراحه الا انه دائما ما يسبق الفرح . لكى تتخلصي من الحزن لابد ات تؤمنى انه قدرك و تتأكدى ان القادم بإذن الله افضل .
بالمناسبة فأفضل اوقاتى عندما اكون حزين لأن عقلي يكون اكثر ترتيبا

sherif gharib said...

انا شايف ان الحزن بقى شىء ثابت معانا لدرجه انى ساعات بحس انة غريزه مولودين بيها بس لمل بتخنق مابالاقيش قدامى غير انى اتناسى النار اللى جوايا علشان مااتحرقش بيها
تحياتى

...دنيتي said...

يا حزين يا قمقم تحت بحر الضياع
حزين انا زيك و ايه مستطاع
الحزن مبقالهوش جلال يا جدع
الحزن زي البرد زي الصداع

المسافر said...

لا لا لا لا لا لا لا لا
الكلام ده ما ينفعش خالص

أمال الرمي ورا الضهر عملوه ليه؟
والطناش اخترعوه علشان إيه؟
لازم الواحد يفوت ويطنش ويمشي ولا كأن فيه حاجة
وديتها تدبي أكلة متينة كدة من النوع اللطيف وعلشان الدنيا صيف والجو مولع يبقى أكلة سمك وجمبري وكابوريا ومعاهم شوية جندوفلي يصاحبهم بعض من الكلاماري ومعنونين بتنويعات من أنغام السلطات والمقبلات، تنكسر بعد ذلك حدتهم بقطعة من التورتات المميزة من لوكرنفال أو من ليدام ونعود إلى الأجواء الشعبية وندبها واحد شاي بالنعناع حتى يصل كل هذا إلى النخاع.... وبعدها يكون الحزن ضاع

أُكتب بالرصاص said...

والله سوسا ضحكتني

الحقوني يا جماعة

انا قلت خير
ايه اللي حصل

ياخوانا
كل واحد ينسك شومة او جزمة ويالا ورايا على سوسا المفروسة

قصدي على مدونة سوسا علشان نشوف ايه اللي بيحصل
:)

saso said...

ومبن فينا مش ملفوف اللبلاب حوالين رقبتة الايام دي
مبقيناش عارفين نعمل فيها مش شايفين ( نستعمي ) غصب عننا بنفكر كل دقيقة طب وبعدين ليها حل ولا هنفضل كدة؟
يارب الايام دي تعدي يا سمباتيك انا زهقت من الحزن

Anonymous said...

اللبلاب
نبات هين
مشكلته انه متطفل
بعيش على جهد غيرة وبياكل اكل غيره
واذا كان ع الحزن
كتيييير
ياكل وهنياله
الله لا تجيب حزن
تحياتى

Anonymous said...

يا عينى ع الولد

القلجاوى said...

فى الحقيقة دى أول مرة لى بمدونك ،
وبا ين مش هتكون الاخيرة ، يعنى بالعربى الفصيح مدونتك فيها حاجة ، فيها معنى واحساس ، نفسى أسالك انتى بتكتبى قصص ، ولو كان دا حقيقى ما تشعرين به ، وأنه بهذه الكيفية تستطيعين التعبير عن ما تشعرين به ، يبقى أنتى حاجة جامدة خالص ، ومش سهلة بالتأكيد
وللكلام بقية كلام وسلام
آه نسيت ، شكرا على زيارتك مدونتى
ويبقى ليكى عندى شاى

أحمــــــــدبــــــــــلال said...

حزين لحزنك
و
حزين لنفسى
و
حزين لبلدى
و
حزين لعروبتى
و
حزين لدينى
و
حزين لأنسانيتى
و
حزين لكرامتى



و القائمة تطول

للأسف

كلبوزة لكن سمباتيك said...

tamer & mai & محمد أبوزيد& islam yousef & ابن الشارع & BaTaBeeT & marktwain & دنيتي & المسافر & Epitaph & saso & aboaml & جمال الدولى& السيول السميرية &
أحمدبلال
الي كل من واساني و شاركني و نصحني
أهديكم باقة من الريحان و الزنبق
جمل الله حياتكم بالسعادة و فرجها علينا و عليكم و علي المسلمين في كل مكان
خالص دعواتي و تحياتي

tota said...

كلبوزة
سعيدة انى شوفت مدونتك
الحزن من شجرتك مادد لكل جسم فينا وطول ما فينا عروق بيمشى فيها دم وطول ما حاسين بالبلد واللى فيها والعرب وحالهم طول ماكبرت اللبلابة اكتر ووربطت شجرنا ببعض
عارفة ان الحزن بيجمع الناس
عارفة اننا ممكن حزننا يوصلنا لطريق نجاه بس لو عرفنا نلم بعضنا
سيبى حزنك طول ما فيكى حزن معناه فيكى روح بتحس معناه انك حية
اعذرينى شجرة حزنى عالية وكبيرة انا كمان بس بتقول انا حية وحاسة

BackBone said...

ليه كده يا كلابيزو دنا كنت.
نزعل علي البلد اه
نزعل علي لبنان ماشي
مفيش مشكله كمان نزعل علي العروبه و الوطنيه و الثقافه اللي انهارت و المبادئ اللي اتبعترت, شئ لازم و طبيعي يا كلبوزه... بس اوعي اوعي تسيبي الحجات ديه توصل الي روحك انا اقصد روحك اللي عيشه جوه جسمك الكلبوز العسول ده.

حاولي تنزلي مع صحباتك...ممكن تروحو السينما و الا ستي ستارز...ممكن كمان تروحي النادي تتمرنني اي حاجه مش لازم يعني يكون عندك صحاب في النادي يعني عشان تروحيه الواحد بيروح النادي يعمل صحاب... و احسن حاجه بحب اعميلها انزلي البسين يوم البنات طبعا ً مش عايزين فضايح ياكلابيزوا انت فهمني
good luck (Y)

layal said...

عايشين بالحزن بالفرح عايشين
عجبتني مسأله التف علي اسرائيل
فين ممكن اتبرع ؟؟

كلبوزة لكن سمباتيك said...

shoowbash
عندك حق
الائيش معاك منفضة انفض بيها؟
-----
tota
الله عليكي يا توتة خلتيني احب الحزن
----
BackBone
عملت بنصيحتك و رحت فيلم واحد من الناس و شفت البلد فيها ظلم اد اية و ان القانون مش بيسري الا علي الغلابة بس
طلعت حزينة اكتر من الاول
اشكرك لنصائحك الغالية
----
wa3d el3yoon
صحيح عندك حق بس مش ملاحظة اننا كل ما نقف نقع؟
اشكرك لامنياتك الرقيقة
----
layal
حقيقي عايشين في كل الاحوال
زوري المدونة السابقة و شاركي معانا
تفتك تهمنا
----
الغريب
تسلم و تعيش يا طيب
بس و لا يهمك انا اشتريت دستة مشابك جديدة و حنشر لكم مدونة فريش لسة مقطوفة من الغيط
-----
لكل من واساني و شاركني و نصحني
خالص تحياتي و امنياتي بالسعادة

salateenoo said...

تشبيه جميل...وبلاغة في التعبير والوصف...الله عليكي

BaTresYa said...

متقلقيش ربكـ كريم
صدقيني دا مش كلام
كل انسان فيه آلآم
بس ربكـ كريم
يخلي الشجرة حطام
والفجر يطلع
ونلاقي في الضلمة نور
صدقيني دا مش كلام
بس لما يجي الأوان
تصويركـ جميل جداً بس صدقيني إن شاء الله ربنا هيوريهم
يمهل ولا يهمل
وربنا هيفتحها علينا ان شاء الله