Sunday, August 27, 2006

خاطبة البلوجرية

نطت فكرة لدماغي و انا اقرأ مدونة
و لقيت الفكرة بتتقلوظ اكتر و انا بتصفح مدونة
و لقيت ان المجتمع مش بيدي الفرصة للبنت او للولد انه يبني نفسه فكريا قبل بناء اسرة و بيحملهم عبء الاسراع بالجواز حتي لا يقعوا تحت طائلة القيل و القال
و كان قطر الجواز لو فات علي واحدة بيهرسها
او ان ميعاد الجواز زي ميعاد مسلسل الساعة تسعة مينفعش يتشاف في الاعادة
لكل هاذوها قررت ان اقوم بدور
خاطبة البلوجربة
و علي كل بلوجراوي يجد في نفسه المؤهلات ان يترك بيناته في الكومنت و بلاش يحط الصورة علشان في ستات بتتوحم
و علي البلوجريات السكرة اللي علي وش جواز ان يعسكرن في الكومنت و يضربوا براشوت في انتظار بينات كويسة و هوب يعملوا ريكويست و تقع الفاس في الراس
بس محدش يرجع يدعي عليا و يقول منك لله يا خالتي كلبوزة
و في فكرة تانية
البلوجريات المتزوجات امثالي
يعرضوا بينات ازواجهم اللي عايزين يخلصوا منهم
و اهو تبقي ضربتي عصفورين بحجر جبتي عروسة لجوزك و بقي ليكي ضرة
بيدي لا بيد عمر
مين عمر ده؟

و اهو كله في سبيل الجاتوه و تورتة الفرح

82 comments:

moorgen said...

هههههههه
انتى كدا قررتى تعملى عمليه انتحاريه ولا زهئتى من جوزك فقولتى اشتغل خاطبه واجيب عروسه لجوزى تطلع عينه ويعرف قيمتى

يا ستى اللى خدته ....
وامشى فى جنازة .....
ولا انت شكلك كلبوزه وبتحبى الجاتوه فقولتى ادبس الناس فى سبيل اكل الحلو ببلاش

عموما
شوفى عريس لدى
حته جاتوه بالكريمه والشيكولاته
مسقيه شربات فواكه
؟؟
:)

Adel said...

شكلك عاوزة تتعوري ما بلاش يا بنتي على راي المثل امشي فجنازة ولا تمشي فجوازة وبعدين ان كنت انت زهقانة من الراجل وعاوزة تتبرعي بيه تقومي تتمحكي فباقي الحريم قومي انزلي الحراج وشوفي لك حاجة استعمال كويسة وبلاش هرشة نافوخ اما عن عرض البلوجريل الرجالة لنفسهم فانا اول زبون يا ستي
الاسم : المزاجنجى (ابو مزاج عااااااالي اوي )
السن :
43 سنة الا كام شهر يعني عيد ميلادي يوم 21/12 ومنتظر هدايا بلاش بخل
الحالة الصحية :
مريض سكر مستجد يعني مفيش مني خوف وعندي جلطة فالقلب من سنة 2000 و8 ذبحات صدرية على مدار ال6 سنوات دول وعامل 5 عمليات توسيع فالقلب وعندي شوية ضغط ونظري 6/60 وعندي هشاشة فالعظام والتهاب مزمن فالبروستاتا
الحالة المالية :
عاطل وعاوز اللي يصرف على ومشارك على معزة كانت حامل وسقطت ولي ربع في نخلة دكر ما بتنزلش ولا بلحة للاسف لكن عندي خلخال بتاع نينه انا وستة اخواتي لكن ممكن انصب عليهم واقدمه شبكة للعروسة وبالمناسبة طقم سناني ملك مش ايجار وعندي كمان طقم السنان بتاع ابويا الله يرحمة بس ضيق شوية بكرة هاعجز ويتظبط والعصايا اللي باتسند عليها خشب فواكه
العروسة :
اولا تكون مزة مزة بحق وحقيقي وعيونها ملونه وشعرها لحد كعب رجليها وتكون رجليها مقلوظة وجسمها فرنساوي من النوع المِتع مش المسلوع وتكون طويلة طول معقول وتكون بشرتها ناعمة علشان ما تطلبش مني سيلك ابيل ولا اي مزيلات ويكون ريحة عرقها مسك ولو شفتها فالضلمة الاقيها منورة وسنانها تكون صفين لولي وايديها رقيقة ولو موظفة وظيفة محنرمة جدا جدا لا باس وياريت يكون عندها ورث او منتظرة زي بعضه نصبر عليها وياريت تكون يتيمة وعندها عربيةان شا الله مرسيدي موديل 2000 حتى مش شرط تكون 2006 اهو نتواضع ونكسب اجر وثواب وللاتصال انا سايب تليفوناتي عند كلابيظو على الرف تحت لمبة الجاز اللي مغسلتهاش من يجي سنتين ويللا يا عرايس فرصتكم وجات لحد عندكم
وانت يا كلابيظو حلاوتك محفوظة واستأجز بقى لحسن غالي شيح وتيليو ولا بلاش الكلام قدام الناس نما انت فاهمة بقى الامسال المزمن ههههههههههههههههه براشوتش

farida said...

يا كلبوزه هانم
فكره حلوه الضره بيدي لا بيد المذه
بس صعبه شويه
و لا انتي خلاص رميتي طوبة الراجل و لا عدش فارق
المهم معنديش عرايس
عندي عرسان زي القمر و قمه في الاخلاق
بس الظروف الماديه.... انتي عارفه

Anonymous said...

أنا معاكي يا كلبوظه و من غير هزار بجد فكرة كويسه جدا ..يا ريت حد ياخدها بجديه و انا منتظره ال سي في بتاع الشباب...و أهو يا بخت من وفق راسين في الحلال

بالتوفيق يا كلابيزو ...ربنا يكتر من أمثالك

wanna b a bride said...

أيوة كده يا كلبوزة هو ده الكلام ...يالا يا شباب من غير ماترحوا ولا تيجوا و لا تجيبوا شوكلاته و لا جاتوه ..و لمعلوماتكم البلوجرز البنات كتير و حلوين بس الناس هي اللي اتعمت ...يالا مستنيين البيانات

أجدع واحد في الشارع said...

ليه بس كده انتى بتقلبى الموجع كده على ناس كتير مش انا والله انا لسة صغير اوى على الحوار ده

أحمــــــــدبــــــــــلال said...

أن قررت عدم الزواج للأبد
و شكلى كده هاقضيها أنحراف و خلاص
ده علشان أتجوز مش قبل ماأوصل للخمسةوتلاتين


ليه بس فكرتونا باللى بنحاول ننساه

LAMIA MAHMOUD said...

جواز اية بس هو حد لاقيه ولا طايقه .. احنا ارفع من الكلام ده
ههههههههه

شريف ضياء said...

يعني عشان عايزة تحلي و تهبري في البوفيه تضيعي الخلق معاكي؟
ماكانش العشم فيكي كده أبداً يا كلابيزو
أنا حابلغ لافندي بتاعك يفصل بدلة فرح مادام طباخ اللامؤاخذة بيدوقه

Shower-Mirror said...

سنتك بيضه و فيها كتكوت يا كلبظ ..!!؟؟ بلغت بيكى الانانيه (حب النفس ) .. و الساديه ( حب تعذيب الاخرين ) ... و السيكوباتيه ( حب الاذى و السلام ) ...هذا الحد ؟ عشان عايزه تكونى سبب فى عذاب الاخرين ... عشان واحده مش عارفه اللى هايجرالها و عايزه تتجوزى ؟ تقومى تعملى مجمع للأزيه و التعزيب ..اخص عليكى ياكلبوظه ... يظهر الرجيم و قلهة الاكل بوظو دماغك ... والا اقولك ( و بعد تفكير ) .. احسن يستاهلوا خليهم يدوقوا اللى احنا فيه ..

BackBone said...

مسااااااااااء الخيــــــر ياكلابيز....ـ

بس انا افضل الانحراف, فهو اسهل, ارخص, ءأمن,

ألذ ألذ.


ممممم, بس اوكي, تعرفي تقوليل ميزانيه الأختراع ده اللي اسمه جواز ممكن تتكلف كام بالذات اذا كانت القطه من البنات المثقفات المتعلمات اللي بيعرفوا يخوشوا علي النت و يعملوا بوستس.ـ

الميزانيه بالميت:ـ

شقه بـ 90,000
شبكه بـ 15,000
عفش و فرش بـ 60,000
فسح و خروجات و شهر عسل بـ 20,000

وانا اصلاً يتيم و فيش حد هيساعدني

يبقي معلش اتجوز ليــــــه

كنس و بعرف اكنس
غسيل و بنعرف نغسل
صحاب و كلام و فضفضه, والحمد لله عندنا اللي نفضفضلهم

عيال, هو احنا عارفين نصرف علي نفسنا لما نفكر في عيال, ده كفايه مزانيه البامبرز اول سنتين

لا وبعد ده كله ممكن جدا او غالبا بعد شهر العسل, هتلاقي العروسه مش مناسبه ليك و هتطلع عينك و عين لامؤخذه اللي خلفوك...ـ

ياكلبوزه جواز ايه بس اللي بتفكري فيه ده,


يالله, علي العموم انا افيلابل لو في واحده عايزه تتجوز.ـ

;)

KazaBaza said...

يا فتاح يا عليم يا رزاق يا كريم

انا مش شايف حد
بصي ابقي اعملي لست فيها البلوجريات الجداد
و طبعا بما اني من مؤسسي هذه الفكره او احد الاسباب
او بلطجه و السلام اللست دي تعدي علي الاول
مفهوم :)

عمر said...

بصراحه الفكره تستاهل وياريت تتطبق.انا بقى عمر

الأميره أوسه said...

كلبوزه
حلوه الفكره جدآ
بدل جواز الصالونات وجواز الكورنيش
يمكن جواز البلوجات يجيب نتيجه
أنا بفكر أكتب حلول لمشكلة تكاليف الجواز وأزاى نخفضها من واقع تجارب ناجحه فعلآ وأثبتت جدواها
خساره أنا مش ناويه أتجوز اليومين دول
أصل الدنيا حر وبعدين بتخنق بسرعه
والواد بتاعى مأشفر جامد معهوش الهوا
طيب ينفع تدوريلوه على عروسه روشه
وبعد كده أضم عليهم
كله شرعى يا حبيبتشى
وبعدين الجواز بيحب اللمه
بس المهم العروسه تكون غنيه و وحشه وحشه وتكون طيبه مش ناقصه أعمل جريمه وأموتها أصلى الغيره مره
العواف عندى راندفول

كلبوزة لكن سمباتيك said...

moorgen
لازم يكون في تكافؤ فرص يعني انا علشان ربنا كرمني و اتجوزت من 15 سنة اسيب صديقاتي البلوجريات من غير جواز اهو مشاركة وجدانية و يشوفوا اللي انا شوفته
تاخده ام الشعور
ميرسي علي الجاتوه
------
المزاجنجي
بما انك اول زبون فانا حعملك خصم هايل و حفتحلك فرع جديد
فرع الترب الشرعية
و حديلك عنوان واحد حنوتي انما حيكرمك جدا
و بالنسبة لمواصفات العروسة اللي طالبها فدي متوفرة و علي قفا من يشيل بس فين النفس
قطيعة الحبة الكحلي طمعت الرجاله و كل قتيل فاكر نفسه عمر الشريف و هو عمر مكرم
اشفلك ممرضة احسن و اهو زتنا يبقي في دقيقنا و نعمل احلي تورتة
جرب زيت اللوز
-----------
farida
يا حبيبتي قالوا في المثل ايش ياخد الريح من البلاط
و قالوا كمان القرش الماسح يلف يلف و يرجع لصاحبه
و كذلك
القديمة تحلة و لو كانت كلبوزة
تحياتي ليكي
-----------
واحده بنت
اللي افرح بيكي يا شابة و امشي في فرحك
بس افتكري اني قلتلك بلاش
متحسبوش يا بنات ان الجواز راحة
---------
wanna b a bride
شفتي بقي افكار ايجابية اهو استاهل عليها حلة محشي ورق عنب و سلطة زبادي
بكرة تندم يا جميل
----------
أبن الشارع
معلش كلنا لها و الجواز علينا حق
---------
wa3d el3yoon
اتردد علي قد ما تقدر و الحق افرح بشبابك قبل الفاس ما تقع في الراس و تعمل مدونة تسميها
ظلموه
----------
أحمدبلال
حتنحرف يمين و لا شمال
خللي بالك الانحراف شمال تاخد عليه مخالفة
بلا وكسة انتم عارفين تنحرفوا !!!حتي الانحراف مش قادرين عليه
اصل الانحراف ده لازم يكون من الصغر
و احنا كبرنا علي الانحراف
:)
----------
LAMIA MAHMOUD
ههههههههه
ده من باب عيني فيه اخيه عليه مش كده
معلش يا اختشي عندك واحد قتيل اقصد عريس فوق اسمه مزاجنجي لو عندك استعداد تشتغلي ممرضة خديه قبل ما ربنا ياخده و اهو ضل بلوجري و لا ضل حيطة
-----------
إ بـ ر ا هـ يـ م
عايزها سودا و لا بيضا و برباط و لا عاده؟
و عايزها فول ابشن و لا لأ؟
عندي واحدة بفتحة من فوق حلوة صيفي يعني
-------------
زنفل المعجباني
هيا عدة الفرح بدلة يا ابو الزنافيل؟!! لا خدعوك فقالوا الجواز عايز امكانيات تانية مش متوفرة في البدلة دي تلاقيها في الصيدلية
و بعدين انا بحب التورتة اللي بالشيكولاتة
-------------
Shower-Mirror
اشمعني احنا يعني طالع تلاتينا
لازم يشربوا من الكاس
و بعدين الجواز حلو يوم الخميس و التلات بس باقي الاسبوع عتمة
-------------
BackBone
الانحراف
يا دي الوكسة
هو الانحراف ياكل عيش يا فقري يا خويا
و بعدين لما تروح النار الكبيرة حتعمل اية وقتها؟
شوف هو شر لابد منه
و بعدين حتقعد علي قهوة المعاشات ازاي و انت مش متاهل
يلا نزل بيناتك و عليك الامان
------
KazaBaza
انت باين عليك طافي الكمبيوتر اصلا
اصحي و افتح الاسكرين يا كازاباظا يا ولدي و نزل بيناتك و حنشوف حد حيعبرك و لا حيحكوك جنب الحيط
انا الزعيمة يا ولدي
-------
عمر
ازيك يا عمر و الله لك واحشة و انا اقول من عمر اللي بيقولوا عليه بيدي لا بيد عمر
فين بيناتك يا عمر
او نزل بينات بابا ;)
----------
Aoossa
اختشي حبيبتي اسكتي انا مدكنة ليكي راجل فلة
جوزي راجل طيب و امير و مستتني و جايبلي من كل الحاجات كوليشي و ملبسني شفتشي
و انا و انت زي السمنة علي البتنجان و اهو فرصة نروشه و نجيب له هرشة في نافوخه
اية رايك تبقي ضرتي؟
و نفتح مدونة نردح فيها بعض و نفرش الملايات بدل الملل ده
و بالنسبة للواد بتاعك فسيبك منه ده مأشفر
و متخفيش بالنسبة للحر انا حبقي اهويلك
بس قوليلي الاول بتعرفي تمسحي و تكنسي و تدعكي مواعين؟ و لا حفضل ادفع مرتب البت الاندونسية المسخوطة؟
يلا يجعله عامر
و عواف
و سعيدة
لولولولولولولوي
------------------------------
نتلقي كافة الطلبات بصدر رحب
و الكومشن حلة تورتة
محلوظة: اللي يعرف طريق زنجولا يقوله: ارجع يا ناقص الحكومة محتاجاك وقعتك كحلي و نزل بيناتك

Anonymous said...

كلبوزة
الاول حمدللة عالسلامة يا قمر...ثانيا بقا الفكرة كويسة .... بس على راى الشباب اللى بيقولوا الانحراف ارخص...العيشة مولعة يا اختشى دلوقتى والجدع من دول بيبقا راسم فى خياله ان اهل عروسته حيفرموه مطالب...مع انى وعن تجربه انا اللى اتفرمت مطالب وبرضوو منفعش...ههههههههه...محدش عاجبه حاله...نمشى لك كدة فى فرح اولادك

Ensan said...

والله كنت عاوز ارد من الاول بس قلت بلاش فضايح يا واد
وبعدين جه على بالى ابعتلك كام تورتة على كام دستة جاتوه وتمسحى الموضوع - علشان فضايح الزملا , بس قلت يمكن الجاتوه يغرق فى العبارة - وانا ماعاييش فلوس ابعتهم فى طيارة

ورجعت وقلت فى عقل بالى , وفيها يه ابنى ادام - المعنى التانى لانسان-ماهو يمكن ربنا يوفئك وتتجوز بدل ماانت قاعد زى البتاع كده , - لسة بقول لنفسى -انت غلبان ومنكسر ومالكش فى الانحراف ماهو يمكن كلبوزة تكون كارهاك وتجوزك واحدة تطلع عينك
وبعدين فى الاخر لسة مش عارف استقر على ايه ؟؟ افيدونى افادكم الله

أحمــــــــدبــــــــــلال said...

يبدو أن الزميل
backbone
هو الوحيد اللى مشاركنى رأى فى أن الانحراف أحسن
على فكرة دى مش أفكار الصبيان بس البنات كمان بيفكروت فى الانحراف لأنه أسهل و بيجيب فلوس
من غير مسئولية و لا وجع دماغ

Ahmed said...

عزيزتي الفكرة رائعة
أنا برضو عايز أتجوز
أنا رجل مثلي
أبحث عن رجل
يعني لجوزيني راجل و الله ما أمزح أكون لك ممنون و مشكور لبقة العمر
تحياتي

Ahmed Rashwan said...

بصي يا كلبوزة
أنتي تبدأي المشروع بتاعك بالعكس
يعني من ورا لقدام
أقولك إزاي يا ستي ؟؟!!ا
تعملي ليستة باللي عاوز يطلق ، واللي عاوز يخلع ، واللي عاوز يفسخ ، واللي عاوز يفلسع ، واللي عاوز ينتحر ، واللي عاوز يموت مراته أو صحبته
وبعد النظر في طلباتهم ودراستها أكيد أكيد يمكن يفضل أسم او اتنين في الليستة ممكن يكرروا التجربة بعد تلبية رغباتهم
وكده تضمني لو مجتش أي طلبات من العزاب حتلاقي واحد أو اتنين من اللي كانوا متجوزين وفشلوا
طبعا حاشاركك في مصاريف الجاتوه والذي منه ، بس ابقي تعالي قابليني !! فين .. مش عارف !!ا

Gid-Do - جدو said...

كلبوزة
المشروع دة بجد محتاج تفكير وترتيب ولازم يتعمل لة مكان غير البلوج زى اى ميل تحت اسمك بكلمة سر محدش يعرفها غيرك وكل ولد او بنت جاد فى الزواج يبعت ليكى معلومات عنة او عنها وانتى تدى لكل واحد منهم رقم وبكدة ميبقاش فية تهريج وتحاولى انت توفقى بين الارقام وربنا حيجزيكى خير لو عملتيها وممكن بعد كدة يكون فية هدايا مننا للمخطوبين ـ فيه رجاء كتبتة لاوسة وعملتة وحكتبة ليكى انت كمان علشان تغيرى الرد عندك فى البلوج وكنت كاتبة بالانجليزى الرجاء اهه
I am asking you, please if it is possible to change your comment section in your blog setting from the current popup windows to non popup to make it easy on us to read and comment, because it is getting hard to read and comment while you have many visitors. Thank you

Polka Dotted said...
This comment has been removed by a blog administrator.
Polka Dotted said...

حيناء ملفوفة القوام
تقدس الحيا الزوجبة و تشاؤك في الاثاث
و رقصنى يا جدغ

...دنيتي said...

انا 40 سنة
مازمازيل من فضلك
من عيلة عريقة اوي وحلوة و غنية وعلى خلق و تعليم عالي
يعني من الأخر ماتسابش
مطلوب شاب مطلق متزوج ارمل يعول او لا يعول بس يكون نص وشه شبه احمد عز والنص التاني شبه توم كروز

tona said...

عمو مزاجنجي

اسمحلي انت مش محتاج عروسه حتي لو كانت ملاك رحمه - ممرضه يعني
انت محتاج ملاك تاني يجي يخلص الموضوع ويلم الليله


شيح - الله يسامحك يا شيخ

الأميره أوسه said...

كلبوزه
أنا لهلوبه فى شغل البيت
المشكله مش فى كده
أنا خايفه يكون مبيعرفش
ونقعد نغنيله ياللى مابتعرفش
ياللى مبتقدرش
ونرجع تانى للمثل بتاعك فاكراه
أكتفى بذاتى ولا تمرمطنى كلبوزه
صباحه فرح يأختشى
وأخرتها ردح
العوافش

Anonymous said...

شوفيلك حاجة تانية
خلاف دى دانت هتفحتحى على نفسك ابواب جهنم
من الستات والرجالة
واسألىينى
انا مجرب يعنى
ع العموم
لو مصرة اعملى حسابى ف حاجة طرية
بدل النشفان
اللى عايشين فيه

Unknown said...

انا من كتبت التعليق السابق

أُكتب بالرصاص said...

انا جاي أقول لك ....


ماتعمليش حسابي في الموضوع ده ،

انا ربنا رزقني بأفضل زوجة في الدنيا، ومش ممكن ابدلها أبدا ..

بس فكرة حلوة ، لو اتاخدت بجد

تحياتي !

غادة الكاميليا said...

عايزة حتة تورته والنبي ياكلبوزة جريتي ريقي ياختشي
وحطالي الكونتر تفاح كمان
طيب أنا قررت أتخن بقى
علشان أعجب العريس طبعاً

كلبوزة لكن سمباتيك said...

shahrzad
الله يسلمك يا جميلة طيب ما دام الانحراف ارخص يبقي نعمل ضوابط للانحراف
صدقتي يا اختي برة و جوة فرشتلك و انت مايل و اية يعدلك
الرجالة دوول بورييييييه منهم
انا مش جوز صبياني
انا اربي و تيجي واحدة مكنسة تاخد علي الجاهز
ده انا اخرطهم للوز اسهل
اموووه
------------
Ensan
بص يا انسان انت توكل علي الله و ابعت دسته الجاتوه و التورتة و اعمل اللي انت عايزه بعدها تتجوز تنحرف تتخلل عادي
اهم حاجة السوبيّج
المدونة بتتكلف دلوقتي و عايزين نجيب همها و لا نجيب ضرفها؟!
متنساش الساليزون
-----------
أحمدبلال
الانحراف بيجيب فلوس؟ ليه هو شهادات استثمار
تصدق بقي الجواز بيجيب فلوس اكتر
انا بهبش من جوزي كل شهر مبلغ و قدره ده غير الطلبات و اللذي منه
و بيدلعني و يهشكني

قال يعني طايلين الجواز و بيتغندروا قطيعة
معلش اصل الجواز عيبه ان في بذر
-------------

الغريـــــــب
ما دام بتحب السمار و مأشفر فأنا حجوزك
صباع كفته
اهو اسمر و يرم عضمك

و بعدين بتدخن ليه
علي راي المثل
اللي تسكر بيه افطر بيه
و انا احور المثل ليكون
اللي تدخن بية اتأهل بيه
-------------
GayofSun

اوبااااااااااا
لا يا بابا لا
الاسمه اية ده مش عندنا جرب كده الكراخانا اللي جنبنا حتلاقي طلبك
متجيش هنا تاني ياد
------------

film69
و الله فكرة كويسة و انت حتسجل في اللستة الاولي و لا التانية؟
و ابقي بدل ما انا خاطبة البلوجرية ابقي مأذون البلوجرية
و اعمل تسعيرة الجواز بتورتة و الطلاق بحلة محشي و الخلع برغيف حواوشي
و متنساش الحاجة الساقعة بيبث
----------

جدوووووووو
طلباتك اوامر يا جدو انا عدلت وضع الكومنت
بس مش حقدر اعمل موضوع الايميل بتاع الخاطبة ده الفكرة هزلية من البداية و انا لا اعترف بزواج النت
اشكر لك تشريفك و نصائحك الغالية
-----------
BaTaBeeT
طيب
ترلا لا لا اههه
ترالالالالاللااااا اه
ترا
ترا
ترااااا
تراااا
ترترترترترااااترارارا
---------------------------------
بعد جهد جهيد اكتشفت ان محدش عايز يتجوز بجد و كله عايز يفلسع
او
ينحرف
خالص تحياتي

كلبوزة لكن سمباتيك said...

حكمل الردود وقت تاني لحسن البطة علي النار و صينية الرقاق في الفرن و الراجل اتصل قال انه في السكة لما اروح اسرح شعري و البس البربتوز و احط اسانس شادية
و اغرد بالاغنية الرومانسية
جوزي و انا حرة فيه جوزي اغسله و اكويه
عواف

حائر في دنيا الله said...

انا مستعد وياريت اهو على الاقل اما اكون مش فاضي حد يتابعلي المدونة بتاعتي
انا اسمي
احمد
وعندي فدانيين مانجو وتلاتة خيار وخمسة كوكتيل
وعندي شقة وعربية عطلانة وكمبيوتر بيهنج على طول
ولابس نظارة

والأهم مش هتجوز قبل ما اخص الكلية السنادي
بس مفيش مانع نتكلم جد

مفلس افندى الرايق said...

بصراحه ياختى فكرتك حلوه

بس انا عندى فكره

نجيب كل واحد نص كيلو لحمه

ونعمل عزومه كبيره وهيصه وزحمه

وتبقى القعده قشطه

وجايز واحنا بنتخانق على طبق اللحمه

ايدى تمس ايد نعمه

واحبها وتحبنى ونركب قطر الزواج من النجمه

بس الخوف للقطر يعطل

وهوب زى ماحصل من اسبوع القطرين يعملوا حادثه

وتطير من ايدى حبيتى نعمه

ويطير الرباط وتنقطع من رجلى الجزمه

يبقى خلاص مالوش بقى لازمه

موضوع اللحمه ولا عاوز اتزوج نعمه

بس انا عندى ليكى كلمه

عندك شراب سلف

البسه تحت الجزمه

وعربى اوه قصدى وعجبى

كلبوزة لكن سمباتيك said...

Epitaph
اهو قلت نساعد الشوباب بس اتضح ان المتقدمين للجواز من عينة مزاجنجي و الغريب العذوبية ليهم اريح و لبنات الناس اسهل و افضل
بقي تعملي ورق عنب و متعزمنيش كنت اخدت اول طيارة و جيت
الحسناء دي بتطلع في الوش و يقولوا بصوا الراجل ابو حسناء في قفاه
بلا جواز بلا وكسة
اموه اموه
-----
...دنيتي
و لما انتي فلة و من عيلة و مية مية عايزة توكسي نفسك بنفسك ليه
و بعدين يا امي احمد عز ده اكسبشن و توم كروز ده فيري اكسبشن
في عندنا واحد نصه مدي علي كلب لولو و النص التاني علي عبد السلام النابلسي ينفع؟
-----

tona
معلش يا تونة الراجل عايز حد يدلعه اصل صباعة الكبير بيوجعه
تحياتي
-----

Aoossa
فطستيني من الضحك يا مصيبة
بقي انا حجيبلك عريس مبيعرفش ليه حبتليكي
و بعدين لعلمك بقي الراجل اللي ما بيعرفش بيبقي احسن راجل علشان بيبقي حونين و طيب و زي اختك الكبيرة صدر حنون
انت حرة عريس و طار من ايدك و بصراحة الراجل بعد ما اكل البطة احلو في عيني و رجعت في كلامي و خللي الماشفر ينفعك
قال خطبوها اتعززت و سابوها اتندمت
اموه اموه برضه
------
أبو أمل
حتة طرية لعمنا ابو امل و صلحه
لحسن الناشف وجع سنانه
:)
-----
أُكتب بالرصاص
ادي عيب ان الزوجة تبقي عارفة عنوان المدونة و تدخل تقرا كومنتات جوزها ده بيخلي الراجل يدلي بكومنتات مزيفة لزوم حماية الراس من المقشة و ابو وردة و مع ذلك احترم زوجتك و ربنا يهنيكم
------
غادة الكاميليا
يا غادة انت تعجبي الباشا
و بعدين انا لسة مشفتش لا تورتة و لا جاتوه البلوجرية مضربين عن الجواز و اللي حطوا بيناتهم فارمهم القطر مش معدي عليهم بس
يعني شكلي كده حطلع من البلوج بلا تورتة
---------------------
خالص حبي و احترامي للجميع و محدش يزعل انا بهزر
ما عدا الواد الجاي ده
ان شفته هنا تاني حفتح كرشه

Mamdouh Dorrah said...

دمك خفيف خالص

كلبوزة لكن سمباتيك said...

cortex
مشكرين يا خويا منجيلكش في حاجة وحشة

Khaled gad said...
This comment has been removed by a blog administrator.
LAMIA MAHMOUD said...

طب ينفع كده

salateenoo said...

والله كان نفسي أخطب عن طريقك...بس خلاص بقى ...طتبت كتابي واللي كان كان ...ياللا ...ملحوقة في الجوازات الجاية إن شاء الله :)

Shower-Mirror said...

أوسه ..و كلابوظه

يا جماعه ماتقلقوش ..كله بعد الجواز بسنتين بيبقى مابيعرفش ... و يبقى مضيع فلوسه على الساحره الزرقاء ( الفياجرا ) ..او اسبراى السعاده الزوجيه :) ... اصل احنا فى زمن (ارتخاء ) المشاعر .... تشاو

سندباد مصري said...

ممكن اشتغل معاكي

يا ست

اصل انا ليا جماعه معارفي بكرههم قوي ونفسي اوديهم في ستين داهيه

قصدي اجوزهم

انتي عارفه الراجل بيفضل راجل لحد ما يتجوز

بعد كده بيبقي رجل كنبه

والسلام

Haitham said...

والنبى ياخالتي كلبوزة .. نا عاوز واحدة لاهى طويلة ولا قصيرة بين البينين .. لاتخيتة ولارفيعة بين البينين .. لا بيضة ولا سمرة بين البينين .. لا متعلمة ولا جاهلة بين البينين .. يعني من الآخر عاوز واحدة بين البينين .. بس تكون مستعدة تتجوز منن سبع لعشر سنين بين البينين مش قبل كدة

كلبوزة لكن سمباتيك said...

بحب مصر
غم اني بكره الاعلانات اللي بتيجي وسط الافلام و ملهاش اي علاقة بموضوع الفيلم
بس كله في حب مصر يهون
------
LAMIA MAHMOUD
مالك بس يا جميل انت زعلتي و لا اية مقدرش علي زعلك يا جميلة دي اسمها مناغشة
قبلاتي
------
salateenoo
الف مبروك يا خويا بس فين الجاتوه اللي قاعدة مستنياه من ورا الشغلانة دي؟
كل جوازة و انت طيب
------
Shower-Mirror
كنت حقولها
و بعدين انتم واخدين فكرة غلط عن الراجل اللي مبيعرفش
ده بيبقي راجل مسالم و جدع و ميبصش برة علشان عارف امكانياته مش احسن من الراجل الفحل اللي بيبقي نسوانجي

BackBone said...

اوبـــــــــــــااااا
دا الموضوع دخل فيه جــــايز


loooooooooooooool

llllololollolyolyoylyoylyoylyo

الف الف مبروك يا كلبوزه, شوفيلوه بوب حلو كده يظبطه.

غور ياد يابن الـ
xxxـ

KazaBaza:
الحجات ديه مينفعش فيها ليست, الحجات ديه لازم تدوق بنفسك يا بوب, والا انا غلطان.ـ

عمر:
انا بقول انت تسيبك من الجواز ده, يابني انت سنك مناسب خداً للانحراف, لو انترٌستد, اديني ميسد و انا هعملك امتحان تحديد مستوي, امال ايه انتوا فكرين الانحراف كده بالساهل ده علم ياجدعان.

اوووسه:
حلو مووت موضوع تجيبي للبوب بتاعك عروسه روشه وبعدين تضمي عليها, انتوا فاكرين الراجل ده ايه خلاط اسمنت و الا بيضرب الارض يطلع عيال, ده كائن حي من لحم و دم و بيخلص. الموضوع كله سنتين و بيبقي مبيعرفش هوه كمان.

ربنا يسطر علينا و علي ولايانا


شهرذاد:
اهوه هو ده كلام الناس العقليـــن, تعالي ياشيخه لا تتفرمي ولا يتفرم, انا فاتح فصل انحراف للبنات ان شاء الله هتمسكه القطه بتعاتي عشان نمنع الاخطلاط, اصل الواحد لازم يراعي ربونا في بنات الناس برده, دحنا عندنا ولايا.

ensan:
سوري يعني, هوه حضرتك قاعد زي
"البتاع" ازااااااــــي يعني. لاء معلش بالراحه عليا بس و وحده وحده.

انا بهرج اوعي تزعل.ـ


احمدبلال:
تعالالي تعالالي, مفيش احلي من الانحراف بالزات علي زوايا 90 و 180 و69, انا بصراحه نفسي استفيد من الخبرات النادره ديه و همسكك القسم الثقافي في المعهد, و انت و شطارتك بقه يابوب.


الغريـــب:
سمرا, أشفور, نكد, لاء انا مبحبش الكلام ده خالص. انت تاخد دش بارد كده وتخوش تموت خميس و جمعه و تجيلي بقه يوم السبت فريش و مظئطط كده. و ربنا يسهل.

BaTaBeeT:
طب و انا اجيبلك عبد السلام النبولسي منين دلوقت, ممكن تبقي تعدي علينا و نشوفلك بوب شديد كده.

Epitaph:
اه ه ه ه ه, انت كده شكلك وطني من بتوع ليلة سقوط بغداد, خليك كده بقه اشجب للصبح.

دنيتي...:
حلو قوي موضوع يعول او لا يعول ده. طب "مزمازيل" ديه يعني لسه أنسه و الا مفيش حاجه بتفضل علي حالها.


اوووسه:
يأوسه ياختشي 70% من رجالت اليومن دشول مبيعرفوش خلاص, يعيني علينا يارجاله, احنا ضحيه التلوث و المبيدات الحشريه و الهرمونات اللي بحطوها في الفراخ, اه ه ه يافراخي.


أكتب بالرصاص:
يابوب مين اللي قال بس تبدلها, يابوب مفيش مشكله لو بتحب مراتك, البحر يحب الزياده. و الانحراف ملوش اخر و الرزق يحب الخفييه.


غادة الكاميليا:
عليا النعمه لو خالتشي اطاطا شافتك لتكلك حتت كده

حائر في دنيا الله:
طب خلص الكليه و مستنينك عندنا في معهد الانحراف المفتوح بس ممكن تاخد كام سكشن كده علشان نظبطك في فترت الكليه, دي احلي فتره تتعلم فيها فن الوظاويظ.

مفلس افندى الرايق:
مبلاش الافكار المتطرفه ديه, ايه بس اللي هيودينا للقطر متشوفلك اي شارع ضلمه و خلاص, وسسع افقك كده.


LAMIA MAHMOUD:
اه طبعاً ينفع,

ده في كمان كده وفي و كده و كده,

دحنا كان زمنا في كل الاوضاع


salateenoo:
يابوب الانحراف بقه هوه اللي هينفعك دلوقتي, و الالتحاق بالمعهد لا يشترط التفرغ.

Shower-Mirror:
بصصي هوه لو الموضوع موضوع "ارتخاء" مشاعر, لا بقي يبقي المشكله عندك انتي. انتي الي مش عارفه "ترفعي" مشاعره للمستوي المطلوب. و انصحك "توئفي" "احاسيسك" و "مبدئك" لفتره كافيه قصاده عشان يتعظ و ابقي عدي علي القطه بتاعتي في المعهد ان شاء الله عندها خلطه بلدي ليكي انما ايه. و يبقي لينا الحلاوه
;)

Haitham:
طب ياهالترا برده سعتك من الرجاله اللي بين البنين و نظام سنتين و كان في و خلص والاايه.


ـــــــــــــــــــــــ


درس للمتجوزين و اللي منرحفين.ـ


اهم حاجه الاحتراااااااااام الاحترااام و بــــــس, هوه فاضل ايه بين الرجل و الست غير الاحترااااام.


الاحترااااام و بســـ




و احب اقول لكل المحترمين ان ده اكبر دليل علي وطنيه الشعب المصري العريــــــــق.


و ان 70 من الرجاله في العالم محترمين, ديه حاجه مش عيب خالص يعني....ـ

كلبوزة لكن سمباتيك said...

حاول تفتكرنى
متقلقش يا معلمي انا حقول اسمك اول ما يبدأ الضرب
و حقول ان انت السبب:)
امال اكل لوحدي
ده حتي اللي ياكل لوحده يزور
------
سندباد مصري
و ماله يا خويا اعينك في كشف الهيئة تكشف علي البلوجرية المتقدمين كشف ذاتي علشان ميكونش حد فيهم مضروب
و سيبلي انا الكشف علي البلوجريات العسل
-----
Haitham
و انت اعمل حسابك علي تورتة بين البنين
من غير شنب
من غير شنب
الجواز مفيهوش زينب
------
BackBone
بما انك قمت بدور صبي الخاطبة بجدارة فانا عينتك في منصبك
و اهو فرصة لما اكون مش فاضية ترد علي الزباين
(((المعلمة نايمة نقولها مين))
احجزلي مكان في كورسات الانحراف بس قعدني قدام علشان اعرف اتفرج
الا هو نظري و لا عملي
ينفع الانحراف يبدأ بعد رمضان؟
نعيد و ناكل الكحك و نقول يا هادي
هع هع هع

Anonymous said...

أول مرة آجيلك هنا .... حسيت إنك تمر حنة ومنتحلة إسم آخر !!! دمكما أنتما الاتنين بيرَّوئ دمي
أنا باكتبلك على عجالة ، بعد مائريت البوست على عجالة برضه ، بس هارجعلك على تمهل ، بعد مااروح أبشَّر طأم البنات الشربتات صحباتي ، بالخاطبة النيو لوك دي
ياختي ونبي دول هيدعولك . و بكرة لو حصل المراد من رب العباد ، هتسمعي دعواتهن مُجَمَّعة بتئول : إلهي تفضلي سمباتيك على طول ياكلبوزة ، يابنت ام كلبوزة
أنا سبت لك تعليق خاص بيكي ف بوست تمر حنة . وئلت آجي عندك أحطهولك برضه ، وبعد ماجيت ، يامحاسن الصدف
تعليقي هو : كلبوزة لكن سمباتيك
كدة تدَّلعي تمرمر بالدلع اللي أطلقته عليها ، دون الإشارة إلى المالكة الأصلية؟
طب احتياطي بأة م الوأتي ، أنا حاجزة لك إسم دلع ، حقوق الملكية الفكرية ، مسجلة باسمي ، ألا وهو : كَلَبْظَس
بفتح كلٍ من الكاف واللام والظاء ، وتسكين الباء . أما السين ، فتمت الاستعانة بها ، عوضاً عن الزين ، لصعوبة نطقها عقب الظاء . بس خدي بالك ، الظاء هنا ماتنطيئهاش بإخراج اللسان ، إنطئيها بالعامية . كزين مفخمة يعني. حركات وكدة

كلبوزة لكن سمباتيك said...

أزئوزة
شرفتي و نورتي يا اختشي و علي فكرة تمر حنة صديقة صخصية ليا و بينا عيش و ورق عنب و طبيعي تلاقي الروح واحدة مع فرق الوزن
اموت انا في العجالة بتاعة روبي دي
انبي شكلك زمل و خريجة عيش شمش زيي نفس الكلية و نفس القسم
حاكم الطيور علي اشكالها تقع
بس اوعي اقع عليكي لفطسك اقعي انتي اسهل
اختشك كلبظس
اموه اموه

Ayyam said...

أنا الحقيقه شايف أن الموضوع مش هذار فى طريقه حلوه بلاش الإى ميل, أيه بس رأيكم تتقابلوا فى أجتماع المدونين أو فعلاً فى أى نادى ثقافى أو فندق كبير زى شيراتون هيلوبلس أو أى وسيله أجتماعيه تتعرفوا بيها على بعض كويس وجهاً لوجه زى الجامعه مثلاً.

memo said...

شاب حليوة واسمر وعسل
بيشتغل مهندس كمبيوتر على اد حلاته
معهوش فلوس ولا واسطة ولا ليه حد وزير ولا محافظ ولا مدير حتى
يا ترى تعرفى تيجيبى لى عروسة
وليكى منى تورتة بحالها

مفلس افندى الرايق said...

اهداء للاميره كلبوظه من مفلس افندى

يا زهرة حب عطريا
قد فاح شذاها كاغنيه
يا ليلة صيفا قمريه
رقصلتى ذات امسيه
حبك كالظل يلاحقنى
كالشعر يا نغمه شعريه
حبك انغام تملؤنى
احساسا دائما بالحريه
احساسا اكبر من كونى
ما كونى لولاكى ليـــه

عربى

كلبوزة لكن سمباتيك said...

Ayyam
فكرة حلوة
بس انا مش حكون موجوده
وااااااااااااء
اولا لاني مش عايزة عريس
ثانيا لاني مش في مصر
ححدفكم بالطوب
--------
memo
ياختشي عليك
بص بقي انا بنتي 14 سنة استني كده عشر سنين كمان ابني نفسك و انا اجوزهالك
كتاكيتو بني ياختي جماله حلو ياختي شبابه حلو
-----------------------------
حنقفل قاعة الخاطبة و نفتح قاعة دار المناسبات لاخذ العزاء في اديبنا الكبير نجيب محفوظ
البقاء لله

كلبوزة لكن سمباتيك said...

مفلس افندى الرايق

راس توم انا وسط التقلية
رحيتها مفحفحة من الصبحية
ارقصلك ليه هو انا سامية
انا الاحقك فشر!! ده انا زبدية
يلاحقك يا بعيد اسد في البرية
انا حبي كابوس في ليلة فقرية
يكبس عليك يفطسك
و يعزوا فيك البلوجرية
و انا ازغرط
لولولولولوي
مات مفلس افندي
بالسكتة الشعرية
:)
---------------
مراشقة رشيقة بالازجال بيني و بين الاخ مفلس

ليس من ورائها اي قصد سوي الضحك

Anonymous said...

BackBone
ههههههههه ..طيب انا احجزلى فى اخر تختة والنبى عشان الاختلاط يبقا من تحت الترابيزة
اوسااا
كل الصنف اللى فى السوق دلوقتى يا اؤختشى ضاربه السلك ومبيعرفش...مش اشاعات يعنى...ولا بعد سنة ولا ست شهور...انتى تاخدى الواحد من دول ومعاه ضمان عشر سنين من المورد وفى الاخر بتاخدى بمبة من اول خمس دقايق
كلبوزة
صح اوى المثل بتاع جوة وبرة فرشت لك...واحب اضيف من منبرى هذا على راى اوسا لما بتعمل عندى...ديل ال...عمره ما بينعدل...يبقا الواحد مخوخ فى البيت وينحرف برة زى القطر..اموووة ليكى..موضوعك جر رجل زباين كتير

islamventura said...

اسالك مجموعة اسئلة و لو عايزة تجاوبى جاوبى
انتى كنتى بتحبى جوزك قبل الزواج ؟
انتى مازلت بتحبيه .؟
انتى تفضلى اللى يتجوزوا الان يكونوا كانوا يعرفوا بعض قبل الزواج ؟
كيف اخترتى زوجك ( على مميزات ولا على حب) ؟

tota said...

كلبوظة
حمد الله على السلامة
روحت اصيف ورجعت لاقيت اعلى رصيد من التعليقات قلت ده الموضوع جامد قوى
لاقيت جواز
قلت ماشى الحال اكمل التعليقات قوم ايه ؟ الاقى لو مكنش فيه خير مكنش رماه الطير
بس الموضوع جه على الوتر الحساس لكل البلوجرية
من اول البيمارستان وده عارف نفسه كويس لغاية الانتيكخانة
وبعدين يعنى ساكنة فى العالى وقفلتى عليه الجيران كمان يعنى لا بلوجرز ولا جيران
معلش خيرها فى غيرها وسكى على التورتة
تحياتى

ody911 said...

نفسى أتجوز يا ناس بس مفيش
مفيش
مفيش
مفيش
مفيش
أنا أتجننت خلاص
بس عاوز أتجوز
جوزونى

مفلس افندى الرايق said...

تيجوا نعمل مجتمع لوحدنا

واهو لما نجوع اى لقمه هتسد فمنـــــا

ولو يوم البرد قرصنا

مدونة كلبوظه هتلمنــا

ماهى زى ما مصر امنــا

كلبوظه تلم شملنــا


انا بصراحه عاجبنى مواضيع البرنسيسه كلبوظه لان فيها خفه دم جميله مايحسهاش الا واحد دموا زى العسل زى هههههههه

سندباد مصري said...

الحمد لله اشكرك يا رب

انا اخيرا لقيت شغل

هوا انا يعني..... انا

هوا يعني

اسمحيلي انا عندي سؤالين كده يعني

يعني

السؤال الأول وهو الغير مهم ( يعني ممكن مترديش عليه )هوا.. هوا

هوا اذاي يعني يعني ... كلبوظه وفي نفس الوقت سمبتيك ؟؟ يعني

والسؤال المهم (( يعني لازم تردي عليه دا اكل عيش )) هوا المرتب يبقي كام هه ؟؟

اسئلك هذا السؤال وانا ارسم علي وجهي اقصي قدر من التناحه مصحوبه بأبتسامه الموناليزا؟

موناليزا هه ؟؟ واخده بالك

شوفي بقا راجل ميت يرسم لوحه تتباع بكام عن واحده ست

وانا هعمل كشف هيئه لكام راجل وكام ست

شوفي انت بقي مرتبي يبقي كام

وكله بالأصول

والسلام

BackBone said...

shower-mirror:
لهو انت طلعت راجل زينا كده, سوري بجد يابوب, اللي ميعرفك يجهلك. بس برده عندي خلطه بلدي عشان موضوع إرتخاء المشاعر ده, ابقي عدي عليا بقي و متروحش للقسم البناتي.ـ

sara... said...

ماشى انا موافقه جوزينى واحد يكون امور يعنى بعيد الشبه عن محمد نجم
غنى يعنى عندو فلوس
وميكونش رخم وايحه
لحسن انا زهت
ومش هكدب عليكى انا عندى حول طفيف
وشعرى حرير حرير ورفيعه جدا تقدرى تقولى نحيفه
بس والله حلوة حلوة كلو بيطلع فى الغسيل
وماما بتعرف تعمل ورق عنب حلو اوى
وهجبلك تورته باللحمه المفرومه

gwad said...

الى خاطبة البلوجرية
انا عاوز عروسة على المقاس عنيها خضرا وشعر اصفر
الصنف دة موجود عندكوا
ارجوا الافادة

الأميره أوسه said...

كلبوزه
عملت تحديث
فى ثلاث مقاطع فيديو جداد ممكن تقدرى تشفيهم قبل مايبقضوا عليا
تعالى
تعالى
متخفيش
أنت بعيده

She said...

عسل يا كلبوزه فعلااا عسل هههههههههه وصدقيني مش هتلاحقي علي طلبات الجواز خااااااالص

مـحـمـد مـفـيـد said...

ربنا يجعلوا في ميزان حسانتك يا حاجه كلبوزه

أحمــــــــدبــــــــــلال said...

أيه يا كلبوزة
هانفضل مقضينها جواز كده ألا ما سمعنا عن حد أتخطب عن طريقك لغاية دلوقتى
أمال كاتبة الخاطبة و مش عارفة تجوزيهم
أراهن أن تسعين فى المائة من المدونين اللى هنا مش مجوزين و لو مجوزين بيفكروا يجربوا حظهم تانى يمكن يطلع كويس المرة دى
ماعتقدش ان فى متجوزين للمرة الثانية هنا و ألا كنا زرناهم فى المقابر

خليكى ورايا تكسبى
الأنحراف مفيش أحسن منه
و من هنا أشير ألى شريكى فى دعوة الانحراف
BackBone
و بفكر نجرب طريقة جديدة اللى عاوز يتجوز يجيلك و هتلاقيهم أغلبهم بنات
و اللى عاوز ينحرف يجيلنا
و غالباً هايكونوا رجالة و شباب
و أحنا هانبتدى دروس الأنحراف مع بداية العام الدراسى

ملحوظة:
يجب مراعاة الألتزام بالزى المدرسى و دفع مصاريف الكتب و دروس الانحراف الخاصة


و لا أيه يا
BackBone?

:)

شريف محمد said...

انا لسة صاحي ماتبنجتش الحمد لله
شكرا على سؤالك
حلو قوي الموضوع بتاع الخاطبة دة وواضح من عدد التعليقات (اللهم لاحسد) ان الشقيانين كتير ... والله هو يستحق يبقى مشروع قومي تحت دعم سيدة البلاد (الكلبوزة السمباتيك ... لأ مش ماما سوزان ) ... والله انا كمان عايز أشارك ... بس ايه البيانات المطلوبة؟
وبعدين البروفيل ماليش ذنب فيه .. أنا اتولدت لقيت نفسي كدة .. اعترضوا بقى على خلقة ربنا ... ياريت تعمليلي استمارة من غير صور أحسن
وربنا يهدّي سر الجميع

كلبوزة لكن سمباتيك said...

shahrzad
ازيك يا اختشي
لية تحجزي ورا اقعدي قدام احسن علشان نعرف نتفرج و نطلع من الاوائل و انا ناوية اكمل دراسات عليا بعد البكابرلوس
صدقتي يا اختي الجيل كلة شارب كافور
اللي ما في زبون واحد جاب معاه حاجة حرشة و هو جاي يكمنت
قبلاتشي
-----
islamventura
ايوة ايوة لا علي غفلة
دي الاجابات نتيجة التحاليل امتي؟
-----
tota
حمدا لله علي سلامتك يا سكرة فين بقي المشبك و البسيمة؟
اتضح ان البلوجرية يفضلون الانحراف و قلبي مش جايبني اعمل لهم بلوج عن الانحراف
احلي من الشرف مافيش يا اه يا اه
قبلاتشي
-----
ody911
بص انا حبعتك عند سندباد يوقع عليك كشف الهيئة و بنائا علي مواصفاتك حنجيب لك عروسة نقاوة و اهو تبقي اول زبون بس الاول معاك الفوزيتة و لا حتجوعنا؟
-----
مفلس افندى الرايق
انا بيتي يا مفلس بيت العيلة
تدخل و تغرف و تاكل في الضليلة
و لا تعتل هم ضرايب في دي ليلة
قال دمك عسل قال
ده انت سكر معقود
يا حليلة عليك يا حليلة
-----
سندباد مصري
انا بعت لك زبون تكشف عليه كشف هيئة و تشوفه كام سلندر و تهتم بالعفشة قوي و تشوفه راشش دواخل و لا لا
لايكون عامل حادثة
السؤال الاول رده في اول مدونة ليا
السؤال التاني انا و انت علي باب الله و الجودة بالموجودة اهو يوم صباع محشي و يوم ترتاية و يوم ناكل ضرب و كده
متعدش علشان البركة متقلش
--------
BackBone
حسس الاول قبل ما تتكلم امال بس مدرس انحراف ازاي؟
-------
sara
تعالي يا اختشي اتغدي عندنا اسبوع و انت تبقي اكلبز مني
اموت انا في ماما و في التورتة ام لحمة مفرومة
قبلاتشي
-----
حاول تفتكرنى
لا و من نبي النبي نبي لازم تقعد اغرفلك
-----
gwad
في يا خويا في
العروسة بتاعة بنتي شعرها اخضر و عنيها صفرا بس الواد الصغي جاع اكل رجلها تنفع؟
مواصفات الجدع اية؟
اوعي تكون شبه شعبولا و عايز نانسي
------
Aoossa
انا جاي فرافيرووووو
وحشتيني يا فقرية
اموه اموه
-----
shaimaa
الله يخليكي يا جميلة
الناس تعبانة يا اختشي اهو بنريحهم بفنجرة بق
-----
مـحـمـد مـفـيـد
تسلم و تعيش
-----
أحمدبلال
ايوة انا مقدمة في دور سبتمبر و حلبس البرباتوز و الجمزة الحمرا و اجي اتعلم الانحراف
بس بلاش تقدملي في كي جي لحسن العيال الصغيرة بيعملوا حاجات مش ولا بد
خلينا نبدا من ثانوي
-----
451 فهرنهايت
لك وحشة يا راجل بتغيب فين
اوعي تتجوز خليك كده مرتاح البال دي بس سبوبة عاملينها لاجوانا البلوجرية التعبانين من الحياه
و اتضح انهم كلهم يفضلون الانحراف
متغيبش علينا
----------------------------------------------------------------------
الي اخواني البلوجرية
الجواز علينا حق
و لا دايم الا وجه الله
و الجواز للجدعان
و الجري للمتاعيس
قبلاتشي

islamventura said...

تستلمى التحاليل ان شاء الله الاحد الساعة عشرة الصبح و معاكى حتة جاتوه

gwad said...

لا انا مش شبة شعبولا
بس صحابى بيقولوا انى شبة احمد زكى
يعنى انا شاب اسمر وطويل

سندباد مصري said...

تقرير عن الزبون الأول

والله الزبون ميه ميه

من ناحيه المسائل الي هيه يعني


اما من ناحيه بقيه المسائل

مش قوي

وانا عملت بحث جامد قوي من ناحيه الموضوع ده

وخلاصه القول في تراثنا ان الراجل ميعيبوش غير جيبه

والعينه الي وصلتني يا ولداه جيبها مخروم خرم اد الثقوب السوداء

وفيها قوه شفط ذيها برضه

الخلاصه

ان الزبون جعان ولو عمل فرح مش هناكل فيه الا ضرب القباقيب

والعروسه هتدعي علينا حتي لو كانت من طراز الأنسه حنفي

ويا بخت من وفق رسين في الحلال

واهو كله بثوابه

ملحوظه : من ناحيه المرتب عال العال

واحنا مينفعش نطمع في احسن من كده

ولكن لازم نتخذ بقا مكتب كبير في وسط البلد لزوم الفشخره وجرجره الزباين التقال عشان نصرف بالفلوس علي الزباين الي هما زي حالاتي

والسلام

كلبوزة لكن سمباتيك said...

islamventura
بقي انا اقدم التحاليل و ادفع كمان حتة جاتوه
ينفع الساعة 12 اصلي مش بصحي بدري
:)
---
gwad
كويس كويس
الله يرحمه بقي كان راجل طيب
بس مقلتش شبهه في اي فلم؟
كابوريا و لا مصيبة تكون شبهه في استاكوزا
يا دهوتيييييييييييييييي
----
سندباد مصري
انا بقول نغير نشاطنا من خاطبة للبلوجرية
الي
تسهيل انحراف
و من ناحية المكتب شوفلنا اي سطوح في وسط البلد نعمل فيه المكتب في الهواء الطلق
شكلك كده مرتبك حتقبضه كومنتات يا ابو السنابيد
محلوظة
الراجل مايعيبوش الا جيبه
و مايزلوش الا عيبه
خالص تحياتي

ody911 said...

مصلحتك محفوظة فى الثلاجة
3 بيضات وزارة من الكبيير دة
مع العلم أن البيضة ب75 قرش
يعنى فى حدود 2.25
بالعملة المقرضة
وعادى بقة
آه نسيت العروسة تكون بتحب البيض
علشان مبقاش غيروا خلاص
أودى
وعادى بقة فوق أهيه منستهاش ولا حاجة

مفلس افندى الرايق said...

القمر الساطع كلبوظه

فى المدونات نجمه محروسه

انا راح اغير اسمى يا ناس

وهاخليه مستر بلوظه

وعاش زعيمنا عاش عاش

وخطاه ديما كده محروسه

وبكره ندورله على جهاز

وندورله على عروسه

وان ماحدش رضى بيه

نزوجه بقى كلبوظـــــه

كلبوزة لكن سمباتيك said...

ody911
و مالة ده حتي البيض كله فسفور
ده انت عريس كنز لاي اسرة مصرية شوف البيضة بقت كنزدلوقتي
من عنيا عروسة اومليت و صلحه للاخ اودي العادي
----
مفلس افندى الرايق
الحقوني يا اخوانا البلوجرية
مفلس بيشتغلني من الصبحية
و قال اية عايز يجوزني ابو طقية
وابقي كلبوزة مصر الاولي الاصلية
و ساعتها اضربه سكينة محمية
و اريح منه البشرية
و عجبي

مفلس افندى الرايق said...

ههههههههههههههههههه

تعرفى لو كان ده اخر واحد ليكى ف الدنيا هاقتلك ارحم

مع تحبات جعلونى مجرما
http://mfaysal.blogspot.com/

الأميره أوسه said...

هههههههههههههههههههههههه
هههههههههههههههههه
هههههههههه
محدش عاوز يتجوز خالص
شغلانه متجيبش همها
بصى أحنا نفتح عربية كبده ونقف بيها
فى وسط عالم البلوجريه ده
مع أنهم برضه هيقولوا منين
أسكتى مش فى خناقه عندى فى المدونه الجربانه بتاعتى
وبيباصوا بعض تعليقات بس جامده شويه
طفيت عليهم النور قولت جايز يناموا أبدآ حكتلهم حدوتة مرعبة مفيش فايده
قولت أجيلك تيجى تهدى النفوس
حاكم أنتى كلامك بلسم والنعمه
وشامبو كماان
أأأأأأموه
أأأأأموه

soosa el-mafroosa said...

ايه يا بنتي ..كل التعليقات دي و لسه ماوفقتيش و لا راس و نص حتى في الحلال

يا بنتي عايزين نتايج ملموسة على أرض الواقع و حيطان الجدية و سقف البلوجرية

ياللا عايزين نسمع زغروطه

و النبي تجوزي

wanna b a bride

الأول شوفتي العريس اللي اتقدملها ده ؟..و النبي البت دي صعبت عليا

قطيعه تقطع الرجاله و سنينهم

BackBone said...

لاء لاء لاء مسمحلقيش (مع الحفاظ علي القاف)...قتيعه تقتع الرجاله ليييييييه,
هو زمبهم انهم يعين امهم مش عارفين يتجوزو.

ميعيني الراجل من دول بيبقي قادر فيزكلي علي الجواز من سن 12-15 سنه و بيقعد يتجوز علي روحه لغايه سن 27-30 سنه يعني لمؤخذه البهاريز كلها بتبقي راحت خلاص قبل ميتجوز, و ترجعوا تقولوا اصلوا مبيعرفش واصلوا بيشخر وهو نايم.
و بعدين بقه بجد كل اللي مبيعرفوش دول مش عيبهم ابداًده لمؤخذه عيب ميراتتهم, همه اللي ميش عارفين.انا قريت الكلام ده في روايت ألفن مينيتس, لـ باولو كويلو.اللي مبيعرفوش دول عشان المدامات هي اللي مش عارفه تتصرف معاهم..ـ

واستروا علينا يستر عليكم ربونا

"الانحراف في الصغر كالنقش علي الحجر"

كلبوزة لكن سمباتيك said...

مفلس افندى الرايق
هو صحيح انا زعيمة منظمة كلابيز من اجل التغيير لكن معنديش استعداد اتجوز زعيم المنايفة و بنتقص لقب سيدة مصر الاولي
بتسعدني زيارتك
-----
Aoossa
شوفتي يا اختي الحكاية متاكلش عيش و بعدين انا مش موافقة علي موضوع عربية الكبدة ده ريحتها حتفوح و شرطة الازالة حتيجي تعاكسنا في السبوبة احنا ناجر مدونة من الباطن و نعمل مدونة كشري و كل بلوجراوي يجي نغرفله
و الصلصة عليكي ماشي؟
و حمام الزباين عليا اصلي متخصصة شامبو
اموه
------
*-* Egypti@no *-*
الحب علي البلوج و علي النت عموما روعة بس ميفتحش بيت
و بكرة تفتح مدونة بعنوان ظلموه
------
soosa el-mafroosa
هو انا مغسل و ضامن جنة اعمل اية اذا كان الزباين يفضلون الانحراف يا اختشي علي كل حال انا قررت اغير نشاطشي
اموه
-------
BackBone
قالوا حجة البليد مسح التخته
و قالوا ملقوش في الورد عيب قالوا يا احمر الخدين
بقي واحد معاه قلم و هو امي مش بيعرف يكتب يبقي نقول اصل القلم ملوش حق
لا يا بابا لا المشكلة في الراجل اللي مبيعرفش و هاري نفسه قبل الجواز و يجي يتجوز يلاقي الصفيحة خلصت
قطيعة خليني ساكتة
يا ابن اختشي
--------------------
الي اللكاء في مدونة الكشري

راندا رأفت said...

أكثر حاجة لفتت نظري في التدوينة دي كثر عدد المعلقين
فقررت اعلق انا كمان
هي الفكرة حلوة بجد وقابلة للتنفيذ بس هتاخد وقت لحد ما يتم استيعابها من الناس وخصوصا الرجالة
المهم ربنا يوفقكم

أسامة حمدي said...

صفات الزوج الصالح :


1 - تقوي الله .
2 - العمل الجاد كي يستطيع ان يعول اسرتة .
3 - قد تنظر الفتاة الي المستوي التعليمي والثقافي والإجتماعي .

http://www.goeng4u.blogspot.com