Tuesday, September 05, 2006

دكانة الكشري


بما إني اكتشفت إن شغلانة خاطبة البلوجرية مش بتأكل عيش و إن معظم البلوجرية يفضلون الإنحراف أو بمعني اخر ملهومش في الجواز و عاملين روحهم مش عايزينه عملا بالمثل القائل
عيني فيه إخيه عليه
فأنا قررت من هذا المزنق إني
أغير نشاطي
و عليه فهيلا بيلا جمعت مشابك الغسيل و طلعت السطح و نشرت لكم البوست ده
و ناوية أاجر مدونة من الباطن و افتح دكانة كشري للبلوجرية الشقيانين
صاحبة الفكرة الحبيبة
و اهي سبوبة الواحد يسترزق منها أنتم عارفين داخلين علي مدارس و رمضان و كسوة الشتا و يجعل بيوت البلوجرية عمار
و اية هيا فكرة الكشري؟؟!!!
الكشري عبارة عن رز و مكرونة و عدس و حمص و شعرية و صلصة و دقة و بصل محمر
شغلانة يعني
و ميزته أنه متنوع المكونات و بينفخ
(محلوظة بعد الأكل بساعتين مش عايزة أشوف جنس بلوجراوي هنا و بلاش فضايح)
و احنا كمان لازم نكون زي الكشري فينا
طيبة و حنية و شقاوة و ظرف و جدية ونباهة و زكاوة و قدرة علي نفخ الأخرين اذا لزم الامر
يعني هي دعوة لأن تحتوي النفس البشرية علي كل الصفات المتناقضة لكي تكون الشخصية ثرية و طعمة و حرشة
انا ضد ان تكون الشخصية طيبة بس أو ساذجة بس أو شريرة بس
لازم نكون
زي الكشري
----------------------------------
الي اللقاء مع مدونة الرز بلبن بعد الكشري

55 comments:

BackBone said...

اهو هوه ده كلام الناس العقلين, خلينا في الكشري و الحبشتكنات جواز ايه بس اللي كنت هتموتينا عليه ده.

بس ايه ده ياكلبوزه دي فلسفه جديده داخل الحزب!!!

فلسفت الكشري

طيب ربنا يوقكك و احجزيلي طبق رز كتير عدس كتير وزودي الدقه لحسن بموت فيها.

و ربنا يستر علي البلوجريه اللي جمبي

أم أحمد said...

انا بقي ماليش في الكشري ماعندكيش حاجة تانيه غيره

tona said...

تصدقي نفسي فيه بجد

حمدالله علي سلامتك يا قمر

أُكتب بالرصاص said...

الله الله الله

مبروووك
ايه النيو لووك داه !!!

انا افتكرت نفسي دخلت بلوج غلط ، واتكسفت قوي
وبعدين جيت اخرج تاني ، لمحت اسمك والقطة الساعة
دعكت عنيا، وقلت
مش معقول

لا ..بس احنا كنا في جرة وطلعنا لبره



ايوه كده
ربنا يفتح على جميع البلوجرية والقرش يجري في إيديهم ويعملوا تحسينات زيك كده

NoOR said...

مبروك النيو لوك.......انت ايه حكايتك مره حواوشي ومره كشري لأ وآل ايه انا مبغريش الزوار ببطنهم امال بايه .......طبعا البوسط الجاي سندوتش كفته لكل مواطن


علي فكره انا مبحبش الطظ باللبن

فكره الكشري بجد مطلوبه في كل انسان

labido said...

كشري ... كشري ... كشري .... يعني ايه كشري ... ممكن حوواشي لو سمحتي

المسافر said...

أمال بس بتقولوا عاملين ريجيم ودايت وحمية وطلع إن الكلام كله على ما فيش وأهو كله كشري

بس والله حاجة تفتح النفس

abderrahman said...

بالنسبة لي كشخص متقلب المزاج، يمكن من السهل إني أكون شخصية كـُشرية
:=)

sara... said...

الف مبروك يا كلبوزه على كشك الكشرى الجديد ..الديكوراشن بتاعه هايل..والصورة بتاعت المشابك دى ياااااي تحفه جدا فوتو جونيك موت


واحد كشرى بالتقليه والدقه..وصلحو

KazaBaza said...

مينفعش طبعا الانسان يكون
طيب علي طول يبقي زي الكشري الي كله رز
و مينفعش يبقي عصبي كل الوقت يبقي كده الشطه زياده
لازم الخلطه تكون موزونه

بس فلسفة علم النفس بالكشري دي جامده

الرز بلبن ده عندي انتي نسيتي ولا ايه
و بعدين انتي اساسا مبتحبيش الرز بلبن
شكلك مش كلبوزه الحقيقيه
انا هبلغ عنك

تررم تررم
الو قسم شرطة التخاتيخ
فيه حد انتحل شخصية كلبوزة
و فيه تغير حصل في ميولها تجاه الرز بلبن
علم وجاري البحث عن الفاعل
وا وي وا وي

أحمــــــــدبــــــــــلال said...

و الله فكرة تحفة و تجيب فلوس
عايزة تكسبى فلوس فى البلد دى أفتحى محل للأكل و هتلاقى نفسك بتكسبى بالهبل

ده أنا أشتغلت فى سوبرماركت فى مكان سياحى كان المحل بيقفل فى نص اليوم بس حوالى من خمستاشر لعشرين ألف
مع اعلم من وجود محلات أخرى مشابهة حواليه
تخيلى مطعم كشرى بقى يعمل أيه

على فكرة فى موقع لمحل كشرى على الانترنت أسمه كشرى أبوطارق و كمان بيغنى فى أفتتاحية الموقع شعبولا
www.aboutarek.com

الأميره أوسه said...

كلبوزه
المشروع ده بالنص
وحياتك مفلسه ومصيفتش السنه دى
ولا اللى فاتت
عاوزه أحوش و أكون نفسى
أنتى تتطبخى وأنا أقف على الفرش
والبلوجريه ياكلوا بالأكراه
رز مكسر و مكرونه كنسة المصانع
و طماطم بايظه وبصل طالع مايتينه
أيوا كله بيعمل كده
صباحك ورد

gwad said...

ممكن ادخل معاكى شريك
انتى تعملى الكشرى وانا اكلة
الله الكشرى بتاعك جميل بس ناقص شوية شطة

tota said...

يا كلبوظة العزيزة
شكرا على الفلسفة المختلفة للنفس البشرية الكشرية
بس للاسف ما ينفعش يبقى كل واحد فينا كشرى هذا هو الملل بعينه
رحمة ربنا بينا هو اختلاف كل منا عن الاخر والا لاصبحنا نسخا طبق الاصل مع اختلاف درجات الوان الصورة حسب كثافة الخلطة

يمكن يكون فى امل فى الرز باللبن سكى على الكشرى
تحياتى

Mohamed Al-Ashry said...

كلبوزة
//
دكانة الكشري
ريحاتها فايحة بين المدونات
كده، هانكلبز لكن مش ها نبقى سمباتيك
//

احييك

كلبوزة لكن سمباتيك said...

BackBone
احلي طبق كشري يجمع كل الاحاسيس الانسانية في الدنيا لابن اختشي
----
sahar
انا و انت حناكل بيتزا اخر النهار بس بدور علي حد يغسل المواعين
----
tona
من عنيا يا جميلة الله يسلمك يا سكرة
----
أُكتب بالرصاص
الله يبارك فيك و يكفينا شر النق و الحسد و البص في السبوبة و حديلك نسبة من الكومنتات
-----
NoOR
ايوة انا بعمل اغراء
فكري و بطني
بلاش طظ بلبن اجيبلك ريري؟
-----
labido
ههههههه الدكانة اللي جنبنا
-----
المسافر
و مال الكشري و مال الدايت لا تعارض
ده حتي في رجيم الفتة
اغرفلك؟
-----
Abdou Basha
و دقة كتير و لا من غير ؟
------
sara
الله يبارك فيك يا احلي بنوتة
احلي طبق ليكي
-----
الكشري فكرة حرشة لتجديد مفردات الحياة
تسخين الحياة
تحريك كبشة الحياة
بحبكم

كلبوزة لكن سمباتيك said...

KazaBaza
تصدق بس كلام في سرك
لا باكل رز بلبن و لا كشري بس ده بزنس اصل لو فتحت دكانة معجنات و بيتزا حقضي علي راس المال من اول يوم لذلك ببيع حاجة مش بحبها
فيخمتو؟
-----
أحمدبلال
يعني اغرفلك و لا مش حدفع و الموقع مش بيفتح ؟!! بتبعتني ؟:)
----
Aoossa
و مالة يا أوخة من عنيا ليكي نص البقشيش و الكومنتات
بس خلي مواصفات الجودة دي في السكرتة لحسن الزباين تطفش
مسائك عسل
----
gwad
من ناحية الشريك انا موافقة بس تغسل الطباق مش تاكل
و خللي بالك الشطة حلوة في الاكل و صعبة في الحمام
----
red ghost
اية يا عم الشبح الدخلة الجامدة دي الناس واقفة علي العربية تاكل في امان الله و انت جاي تغمهم كده من غير متمسي و لا تكمنت علي الموضوع
دي مش اصول ولاد البلد
و عقابا ليك
واحد كشري لعم الشبح و كتري الشطة يا اوسة و سمعني احلي يا دهوتي
-----
tota
صحيح يا توته مهم جدا التباين بين الناس و ده اكيد يفرق من طبق كشري لطبق تاني واحد شطة زيادة و واحد عدس زيادة و كده
في شخصية حامية و شخصية باردة و هكذا
بحبك يا توتة انتي سكرة
----
Muhammad EL-Ashry
هو ده الهدف اننا نكلبز علشان نطبق نظيرة كلابيز من اجل التغير
حياك الله
-----
يلا قبل ما نشطب يا جدعان
الصلصة حتحمض يا جدعااان
يلا قبل مياحث الصحة ما تكبس
يا دهوتي
كبسة

KazaBaza said...

كويس انك بتبيعي حجات مش بتحبيها
و الا انتي عارفه العواقب
:))
فخمتو يا فندم

دماغك طلعت لوزعيه و ليكي في مجال المال و
الاعمال

ما تقلبيها اسهم
انتي عارفه السوق هنا غير
و انا هشتري سهمين

بعدك على بالى said...

كلبوزتى الجميلة..
بس انتى محددتيش فى القايمة بتاعتك الطيبة مثلا رز ولا مكرونه و هل الطيبة لدرجة الهطل ده نوع مش موجود فى مكونات الكشرى ولا ده بينتج من تفاعل مواد مع بعض لما الواحد يكتر نوع على حساب التانى ...

انا عن نفسى حاولت ابقى زى الكشرى مزيج من كل الانواع بس معرفش ده قدر بقى ولا سمات شخصية بتتكون من عوامل مختلفة كتير،بس المؤكد ودى حكمة ربنا مينفعش كلنا زى ماقالت توته كلنا نبقى نفس الخلطة ودى حكمة ربنا لانه كان قادر يخلينا كده، لكن ينفع طبعا (بعد ما تحددى انواع الصفات مقارنة بمكونات الكشرى) اننا نطالب بتسيد الطيبة لو هى الارز ، الرحمة لو كانت المكرونه وبلاش الشطة على اعتبار انها بديل للشر (مع الاعتذار لهواة اكلها)

احييك بجد على الفكرة.. متميزة كالعادة ( على فكرة انا بعت لك اميلين بس فيما يبدو راحوا دكانة الحواوشى اللى جنبك فياريت تتخانقى معاهم لانه كل مابعت مش بيوصلك مع انى بعت على العنوان اللى انتى كنت سايباه)

مرة تانيه باحييك ومنتظرة الرز بلبن

قبله كبيرة على جبينك

بعدك على بالى said...

يوووووووووه ده انا جيت لك بعد الكبسة.. شكلك اتقبض عليكى ولا ايه؟

عموما يرجعك لنا بالسلامة وبحييك على اللوك الجديد ومن غير نق ولا حسد بس ساعدونا يساعدكم ربنا واهو من عمل خير التقاه، ويقعد لك يارب فى صحتك وعيالك ويزود ارباحك فى الدكانة ...

ساعدينى اعمل انقلاب شكلى مادام مش عارفه اعمل انقلاب فى المضمون ، يعنى، يمكن ده يخرجنا من قالب الكآبة ..

تحياتى

Unknown said...

فيه حاجة يافالحة
فين تصريح الصحة والذى منه
ولا انت عامله نفسك
هتتسابى
كده
لا يا كلابيظو
البلد مش سايبة

بس فكرة
ان النفس طبق كشرة فكزة جوينةقوى
على وزن عميقة
انا مستعد
اشارك معاك
كلاكيع نفسية
مشاكل
وتوابل عاطفية
هتعجب الزباين
تحياتى

كلبوزة لكن سمباتيك said...

KazaBaza
لا انا مليش في الاسهم
ممكن ابيع عوامات لزوم البلبطة
و اهو كل واحد يشتري خمس ست عوامات و يدكنهم لحد ما العوامات تغلي
و اهو كلة نفخ
عاملين فاصوليا بيتي متيجي تتغدي معانا
-----
بعدك على بالى
وصلتني رسايلك الرقيقة و رديت عليها يا قمر بس يظهر ايميلك مزدحم زي ايميلي و تايهين وسط الرسايل
بالنسبة للنيو لوك ده سهل قوي افتحي تمبلت و اختاري نيو بيك و جددي
الكشري اكلة حلوة الصغير و الكبير بيحبها وموفقاكي اننا نحدد اسم كل مكون و علاقته بالصفة النفسية للانسان
الي وطن كله كشري
اموه علي خدودك
-----
الغـــــــــــــريب
ههههههههه المكسب كومنتات بس يا الغريب مفيش تمويل مادي حقيقي بس سيبك انت اهم حاجة حب البلوجرية
طبق كشري جيفت من صاحب المخل للغريب و صلخه
------
red ghost
حصلنا الرعب اقصد الشرف
و بعدين بتفكرني بشغلانة الخاطبة بعد ما جبت ضرفها و سرحت الموظفين ليـــــه
جيت في الاتز تو لااات
المهم طلبك سهل
انت تروح ترب الغفير لو في مصر او ترب عمود السواري لو في اللكس
و تنادي علي نادية
نادية دي قمر
ماتت محروقةو عفرتتها سنتيمنتال خالص
حتبسطك
يلا اهو كله في سبيل التورتة و الجاتوه
و صافي يا لبن

islamventura said...

ربنا يوفقك انتى باردوا بنت حلال

غادة الكاميليا said...

كلبوزة عايزة طبق نفسي أتخن شويه
وحياتك زوديلي الحبشتكنات حبة

NoOR said...

ريري!!!!!!!!!!!!!!!!!!؟


ماشي بس انا بطلت من حواي حاجه وعشرين سنه

Dr. Tantawy said...

كشررررررررررررررررري

حتى في التدوينات هنفضل مسوسين يا ريسه
احنا وعدنا الشعب بالتغيير ولازم نكون قد كلامنا .. اومال فين السيمون فيميه و الكافيار و الفول النابت
ارجوكي تعيدي نظر في الكشري لأن الشعب طافح الكوته منه ههههه

بانتظار الرز بلبن لأني بحبه بصراحه هههههه ويا سلام لو يبقى رز بلبن وورق عنب .. يعني محشي ورق عنب .. بعشقه هههه

safa said...

السلام عليكم, بصراحة أنا بتابع البوستس بتعتك و نادر الواحد يجد امرآة تتمتع بروح الفكاهة زيك كده, بالنسبة للكشرى أحب أضيف أن بيعمل حموضة جامدة جداً بسسب تركيبته الكميائية الشديدة المعدة, حاجة كمان أنا و الله بحسدك على عدد الكومنتس بس بجد البلوج بتاعك يستاهل الشعبية دى زى شعبية الكشرى
شكراً و بقى شرفينا فى البلوج بتعنا

memo said...

كده برده يا كلبوزة
دانا قولت انها فرجت وهتجوز على ايدك
تقومى تخلى بيا وتقفلى المحل وتفتحى كشرى
ما كانش العشم
يالا بلا جواز بلا وجع دماغ

الأميره أوسه said...

كلبوزه
شفتى اللى جات سابت تعليق أسمها
Safa
الله رقيقه أوى يا تنت كلبوزه
بتقول الكشرى بيعمل حموده
ههههههههههههههههههههههه
ده أنا غفر على كده
حـــــــــمـــوضه
أموووت فى السكر السنترافيش
أنا رايحه أشوف حكايتها أيه
العوافش

سندباد مصري said...

يلا يلا يادي العوقا

مين عايز كشري

انا هرش ميه حولين العربيه يا معلمه لزوم الدبا والنيله

وشوفي الزبون ده عايز قيه

وانت يا اخينا يتاكل وانت ساكت يا تهوينا

وانت يا بت يا اوسه حطي حاجه علي كتفك العريان ده متجيبليناش الكلام من الي يسوي والي ميسواش

مبروك عليك عربيه الكشري يا معلمه

انا مستني الحساب بتاعي

عشان الحق العيال وامهم

والشغل بكره من الساعه كام

بقولك ايه العدس مكانش مستوي قوي النهارده ايه رأيك

اسويه بكره اكتر

وعموما الزباين شكلها مبسوط خالص

والناس الي راحت المستشفي كانت من جنانهم من كتر جمال الكشري

والسلام

مفلس افندى الرايق said...

ممكن ادوق ياجميل

كشرى ونتمشى على النيل

بس انا عاوز طبق كبييير

وعاوز شطه عليها كتيير

ياعينى على حسن الصنعه

يا كلبوزه كشرى جميل

يلا بقى يا واد انت وهو

وبلاش زحمه انا اصلى على كلبوزتى بغير ههههههه

انا ناوى اخليها ملكه على عرشى

وانا هابقى امييير

وان يوم قالن نفسى ف كشرى

هانزل اسرقلها كوشه وحله

بس يا ريت الحله تكفى

اصل كلبوزه بطنها واسعه

وتاخد من الكشرى كتييييير


ازيك يا كلبوزه اوعى تقولى بعاكسك ولا حاجه اهو شعر عادى برئ من اى اهتامات عزليه
هههههههههههه سلام يا كلبوزه يا اللى عليكى احلى كلام

هىهىهىهىهىهىهى

مفلس افندى الرايق said...

نلعن افتتاح محل كشرى كلبوزه

والمعلقه بجنيه يا جماعه

والطربيزات كلها محجوزه

وهانجيب تليفزيون واذاعه

وهتبقى كلبوزه مشهوره

ونعملها فيلم سينمائى

اسمه كلبوزه الاموره

وانا اكون بطل الفيلم

وتقولى اهلا سموره

حلم ده ولا يا ناس علم

لازم اخد وياك صوره

وانا اقولها علم يا سنيوره

انا وانتى بقينا ابطال

وف دنيا الهوى ناس مشهوره

لولولولولىىىىىىىىىىى

مفلس افندى الرايق said...

نزلت بالجديد يلا تعالى كلى الحلو بعد الكشرى

Adel said...

اشطة ليلتك كحلي معايا انت بتبعيني وبتلعبي بديلك مش قولنا طقم الماكولات يخصني انا وعملت له طبلية العيلة لليلة وكل ليلة وانت جاية تنطي على وتعملي كشري جنب مني روحي ربنا يرزقك بمفتش صحة رزل ياخدك على الصحة ويعملك تحاليل شاملة وكاملة وما يرضاش يسيبك الا بعد حقنة .... ولابلاش لينا قهوة نتلم عليها اخر الليل ونتعاتب اشطة يا كلبظ مش هاتعدي بالساهل ولا اوسة اللي على حزب الريح وربنا لاوريها

Anonymous said...

هووووووو دة الكلام يا حبيبتشى
باموووووووت فى الكشرى ابو دقة وصلصة مشطشطة كدة ونحبس وراه بطبق ارز بلبن ووراة ازازة بيبس
هههههههه بعدها بقا على ترب الغفير جماعة
لو حتتزعمى حركة بلوجرية للوصفات المطبخية انا وراااااااااااك يا ريس
وبالروح والدم
والكلام المجعلص دة
اموووة لعيونك

أحمــــــــدبــــــــــلال said...

وصلنى الطبق
و تسلم أيديكى عليه
تحفة بس الحموضة هاتموتنى لغاية دلوقتى
خففى الحراق شوية


و البقشيش أنا سايبه فوق الطبق




على فكرة الموقع بيفتح عندى عادى
www.aboutarek.com

كلبوزة لكن سمباتيك said...

islamventura
تشكر يا طيب
----
غادة الكاميليا
من عنيا يا اختشي تعالي اقضي عندي الويك انت و انت تزيدي خمسة كيلة بالراحة
قبلاتشي
----
red ghost
نادية كانت اخر امل ليك
مفيش غير اني اموتلك نانسي عجرم و لا هيفاء و لا اليسا علشان يبقوا عفاريت علي قد مقامك
بس ابقي افتكرني بالصور
----
NoOR
طيب يا فندم متزعلش نجيب بدل الرز بلبن اية؟
طبق بمب؟
و لا فروووط صلااااط؟
----
ZanGooLaaa
لا ما احنا مش عايزين نطمع الشعب من اولها و بعدين احنا في طريق الي عالم كلابيز يعني لازم نشتغل علي الكشري و الرز و المحشي و كده
امال حيكلبزوا ازاي
كل شئ مدروووس
كل شئ محسووووب
----
اعلنت مباحث التموين عن حدوث حالات تسمم و استفسيا الخنق في البلوجر شارع المدونات علي ناصية البوست
و ما زال السبب مجهول

كلبوزة لكن سمباتيك said...

safa
و عليكم السلام و رحمة الله
اصل انا بحب الفكاهة جدا بالذات الكمثري و الموز
اما عن الحموضة اللي بيعملها الكشري فاحنا بنبيع مع كل طبق ازازة ميكوجيل هدية
و بالنسبة للحسد و خلافه
فكلام في سرك البلوجرية زهقانين من السياسة و وجع القلب و بيجوا يروقوا عندي
و لاني بحبهم الكلام بيبقي من القلب للقلب
مدونتك حلوة زيك
----
memo
صح بلا جواز بلا وجع هم
اغرفلك طبق كشري ماركة ودع اهلك؟
و لا انت شعبان؟
----
Aoossa
معلش يا اوسة مش المعدات زي معداتنا يا امي تهضم الزلط
و بعدين تصدقي انا كمان الكشري بيتعبني
بي انا مش سكر سنترافيش هههههه
اوعي نفسك تهفك علي طبق كشري لحسن الزباين بيغمن عليها مش عارفة ليه
قبلاتشي
----
Epitaph
يبارك فيكي يا جميلة
من عنيا مهلبية مخصوص لاحلي ايبي
و بلاش انتي بالذات كشري لحسن عايزينك اليومين دول
قبلاتشي
----
سندباد مصري
خمسة كومنت و مشبكين للريس ابو السناديب
علي ما كدمه من جهوض لرفع مسطوي عبرية القشري
و لو مباحث الصحة جت سالت قولهم انا المسؤوول و انا حبقي اجيلك الحجز و اشوفك بطبق كشري
----
مفلس افندى الرايق
مفيش دواقة يا سي مفلس عايز تاكل اشتري
احنا مش فاتحنها سبيل
و لا ياكل معانل التسبيل
احنا ورانا التزمات
و كفاية ان في كام واحد مات
بطني واسعة اية يدريك
ده انا كلبوزة صحيح
بس سمباتيك

كلبوزة لكن سمباتيك said...

مفلس افندى الرايق
و لا فيلم و لا تصويرة
انا راسمة اكبر تكشيرة
ادفع تمن الكشري الاول
بدل معملك تعويرة
------
المزاجنجي
معلش يا ريس اهي سبوية ناكل منها كومنتات و المصاريف كبست عليا
و ايراد القهوة مش بيكفي
ارصلك حجرين علي طبق الكشري لزوم الصلح
و اسمعك سونج
بتلوموني ليه لو شفتم كشرية حلو اد اية؟
-----
شهروزة
ايوة يا اختشي بعد المعركة دي لازم نضرب ازازة محلول فنيك علشان نسهل علي المسعفين غسيل المعدة
و اهو تبقي نضافة و توفير
اموه اموه
----
بحبكم

سندباد مصري said...

اما عن الحاجز يا معلمه

فمتقلقيش علي السندباد انا واخد علي الأقسام والذي منه

سندباد بقا رحال في دنيا الله

وفيه ذي الأقسام الواحد يشوف فيه الي ميشوفوش انسان

انا شايفك عماله تتنططي من مشروع لمشروع

حاسبي يا معلمه خبراء الأقتصاد اياهم بيقولوا ان مفيش مشروع في مصر هيكسب

حتي لو كان مشروع جواز

العيال بتيجي متخلفه عقليا في الأخر

سيبك من احتمال الأكياس الي بيخلي الواحد ينام وهوا مكمم مراته

بس انا شايف ان فيه اقبال كبير علي العربيه

ولو دفعنا قرشين لبتوع مباحث التموين والصحه هيسيبونا عايشين واهوا البلد كلها ماشيه كده

واحنا عايزين ناكل عيش

ولا ايه

ننحرف بقا

والسلام

مفلس افندى الرايق said...

هههههههههههههههههههههههههههه

بجد انتى حكايه

بس انا برضه مصمم ادوق

بالعافيه لو منفعش الذوق

وحتى ناوى احلى عندك

برز بلبن وبرقوق

وسوق على ماهلك سوق

كلبوزه بكره تفوق

وتعرفى انى مش بدفع حساب

وهادوق يعنى هادوق

مفلس افندى الرايق said...

انا عامل موضوع ف بلوج العار
وعارف انك عندك موهبه غنائيه يلا اقريه وغنيه وسمعينى احلى سلام وتحيا كلبوزه زعيمة الكشرى والى الامام

Ayyam said...

منك لله فكرتينى ليه بالكشرى بس ,ده أنا ليه أكتر من عشر سنين ماأكلتهوش. طيب أنا كمان جاى المحل

BackBone said...

ياخاااااااااااااااالتشــــــي, اوممي بتقولك بلاش الكشري ده لحسن بيجيب اسهااااااال متعمليلنا كده حاجه فيها لحمه و خضاااار....ـ

مش هتصدقي اني معرفتش اكل الكشري ده اللا يمكن لما وصلت 15-16 سنه, كان ديماً اول لما بكله بيجلي تلبك معوي و لازم ارجعه, ولغايه دلؤتي لازم يجيلي تلبك بس بمسك نفسي و لما سألت امي عن الموضوع ده, اتضح انها كانت بتتوحم وهي حامل فيه علي بيبسي و تفاح ... تخيلي "انا" بيبسي و تفاح
يانهار مش فايت يامه.

فانا بقه عشت طول عمري نفسي اكل كشري بس من الشارع و مش طايل

انا اينعم "عظييييييييييم" بس مش لدجه البيبسي و التفاااااح

و كتها ايه ياللي عايزه خلف...ـ

توهة said...

مممممممم كشرى .... أنا بحبه بعدس بجبه وشيليلى البصل والصلصه وزودى الدقه


ومعرفش أبدا أكون كشرى أنا أخرى صنف واحد


ومبرووووووك النيو لوك

فانتازيااااااااااااااااااااا
فانتازيااااااااااااااااااا

مـحـمـد مـفـيـد said...

والله يا كلبوزه انتي جوعتيني
بسرعه جهزي الحلو الارز باللبن حتي لا اغضب واروح

الأميره أوسه said...

واحد كشرى وصايه للمعلمه توحيده ومعاه شيشه وكوباية شاى و معاهم عريس حنين وصلحوااااااااا
أتنين كشرى مع واحد ورد للأستاذ حنفى الفجعان ومعاه رغفين عيش وشوية طرشى
و أزازة فنيك مركة الهلال والنجمه وصلحواااااااااااااااااااااااا
واحد كماله و أتنين لوكس الوكس
للست أعتدال و ولدها حمدى وعروسته نوال والف نهار مبروك للعروسين
ونفتح الستار ونصلى على النبى المختار
ومعانا طبله ومعانا تار
والعريس بيشرب مية نار
و زغروته حلوه توقع الجدار
وسكينه تشق بطن الكافر اللى مايسمعنا
صــــــــــلاة النبى
لوللولولوولوولوولو
الف شكر للناس اللى شرفتنا فى الأفتتاح
ونردهالكم يوم طهوركم
وسمعونا زغروطه حلوه يا بنات حارتنا
وبعد أسبوع أفتتاح قسم الرز باللبن
والدعوه عامه لكل فتى وفتاه
والسهره صباحى مع أحلى الأنغام وألأصوات والمطربين
مطرب الشباب والكباب المزجانجى
صاحب الحنجره المستهويه أدم المصرى
مع رقصة الحصان لأوسه عاكف وشهروزه الحلو
وفقرات السيرك لزانجولا العجيب
فرقة كلبوزه الموسيقيه
ترحب بكم وتتمنى لكم
سهره سعيده
وأحلام سوده
كان معكم من الأذاعه المدرسيه
الأميره أوسـه

الأميره أوسه said...

النهارده الخميس العروسه للسيد العريس
والجمعه الصباحيه ويفضل المتاعيس
و يجى السبت
ومعاه
كلمة السر
صباع كفته لكل مواطن
كركركر

أجدع واحد في الشارع said...

2 كشرى تحينه برة ماشى

soosa el-mafroosa said...

يا بنتي امال سمباتيك ايه بس ..هو ده الإتفاق بعد ما نخسلنا شوية ..عايزة تبوظلنا الروجيم ..كده يا كلابيزو

طب ممكن تعمليلنا الرز بلبن بسكر دايت؟

admelmasry said...

انا بحب الكشري اللي بدقة وشطة .. عندك ولا ايه

ولا هتعملي زي سوسن بدر في فيلم سلام ياصاحبي

وتطردينا بقي


ايه النظام احنا بنجر شكل لمؤخذة .. عشان احنا عيال صايعة بقي

والكشري ده الواجبة الاساسية بتاعتنا


ياعني م الاخر لو عملتي زي .. عابلة كامل في فيلم سيد العاطفي .. وهنقول عليكي انك جدعة وناكل من عندك كشري علي طول


بقولك ايه ؟


اوعي تقري حجاة من اللي فوق ده مش انا اللي كاتب ده كلام تهريج .. مش فاهم انا الناس اللي داخلة تعلق عند ناس وتهرج دي مش فاهم

ما تروح تلعب عن بيتك ياد انت وهو

معلشي انا اسف .. اصل اللي كتب الكلام ده واحد رخم

بس انا مشيته

انت بقي عاملة ايه دلوقتيييييييييييييييييي؟

شيمـــــاء said...

كله بيتكلم عن الكشرى
يا ترى فيه حلو غير الرز باللبن

انا احب التجديد لو سمحتى

زميلتك فى الكلبظة

كلبوزة لكن سمباتيك said...

أحمدبلال
سلامتك من الحموضة يا سي احمد انا حبعتلك ازازة ميكوجيل جدعنة و مشكرين علي التبس
و حياة النبي هنا في بروكسي المواقع مش كلها بتفتح و انا عندي البي سي نقاوة و علي كيفك و اول قطفة بس نعمل اية قليل البخت يلاقي البروكسي في جده
----
سندباد مصري
يحميك لشبابك يا سندباستا يا خويا
عارفة انك رد سجون و البرش واخد منك رائات و عارفة ان ورايا رجالة و اني ساعة الجد حتبقي انت اللي في وش المدفع
و انا حجري فوريرة ميغركش انا كلبوزة صحيح بس خفيفة
هو لو كان الانحراف بيجيب فلوس كنا قعدنا بلجرنا هنا
قطيعة
-----
مفلس افندى الرايق
شطبنا يا رايق بس ابقي تعالي عاملة حفلة في البلوج بكرة و عيد ميلاد و زروطة
اوعي تيجي
-----
Ayyam
يا فندم احنا بنوصل لحد المدونات مدونات دليفري فور فري
اند دونت فورجت ذا بكشيش
ترجع مصر بالسلامة
--------
BackBone
ابن اختشيييييي
تفاح اية و بتاع اية دي مامتك اختشي و انا عارفة هي اتوحمت فيك علي دوم و جعضيض
و بقينا ندور علي الدوم بمنكاش و خايفين للواد يطلعله دومة في قفاه
سلملي علي اختشي
يا ابن اختشي
-----
الكروان يغنى فانتازيا
من عنيا بس فين السوبيج الاول
انا احب اكون كشري و ساعات ببقي ديناميت
يا سيمون فيميه يا قمر انتي
-----
مـحـمـد مـفـيـد
حاضر من عنيا بس انت تعالي ضروري بكرة
زرونا تجدوا ما يرزكم بلبنكم
----
Aoossa
انبي يا اختشي انت اكيد بتشتغلي الشغلانة دي من زمان لانك خبرة و متمكنة و علي درايا باحوال الشارع الكشري
و معلش بقي رجعي صباع الكفتة اللي استلفتيه مني علشان تتقمعي بيه قدام ضيوفك علي الغدا النهاردة لحسن مزنوقة فيه
عايزة اعمل بيه عيد ميلاد
و ضرب نار للصباح الباكر
يا ريس
اموه
----
أبن الشارع
ياختي عليك
قاعد في العربية الكارو و مدلدل رجليك و بتطلب بقلاطة
انزل خد طبقك
----
soosa el-mafroosa
يا سوسة يا اختي انا مش باكل منه ده انا عاملاه مخصوص علشان اكلبز الشعب و يبقي كلنا في الهوا سوا
اوعي تخسي لاطلعك من الحزب
قبلاتشي
----
admelmasry
الشيزوفرنيا عاملة شغل جامد قوي
انا حبعتلك طبق و لصحابك اللي بيطلعوا امتي دول طبق
مساء الخير يا عوكل
----
shaimaa
زميلتي العزيزة في الكلبزة
في يا جميل انت تأمر بس في رز بلبن و في سيديهات و في فلوبي ديسك اللي انت عايزاه
----------------------------
تعلن ساعة اشارة الوقت الي انه سيتم تفجير المدونة في وقت لاحق
لا
يفوتكم
الانفجار
بببب
وووو
مممممم

admelmasry said...

ههههههههههه

كراكيب نـهـى مـحمود said...

اولا دي اول مشاركة ليه هنا بس مش اول قراءه بقالي كام يوم ادخل اخد جرعه واخرج لحد ما وصل الموضوع للادمان لأ مش كشري 0 كلمات
المدونة جميله ودمها خفيف وكل حاجة حلوة بقى
ثانيا عايزة اقولك انك حد شجاع بشكل جميل اوي اصل الكلابيز دايا بيحاولوا ينفوا التهمه دي عنهم انتي فرحانه بيها كده زي ما تكون جوليا روبرتس
ثالثا انا جارتكم في مدينة المدونين ان جاز التعبير في اخر الطريق الزراعي وانتي طالعه على بلاد العجائب بتاعت اليس احب اشوفك عندنا قريب ويا ريت وانتي جايه تيجيبي طبق كشري في طلب محرج كمان بلاش ارز بلبن اصله بيعملي دماغ وبدوخ منه اوعي تقولي لحد بقى
كراكيب نهى