Sunday, September 17, 2006

عشرة مرق و عشرة خرق و عشرة حلق

كنت اسمع ستي (اللي هيا جدتي) تقول رمضان عشرة مرق (يعني طبيخ و اكل )و عشرة خرق (يعني تجهيز لبس للعيد )و عشرة حلق( يعني عمل الكحك و الغريبة و المنين)ن
و لما كبرت شوية بقي رمضان يعني ليا الفوازير و نيللي و عمو فؤاد و السهر للفجر و النوم لحد العصر
و لما كبرت شوية كمان اكتشفت الحقيقة
يا نهار ابيض
ده رمضان حاجة تانية خالص غير العبط اللي كنا بنعمله و احنا صغيرين ده
ده شهر في السنة للتقرب من الله و غسل النفس من الذنوب و استغلال فترة الصيام و النقاء الروحي اللي فيها في التعبد و التدبر و معرفة قد اية الواحد ميسويش علشان يبقي ضايع و مفيص من قلة الاكل
و هو اللي عامل جن بقية السنة
رمضان مش السهر في الخيمات الرمضانية (نفسي اعرف ابن شوز مين اللي سماها كده)اللي مليانة غناء و رقص و اختلاط و شيش و بلاوي سوداء
رمضان مش نوم للعصر و صيام تلات ساعات قدام التليفزيون
رمضان مش حداشر مسلسل يستلموك من اول الفطار لحد ما تتسحر
رمضان مش حشو بطن و حلو و حادق و ساقع و سخن و عزومات كل يوم
يا ربي
ده رمضان ده فرصة لازم نغتنمها
استعدوا معايا لرمضان

52 comments:

مفلس افندى الرايق said...

عشرة مرق و عشرة خرق و عشرة حلق
انا اول ما قريت العنوان قولت يا عينى كلبوزه عجزت ولا ايه والكلام بقى بيقع منهاهههههههههههههه

بس لما قريت فهمت

يا ريت بجد نستعد لرمضان

ازيك يا كلبوزه انا اول واحد اعلق هاهاهاها طول عمرى مرزق

انا كمان لسه كاتب موضوع وكنت داخل اقولك تعالى اقريه لقيتك انتى كمان عامله موضوع جديد

كل سنه وانتى طيبه ويمكن بعد رمضان تخسى ويبقى اسمك خسايه ولسه سمباتيك

admelmasry said...

ياااااااااااه
كلامك حلو قوي يا كلبوزة
بجد كلام مريح
.
.
.
مش عارف ليه حاسس انك اليومين بتعدي بظروف مش عادية بسبب رمضان

بس تعرفي انتي احلي اكتير
دايما يارب تفضلي حلوة علي طول

لانك احلي كلبوزة في الدنيا

...دنيتي said...

طبعا عندك حق وربنا يعينا ويتقبل منا
كل سنة وانتي طيبة يا كلابيزو ورمضان كريم:)

Nouran said...

يا تصدقي نفسي اعد العدة لرمضان نفسي استمتع بيه ع طريقتي مش اسلي صيامي ارحمنا يا رب
انا سمعت الموضوع بتاع العشرات ده من جدتي بس كان حاجة شبه كده برضه
ربنا يبلغنا رمضان يا رب ونغتنم كل فرصه فيه

sara... said...

يارب يا كلبوزة
بجد نفسي احس بقرب من ربنا فى الشهر ده

علا من غزة said...

اول مرة اسمع المثل ده ..
بجد الناس الكبار "معظمهم يعني مش كلهم" بيفكروا كدة زي جدتك

ربنا يفرجها علينا ويوصلنا لرمضان ويلهمنا الاستفادة من بركاته ..

ادعيلي ربنا يرجعلنا بابا قبل ما ييجي رمضان .. السفرة مش حلوة من غيره
http://fromghazza.blogspot.com/

تمر حنه said...

بخ أنااااا جيت
كلبوزتى .. كل سنة و انتى بخير و كل البلوجارية (تحسى اننا من الحرفيين) الى الأفضل باذن الله
طبعا احنا كلنا فاهمين الشهر غلط و كلامى بعدك هيبقى زى من فسر الماء بعد الجهد ب امبو - ربنا يفتح عليكى و كلامك بيرشق فى القلب على طول.

3ola ربنا يرجعلك والدك سالم غانم هو و كل غايب

أم أحمد said...

في رمضان احنا بنجاهد جهاد ربنا يعلم بيه بسبب المسلسلات اللي مايحلاش عرضها إلا في رمضان
كل سنة وانتي طيبة
أم أحمد

الســـاحر said...

ربنا يهدينا فى رمضان وغير رمضان..ويجعل كل ايامك سعاده على الموضوع الجميل ده

BackBone said...

ياخاااااااااااااااااااااالتشي, ان جي اهوه اعمل الخبر ده ايكسكلوسف عندك في البلوجر:

سمعوووووووووووووني احلي زغروطه اسكندراني شحط محط علشان ان خطبة يابلوجريه.

و العاقبه عندكم في الاوتوبيسات
:D


بي اس:
مدرسة الانحراف شغاله شغاله محدش من الاخوه راغبين الانحراف يقلق. والله المستعااااااااااان.

علي فكره احنا بنطبق الانحراف الشرعي و محدش يفهمنا غلط
;)

LAMIA MAHMOUD said...

حلو الكلام .. بس المشكلة ان الدنيا كلها بتصلح في رمضان وبعد ما يخلص ترجع ريما لعادتها القديمة

labido said...

... وآخره عتق من النار ..
اللهم اجعلنا من عتقائك من النيران ومن المقبولين
وكل سنة وانتي بصحة وسلامة وعيد
عبدو

Shower-Mirror said...

براوه عليكى يابت يا كلبظ

أُكتب بالرصاص said...

السيدة المحترمة
كلبوزة

كلام في منتهى العقل ، وفعلا احنا اكتشفناه على كبر ، يجيي من عشرين خمسة وعشرين سنة
وقبل كده كان رمضان بالنوسبة لنا القناة الاولى والتانية

لكن الحمد لله

اكتشفنا لذة رمضان

بصراحة لا إضافة
ماذا اقول بعد كل ماقيل
وهل كل ما يقال قيل؟؟!


تحياني

MAKSOFA said...

رمضان كل حاجه حلوة
رمضان فرصه لنا من الله سبحانه وتعالي لنقترب منه ونراجع أنفسنا ونحاسبها
رمضان جهاد للنفس الشقيه
رمضان فرصه طيبه للتطهر ومحو الأثام
رمضان لمه الأهل والأصدقاء
رمضان كريم ياكلبوزة
وكل سنه وانت طيبه

المسافر said...

المثل اللي أنتي كتبتيه ده بيخليني أسألك هو انت أصلاً منين في مصر؟

بس عموماً أنا متفق معاكي في رفض الخيبة الرمضانية اللي كل سنة تلاقي إعلاناتها بتقطع بعضها وأكثر ما هو مستفز حكاية
رمضان 2006؟!!!

إزاي يعني الحول والبله المغولي ده

كل سنة وانتم طيببين

safa said...

كلنا على أهبة الاستعداد.....3,2,1

Anonymous said...

كلبوزتى
كل سنة وانتى طيبة
لحد دلوقتى عندى تيتا لسة بتقول كدة مع انها قربت تفلسع من الدنيا بس يبدو ان دة بقا مبداء
السنة دى داخل عليا احساس بان رمضان مختلف وحاسة انه حيكون حلو ونضيف عن كل سنة
كل سنة انتوا اجمعين بخير
وربنا يستر ويصح احساسى
اهوو امل

الأميره أوسه said...

رمضان جانا
وحووى يا وحوووى
زمان كنت بروح أنا وصحابى نلف على البيوت ومعانا الفوانيس
بفكر أخدك أنت وشهروزه ونعملها
اهو نجمع فلوس لبس العيد
وحشااااااانى يا كلبوزه
أأأأموه ليكى
وكل عام وأنت حبيبتى
أوسه الساهر

مفلس افندى الرايق said...

دعوه عامه منى لزيارة البلوج بتاع للدفاع عن الرسول

تعالوا

أحمــــــــدبــــــــــلال said...

تحياتى لكلمات جدتك الرائعة
و لكن للأسف كلنا تقريباً تربينا على ذلك طول عمرنا
بس بجد أستعداد رمضان حاجة تانية خالص

أنا منتظر رمضان بفارغ الصبر

tota said...

كلبوز الجميلة
كل عام وانت بخير
انا كمان اول مرة اسمع المثل ده
بس احب اشكر الفضائيات اصل رمضان زمان كان بالنسبة لينا القناه الاولى والتانية ومكناش ملاحقين على المسلسلات والفوازير والبرامج الهايفة دلوقتى يا سلام رمضان بقى مش هتغمض عنيك عن الشاشة
وحسبى الله ونعم الوكيل

عندى اقتراح
ينفع نتفق كلنا ما نتفرجش غير على البرامج الدينية والبرامج الهادفة طوال هذا الشهر ونقلل ذنوبنا شوية من روتانا واوربت وشو تايم

ايه رأيك نجرب الموضوع ده مع بعض
تحياتى يا جميلة

ody911 said...

اللهم تقبل صيامنا وصلاتنا
وركوعنا وسجودنا
اللهم أغفر لنا زنوبنا
وأرحمنا وأنت أرحم الراحمين

Adel said...

كلابيظو المثل ده مش قديم قوي ولا حاجة سؤال فالخباثة هي تيتة مرتبطة ؟ وعموما كل سنة وانت طيبة واللهم بلغنا رمضان اعوام عديدة واعمار مديدة ولا تحرمنا من نفحاته ..اللهم إنا انخنا مطايانا ببابك وبللنا بالدموع اعتابك فاقبلنا في عتقائك يا ارحم الراحمين وصلى اللهم على سيدنا محمد وعلى اله وصحبه وسلم (اكثروا من الصلاة على الحبيب فصلاته نور وطيب وحسنات من رب الارض والسموات)

BackBone said...

واضح ان الناس عندك في البلوجر بطلوا يقروا تعليقات بعض, وده نتيجة الدهوله اللي همه فيه, اصل رمضان بيبقي بهدله علي جميع المستويات. و الواحد يتمني يتبهدل شويه في العباده, اصل العباده في رمضان بتختلف عن اي شهر تاني. و اللهم ما اعني عل حمدك و شكرك و حسن عبادتك.

االهم ما انت عفو تحب العفو فعفو عنا

كلبوزة لكن سمباتيك said...

الي كل اصدقائي الغالين
اسفة للتاخير في الرد بس مشغولة في سبوبة شويتين
كل سنة و انتم بالف خير و سلامة و صحة و عافية
و ربنا يتقبل صيامكم و دعائكم و يبارك لي فيكم

اجابات سريعة

1سيتي من الاسكندرية
2نورتي مصر يا تمر حنة
3موافقة علي اقتراح توتة
4ربنا يرجع باباكي بالسلامة يا علا
56789الي كل من شاركني الاستعداد
بحبكم جدا و وجودكم بيسعدني قوي
ربنا يجمعنا علي حبه
و اللهم صلي و سلم علي محمد افضل صلاة و تسليم

توهة said...

بجد عندك حق
كنا فى دنيا تانيه



فانتازياااااااااااااااااااااااا

GoGa said...

كل سنه وانتي طيبه يا كلبوزه وحشاني مووت
فعلا رمضان عندنا معرفشي ليه مرتبط بالأكل والتليفزيون والأغرب علي رأيك حكايه الخيم دي اللي معرفشي جاتلنا منين فكرتها دي
شكلك مشغوله في الأعداد لرمضان بما لذ وطاب شكلي كده هافطر عندك بس مل تنسيش الكنافه أصلي بحبها أوي
متشوقه جدا لرمضان
اللهم بلغنا رمضان

Anonymous said...

حلوة فعلا مثل جدتك يا كلبوظة
جديد عليا انا كمان
بيتهيألى لو احنا اهتينا بختم القرءان أكتر من مرة في شهر القرءان وصلينا تراويح وتهجد مش حيبقى عندنا وقت للمسلسلات والفضائيات وحنقدر نقاطعها
تيجوا نجرب ؟
اللهم بلغنا رمضان وأعتا علي صيامه وقيامه
كل سنة وانتي طيبة يا كلبوزة
صديقتك الجديدة :) لو تتقبليني

Anonymous said...

كل سنه وانتم طيبين وربنا يعود علينا وعليكم الايام بخير

Unknown said...

كل سنة وانتم طيبين
قلبى عليك يا كلبوزة ف رمضان
هتبطلى رغى واكل
فينك
ما حدش شافك من زمااااان

Anonymous said...

كلنا مستعدين لرمضان وانشاء الله نكون احسن واقرب الى الله من رمضان اللى فات المهم الثبات بعد رمضان لان رب رمضان رب كل الشهور
ربنا يثبتنا كلنا

مفلس افندى الرايق said...
This comment has been removed by a blog administrator.
مفلس افندى الرايق said...

الظاهر ان كلبوزه ما بتردش اليومين دول على الولاد يا رجاله

layal said...

اعد الله علينا وعليك رمضان اعواما عديده وازمنه مديده
تحيه رمضانيه

بعدك على بالى said...

صديقتى الرائعة

سحرتنى كلماتك حينما التقطتها عينى لأول مرة، أدهشنى صدقها، طزاجتها، أفكارك التى تحلق بعيدا عن المتداول، بصمتك الساخرة شديدة الخصوصية والمختلفة عن أية نصوص تنتمى عفوا لهذا النمط من الكتابة..

أما صوتك فلقد سكننى بحميميته وخفة ظلة ورقته و.......
أنا التى أشكرك ياسيدتى لمنحى شرف التواصل معك على الهواء مباشرة،فلقد مددتى بكلماتك الراقية جسر صداقة أثق بأنها ستكون بعرض السماوات..
محبتى و.. محبتى

محمد أبو زيد said...

كل سنة وانت طيبة
رمضان للأسق ما عادشي شهر عبادات ، ولا تقرب من الله ، ولا تراويح ، مع ضغط الميديا ، والاعلانات ، والمسلسلات ، غير المحتمل ، أعتقد إن الحل إن احنال نبدأ بأنفسنا ن في حملة مقاطعة ذاتية ، ومحاولة للعودة إلى الله ، محتاجين نغسل ذنوبنا ، وهمومنا طول السنة اللي فاتت
وكل سنة وانتي طيبة تاني وتالت ورابع وعاشر

Anonymous said...

1- إخلاص العمل لله عز وجل .
2- استشعار نعمة الله علينا بهذه المواسم .
3- العلم بأنه ميدان منافسة على العتق من النار .
4- تهيئة المصحف والانقطاع عن الشواغل .
5- اختيار كتاب من كتب التفسير ككتاب السعدي رحمه الله للرجوع إليه عند الحاجة .
6- أن يخصص الإنسان لنفسه تلاوتين الأولى / تلاوة تدبر بقراءة جزء واحد في كل يوم بتدبره ويقف عند عجائبه وآياته . الثانية / تلاوة أجر وهي التي يكثر فيها الختمات ابتغاء الأجر .
7- إعداد جدول للقراءة يوفق فيه الإنسان بين قدراته وأعماله .
8- تعويد النفس على الدعاء ورفع اليدين .
9- تعويد النفس على الجلوس في المسجد أدبار الصلوات وخاصة صلاتي الفجر والعصر .
10- تعويد النفس على الصدقة والبذل والعطاء.
11- الحرص على تحفيز النفس ومضاعفة دورها في العمل الصالح مثل قراءة حياة السلف وحالهم في رمضان 12- الاستماع إلى الأشرطة وقراءة المطويات الخاصة بذلك .
13- تعويد النفس على القيام وذلك بالزيادة في الوتر والتهجد .

ثانياَ / البيت :-
1- شراء مصاحف وحاملات مصاحف لجميع أعضاء الأسرة .
2- تخصيص مصلى في المنزل .
3- شراء الأشرطة و المطويات وعمل مسابقات عائلية خاصة برمضان .
4- عقد جلسة مع أفراد الأسرة والتحدث عن رمضان وفضله وأحكامه .
5- تجهيز المنزل بما يتطلبه من مأكولات مشروبات بشرط عدم الإسراف .
6- اتخاذ قرار مجمع عليه تجاه وسائل الإعلام وما تبثه في رمضان .
7- تنسيق وتوزيع الأدوار بين أهل البيت في الخدمة حتى تجد المرأة حظها في برامج العبادة .
8- تنسيق برامج الزيارات والاستضافات الرمضانية مع الأهل والجيران والأصدقاء .
9- إعداد برنامج للعمرة والاعتكاف لجميع أعضاء الأسرة .
10- المشاركة في إعداد الطبق اليومي ولو كان شيئاً يسيراً يهدى لوجبة تفطير الصائمين في المسجد.
11- مسابقة في حفظ أحاديث كتاب الصيام مثل كتاب بلوغ المرام أو رياض الصالحين .

ج / المسجد :-
1- أن يتهيأ الإمام في المواظبة بالقيام بجميع الفروض في مسجده طيلة أيام الشهر .
2- إعداد إنارة المسجد وتنظيم أثاثه ، والعناية بالإذاعة والصوتيات .
3- الاهتمام بدورات المياة والقيام على تجهيزها وتنظيفها .
4- العمل على حث جماعة المسجد في جمع تبرعات للمسجد وما يحتاجه من الماء والمناديل الورقية والطيب .
5- استضافة بعض العلماء وطلبة العلم في المسجد لإلقاء الكلمات والمواعظ قبل رمضان وأثناءه .
6- اختيار الإمام للكتاب المناسب وقراءته على جماعة المسجد بعد إحدى الصلوات .
7- إعداد المسابقات اليومية والأسبوعية لجماعة المسجد .
8- تخصيص لجنة تقوم بإعداد وجبة إفطار الصائم والإشراف عليها .
9- توزيع الأشرطة على أهل الحي .
10- إعداد برامج للجاليات من مطويات وأشرطة .
11- تخصيص ليلتين أو ثلاث من الشهر يجتمع فيها جماعة المسجد لإفطار جماعي يأتي كل واحد منهم باليسير من زاده ويجتمعون عليه في المسجد تحت إشراف الإمام وتنسيقه .
12- إعداد برنامج ترفيهي لشباب الحي .
13- الحرص على أن يختم الإمام ولو ختمة واحدة في صلاة التراويح .
14- إقامة دورية للحي .
15- الحرص على أن تقدم برامج تكون بدائل ومزاحمات إعلامية .
16- إعداد برنامج لجمع الزكاة وتوزيعها على فقراء الحي .
17- إعداد برنامج لعيد رمضان مثل اجتماع الجيران بعد صلاة العيد في المسجد .

وبالله التوفيق , وصلى الله على سيدنا محمد وعلى آله وصحبه وسلم

المصدر

sherif gharib said...

كل واحد بياخد الشهر ده على مزاجه
زى ما فيه مصطلحات مصاحبه ليه
زى الشعبنه
و هيه قضاء اخر يوم فى شعبان
بكل الذنوب اللى ممكن تتعمل
رحم الله هذه الامه

abderrahman said...

..مين يسمع
العحيب الواحد مثلا ممكن يقول ان الكسل ده سببه قلة الأكل
لكن الشهر ده هو أكتر شهر الناس بتاكل فيه
(شوفي المفارقة)
**
هي حجج وتلاكيك.. عشان عدم الشغل .
:)

Anonymous said...

كل رمضان و إنتي بخير يا ألذ كلبوزة :)

arabic man said...

كل سنة وإنتم بخير ورمضان كريم
بوست رائع ومميز فعلا

Mamdouh Dorrah said...

كل سنة و انتي طيبه يا كلابيزووووووو

اروي الطويل said...

هاهاهاهاها جميل اوى اوى اوى

Anonymous said...

العبرة مش بالكلام لكن بالعمل

Anonymous said...

كل عام و انت بخير يا كلبوزة و يا رب رمضان السنة دى نقضيه كلنا عبادة و صوم و قيام ليل و فى ذلك اتباع لكلام رسولنا الكريم اللهم صلى و سلم عليه :


من قام رمضان إيمانا واحتسابا غفر له
ما تقدم من ذنبه}. متفق عليه

مجدى سرحان said...

كل سنه وانتى طيبه يا كلبوزه

Anonymous said...

كل سنة وانتي طيبة
فعلا عندك حق في ناس كتير فاكرة ان رمضان ده شهر الاكل وبيضيعوا العشرة الاواخر ال فيهم ليلة القدر في عمل الكحك والبسكوت والاستعداد للعيد على الرغم ان العيد ده جايزة ربنا للناس ال صاموا واقاموا الليل في رمضان مش جايزة الناس ال كلت واتفرجت على المسلسلات

... said...

كل سنة وانت طيبة يا جميلة
جبتى المثل دة منين انا كنت فاكره تراث عائلى
:)
رمضان كريم

Anonymous said...

انا عارف الكلام ده وسمعته زيك من ستى برضه او مش من ستى بالظبط لانى ستى ماتت من زمان انا سمعتو من ناس كتير زى امى وخالتى ام اشرف وخالتى ام احمد وخالتى ام عصام يعنى بس اعرف كمان ان رمضان اوله رحمه واوسطه مغفره واخره عتق من النار اللهم ارضى عنا وعن من سبقونا فى الاسلام اليك وصلى اللهم عن اشرف الخلق وسيدهم محمد ابن عبد الله وفرصه سعيده وكل سنه وانتى طيبه

Anonymous said...

كلبوزة

كل عام وانت طيبة وبصحة وسعادة وراحة بال

شكرآ غاليتى لمرورك الطيب ، لكن أرجو مداومة الإتصال على مدونتى المتواضعة ( ضعف أنثى )
http://emyemyemy.jeeran.com

elkamhawi said...

ربنا يفتح عليكىبس على فكرة النوم لحد العصر او المغرب مش وحش قوى