Wednesday, May 09, 2007

مسلسل زنوبة الأروبة


الحلقة الأولى
البت زينب شغالة بريمو،صحيح هي مقرودة و شكلها ميديش سنها بس لهلوبة في شغل البيت، و كل سكان العمارةبيجروا وراها علشان تقبل تنضف لهم شققهم.0
زنوبة عندها سبع عشرة سنة، سمراء زي معظم بنات اسيوط ،شعرها مكتكت بس هيا بتفرده كل فترة بالبوطاس و الجاز علشان يبقى سايح و نايح على وشها من تحت لفه الايشارب او المنديل زي ما بتحب تسميه.0
عنيها ضيقة بس بتشوف بيهم كل صغيرة و كبيرة في البيوت ،و ابتسامتها العريضة اللي بتبين كل اسنانها و اغلب ضروسها بتديلك انطباع انها ساذجة و طيبة و يمكن هابلة ،على عكس ما الأيام بتثبتلك.0

و زي حلم كل البنات، بتحلم زنوبة انها تتجوز، بس طموحتها معدية شريحة المكوجية و البقالين و البوابين و نفسها تقب بقى على وش الدنيا و تتستت و تبقى هانم زي اللي بتشتغل عندهم و احسن
و نفسها تتجوز واد متعلم ،معاه دبلون مثلا او معهد ،و لا حتى يكون عسكري(إمن) اهي شغلانة ميري و السلام، علشان تتفشخر بيه في وسط صحباتها البوابات و الشغالات و تقول: الافندي بتاعي شغال كذا

و الايام علمتها ان اللي معاه قرش يسوى قرش و المراية عرفتها انها مش حلوة قوي يعني و ان كل محاولات التبيض و السنفرة مجبتش غير نتائج عكسية و ان لازم تعتمد على حاجة تانية في (توقيع)عريس في دباديبها

و اكتشفت ان (الصيغة) هي السلاح الذي لا يقاوم من اي شاب و هي اللي بتوقع الواد من دول على بوزه
فكانت بتحول فلوسها و مدخراتها اول كل شهر لمصاغ و تملى الطشت مية سخنة و تجيب الحجر و سلك المواعين و فرشاة البلاط و تدخل خمس.. ست ساعات الحمام تشيل ما خلفه غبار الشهر على سحنتها
و تطلع من الحمام مخلوق فضائي جديد بعد ما تكون قضت على بروة الصابون -اللي لطشتها من مدام السيسي اللي في الدور الخامس- و هدرت لتر الجاز- اللي اشترته من عم عبده بتاع الجاااااز- في القضاء على اخر فلول الجيش المعسكر في شعرها من جحافل القمل و الصبان

و تلبس الحتة الدهب الجديدة و تضرب الفستان الستان البمبى المسخسخ ابو تقويرة على الصدر و الصندل الازرق ابو كعب اجلاسيه و تتقمط بالمنديل الاصفر ابو ترتر و طبعا مبتنساش ترش معطر جو-اللي علقته من عند ام احمد اللي في الدور السابع- على هدومها و تقرص في خدودها يمكن الدم يتكسف و يظهر حماره-بفتح الحاء-0

و بعد ما تخلص المشروع ده من فحت و صب و انشاء و ترميم تطلع تتمشى في الشارع و تعدي على كل (بيوت المنطشقة) تشخلل بالغوايش يمكن حد من الشوبان يشوف او يسمع او يشم ان في بنت معدية


الى اللقاء في الحلقة القادمة

سمباتيك

29 comments:

hapasa said...

بصراحة مش عارف أقول ايه
بس جميلة جدا ومجهود رائع
من ناحية القصة والموضوع والترابط
ده طبعا غير خفة الدم
تحياتى ليكى

Amr Ahmed said...

في انتظار
الباقي

تحياتي

قاسم أفندي said...

في واحدة نعرفها من غير ما نذكر اسماء كان نفسها تبقي زنوبة برضه... أيوة بالظبط كده خدامة
:)
يعني في ناس كتير بتحسدهم

حلو برضه
أما نشوف أخرتها
تحياتي

BaTresYa said...

تيب وبعدين حصل ايه يا كلبوزة كملي :(
الواد عطوه ادها مطوه ولا ايه ؟؟
تيب هستناكي الحلقه الجيه من نفس الميعاد :ي

IRC President said...

جميلة قوي :)

كراكيب عادل said...

لعلمك البنت دي هتطلع حكاية في الاخر

اما نشوف باقي الحدوتة

طيب كنتي دلقتيها مرة وحدة وخلاص

لسه هنستني تاني

وادي قعدة

عايز عصير قصب لو سمحتي

:( :)

شادي فايد said...

كويس اني لحقت من اول حلقة
يا معين
ربنا يسهل
شكله مش حيبقى ممل

:)
:)

مصراوي أوي said...

شكلك سيناريست محترفة

جميلة جدا وعيشتينا الجو بتاع مقدمة القصة وف انتظار باقي الحلقات

A.SAMIR said...

زنوبة دي كائنة فضائية ولا ايه؟
بس ان جيتي للحق انا متخيلها قدامي من خلال نماذج بشوفها في الشارع
كملي كملي اما نشوف ست زنوبة هانم هتوقع مين في شباكها
تحياتي واحتراماتي

صاحب البوابــة said...

بداية موفقة

انتظر القادم بشغف

تحياتي

رينـــــــــــا said...

مش دى زنوبه بتاعت فيلم صباح وفريد!!!

زنوبه زنوبه حلوة وطعمه !!
:P:P
لا بدايه جامدة واسلوبك رائع بجد
مستنيه الباقى

Mohamed A. Ghaffar said...

بدايع موفقه اتمنى ان تكون باق الأجزاء بنفس الرشاقه والتشويق ، واظنها ستكون كذلك

تنويه بسيط :بنات ورجال اسيوط ليس اغلبهم سمر

مصر هى أمى said...

سمباتيك

ايه الوصف التفصيلى اللى حضرتك حكاياه شكلك كنتى معاشرة زنوبة ديه
اعترفى عارفاها ولا لا

اكتر حاجة عجبتنى اما قولتى انها لاطشة الصابون من الجارة اللى فوق

فعلا هما بيعملوا كده

يا مراكبي said...

ده إيه المفاجآت الجميلة دي .. مسلسل مرة واحدة؟ والله ولعبت معاكي وهنشوفك عالفضائيات في رمضان وإم بس سي ثري وحاجات كده

إبقي إفتكرينا بس ساعتها

وبعدين أروبة بالألف مش قروبة بالقاف .. إنتي مؤلفة مسلسلات دلوقت ولازم تأخدي بالك من النقاد

بناسبة العريس اللي زنوبة عايزاه يبقى معاه دبلون ده .. هي الصيغةِ اللي عندها كتيرة قوي يعني؟

سجدة said...

تفاصيل ممتازة وواضح القصة معبرة كملى
علشان نستمتع بالقصة اكتر

امام الجيل said...

تجربة قصصية رائعة وكم من زينب بيننا
بس مش عارف هو صحيح البنات بيعملوا كده فى نفسهم عشان الجواز ولا موضة زى ما بيقولوا نفسى اعرف الحقيقة اصل الموضوع بقى صعب جدا والحالة بقت صعبة جدا

حاول تفتكرنى said...

مع أن المسلسلات ترهقنى لعدم قدرتي على تتبعها

لكنها هنا بطعم أخر
تجبرنا على أحترام مواعيدها

خاصة أن المؤلفة قريبة جدا منا

تحياتي

The Groom said...


اسلوبك ظريف

لكن

فيه ريحة تريقة او استخفاف او سخرية منها و من اسلوبها

للأسف يا سمبتيك

حتى لو مكنتيش تقصدي و انا متأكد من كده لكن البوست كلامه خانك

:(

تحياتي لك من ماناساس البلد

عدى النهار said...

إمتى يختفى من حياتنا الجهل والمرض و الفقر إلي عمل زنوبة و بلية وكتير غيرهم! أنا شايفها صورة مأساوية أكثر منها كومدية

شريف said...

هههههههههههههه
روعة روعة روعة

جميلة والله سمبتيك

اية الجمال دة

دواكيد الحلقة التانية بردة هتبقى حلوة

وشكرين مجهودة ولكى تحياتى

عــلا said...

متابعون و منتظرون :)

أحمــــــــدبــــــــــلال said...

و بعدين ؟

REEMOO said...

مستنيه المزيد يا سمباتيك
واضح انها هتبقى جميله
تحياتى

صفصف لادي said...

ha wi ba3deen?????

BackBone said...

لذيذه ياخاتشي

كلنا اذان صاغيه

بس علي فكره اعتقد انك كنت تقصدي بضم الميم مش بفتح الحاء

Sampateek said...

الى كل قرائي الافاضل
ازيكم
عاملين اية؟
انا اصلي زهقت من التدوين و حبيت اعمل حاجة جديدة
انا زيكم بالظبط مش عارفة زوبة حتوصل لفين او اية نهاية قصتها بس بكتب معاكم احداثها

صحيح الاسلوب ساخر و ده مقصود
و صحيح في لكنة تهكم يمكن مش مقصودة بس لازعة

مش بنقد اوضاع بقدر ما بصور حالة موجودة بكل سلبياتها و ايجابيتها
اكيد كل حد فينا عدت في حياته زنوبة زي دي
سواء اتغير الاسم او الشكل او المستوى الاجتماعي
بس اكيد موجودة

تحياتي لمتابعتكم و اتمنى اسعدكم و تقضوا معايا وقت لطيف

سمباتيك

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام