Friday, May 11, 2007

الحلقة الثانية


حامد فانتوم- صبي مكوجي- اشتهر بالاسم ده بعد ما وقع من بلاكونة الدور التاني و هو عنده سبع سنين و نزل حي من غير اي كسر! ماعدا شوية كدمات بسيطة.0
فانتوم عنده 21 سنة و ساقط اعدادية و كسيب بس فلوسه كلها ضايعة على قاعدة القهوة و السجاير ،و حاسس انه عمره ما حيعرف يحوش طول ما امه (ام حامد) وراه و منفضه جيوبه اول باول
و طبعا حامد كاي شاب نفسه يتجوز و يستقر و تبقى في حياته حته طرية تهون العيشة الناشفة اللي عايشها، و كان دايما يشوف زوبة كل اما تجيب له المكوي بتاعة السكان اللي بتشتغل عندهم او لما يروح يوصل المكوى لاصحابها كانت تفتح له باب الشقة بابتسامتها الواسعة،و طبعا مبتنساش تشخلل بالغوايش و هي بتاخد منه القمصان من باب اللي ما يشتري يتفرج

ام حامد (الست بديعة) ست قوية و مفترية و تلعب بالبيضة و الحجر، تعرف زوبة بحكم الجيرة و تسمع عنها انها كسيبة و يوميتها بتقف بخمسين جنيه ده غير اللي بتلهفه من السكان اشي لبس و اشي شنط ده غير اللي بتدكنه من وراهم.

نطت في دماغها فكرة انها تجوز ابنها لزوبة ( زنوبة) و اهي تضرب عصفورين بحجر اولا تجوز ابنها و تفرح بيه من عروسة دفيانه و مقرشة و متصيغة و ثانيا تجيب لها شغالة لهلوبة تنضف لها البيت.0

صحيح حامد مكنش موافق في الأول اكمن زوبة يعني مش حلوة و مش البنت اللي بيتمناها بس مع زن امه على ودانه و كبشة من الامثال اللي تيجي على الجرح من عينة( على اد لحافك مد رجليك) ، رضخ حامد للأمر الواقع و ضرب الجيل التمام في شعره و راح يخش من الباب ،اقصد يعني يقابل عم سيد
عم سيد ده جوز ام زوبة اللي اتجوزها بعد وفاة ابو زوبة و هي لسة حتة لحمة حمرا و وافق يربيها رغم انه بياع سريح على اد حاله ،و الراجل مقصرش خالص أول ما زوبة شبت و عرفت تقف على رجليها نزلها الشغل علشان تجيب لقمتها و كسوتها -ما علينا- قابل حامد عم سيد و طلب منه ايد زوبة بعد ما عصر على نفسه لمونة


في الاول زوبة فرحت اكمن جالها عريس، بس لما فاقت من الفرحة اكتشفت ان حامد مش هو فتى احلامها المتعلم صاحب الوظيفة الميري، بس مع ضغط جوز امها و امها عليها وافقت و هو ضل راجل و لا ضل حيطة و و خافت لتكون اللي بيقولوا عليها خطبوها اتعززت و سابوها اتندمت واتفقوا يشتروا دبل بس دلوقت و بعدين يعملوا كتب الكتاب و الشبكة و كان الاتفاق يتجوزوا مع امه في الاوضتين و الصالة بعد ما يفصلوا اوضة نوم بالقسط


و يوم ما راحوا يشتروا الشبكة اصرت ام حامد ان الدبل تبقى عيار تمنتاشر و من النوع الرفيع جدا زي ما تقولوا عايزة تخطب لابنها باقل الخسائر او التكاليف و لما زوبة اعترضت قالتلها

ارضي بقليلك يا اختي ، انت عارفة الفلوس دي جت ازاي!-مصمصة شفايف-حكم...بصوت منخفض رضينا بالهم و الهم مش راضي بينا

و دي كانت اول صدمة لزوبة،انها حاسة انها مش مرغوبة من ناحية حماتها و انها موافقة لاسباب تانية في الغالب الطمع اولها

عملوا حفلة على الضيق فوق السطح ،قراية فاتحة و دبل، و قعدوا ساعتين يتناقشوا مين حيدفع تمن الساقع اللي شربوه المعازيم

مش كان الشربات كفاية

هييييه

الى اللقاء في الحلقة القادمة


سمباتيك

28 comments:

The Groom said...


لعن الله الفقر

صحيح فتنة أمتنا في المال وصدق الرسول الكريم صلى الله عليه وسلم

الجزأ ده عجبني رغم قصره

تحياتي لك من ماناساس البلد

IRC President said...

الباااااااااااااااااقي يا ريت

Amr Ahmed said...

في انتظار الباقي

REEMOO said...

سمباتيك
يلا كده الجزء صغير اوى والتشويق للباقى بيزيد
انا مشتنيه الباقى
بلاش شغل المسلسلات ده انا بحب اتفرج على الفيلم مره واحده
القصه حلوه جدا
تحياتى

reri said...

القصه جميله وشدتني جدا ... في إنتظار الباقي .. البت زوبه هتعمل إيه

سلامااااااااااااات

رينـــــــــــا said...

يا مســـــــــــهل

Ahmed Shokeir said...

مش عارف ياكلبوزة جايبة الاسلوب السهل والتفاصيل الدقيقة دي وقادرة تغزليها بالشكل الجميل ده .. التعليق ده على البوست ده وعلى الحلقة الاولى كمان اللي اكتر من رائعة
الغريب انك عرفتي دواخل هذا العالم المهمش إزاي كده

Esmeralda said...

ايه يا كلابيزوه يا جامده ده

يا بنتى البلوج كله بقى ريحته جاز

مش كدشه

Ma-3lina said...

الجزئين جامدين ما شاء الله

و مستنين بقية الاجزااء

BaTresYa said...

وبعدين طيب ..بس ملهاش حق زنوبة ..وبعدين ماله عيار 18 مش دا الدهب الإيطالي برده والله بيكون جميل ..ولايق مع لون بشرتها
مستنين الاجزاء القادمة

نقطة مية said...

جميلة جدا القصة و مستنية باقيتها
تحياتي

Rivendell** said...

مستنيين الباقي على نار

سكينة said...

باين كده زوبة وأخواتها عاملين عمايلهم معاك حفظاهم صم
كان الله في عونهم وعونا
بس أوعي تعملها فيك وفينا تقولك اروح البلد يومين ومترجعش أو تغيب شهر من غير ما نعرف باقي الحدوتة

None said...

لا لا لا
الموضوع شكله كبير

في انتظار بقي الحلقات

DR.SHERBO said...

اولا هل القصة دي حقيقية
لانها حلوة في طريقة العرض حتى لو كانت حقيقية

اما لو كانت تأليف فيالا شدي حيلك و اعمللنا رواية اجيال على مدار يا دوب العشرين سنة الجايين

Mohamed A. Ghaffar said...

اكيد القصه دى هتنتهى بجريمة قتل

bastokka طهقانة said...

ممكن تسأليلي زوبة مش فاضية يوم السبت و الاربع؟ لحسن اوشين واخدة اجازة و اختك فيري كونفيوزد
اوروفوار

يا مراكبي said...

الساقع على زوبة طبعا .. هي دي الأصول .. الخطوبة بتبقى على حساب أهل العروسة .. مش كده برضة؟

أنا ليا في مكسب القصة دي لأني أنا اللي قلت لك على أروبة بالألف .. ماشي؟

Sampateek said...

اعزائي
سعيدة بمتابعتكم و اتمنى تعجبكم و تستمتعوا بيها

القصة من وحي الخيال بس مش خيالية
في نماذج زي زنوبة و اصعب

ربنا يصلح حال الجميع

تحياتي

عدى النهار said...

أسلوبك سهل ومُسلى... وربنا يصلح حال الجميع زى ماقلتى

واحد من الناس said...

ها و بعدين

شكلها قصه حلوه

وياريت تخلي عنيكي على البوست بتاعي بتاع الجواز لو لسه فاكراه وتحاولى تظهري معناه داخل القصه

وتحياتي

sherehan84 said...

عايزه الباقي لو سمحتي :)))

امام الجيل said...

ايه ده حد يتجوز بالطريقة دى جوازة ايه دى بس هو الواحد هيتجوز فى حياته كام مرة هما اربعة بس

nirfana said...

كملى

متابعين

che husam said...

أنا قلت أدخل أمسى
مساء الخير يا أستاذه سمباتيك
جميل الشغل ده
تحياتى

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام