Monday, May 14, 2007

الحلقة الرابعة و الخامسة- الأخيرة

الحلقة الرابعة



انتظمت زوبة في دروس (نحو الامية) - زي ما كانت بتسميها- و كانت كل يوم بعد العصر تتشطف و تلبس و تاخد الكراسة و القلم و الاستيكة و تطلع على المركز تاخد دروس محو الامية و تمشي في الشارع و هي كلها سعادة و ايباء و كانها رايحة تجيب الديب من ديله.0
و طبعا الموضوع مكنش سهل ابدا، عملية اتقانها لمسك القلم كانت عملية صعبة جدا و تعبت معاها المُدرسة لدرجة انها كانت حتعتزل التدريس و تبيع ترمس
ابلة (عفاف ماشي) مدرسة محو الامية في المركز؛ ست كبيرة سافر اولادها بعد ما اتخرجوا و اتجوزوا، و هي بتسلي وقت فراغها في تعليم كبار السن و اللي فاتهم قطار التعليم، و اشتهرت بالاسم ده لانها بتقول كلمة ماشي خمستلاف مرة في الدقيقة و نظرا لكبر سنها و وقوع معظم سنانها فكانت الشين بتطلّع معاها كل العلم اللي في بقها
و كان الطلبة بيتخانقوا على مين اللي يقعد ورا علشان ميطلهوش علم ابلة (عفاف ماشي )و يبل وشه و دفاتره

و في مرة جت زوبة متاخرة لقت كل الدكك اللي روا مليانة ،و اضطرت تقعد قدام في اول دكة مواجه (لدش) ابلة عفاف ماشي و استوعبت الدرس حرف حرف و كلمة كلمة و روحت مبلولة!0
كانت زنوبة طالبة مجتهده بتسهر تعمل الواجب و هي بتتعشى و كل يوم تودي الدفتر لابله (عفاف ماشى) و هو عليه زيت البطاطس المقلية و الطعمية و البتنجان و ساعات قطرات من الفول بالزيت و الليمون.0
و كانت ابلة عفاف بتعاقبها بانها تقعدها في اول دكة علشان تاخد الدش اقصد الدرس.0


لكن بعد سنة من المواظبة على دروس محو الامية اكتشفت زنوبة ان العلم ده بحوره واسعة و انها مش بتعرف تعوم كويس و اكتفت بانها اخدت شهادة من المركز بانها بتعرف تفك الخط و تكتب اسمها، و بدا الامل في انها تحقق ذاتها ينطفي و يذبل لحد ما حصل اللي حصل.0

في يوم و هي عند الست سوزان اللي في الدور السادس بتنظف لها الشقة كالعادة، لقت بنتها دنيا بتقولها
دنيا : يا مامي الخياطة مصرة تاخد تلتميت جنيه في الفستان و بالعافية رضيت تاخد متين و تمانين
طرطقت زوبة ودانها مستغربة و سمعت مدام سوزان بتقول
سوزان: شوفي خياطة تانية دي سفاحة
ردت نادين: دي ارخص واحدة في الحي الباقين مش بيرضوا باقل من خمسميت جنية
الفضول قطع صمت زوبة و خلاها تدخّل في الحوار
زوبة: ليه يا ابلة هو القماش غالي قوي كده؟!0
نادين: قماش اية يا زوبة ، انا اللي اشتريت القماش، دي الخياطة حتفصّل بس، بس علشان فستان خطوبة فمبيقلش تفصيله عن المبلغ ده.0

قفلت زوبة ودانها عن سماع باقي الحوار ، بعد ما سمعت الجملتين دول و سرحت مع نفسها: بقى يعني انا لو اتعلمت التفصيل، ابقى خياطة متسيطة و اشتهر و افصل الفستان بخمسميت جنية ؟!يا حلاوة يا ولاد

و بعد ما خلصت الشغل اخدت الدش التمام- ده غير دش ابلة عفاف- و طلعت على المركز، قدمت في فصول تعليم الخياطة و هي بتقدم طلبت من البنت اللي بتستقبل المتقدمين
زوبة: يا ابلة.. ممكن تقدميلي في فصول تعليم خياطة فساتين الخطوبة؟!0
البنت: مفيش نقاوة ..لازم تتعلمي تفصيل كل حاجة
زنوبة: و ده ياخد اد اية؟
البنت: انت و نباهتك
زنوبة في سرها.. اذا كنت اخدت سنة علشان اعرف اكتب اسمي يبقى حتعلم الخياطة في عشر سنين ..يلا مش اشكال
البنت: بتعرفي تفكي الخط و تكتبي اسمك؟
زنوبة بمنتهى الايباء و الشمم: طبعا

و بكده التحقت زنوبة بفصول الخياطة و رجعت تواظب تاني على الذهاب للمركز كل يوم العصر علشان تبقى خياطة شاطرة و يبقى لها وظيفة محترمة بدل خدمة البيوت
الحلقة القادمة تتبع نظرا لاقبال الجماهير

************************************

الحلقة الخامسة


و بعكس صعوبة تعليم الكتابة و القراية كان تعليم الخياطة سهل بالنسبة لزوبة و حست انها اتولدت علشان تكون خياطة و اتقدمت في فترة قصيرة ما احنا عارفين ان زنوبة أروبة
و الاهم انها كان عندها هدف و نفسها توصله و ده كان رافع معنوياتها جدا و مديلها دفعة و حافز للتقدم و الصبر و المواصلة صحيح ان الابلة اللي بتعلمهم الخياطة دقيقة قوي و بتخليها تفك الاسورة عشرين مرة لحد ما تتقن تشطيبها و تركيبها بس هي كانت مبسوطة علشان زي ما كانت -نص حياتها- شغالة بريمو كانت عايزة كمان تبقى خياطة بريمو

و بعد تلات سنين من الفك و التركيب و القص و الخياطة و الصبر قدرت زنوبة انها تفصل اول فستان محترم تشطيبه ممتاز و حست وقتها انها اتولدت من جديد، و اثناء الوقت ده كان بيتقدم لها عرسان كتير بس هي كانت بترفضهم كلهم لشكها انهم طمعانين فيها و في فلوسها و دهبها و كانت بتبعد فكرة الجواز دي عن دماغها و مش شايفة غير انها عايزة تبقى (حاجة).0

و كان اول الشهر ..و اخدت زنوبة الحماية التمام اللي بفرشة البلاط و سلك المواعين و لبست الفستان اللي مفصلاه و لبست دهبها و خرجت تتمشى في الشارع و كل اللي يقابلها يسالها :اية الشياكة دي يا زوبة ؟
ترفع راسها و تقول بصوت مسموع: عمايل ايدي وحياة سيدي!0

سابت زوبة شغلانة الخدامة واشتغلت في مشغل تفصيل سنتين ، و اترقت فيه من عاملة.. لاسطى لحد ما بقت مقصدار يعني المسئولة عن قص القماش.0

و في نفس الوقت كانت بتفصل للجيران لحسابها، و قدرت على مدار خمس سنين انها تعمل زباين و تتعرف بالاسم ، و بمساعدة زبونة كريمة عندها اجرّت شقة صغيرة و فتحت مشغل باسمها ، حقق نجاح كبير لان معارفها كتير من ايام ما كانت بتخدم في البيوت.0

فصلت زنوبة عشرات من فساتين الخطوبة و الافراح و كانت كل مرة تفصل فستان تحطه عليها و تبص في المراية و تقول: يا حلاوتك يا بت يا زوبة في الفستان ده ، بس لو كنتي لقيتي ابن الحلال اللي مش طمعان فيكي؟!! -بتنهيده- حكَم

و النهاردة زنوبة الأروبة خياطة مشهورة و سابت خدمة البيوت و حققت نجاح و فلوس لكن فضلت في حياتها امنية متعلقة ،كانت دايما بتتمنى تحققها بس خايفة تقدم على خطوة و ترجع تندم عليها و طبعا هي امنية الجواز من واحد متعلم بيشتغل وظيفة محترمة تتفشخر بيه في وسط صاحباتها
و لانها مش واثقة في نفسها و عارفة انها مش حلوة و ان محدش حيبصلها علشان ذاتها؛ كان هاجس العريس الطمعان فيها مسيطر عليها ومكنتش بتشوف في عنين اي حد من اللي بيتقدموا لها ؛غير عنين (حامد فانتم) و امه اللي كانوا عايزين ينهبوها .

اول صدمة في حياة الانسان ممكن تغير حياته و تسيطر على الباقى منها. ممكن بالسلب و ممكن بالايجاب بس على كل حال الانسان عمره ما بينسى الم اتعرضله، أو تجربة مرة عدت عليه ، و على راي المثل
(اللي يتلسع من الشوربة ينفخ في الزبادي)
:)

تمت
مع تحياتي
سمباتيك

65 comments:

شادي فايد said...

يا خبر دا انا فاتني حلقتنين


اروح اقراهم وارجع
:)

شادي فايد said...

:)

هو ليه العريس متجوزش العروسة
وعاشو في تبات ونبات وخلفو صبيان وبنات
؟؟

زنوبة دي عندها مشكلتين
انها شايفة نفسها وحشة
وانها عايزة تتجوز واحد يخرجها من مشاكلها وبس

المفروض
تدور ع الانسان
:)

REEMOO said...

حلوه أوى يا سمباتيك
بس انا شايفه ان زوبه بالغت فى خوفها من العريس الطماع
وده خلى العمر مره بيها
اه حققت هدف وشهره وقدرت تغير وضعها من خدامه لخياطه بس برده فشلت فى حياتها الشخصيه
وفضلت ترفض لغايه ما سنها كبر
ساعات ممكن التخلى عن بعض الاشياءالصغيره فى مقابل تحقيق هدف اكبر

بعيد عن كده القصه حلوه فعلا
تنفع تتعمل فيلم أو مسلسل
تحياتى ومحبتى

خمسة فضفضة said...

السلام عليكم ورحمة الله وبركاته


لا بصراحه روووووووعه

والمعاني اللي ورا الكلام كمان جميله


بجد تستاهلي نصفيق حاااااااااااااااد


تحياتي

i`m just depressed said...

ازيك يا سمبتيك
والله وحشتينى خالص خالص
عارفه انى وحشه و بقالى كتير ما بشقش عليكى
بس جبتلك معايا شوكولاته عشان اصالحك
ايه المسلسل الرائع ده
بجد بجد تحفه و شخصيه زنوبه نفسها حلوه قوى قوى
شخصيه قويه جدا هيه مش موجوده كتير فى حياتنا
قصدى الناس الى بتغير مسار حياتها
و بتدى لحياتها شكل جديد كل فتره و تتطور
بس يا ريت كلنا نتعلم من زنوبه
صحيح فى حلم واحد فى حياتها ما اتخققش
بس بداله حققت احلام كتير
و يمكن فى يوم ربنا يفتح عليها و تسمع من حد من زباينها عن الميك اوفر
و تروح تعمل عمليه تبقى بعدها فشر هيفاء و تستعيد ثقتها بنفسها
و تلاقى حد مش طمعان فيها
بس بجد بجد قصه حلوه جدا

The Groom said...


الاصرار

يأتي من العزيمة

والعزيمة

تتولد من الهدف

والهدف

يأتي من التفكير في التغيير

والتفكير

يأتي من عدم الرضا بالحال

وعدم الرضا بالحال

يأتي بفوقان في الدماغ

والفوقان يأتي من صدمة

والصدمة تأتي من موقف

والموقف يأتي من الاحتكاك

والاحتكاك يأتي من كوننا بشر

وكوننا بشر يأتي من خلق الله سبحانه و تعالى

انتهى ملخصا

أي كلام

بس قصة وهمية ما شاء الله يا سمبتيك

حاولي تنشريها الأعمال الأدبية القصيرة وخصوصا دي تستحق

لي الفخر أني من قرائك

جزاك الله خيرا

تحياتي لك من ماناساس البلد

IRC President said...

ايوة أنا مع ذا جرووم، قصة فعلا وهمية :D

david santos said...

Blogues puts all the MADELEINE photo in yours, a girl of 4 years of age that was abducted in day 4 in the Beach of the Light, in the Algarve, Portugal. They send the image of MADELEINE to all blogues of Morocco, Tunisia and Argel, thanks a lot

اسكندراني في الغربة said...

حظي وحش اني جيت متأخر و شوفت القصة كلها مرة واحدة
بس فية سؤال يعني اية طموح ؟
و زنوبة دي عايشة في مصر؟
مش تخليكي واقعية شوية

IRC President said...

الكابتن دافيد سانتوس إيه نظامه؟ حد يعرفه؟

عمل كومنت عندي برده

يا مراكبي said...

ياخسارة .. كان نفسي قوي أتصور مع العريس والعروسة .. كده خليتي البنت تعنس؟

بس فيها فكرة برضه يا سمباتيك .. ده أنا أعرف بنات معاهم مؤهلات عليا بيحصلهم كده برضة .. هي الدنيا كده

برافو عليكي وعقبال المسلسل اللي جاي

عدى النهار said...

زوبة حققت شىء مش قليل فى حياتها... المهم إنها تدرك ذلك. على فكرة فى أحيان المشاهدات اللي بتمر على الإنسان وإن كانت متعلقة بغيره بتأثر فى مسار حياته بالسلب والإيجاب أيضاً.

قصة جميلة محبوكة و مافيش فيها لت وعجن :)
برافوااااا

سجدة said...

ويبقى إن مهما حققت المرأة او الرجل من نجاح وشهرة ومال
فالأخر هما يحتاجون بشدة لبعض وتغلبهم الفطرة والحنين
لكن لا ننكر إن ليس بالزواج وحده تكون قيمة الإنسان وقيمة أهدافه
ولكن هذه القيم المادية
أما القيم الروحية والمشاعر فطبعا هذا شأن أخر

fad-fadat nour said...

حكاية جميلة اوي و احسن ما فيها ان زنوبة طلعت فعلا اروبةو عرفت تتعلم حاجة تنفعها
بدل ما تقعد تحط ايدهاعلي
خدها و تستني

اسلوب السرد رائع .. يجذب القاريء من اول حرف حتي اخر نقطة

القصة و الشخصيات واقعية و النهاية موفقة جدا


في انتظار المزيد
تحياتي

ana ga3an said...

العبر المستفادة:
حاسبي علي الصابون بتاعك من تقليب الشغالين
الحجرة و سلك المواعين يجعل كوعك و قفاكي اكثر بياضا
متقربيش من البوتجاز و انتي حاطة جاز في شعرك
لازم تتفقو قبل الجواز الكوكاكولا علي مين
ولو تعرفي واحدة اسمها سحر استشيريها في اي حاجة
واخيرا و ليس اخرا
حوشي فلوس و اعملي عملية تنفيخ وخليكي زي الست هيفا
وامناء الشرطة هيبقو كدة علي بابك



ودي اخرة اللي بتزوغ من المدرسة ومبتغسلش كوعها قبل ما تنام


مسخررررررررررة يا كلبوظة حقيقي مسخرة

صاحب البوابــة said...

ارفع القبعة تحية لأفكارك التي تقبع وراء كلماتك

تحياتي أختاة

bastokka طهقانة said...

شغالة ..خياطة كله كويس اهو احسن من البكالوريوس و السلام

اوروفوار

BackBone said...

فكرة القصه جامده قوي ياخاتشي

و مع بعض الفروق اعتقد ان كل البنات اللي متجوزوش لغاية لما عدي عليهم القطر كانت كده

المهم انا شايف ان فكرة العريس المثالي او العروسه المثاليه دي افكار مثاليه

و مفيش حاجه مثاليه ابدا


الواحد ديما و بالذات في الجواز يتكل علي الله و يحاول يختار احسن الاختيارات المتاحه و بعد كده بقه يرضي بنصيبه


{قُل لَّن يُصِيبَنَا إِلاَّ مَا كَتَبَ اللّهُ لَنَا هُوَ مَوْلاَنَا وَعَلَى اللّهِ فَلْيَتَوَكَّلِ الْمُؤْمِنُونَ } (51) سورة التوبة


و الجواز علينــــــــــا حق

الديب said...

جميلة مووووز

ما شاء الله .. اسلوبك جميل فعلا

سمسم said...

ينهار مدوحس
طب سيدتك معملتيش إعلانات ليه في المدونات ان في مسلسل رهيييييييييب هيتعرض عندك
الله يسمحك فاتتني الحلقات طازة
علي العموم مسلسل جميل وترابط احداث شيق ومغزي واضح ورسائل من النوع السهل الممتنع
كل انسان المفروض يحول المحنة الي منحة ويتعلم من الدرس الضربة اللي متكسرش تقيم
تحياتي
ويجعلو بالبطاطس عاااااااااااااااامر

DR.SHERBO said...

حلوة قوي

بس هو الدرس في الاصرار على النجاح

و لا الصدمة الأولى تدوووووووووووم؟؟

Ma-3lina said...

الحلقات راائعة جدا

بس كان نفسى تنتهى بجوازها و تجيبلها كام عيل كدا

بس برد كويس انها بنت مستقبلها و اثبتت نفسها

قنديل في قلبي said...

المسلسل لذيذ طحن.. عايزينه ينزل رمضان اللي جاي

كراكيب عادل said...

تعرفي ابتديت اتشد انا للمسلسل دة

يخرب عقلك انتي بجد الي كاتبة الكلام دة

واللة تخيلت الشخصيات

بس مقصدار دي موتتني ضحك

ولا الابلة الي سنانها واقعة

ههههههههههههههههههههه

مش هطلب عصير قصب المرة دي هطلب باقي الحلقات وادي نومة في مدونتك مستني

كراكيب عادل said...

اية اية اية

تمت ازي انا كنت مستني اصل عجبني المسلسل

طيب اعملي منة جزء تاني كروتينا انتي بجد ولا زهقتي من كتابتها ؟؟؟

حــلم said...

سمباتيك
جميلة فعلاً..وواقعية جداً
وكمان انتى حبكتيها كويس
يعنى بعد نهاية الحلقة التالتة توقعنا ان زوبة ممكن تبقى دكتورة
:)
بس انت حولتى مسارها لشىء منطقى وممكن
لكن الفكرة الأساسية: ان الحدث الأول غير مسار حياتها فكرة محترمة بجد
لأنها حقيقية
وكتير بيفتقدوا وجود الحدث دة وبتمشى حياتهم من غير ما ياخدوا بالهم
انهم ممكن يغيروا ويتغيروا

انا شايفة انها رغم خسارة العريس الا انها كسبت نفسها
وانت هتكسبى دهب لو عملتيها مسلسل
هتفرقع زى عبد الغفور البرعى وأكتر
:)

sendbad said...

اسلوبك شيق وجميل والمعني واضح ومفهوم وفي انتظار المزيد

khaled said...

جود ورك اند هاف ا نايس ويك اند

صاحب البوابــة said...

الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...

البوست بعنوان

أن تكون أبو الفـتوح شوشة

حملة الإفراج عن شيخ المجـاهدين :

في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...

الروابط :
مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html

مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm

تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1

ملف pdf عن جهاد شيخ المجاهدين المصريين في فلسطين
http://www.fm-m.com/2003/aug2003/pdf/51.pdf

جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
جاري تدعيم الحملة بتقرير جريدة الوفد عن شيخ المجاهدين بتاريخ14/5/2007

Mohamed A. Ghaffar said...

فى المجمل جيده

ولكن من وجه نظرى عندك مشكله يجب معالجتها

كلما تقدمتى فى الحلقات كلما قلت قوتها وعمقها وزادت تقليديتها

فقدت بريدك الألكترونى

امام الجيل said...

كويس ان النهاية مختلفة وغير تقليدية كالعادةطيب خير
محاولة قصصية رائعة وفعلا اكيد ممكن الواحد يتعقد من موقف وياثر عليه فى حياته وفى اختياره بس ده مش صح ولازم الواحد يتعلم من اخطاؤه يا ست زنوبة

Xee said...

من حظي اني جيت متأخر، فرحت ضارب الخمس حلقات كلهم على كيس لب اسمر واحد
اوعى وشك

بجد احييكي
ولاكلام اللي بين السطور اوضح من السطرو نفسها

اسلوبك رائع
تحياتي
زي

طارق إمام said...

على فكرة انتي ممكن تكتبي سيت كوم بشكل هاايل
................................
بلوجك حلو جدا
جدا
جدا

رينـــــــــــا said...

تحفه يا سمباتيك
بس تعرفى
لولا الموقف بتاع عريسها
مكنتش تصر انها تكون مختلفه
وانها تفكر تتعلم
اى نعم السلب قصر اكتر
بس رب ضارة نافعه
تحياتى يا قمر

وجع دماغ said...

تعرفى يا سامبتيك
أحلى حاجة فى شخصية زنوبة أنها واقعية منها وممكن جدا تشوفيها فى كل مكان قى مصر
وده اللى مخلى القصة أحساسها عالى

YHYيــوســف الـمصـرى said...

اعملى جزء تانى وسميه زنوبة فى البرلمان وخليها ترشح نفسها فى مجلس الشعب هتبقى مسخرة هههههه
وصدقينى هتنجح فى الانتخابات
المجلس فيه مشاء الله مائات الزنوبات ههههه
جميلة اوى تسلم الايادى
تحياتى لك ولمدونتك
الا عنوان زنوبة ايه علشان عايز عروسة بس مش طمعان فيها ;)
نيههههههههه

ادم المصري said...

جميييييييييييييييييلة القصة فعلا يا سمباتيك
وسردك فيها رائع جدا
.
.
انا كملتها لاخرها وانا مش باعمل كدا في اي بوست طويل اصلا الا لو كان حلو
.
.
والبوست بتاعك رائع
.
.
تحياتي والسلام
ادم المصري
اول دكتور احه
مدون غير منحاز

سكينة said...

حلو أنها حققت حاجة في حياتها
ثاني مدونة مشرقة أشوفها النهاردة يا مسهل والدنيا تبقى معقولة مش طماعة لدرجة أقول حلوة
:)

كراكيب عادل said...

فية مثل كمان الي اتلسع من التعبان يخاف من جرة الحبل

بس دي يناسب معاها

اعور ضربوة علي عينة قال خربانة خربانة

انا جاي امضي واوقع حضور بس

maged stephen said...

شوفى ياسامباتيك مش عاجبك الكلام اللى أنا بأكتبه ماشى نو بروبريم
بس لازم أشوفك علشان تدفعى الجمعية اللى أنا هأقبضها الشهر اللى جاى

نقطة مية said...

القصة جميلة جدا..احييك على الافكار و تلقائية السرد
الى الامام و في انتظار جديدك

لحظة said...

حلوة اوي

Sharm said...

جميل اللوك الجديد يا كلبوزة

.:.-=- ELGaZaLy-=-.:. said...

جميلة اوى بجد يا سمباتيك

Rosa said...

واااااااو يا سمبتيك
بجد مافيش تعليق
قصه جميله
ومتأكده ان زنوبه هتصبر و تنول في الاخر
قصه بسيطه في مضمونها بس كبيره قوي قوي في معناها و الاشارات الي فيها
حقيقي تسلم افكارك يا سامباتيك
مستنين حلقات جديده مع شخصيه جديده
:)

حقى اهرتل said...

شكرا على الاهتمام بالمدونه

أبو أمل said...

دخلنا فى الدراما يا ستى
اللى اداك يدينا
يا عم

بنى أدم مع وقف التنفيذ said...

اية الواقعية دى كلها ..برافو عليكى

حقى اهرتل said...

يامجرى ريق القلم على ورقه م الدفتر
اوعى لكلام خداع قبل الميعاد يفطر
خليه يكمل صوم لحد سبت النور
لو قش هوه ببنت بالتالته هيبصر

أحمــــــــدبــــــــــلال said...

و الله حلوة
جميل بساطتها و لغتها السلسة

بصراحة لم اتوقع التغير السريع ده فى حياة زنوبة



و مبروك على اللوك الجديد

نفسنا said...

تم أفتتاح العدد الأول من مجلة نفسنا
نتمنى منكم زيارتنا

هنا الجنة said...

والله هتوحشنا زوبة , عشنا معاها شوية كانت طيبة قوى وجدعة والله انها كملت المشوار للآخر , قصة حلوة بجد وكلامها بسيط وسهل زى بطلتها

سلسبيل said...

جميله اوي ياسمباتيك...
بس اما البت زوبه دي طلعت اروبه بجد
بتفكرني بواحدة اعرفها ..اسمها سعيدة...بس هيه لا سعيدة..ولا اروبه..مشكله فعلا هههههههههه
تسلم ايدك

سندباد مصري said...

اول صدمة في حياة الانسان ممكن تغير حياته و تسيطر على الباقى منها. ممكن بالسلب و ممكن بالايجاب بس على كل حال الانسان عمره ما بينسى الم اتعرضله، أو تجربة مرة عدت عليه ، و على راي المثل

(اللي يتلسع من الشوربة ينفخ في الزبادي)



أوك ... موافق

تحياتي

زحل الفلكي said...

قريت القصة كلها على بعضها

على فكره عندك ملكة الكتابة جدا جدا جدا جدا جدا
وعايز اقولك اني قرئ قديم واقولك اني كنت بجري على السطور علشان اقرأ القصة
ورسمت لزوبة شكل في دماغي وشوفها وهي بتخدم في البيوت وشوفتها وهي بتفك وتركب الاسوره

بجد حلوة جدا القصة دي

بس كان نفسنا البت زوبة تتجوز شاب حليوه كده وبيشتغل موظف حكومة قد الدنيا
وتروح تغيظ الواد فانتوم

قاسم أفندي said...

فينك؟
وحشتينا

None said...

حلوة اوي يا سمباتيك

بس ليه الخوف دا كله .. وليه قلة ثقتها في نفسها كدا ... بس تعرفي بقي ان قلة ثقتها في نفسها دي هي اللي خلت الموضوع واقعي جدا ..وخلت النهايه كمان غير نهاية الافلام العربي بتاعت وعاشوا في تبات ونبات وخلفوا صبيان وبنات

احساس ان الست مهما كانت بردو بتحلم بالفستان الابيض والكوشه والعريس ..هو واقعي ..بس ساعات بيبقي سلاح ذو حدين ..ابقي خلي طهقانه تديها دروس عن الجواز وهي هاتشيل الفكرة من دماغها وحياتها هاتبقي اسهل

وحشتيني اوي بجد

تحياتي يا جميل

Mohamed Samir said...

حلوة اوي الحكاية ياسمباتيك
انا اول مرة ازورك ومدونتك لطيفة اوي
تحياتي

MAKSOFA said...

كلبوزة
أنت عملتي لنا مسلسل أطول من المسلسلات المكسيكيه

بس دمك خفيف ياكلبوظتي

سمسم said...

إحنا سقعنا من القعدة انزلي بالجديد
تحياتي
ويجعلوعااااااااااااااااااااااامر

انتظار مؤقت said...

هيه بنت مدام سوزان اتجوزت على كده و لا لسه ..طب وزوبه مش عايزه عريس ..بجد قصه حلوه و اسلوبك جميل اتمنى اشوفك عندي في زياره يا قمر ..تحياتي

أشرف جهاد said...

جميلة جدا
لكنها أثارت مشكلتين , أعطت لأحدهما حلاً , واكتفت في الثانية بالوصف والوصول لقمة العقدة القصصية .
من وجهة نظري الأفضل , ان تبحثي بشكل قصصي عن حل للعقدة القصصية الثانية وهي مشكلة اللي اتلسع من الشوربة ينفخ في الزبادي.

تقبلي تحياتي

jedaah said...

حركات
http://www.7rkat.net

منتدى حركات
http://www.7rkat.net/vb

مركز تحميل حركات
http://www.7rkat.net/up

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام