Tuesday, July 11, 2006

هرونا أعلانات

تفاعلا مع مدونة الزميل من زمااااااان
التي بعنوان احكي يا حكاواتي
------------------------
هرونا إعلانات
و رقص ولاد و بنات
علي الوكسة بيرقصوا
و لا علي الخيبات
---------
عايزنا ناكل جيلاتي بعيش!
و احنا فارشين تحت رسنا الخيش!
هوا احنا لسة خلصنا
من طابور العيش
----------------
يا عم يا إعلاناتي
ارحم جعنا و قوم
إعلن عن الجعان
اللي بيكمل عشاه نوم
-----------
اعلن عن العيش الحجر
اللي يعور سنان الصبايا
و لا الغموس المر
اعلن عن جنون الفراخ
و هبل السمك
و انفلونزا البقر
اعلن عن المطبات في الشوارع
و عن سواقين المكروباص الغجر
اعلن عن الشحاتين
و اللي نايمين في الحفر
اعلن عن الشعب الجعان
اللي عمره ما بالله كفر
---------
يا رب أنت علي المفتري
و أنت رب الغلابة و الليل و القمر
--------
و عجبي

20 comments:

Unknown said...

تحياتى لك ولـ
من زمان
ارجو التواصل

Adel said...

ياستي والله هرونا وطلعوا عين ابونا ويرضو مش هايرحمونا ربنا ينتقم لنا منهم وبجد انت عسل تحياتي ومنتظرك غي زيارة قريبة

كلبوزة لكن سمباتيك said...

يا ماحلي الطلة
أبو أمل
و
من زماااااااان
نورتونا
احلي طقم شاي لاحلي بلوجرية

Adel said...

يا ستي تسلمي بقى انتي عاوزاني اجيب نص دستة عيال لو انت كنت قريتي مدونتي حلو كنت عرفتي ان انا كان مه خمسة وصفيوا ببركات الباشا يوسف والي لتلاته ولله الحمد

هراءات منطقية said...

لا إله الا الله

ماتسيبوهم يترقصوا،الشباب تعبان........تعباااااااااااان

تمر حنه said...

الله الله الله
بس تفتكرى مين يقرا و مين يسمع
عايزين العيال يرقصوا - و ميفكروش
كتر خيرهم و الله بيدوهم مسكنات
لأننا ساعة مانلاقى الدنيا هس هس هندور حوالينا و نسأل ليه و ازاى و امتى - و ده اللى مش مطلوب سيبيهم يرقصونا و يطلعوا عين أبونا
أصله ملك و مرتبه مالك الملك و بكرة هنشوف مين اللى هيرقص.
امواااااااااه

mitar2a3 said...

so cooool

مـحـمـد مـفـيـد said...

ما احنا مش نافعين غير في الاعلانات

شريف محمد said...

عمال أقرا الاغنية وفي دماغي متخيل معاها لحن لأغاني الزنوج ... أو حتى أغنية ل
eminem
ممكن تتلحن وتتصور كليب كمان .. ايه رأيك؟
:)
____
أول خطوة ادخلها لمدونتك بالرجل اليمين ... تدويناتك تلقائية ولغتك سهلة خالية من كولستيرول الكلكعة والتقعر
وبصراحة بقى الاسم بتاعك لذيذ جدا .فعلا سمباتيك
تحياتي .. وابقي فكري في الكليب

karakib said...

و هرونا وعود كمان ... و لا ايه ؟
انتوك

Anonymous said...

فينك
ولا سألتى

كلبوزة لكن سمباتيك said...

عمنا من زمااااان
ربنا يخليهملك و يخليك للبلووجرية
و حسنة قليلة تمنع بلاوي كتيرة
و الشيح علي النار

كلبوزة لكن سمباتيك said...

أياكش تولع
-------
يا نين ون ون
حريقةةةةةة
صحيح الشباب تعباااان
و الواد قبة لا مؤخذة بيوجعه
نورتنا يا فندم

كلبوزة لكن سمباتيك said...

تمر حنة الغالية
يا أختي و الله انا بفرح بدخلتك عليا جدا
الا قوليلي ما ينفعش أروح أعملي فيديون كليب بالبراشوت مقاس اكس لارج و الملي قرشين لزوم المصيف و بعد كده اتوب و كده
بلا وكسة مش حينفع أنحرف علي كبر
عواف عليكي يعافيكي يا اختشي
انبي يا اختي ممكن مشبكين انشر الباراشوت
ههههههههههه

كلبوزة لكن سمباتيك said...

metar2a3
ثانكس الوت

كلبوزة لكن سمباتيك said...

محمد مفيد
لا و الله يا فندم فالحين في حاجات تانية كمان
بس ربنا ستار حليم
شرفتنا

كلبوزة لكن سمباتيك said...

451 فهرنهايت
تفتكر ممك اعمل فيديون كليب و اتشهر و ابقي اول مطربة ضبل اكسلارج
و الله فكرة
هيا جت عليا انا يعني
يا فندم نورتنا
و اول شريط (حعبيه) حبعتلك منه مغرفه
اقصد نسخة
خالص تحياتي

غادة الكاميليا said...

يابنتي الشباب عايز حد يدلعه

كلبوزة لكن سمباتيك said...

غادة الكاميليا
الشباب عايز حاجات كتير قوي يا غادة عايز حد يعلمه و حد يثقفه و حد يريضه وحد يشغله و حد يجوزه و حد يسكنه و حد يعلم ولاده و يدخلهم نوادي و بلاوي متلتله
بس حكومتنا الرشيدة (الرشيدة دي مش شتيمة) شايفة انها تدلعه الاول و بعدين نفكر في الحاجات التانية
نورتينا يا جميلة

mostafashaban said...


ما هى التسربات هى اى تسريب ياتى من المياه قد يكون فى الخزانات مع الاسطح قد يكون فى المناور مع المواسير وشبكات الصرف الصحى قد يكون فى الحمامات والمطابخ مع الصرف الخاص بهم ولان عمليه التسرب عمليه خطيره جدا قد تؤدى بحياه الافراد الى الضياع فيجب ان تهتم بكل ما يلزم من اجل تحقيق الكشف عن التسرب بشكل دقيق وامن وغير مكلف فالبعض يؤدى عمليه التسرب بعد التكسير ولكننا نقوم بالكشف عن التسربات بشكل دقيق عن طريق احدث الاجهزه التى تقيس درجه التسرب بشكل كبير وهذا من اجل الاطمئنان على صحتك وصحة اسرتك فيجب ان تقوم انت بطلب كشف دورى على التسربات ونحن تحت امرك كل هذا واكثر نقدمه لكم نحن شركة كشف تسربات المياه بالقطيف فالتسريب من خطورته قد يؤدى الى انهيار المبانى والخرسانات المسلحه وقد يخلط المياه الصالحه للشرب بمياه المجارى والصرف الصحى وقد يعرض الحوائط والتشققات فى الدهانات عزيزى العميل نحن شركة كشف تسربات بالقطيف نقوم بكافة اعمال الكشف عن التسربات على ايدى افضل عماله ماهره جدا من اجل تحقيق الراحه والامان لك عزيزى العميل وكل هذا باقل التكاليف واعلى جوده لن تجدها الا لدينا كل ما عليك هو الاتصال بنا نحن شركة كشف تسربات بالقطيف وستجد ما يسرك من تحقيق لاهدافك المرغوبه دون اى تعب او مجهود او تكاليف باهظه .
لمزيد من خدماتنا
شركة كشف تسرب المياه بالجبيل
للتواصل
0537772829
او زيارة موقعنا
https://forsan-dmm.com/