Saturday, May 12, 2007

الحلقة الثالثة



و من اول لحظة قرأت زوبة في عنين ام حامد-رغم انها مبتعرفش تقرا- طمعها في الدهب و في القرشين اللي هي مدكناهم للزمن
و بان ده لما ام حامد طلبت من زوبة انها تبيع الغوايش و تدفع عربون اوضة النوم، و طلبت منها اكتر من مرة فلوس علشان تبيض الشقة و تصلح النملية و تركب طقم حمام جديد.صحيح دي من واجبات العريس بس طبعا علشان ابنها فلتة و محصلش فلازم العروسة تتعب و تشقى علشان تنال شرف الجواز منه و لما رفضت زوبة بدات ام حامد تكيل لها من المنقي كلام زي السم و بقت كل يوم تروح شغلها معيطة.0
و مفيش شهرين و كانت زوبة فاسخة الخطوبة و لما بنات الحتة سألوها: ليه؟؟؟0
قالت: دول داخلين على طمع يا امه ، بقى انا اشقى و اتعب، و هم يجوا يخدوها على الجاهز؟؟!! ميحكمشي
و هكذا.. ثلاث مرات تتخطب زنوبة و تفسخ الخطوبة لاسباب مختلفة:0
مرة بسبب اللي طمعانين في الدهب و مرة علشان العريس عايزها تخدم في البيوت و تساعد في مصروف البيت و هي عايزة تتستت و مرة علشان ام العريس عايزاها تسيب خدمة البيوت و تخدمها هي

و اتحولت بسمة زنوبة العريضة اللي بتبين سنانها و اغلب ضروسها لتكشيرة حزينة

و في يوم و هي عند (مدام سحر) بتنضف لها الشقة سرحت في اللي حصلها و قالت بتنهيده: يا ميلة بختي
سمعتها مدام سحر و قالتلها: مالك يا زوبة !!!ما انت اللي مميلة باختك بايدك يا بنتي.
زوبة: انا يا مدام؟ ده انا مخلتش في وسعي بد.. و عملت كل اللي عليا
سحر: ازاي بقى انت سايبة نفسك لعبة في ايدين العرسان، و معندكيش اي سلاح يحميكي من تقلبات الزمن
زوبة: فتحت عنيها جامد و فتحت بقها: ازاي
سحر: ليه متكمليش تعليمك و تشتغلي في اي مصنع و يبقى ليكي تامين اجتماعي و علاج و معاش بدل خدمة البيوت دي، صحيح انا حخسرك ..بس انت غلبانة و العمر حيجري بيكي و لما تعجزي مش حتقدري تخدمي و ساعتها حتاكلي ازاي؟

الكلام رن في ودان زوبة و اثر فيها و شالها من دايرة العرسان اللي كانت غطسانة فيها لدايرة اوسع و حلم اكبر و اعمق، انها بدل ما نفسها تتجوز من واحد متعلم ليه متبقاش هي متعلمة تقدر تتوظف و تبقى محترمة
و فضل الكلام يلف و يدور في مخها لحد ما راحت للست سحر الاسبوع اللي بعده و سالتها: قوليلي يا ست سحر هو انا اقدر اتعلم و اروح المدرسة و انا كبيرة كده؟
سحر: لا مينفعش تروحي المدرسة بس ممكن تقدمي في فصول محو الأمية و كمان تروحي بعد الضهر يعني مش حيأثر على شغلك و واحدة واحدة تاخدي الابتدائية
زنوبة: بابتسامتها العريضة: صحيح و النبي يا ست؟
سحر: ايوة يا بنتي و علشان تصدقي انا حاخدك بكرة العصر و نروح مركز السلام اللي فيه الجامع و المستوصف و فصول محو الأمية و تعليم الخياطة و حقدملك بنفسي.. مبسوطة يا ستي؟
زنوبة: بمنتهى الفرح: ربنا يخليكي يا مدام مبسوطة طبعا

و بكده خرجت زوبة من حزنها على ضياع اهدافها الصغيرة لفرحها باولى خطواتها في تحقيق اهدافها الكبيرة.0
الى اللقاء في الحلقة القادمة
سمباتيك

32 comments:

david santos said...

I offer to my friend Esmeralda


MOTHER OF THE WORLD

Egypt , gather your children
Even the most unwelcome
And show them the facts

All of them are dear then
But for the most fearsome
It will undo their evil acts

BaTresYa said...

الحلقات بتحلو ..والله يا بت يا زوبة وهتاخدي الابيدائيه... متابعين اهه

Rosa said...

وااااااو
جميله اوي يا سامباتيك
ماتتأخريش علينا بليز بالحلقات الجاية

sherehan84 said...

يا كلبوزه ايه ده؟ الأجزاء صغيره جدا ..فكيها علينا شويه ..شخشخي جيوبك..
اعتبري انك عازمانا على أكل معقوله الحبه دول هيكفونا؟

سندباد said...

انا شايف ان الفضول هايقتل كل المتابعين انتي عاملة زي المسلسلات العربية اللي من 40 حلقة بس برضه متابعين معاكي للاخر
تحياتي وشكرا لزيارتك الفكرة

.:.-=- ELGaZaLy-=-.:. said...

حلو اوى يا سمباتيك بس الحلقات قصيرة ,,,

بس جميلة اوى تحياتى

محمد العدوي said...
This comment has been removed by the author.
محمد العدوي said...

هو الأخ اللي فوق دا يقرب لزنوبة ايه ..

طمعان في حتتين السيغة ( الصيغة )هو كمان ..


والله من حسنات الزمن انه يحدفني هنا ..

ونورتك أكيد .

الســـاحر said...

انتى طريقتك فى الكتابه خفيفه ولذيذه جدا
وموقعك هايل جدا
وفى النهايه سلامى وربنا يوفقك
واتمنى تشرفينى بالزياره

عدى النهار said...

تصدقى إن فى تعليقى على الحلقة الثانية كنت عاوز أسألك عن موقف زوبة ممن حولها (المجموعة الأخرى فى حياتها أو من تخدم عندهم) وموقفهم نحوها. أحداث المسلسل بتتطور بصورة منطقية سلسة

واحد من الناس said...

انت ناويه تبدأي من محو الأميه
امال هتوصلي للجامعه امتى
واوعي تكوني ناويه على الدكتوره
عالعمو ياخبر النهارده بفلوس
ومستني الباقي لى احر من الجمر

soreal said...

i like the last twist

hope in a grim world :)

كراكيب عادل said...

دخلنا علي الجد

ربنا يخلي الست سحر

علي فكرة انا خدتني نومة في مدونتك المرة الي فاتت وانا منتظر عصير القصب

هشتري من المحل الي علي الناصية

... said...

متابعة يا سمباتيك

بصمت

مبروك اللوك الجديد
الراجل كاز دة جميل فعلاً

:)

صاحب البوابــة said...

حلقة جميلة

اسجل متابعتي

تحياتي

Anonymous said...

أولا دى زيارتى اولالى للبلوج اللذيذ او ده شكرا انك عرفتينى عليه البوست جنان وفكرته حلوه اوى اوى انا قريت الثلاثه حلقات من اولا فكره جميله واسلوبك شيق ان شاء الله متابع وتحياتى يا فندم

Shower-Mirror said...

الف شكر يا كلبظ على تسريب النتيجه ليا

و هارد لاك المره دى
شوفتى ربنا ...عشان ماكنتيش عايزه تدينى حته من الجايزه

هههههههههههههه

خليكى جدعه بقى و خلى عندك روح رياضيه بالتقليه ..و روحى ارقعيلى ميت صوت فى المرحله الثانيه ،،، الصوت بيفرق ...

....

هههههههههههههههههه

اروح بقى اكمل المسلسل بتاعك و هابقى اعلق بعد الجزء الاخير

******************
سلامتها ام على

محمد عبد الغفار said...

ان ان ااااان

دخلنا بوابة الأحلام

Shower-Mirror said...

" انها بدل ما نفسها تتجوز من واحد متعلم ليه متبقاش هي متعلمة تقدر تتوظف و تبقى محترمة "

عجبتنى اوى الجمله دى ... هى دى الماين كونفرت بتاع الاحداث ..

ده انتى طلعتى سيناريوهجيه كبيره بقى ... اممم انا مستنى باقى الحلقات على نار الفرن ..و فى هذه الاثناء انا بجهز قصه جديده برضه ... يعنى المسابقه الجايه هاتلاقينى فى وشك ياقمر

تحياتى ...و بجد كتابتك تحفه ... و بالذات الكلام المصرى الاصيل و حوارات البسطاء اللى بتأكد انى نظرتى فيكى صح ...انتى بنت بلد جدعه بجد

بايبايات (جمع باى باى )

هههههههههه

سجدة said...

بجد اسلوبك تحفة
وفعلا القصة ممتازة
والمفروض اى واحد لا تحصر نفسها فى قيمة الزواج وبس
اه حلم بنت انها تتزوج
لكن إن كان الحلم لا يتحقق فيجب ان تحقق اهداف أخرى
ولتكن هى نفسها قيمة فى الحياة بذاتها وليس بزواجها فقط

karakib said...

أيه الجامد ده :)الحلقات دي دمها خفيف

Reemo said...

اولا مبروك على الستايل الجديد يا قمر
ثانيا القصه بدات تشدنى جدا
كبرى الجزء شويه يا سمباتيك
مستنيه الباقى
تحياتى

قاسم أفندي said...

بتحلو اهي
بس عايزين شوية اكشن بقي
مبروك النيو لوك

bastokka طهقانة said...

و هم اللي اتعلموا عملوا اية؟؟
بلا وكسة

خليكي جاهلة يا زوبة
العلام بيدودي ورا الشمس

ها فاضية سبت و اربع؟

اوروفوار

يا مراكبي said...

الموضوع كده دخل في سكة تانية خالص غير اللي كنت متوقعها ..

صحيح .. نسيت أبارك لك على النيولوك بتاع المدونة .. عقبالي لما أزرع شعر

خمسة فضفضة said...

السلام عليكم ورحمة الله وبركاته

اولا مبروووووووووووووووك علي النيو لوك
تحفه
والصوره كمان روعه، ايوه كده هي
ي السمبتكه ( من سمباتيك ) ولا بلاش ..هههههه

القصه جميله اوي وشدتني جدا ، وكويس اني لما جيت لقيتك منزله تلات حلقات لان الحلقه قصيره اوي ما بيلحقش الواحد يدخل في لموود يلاقيها خلصت ، ياريت تطوليها شويه وهانكلم المنتج يبحبح ايد معاكي ما تقلقيش ..هههههه

بس مش عارفه الحلقه التالته دي بدأت تاخد طريق تاني خالص ، فكرتني بتمثيليه قديمه اسمها نونا الشعنونه بتاع حنان ترك

عموما الاسلوب رائع
ووصفك للشخصيات دقيق خلانا نشوفها قدام عنينا
في انتظار البقية


تحياتشي

تحياتي

BaTresYa said...

مبروووك التصميم الجديد يجنن بجد وسمبل كدا ورقيق ..مبروك عليكي يا قمر

سكينة said...

أي نعم أنا مؤيدة للحراك الاجتماعي والتعليم أحد أعمدته لكن يا ريت الست سحر تاخد بالها أنها تديها الحد الضروري منه يعني بلاش حكاية الدراسات العليا والشهادات دي وبعد كده تركز معاها في التوجيه المهني الخياطة صنعة ستات بيوت بجد
وبكده تضرب عصفورين بحجر تستت وتأمن مستقبلها

نقطة مية said...

التطور في الحلقات سريع و الحلقة دي جميلة و الله فرحت لزوبة ..الحلقة الجاية امتى؟؟

رينـــــــــــا said...

اولا مبروك النيولوك يا كلبوزة
بجد تحفه وشيك اوى اوى

ثانيا هو انتى لازم يعنى تشوقينا؟؟
حاولى تكبرى الحلقات شويه
ديل؟؟

انتظار مؤقت said...

شوفي انا اول مره ادخل عندك البلوج تحفه و جميل و كلامك كمان جميل جدا بس الي لفت نظري هوه ما شاء الله كم الاصدقاء بتوعك ربنا يزيدك و يباركلك مش حسد و الله ماشاءالله ربنا يزيدك تحياتي

أجزاخانجيه said...

ههههههههههههههههههههههههههههههههههيع
قصه حيلوه ومن صميم الشارع
بس انا حاولت اعمل البوقين دول واخلى واحده بنت بواب تكمل تعليمها لول
بس يابنتى الكلام ده فى الافلام بس
وطبعاً جيه نأبى على شونه

انتى قصدك السلام اللى فى الهرم
دا احنا جوران بقى انا هرم باردو